“Mi No Ta Interesá”
1 Den algun área, esei ta un reakshon komun riba nos mensahe. Kiko por yuda nos evitá di bira desanimá ora nos ta konfrontá falta di interes den nos teritorio? Kon nos lo por stimulá e hendenan su interes den e bon nobo?
2 Mantené Goso: Un kos ku por yuda nos mantené nos goso ta di kòrda dikon hopi hende no ta interesá. Hende ku a siña e teoria di evolushon òf ku a lanta den un komunidat ateista, kisas no a yega di konsiderá e balor di Beibel. Tin hende kisas ta desilushoná pa e hipokresia ku nan a opservá den religion. Pa otronan, nan falta di interes ta un refleho di e frustrashon i desesperashon ku nan ta sinti. (Efe. 2:12) Tin hende ku ‘no ta hasi kaso’ pasobra nan ta kargá ku e preokupashonnan di bida.—Mat. 24:37-39, NW.
3 Apesar di e reakshon negativo di algun hende, nos por tin goso den e ministerio ya ku nos sa ku nos esfuersonan ta glorifiká Yehova. (1 Ped. 4:11) Ademas, papiando tokante e bèrdat, asta ku hende ku ainda no ta apresi’é, ta fortalesé nos propio fe. Laga nos purba mira e hendenan den teritorio manera Yehova ta mira nan. El a sinti duele di e hendenan di Nínive ‘ku no tabata sa e diferensia entre nan man drechi i man robes.’ (Jon. 4:11) E hendenan ku ta biba den nos teritorio tin mester di e bon nobo! Pues, nos no mester entregá sino mas bien nos mester buska maneranan pa stimulá nan interes den e mensahe di Beibel.
4 Papia di Preokupashonnan Lokal: Lo bo por menshoná un asuntu di preokupashon lokal den bo introdukshon i pidi e doño di kas pa ekspresá su punto di bista. Skucha segun ku e ta papia, anto kaba mustr’é e mensahe di konsuelo ku Beibel ta duna relashoná ku su preokupashon. Despues ku un tragedia lokal a tuma lugá, un Testigu a ekspresá su duele sinsero na kada kas ku el a bishitá. El a konta: “Diripiente, ata e hendenan kier a papia. Mi tabatin hopi kòmbersashon ekselente e dia ei pasobra mi a mustra interes den nan bida.”
5 E Reino di Dios lo resolvé delaster un problema ku ta konfrontá humanidat. Purba saka afó ta kua ta e problema ku mas ta preokupá e doño di kas. Lo e por permití bo splika e mensahe di speransa ku Beibel ta duna. Si esei no sosodé, kisas lo e ta dispuesto pa skucha “na un otro okashon.”—Echo. 17:32, NW.