Hasi Bon Uso di Beibel
1 Sin importá ki literatura nos tin intenshon di ofresé den sirbishi, ta bon pa nos skohe un teksto di Beibel ku ta stimulá pensamentu pa kompartí ku e hendenan ku ke skucha. (Heb. 4:12) Si bo skohe un teksto ku ta aparesé den e publikashon ku bo ta ofresé, esaki por sirbi komo un brùg pa hiba na e publikashon. Den algun área, publikadónan a ripará ku ta bon pa kana ku nan Beibel den man ora nan ta aserká un persona òf ora nan ta bai di kas pa kas.
2 Kuminsá ku un Teksto di Beibel: Algun publikadó ta kuminsá nan presentashon dor di puntra e doño di kas kiko e ta opiná di e teksto di Beibel ku nan ta bai lesa. Di e manera ei nan ta dirigí e persona su atenshon mesora na e Palabra di Dios. Algun di e siguiente introdukshonnan aki lo por ta efektivo den bo teritorio?
◼ “Si abo tabatin poder, lo bo a trese e kambionan aki?” Lesa Revelashon 21:4.
◼ “Dikon e tempu ku nos ta biba aden ta asina trabahoso?” Lesa 2 Timoteo 3:1-5.
◼ “Bo ta kere ku nos komunidat lo tabata mihó si tur hende ta sigui e konseho aki?” Lesa Mateo 7:12.
◼ “Bo ta kere ku bo yunan lo por disfrutá di e kondishonnan aki ku Beibel ta deskribí?” Lesa Salmo 37:10 i 11.
◼ “Bo ta kere ku un dia e palabranan aki lo bira realidat?” Lesa Isaias 33:24.
◼ “Bo sa di e kambio di gobernashon ku Beibel ta papia di dje aki?” Lesa Daniel 2:44.
◼ “Bo tabatin deseo di hasi Dios e pregunta aki?” Lesa Jòb 21:7.
◼ “Nos lo por mira nos sernan kerí ku a muri, atrobe?” Lesa Juan 5:28 i 29.
◼ “E mortonan sa kiko e bibunan ta hasiendo?” Lesa Eklesiastés 9:5.
3 Splika, Ilustrá i Apliká: Ora un persona ta dispuesto pa kòmbersá, no pasa lihé-lihé dor di bo presentashon. Tuma tempu pa splika, ilustrá i apliká e teksto ku bo a lesa pa e persona por komprond’é. (Neh. 8:8) Ora hende komprondé i aseptá loke e Palabra di Dios ta siña, esei por hasi kambionan maravioso den nan bida.—1 Tes. 2:13.
4 Sigui hasi bon uso di Beibel segun ku bo ta kultivá interes di hende. Bo por usa e mesun método aki ora di hasi rebishita: (1) Skohe un teksto apropiá. (2) Hasi un pregunta simpel pa sa kiko e doño di kas ta opiná di e teksto. Kaba les’é. (3) Splika, ilustrá i aplik’é. Hasi esfuerso pa kada bes ku bo bishitá e persona, e haña mas konosementu di e Palabra di Dios. Podisé lo no dura mashá ku lo bo ta kondusiendo un studio di Beibel!
[Study Questions]
1. Kiko lo bo por hasi ora bo ta prepará pa sirbishi di vèlt?
2. (a) Kon nos por kuminsá nos presentashon ku un teksto di Beibel? (b) Kua temanan bíbliko ta interesá hende den e teritorio?
3. Kon nos por yuda hende komprondé e tekstonan di Beibel ku nos a lesa?
4. Kon nos por hasi bon uso di Beibel ora di hasi rebishita?