Kultivá Interes Mediante un Ruta di Revista
1 Hopi hende ku nos ta topa den e ministerio ta risibí nos bishita i aseptá nos literatura gustosamente, pero nan ta vasilá pa aseptá un estudio di Beibel regular. Un manera pa kultivá nan interes ta mediante un ruta di revista. Ora bo laga revista ku un hende, skirbi su nòmber i adrès, e dia ku bo a bishit’é, kua revista el a tuma i e teksto ku bo a konsiderá i anotá tambe kualke kos ku bo a ripará ku a interes’é. Na momentu ku revista nobo yega, buska puntonan ku lo atra’é esnan ku ta riba bo ruta di revista; i ora bo bishitá nan, mustra nan e puntonan aki. (1 Kor. 9:19-23) Ku tempu, kisas nan lo lesa algu den nos revistanan ku ta lanta nan interes i duna nan e deseo pa siña mas.
2 Pero nos ta rekonosé ku mayoria hende lo no bira un sirbidó di Yehova djis dor di lesa e revistanan so. Siendo ku ta urgente pa hende buska Yehova awor, kiko mas nos lo por hasi pa yuda nan? (Sof. 2:2, 3; Rev. 14:6, 7) Nos por kultivá nan interes dor di kompartí un teksto bíbliko ku nos a skohe kuidadosamente kada bes ku nos hiba e revistanan pa nan.
3 Presentashonnan Basá Riba Un Solo Teksto: Pensa riba e hendenan ku bo tin riba bo ruta di revista, i prepará un seri di presentashon basá riba un solo teksto pa e nesesidat spesífiko di kada un di nan. (Fil. 2:4) Por ehèmpel, si un hende a pèrdè un ser kerí resientemente, lo bo por hasi vários bishita pa konsiderá loke Beibel ta bisa tokante e kondishon di e mortonan i e speransa di resurekshon. Lo bo por usa informashon for di e buki Rasonamentu bou di e tema prinsipal “Morto” i “Resurekshon” pa prepará e presentashonnan basá riba un solo teksto di Beibel. Outomátikamente kaminda lo por habri pa kòmbersashonnan adishonal riba tópikonan ku ta relashoná ku esei, manera por ehèmpel kon malesa, behes i morto lo wòrdu eliminá kompletamente. E meta ta pa haña un tema ku ta interesá e persona i mustr’é progresivamente kiko Beibel ta bisa tokante esei.
4 Yuda Nan Komprondé: Maske ku normalmente ta mihó pa tene e kòmbersashonnan ei simpel i breve, mas ta nesesario ku djis lesa e teksto ku bo a skohe. Satanas a siega mente di hende pa e bon nobo. (2 Kor. 4:3, 4) Asta hende ku ta bisa ku nan konosé nan Beibel mester di yudansa pa komprond’é. (Echo. 8:30, 31) P’esei, tuma tempu pa splika e teksto i aplik’é, manera lo bo hasi ora bo ta duna un parti den e Skol di Ministerio Teokrátiko. (Echo. 17:3) Sòru pa e persona mira e balor práktiko ku e Palabra di Dios por tin den su propio bida.
5 Si un persona ta gusta loke e ta siña, gradualmente lo bo por kuminsá usa dos òf tres teksto den bo presentashon kada biaha ku bo bishit’é. Buska un chèns pa introdusí e foyeto Rekerí òf e buki Conocimentu. Di e manera aki, un persona riba nos ruta di revista ku tempu lo por bira un studiante di Beibel.
[Study Questions]
1. Kon nos por kultivá interes mediante un ruta di revista?
2. Dikon ta urgente pa hende buska Yehova awor, i kiko mas nos lo por hasi pa yuda nan?
3. (a) Kon nos por prepará un seri di presentashon basá riba un solo teksto? (b) Kua ta e tópikonan ku mas ta interesá e hendenan den bo teritorio?
4. Dikon ta importante pa yuda hende komprondé e tekstonan, i kon nos por hasi esei?
5. Kon un persona riba nos ruta di revista lo por bira un studiante di Beibel?