Programa Nobo pa Asamblea di Sirkuito

Yehova ta meresé pa nos dun’é gloria. Kon nos ta glorifiká Yehova? Ki reto algun ruman ta konfrontá relashoná ku esaki? Ki bendishon hende ku ta glorifiká Dios ta risibí awe? E programa di asamblea di sirkuito pa e aña di sirbishi 2008 lo duna kontesta satisfaktorio riba e preguntanan ei. E tema di e asamblea ta: ‘Hasi Tur Kos pa e Gloria di Dios.’ (1 Kor. 10:31) Ban konsiderá loke ta spera nos durante e binidero dos dianan di instrukshon spiritual abundante.

E superintendente di distrito lo trata e temanan “Pakiko Duna Gloria na Dios?” i “Sea Ehemplar den Kumpli ku e Rekisitonan di Dios.” Ademas, lo e duna e diskurso públiko “Ken Ta e Hendenan Ku Ta Glorifiká Dios?” i e diskurso di klousura “Glorifiká Dios Unidamente Rònt Mundu.” Lo e kondusí tambe e Skol di Ministerio Teokrátiko. E superintendente di sirkuito lo trata e temanan “Haña Goso den Reflehá e Gloria di Dios,” “Dunando Atenshon n’e Nesesidatnan di Sirkuito,” i “Keda Firmemente ‘Establesí den e Bèrdat,’” basá riba 2 Pedro 1:12. Ademas nos lo siña kon “E Sirbishi di Pionero Ta Glorifiká Dios.” Lo tin dos simposio ku lo stimulá nos pa pensa seriamente. E promé tin e tema “Glorifiká Dios den Tur Aspekto di Nos Bida,” i lo e analisá e nifikashon profundo di e palabranan inspirá di 1 Korintionan 10:31. E otro simposio “Rindi Sirbishi Sagrado pa Alabá Yehova” lo trata vários faseta di nos adorashon. Djadumingu nos lo tin un resúmen di E Toren di Vigilansia i konsiderashon di e teksto di dia. Lo tin tambe oportunidat pa batisá.

Mayor parti di humanidat ta nenga di rekonosé Dios. Hopi di nan ta demasiado okupá ku aktividatnan humano pa nan para ketu i pensa riba e grandesa di Yehova. (Juan 5:44) Pero nos sí ta konvensí ku ta masha importante pa nos tuma tempu pa pensa kon nos por ‘Hasi Tur Kos pa e Gloria di Dios.’ Plania bo asuntunan pa bo ta presente i pa bo benefisiá plenamente di tur kuater seshon.