Hasi Bon Uso di Bo Tempu den Sirbishi
1 Sin duda, ainda nos tin hopi di hasi den nos ministerio, i e tempu ku a resta ta kòrtiku. (Juan 4:35; 1 Kor. 7:29) Si nos ta bon organisá i ta plania di antemano, nos lo por hasi bon uso di e tempu ku nos a apartá pa sirbishi.
2 Sea Prepará: Promé ku bo bai reuní pa sirbishi di vèlt, hasi sigur ku bo tin sufisiente literatura i ku bo a prepará bo presentashon. Despues di orashon bai mesora den sirbishi. Di e manera ei abo i esnan ku ta traha huntu ku bo lo por logra mas tantu posibel durante e tempu disponibel pa sirbishi di vèlt.
3 Si ta abo ta esun asigná pa dirigí e reunion di sirbishi di vèlt, kuminsá na ora. Tene e reunion kòrtiku, esta, no mas ku 10 pa 15 minüt. Promé ku bo laga e rumannan bai, hasi sigur ku kada un di nan sa na unda nan tin ku bai traha i ku ken.
4 Den Sirbishi: Asina ku e reunion di sirbishi di vèlt kaba, bai den teritorio mesora i no tarda innesesariamente. Si bo sa di antemano ku bo tin ku sali trempan for di teritorio, kisas bo por perkurá pa bo mes transpòrt ya e restu di e grupo no tin nodi stòp trempan. Ora bo ta traha den un grupo, tene konsiderashon ku e otro rumannan ku podisé ta warda bo kaba di papia. Esei kisas ta enserá usa takto pa terminá un kòmbersashon ku un hende ku ta diskutí, òf hasi areglo pa rebishitá esnan ku ta interesá.—Mat. 10:11.
5 Ora di hasi rebishita, bo por evitá di kore bai bin innesesariamente dor di hasi tur e rebishitanan den un área promé ku bo bai un otro área. Kisas lo bo por yama un hende ku bo tin pensá di rebishitá na telefòn pa hasi sigur ku e ta na kas. (Pro. 21:5, NW) Si bo ta pensa ku e bishita lo bai dura largu, por hasi areglo pa e otro rumannan den e grupo prediká ei banda mes òf hasi un otro rebishita.
6 Nos ta bibando den e tempu di un gran kosecha spiritual. (Mat. 9:37, 38) Pronto e trabou lo kaba. P’e motibu ei, nos lo kier hasi bon uso di nos tempu ora nos ta den sirbishi.