Khala nu Gikhesa Gifua Zadoke

1-2. Zadoke wakhalele nanyi? (1 Gudilanduluila 12:22, 26-28)

TANGIZA luholo mala gubalega 340 000 adibungishile ha gubuisa Davidi fumu wa gu Isalele. Mala ene akalegele masugu thathu mu maseso akhalele mu tumilundu tudi hehi nu Hebrone, akhalele nu gusuanguluga nu guta maga nu guyimba ngimbo ha gutumbuisa Yehowa. (1 Gudi. 12:39) Muvuala mumoshi jina dienji Zadoke wakhalele mukatshi dia athu ene, uvi athu avula akhalelego mujiya egi udi mukatshi diawo. Uvi Yehowa wamumonele, watshiginyile egi esue nji tujiye egi Zadoke wakhalele hene. (Tanga 1 Gudilanduluila 12:22, 26-28.) Zadoke muene wakhalele nanyi?

² Zadoke wakhalele nganga-nzambi, watshitshile mudimo hamoshi nu Nganga-nzambi Wakoma Abiatare. Nzambi wamuhanale nji ndunge jiavula nu gutema ha gukotelesa gutshigina guenji. (2 Sam. 15:27) Gula athu adi nu funu ya ukuateshi akhalele muya gudi Zadoke ha guheta malongo abonga. Wakhalele nji nu gikhesa giavula. Mu longo edi tuza muzuelela muavula gikhesa gienji.

3. a) Mukunda natshi akombeledi a Yehowa adi naye gukhala nu gikhesa? b) Itshi tuza muzuelela mu longo edi?

³ Mu masugu awa a gisugishilo, Satana wana tshita yagasue ha gubolesa ufuta wetu nu Yehowa. (1 Phet. 5:8) Hene tudi naye gukhala nu gikhesa, ha tudi munengenena egi Yehowa ashiye Satana nu ulondegi wenji. (Ngi. 31:24) Tutadilenu maluholo thathu tuajiya gumonesa gikhesa gifua Zadoke.

HANA MAGO HA GUKUATESA MIDIMO YA UFUMU

4. Mukunda natshi akombeledi a Yehowa adi naye gumonesa gikhesa ha gukuatesa midimo ya Ufumu? (Tala nji gifuanesa.)

⁴ Luholo tudi akombeledi a Yehowa, tuana tshita yagasue ha gukuatesa midimo ya Ufumu wa Nzambi, uvi matangua avula yana toga gumonesa gikhesa ha guyitshita. Mu luholo lutshi? (Mat. 6:33) Ha gufezegesa, yana toga gumonesa gikhesa ha gutshita ndaga mu gudivua nu mikhuala ya Yehowa nu gulongesa lukuma luabonga ha mavu awa abola. (1 Tes. 2:2) Yana toga nji gumonesa gikhesa ha gutuna gudinginyisa mu ndaga jia politike jidi mukhaphumuna athu a ha mavu. (Yone 18:36) Akombeledi a Yehowa avula adi mutagana nu lamba dia mbongo, ako ana betewa nga gumbiwa mu bologo handaga ana tuna gudinginyisa mu ndaga jia politike nga gutshita mudimo wa gisuta.

5. Mukunda natshi yakhalele mutoga egi Zadoke akhale nu gikhesa ha gukuatesa Davidi?

⁵ Zadoke gayilego gu Hebrone phamba mukunda nu gusuanguluga luholo Davidi wabuile fumu. Uvi wazanguile iluilo yenji nu wakhalele yagudilonda ha gulua gula yatoga egi alue. (1 Gudi. 12:38) Wakhalele hehi ha guya nu Davidi gu ita ha guluisa mbalagaji jia enya Isalele. Yajiya gukhala egi Zadoke gakhalelego diago mujiya gulua ita, uvi wazanguile iluilo yenji handaga wakhalele nu gikhesa giavula.

6. Luholo lutshi Davidi wahanele gifezegeselo giabonga gudi Zadoke mu ndaga yatadila gikhesa? (Ngimbo 138:3)

⁶ Itshi yakuatesele nganga-nzambi Zadoke ha gukhala nu gikhesa? Wakhalele mukhala nu athu akhalele nu ngolo nu gikhesa giavula. Idi yadiago egi walanduile gifezegeselo giawo. Ha gufezegesa, luholo Davidi wakhalele nu gikhesa nu wakhalele suta dia ngolo, enya Isalele agasue akhalele mutshigina gumubuisa fumu wawo. (1 Gudi. 11:1, 2) Davidi wakhalele mushila Yehowa mutshima egi mbawumukuatesa ha gubinga mbalagaji jienji. (Ngi. 28:7; Tanga Ngimbo 138:3.) Yoyada nu mun’enji Benaya munu wakhalele suta dienji nu manene 22 a iphuta akhalele gu khanda ya Davidi, akuatesele nji Zadoke ha gukhala nu gikhesa. (1 Gudi. 11:22-25; 12:26-28) Mala ene agasue azudile desizio dia gubuisa Davidi fumu wawo nu ha gumubamba.

7. a) Ifezegeselo itshi ya aphangi a mu masugu etu yajiya gutukuatesa ha gukhala nu gikhesa? b) Gifegeselo gia phangi Nsilu tuamonyi mu video gidi gugulongesa itshi?

⁷ Tuana heta nji ngolo nu gikhesa gula tudi mutangigiza ifezegeselo ya aphangi amonesele gikhesa ha gusala yagujinginyina gudi Yehowa nu gu Ufumu wenji. Tangua Yesu Klisto wakhalele ha mavu, watunyine diago gudinginyisa mu ndaga jia politike jia ulondegi wa Satana. (Mat. 4:8-11; Yone 6:14, 15) Walanduile gushila Yehowa mutshima ha gumuhana ngolo. Mangino nji tudi nu ifezegeselo yavula ya mavuala ana tuna gutshita mudimo wa gisuta nu gudinginyisa mu ndaga jia politike. Wajiya gutanga ba eksperianse awo mu jw.org.a

KUATESA APHANGI’AYE AKLISTO

8. Mu tangua ditshi yajiya gutoga egi akulu amonese gikhesa ha gukuatesa aphangi?

⁸ Akombeledi a Yehowa ana gudikuatesa. (2 Kol. 8:4) Uvi matangua ako yana toga gukhala nu gikhesa ha gukuatesa aphangi. Ha gufezegesa, mu tangua dia ita akulu ana tshita yagasue ha guhana aphangi Biblia nu mikanda yetu iko, ana guahana nji ima ya gudia, milele nu mafundo a gukhala. Akulu ana zumba aphangi a mala nu a akhetu muavula, hene ana sha monyo wawo mu gingonza ha guakuatesa. (Yone 15:12, 13) Tangua ana tshita ngenyi, ana monesa gikhesa gifua Zadoke.

9. Gifua luholo 2 Samuele 15:27-29 idi guyimonesa, ndaga itshi Davidi wawambelele Zadoke ha gutshita? (Tala nji gifuanesa.)

⁹ Davidi wakhalele mu gingonza. Mun’enji Abasaloma wakhalele mukalagala ngolo ha gumutambula ufumu. (2 Sam. 15:12, 13) Yakhalele mutoga egi, Davidi akatuge gu Yelusalema mbala imoshi! Wawambelele enya mudimo enji egi: ‘Zugenu tulenge, gula ndo Abasaloma uza gutushiya mukut’etu agasue!’ (2 Sam. 15:14) Tangua enya mudimo ene akhalele mulenga, Davidi wakotelesele egi yakhalele mutoga egi muthu mumoshi asale ha gumuwambela ndaga Abasaloma wakhalele mutshigina gukalagala. Hene wavutudile Zadoke nu nganga-nzambi jiko mu dimbo ha gumutemesa. (Tanga 2 Samuele 15:27-29.) Akhalele naye gutshita ndaga nu gutema guagasue. Ndaga Davidi wawambelele nganga-nzambi jiene ha gukalagala jiakhalele muhaga monyo wawo mu gingonza. Abasaloma wakhalele muenya khuta, wakhalele nji mutshigina ufumu muavula. Tangiza gale ndaga yakhalele naye muene gukalagala Zadoke nu nganga-nzambi gula nga wajiyile egi ajile ha gujiya matangi enji ha gubamba Davidi!

10. Luholo lutshi Zadoke nu athu akhalele nawo abambele Davidi?

¹⁰ Davidi watogele futa dienji muko Hushayi munu wakhalele gu khanda yenji nu Zadoke ha gumukuatesa ha gujiya matangi a Abasaloma. (2 Sam. 15:32-37) Hushayi wawambelele Abasaloma egi udi gu khanda yenji ha gumuwambela luholo lua guluisa Davidi, ndaga yene yakuatesele Davidi ha gudilonda ha guluisa Abasaloma. Tangua Abasaloma wakhalele mutshigina matangi a Hushayi, Hushayi wakhalele muwambela Zadoke nu Abiatare ndaga jiene. (2 Sam. 17:8-16) Gungima Zadoke nu Abiatare akhalele mutuma athu ha gutemesa Davidi. (2 Sam. 17:17) Yehowa wakuatesele Zadoke nu nganga-nzambi jiko ha gubamba Davidi gudi athu akhalele mukamba ha gumushiya.​—2 Sam. 17:21, 22.

11. Luholo lutshi tuajiya gumonesa gikhesa gifua Zadoke tangua tudi mukuatesa aphangi’etu Aklisto?

¹¹ Luholo lutshi esue nji tuajiya gumonesa gikhesa gifua Zadoke gula atutoga ha gukuatesa aphangi adi mu gingonza? 1) Landula malongo aguhanewa. Mu tangua dia luholo elu, yana toga egi tukhale mu gudivua guabonga. Tumagela malongo adi mukatuga gu Betele. (Heb. 13:17) Akulu adi naye guvutugila malongo adi mumonesa luholo aphangi ajiya gudilondega mukunda nu lamba dimoshi diajiya guabuila mu gisagumuisa, nu guawambela ndaga ajiya gukalagala mu tangua diene. (1 Kol. 14:33, 40) 2) Khala nu gikhesa uvi monesa nji gutema. (Ish. 22:3) Tangiza muabonga gutuama dia gukalagala ndaga yagasue, ulabigo gudimba mu gingonza. 3) Shila Yehowa mutshima. Ujimbilago egi Yehowa wana tshigina egi aye nu aphangi ako a Aklisto mukhale mu ubambi. Yehowa wajiya gugukalegela ha gukuatesa aphangi.

12-13. Malongo atshi wazula mu gifezegeselo gia phangi Viktor nu Vitalii? (Tala nji gifuanesa.)

¹² Tutadilenu gifezegeselo gia phangi Viktor nu Vitalii. Aphangi ene mbadi atshitshile mudimo wakola ha guhana aphangi a gu Ukraine ima ya gudia nu meya. Viktor wazuelele egi: “Tuakhalele muya nu gukamba ima yagudia mu mafundo agudisha. Mbala jiavula tuakhalele muvua athu musha matululu hehi nu esue. Gungima atuwambelele egi phangi mumoshi wa yala wakhalele mukhaphela athu ima ya gudia mu butike yenji. Ima yene yakuatesele aphangi avula mu masugu avula. Tangua tuakhalele mumba ima mu gamiyo getu, bombe imoshi yabuile hehi nu fundo tuakhalele mu ulehelo wa bametre 20. Mu lusugu luene ngabubidile Yehowa ha gunguhana gikhesa ha gulandula gukuatesa aphangi.”

¹³ Phangi Vitalii wazuelele egi: “Tuakhalele nu funu ya gikhesa ha gukuatesa aphangi mu tangua diene. Tuatshitshile matangua 12 mu njila tangua tuayile mukuatesa aphangi mbala ya thomo. Njila yagasue ngakhalele muya nu gukombelela Yehowa.” Vitalii wakhalele nu gikhesa uvi wamonesele nji gutema. Wazuelele nji egi: “Ngatogele Yehowa ha gunguhana ndunge nu khadilo dia gudibulumuisa. Ngabalegele phamba mu njila inyi mafumu atshiginyile egi athu abalege. Gutshigina guami guakolele tangua ngamonele luholo aphangi akhalele mutshita mudimo hamoshi. Akhalele mukatula mvindu mu njila nu atukuatesele nji ha gumba ima ya gudia mu gamiyo nu milele nu ima iko aphangi akhalele nayo funu. Atuhanele nji ima ya gudia, atulondele nji mafundo tuajiya gubanda mu njila.”

KHALA YAGUJINGINYINA GUDI YEHOWA

14. Luholo lutshi tuajiya gudivua gula muthu tuana zumba muavula wabemba gukombelela Yehowa?

¹⁴ Gula muenya fami yetu nga futa dietu wabemba gukombelela Yehowa yajiya gutusagesa muavula gubalega malamba ako ajiya gutubuila. (Ngi. 78:40; Ish. 24:10) Luholo wana zumba muthu muene muavula yajiya gukhala lamba ha gukolesela mu ndaga yene. Gula udi nu muenya fami yaye nga futa diaye wazolewe gale mu hungu, gifezegeselo giabonga gia Zadoke giajiya gugukuatesa.

15. Mukunda natshi yakhalele mutoga egi Zadoke amonese gikhesa ha gusala yagujinginyina gudi Yehowa? (1 Mafumu 1:5-8)

¹⁵ Zadoke wasalele yagujinginyina gudi Yehowa ikhale futa dienji Abiatare gakhalelego luko yagujinginyina gudi Yehowa. Ndaga yene yabuile gu gisugishilo gia uhinyinyi wa Davidi. Tangua Davidi wabuile muthu wagukola nu wakhalele mutshigina gufua, mun’enji Adoniya watshiginyile gudibuisa fumu ha fundo dia Salomo munu Yehowa watombele ha guhingana Davidi. (1 Gudi. 22:9, 10) Abiatare wayile genji gu khanda ya Adoniya. (Tanga 1 Mafumu 1:5-8.) Ngenyi, Abiatare gakhalelego luko yagujinginyina gudi Davidi nu gudi Yehowa! Tangiza gale luholo ndaga yene yahanele Zadoke gikenene! Muene nu Abiatare akalegele mudimo hamoshi gifua nganga-nzambi ivo gubalega 40. (2 Sam. 8:17) Akhalele nji mubamba ‘mushete wa gikotelo wa Nzambi wa giamatshidia’ hamoshi. (2 Sam. 15:29) Thomo mala ene mbadi akhalele mukuatesa Davidi gifua fumu wawo nu adihanele muavula mu mudimo wa Yehowa.​—2 Sam. 19:11-14.

16. Yajiya gukhala egi itshi yakuatesele Zadoke ha gusala yagujinginyina?

¹⁶ Zadoke wasalele yagujinginyina gudi Yehowa ikhale Abiatare wayile genji gu khanda ya Adoniya. Davidi wajiyile muabonga egi Zadoke mbagamubembigo nga hazonda. Tangua athu ajiyile ndaga Adoniya wakalegele, Davidi wawambelele Zadoke nu Natana nu Benaya ha gubuisa Salomo fumu. (1 Maf. 1:32-34) Zadoke wahetele diago gikhesa mu gifezegeselo gia akombeledi ako agujinginyina a Yehowa gifua Natana nu athu ako akuatesele Fumu Davidi. (1 Maf. 1:38, 39) Tangua Salomo wabuile fumu, ‘watombele Zadoke ha gukhala nganga-nzambi ha fundo dia Abiatare.’​—1 Maf. 2:35.

17. Luholo lutshi tuajiya gulandula gifezegeselo gia Zadoke gula muthu tuana zumba wabemba gukombelela Yehowa?

¹⁷ Luholo lutshi tuajiya gulandula gifezegeselo gia Zadoke? Gula muthu mumoshi wana zumba wabemba gukombelela Yehowa, monesa egi aye udi yagujinginyina gudi Yehowa. (Yosh. 24:15) Yehowa mbawuguhana ngolo nu gikhesa ha gukolesela. Tshita gisambu gudi Yehowa, kuata nji ufuta nu aphangi adi yagujinginyina gudi muene. Yehowa wana suanguluga luholo udi yagujinginyina gudi muene nu mbawugushimbiga.​—2 Sam. 22:26.

18. Longo ditshi wazula mu eksperianse ya phangi Marco nu mukaji’enji Sidse?

¹⁸ Tutadilenu luholo phangi Marco nu mukaji’enji Sidse adivuile tangua an’awo mbadi a akhetu abembele gukombelela Yehowa. Marco wazuelele egi: “Tangua tuavualele an’etu, tuaazumbile muavula. Tuatshitshile yagasue ha guabamba hagula ndaga ya lamba yabuilago. Uvi tangua azudile desizio dia gubemba gukombelela Yehowa yatusagesele muavula diago.” Wazuelele luko egi: “Yehowa watukuatesele ha gukolesela. Watshitshile yagasue hagula tukhale gudihana gikhesa nu mukaji’ami. Gula muila wanguleba mukaji’ami wakhalele gungukuatesa, ame nji ngakhalele gumukuatesa gula muene nji wadivua ngenyi.” Phangi Sidse wazuelele egi: “Tuakolesele mu lamba diene handaga Yehowa wakhalele gutukuatesa. Ngakhalele gudibela muavula egi gula ana ene abembele gukombelela Yehowa, yakhalele gubola guami hene ngawambelele Yehowa luholo ngakhalele gudivua. Gungima dia tangua diazonda, phangi mumoshi wa mukhetu tuadimonele n’enji sendese mualeha wajile fundo ngakhalele, wangukuatele ha phanga wangutalele, gungima wazuelele egi: ‘Ujimbilago egi gula ana abembi gukombelela Yehowa, ishigo gubola guaye!’ Yehowa wangukuatesele ha gulandula gumukombelela nu gusuanguluga guagasue.”

19. Desizio ditshi wazula?

¹⁹ Yehowa wana tshigina egi akombeledi enji agasue akhale nu gikhesa gifua Zadoke. (2 Tim. 1:7) Ganago gutshigina egi tudishile mutshima. Uvi wana tshigina egi tushe mutshima gudi muene. Hene gula watagana nu ndaga imoshi idi mutoga egi umonese gikhesa, toga ukuateshi gudi Yehowa. Wajiya gusha mutshima egi mbawuguhana gikhesa gifua Zadoke!​—1 Phet. 5:10.