Wana Jiya Gudisha Gudi Mukatshi dia Giamatshidia nu Mambo Ba?

1. Wana gudivua gikhuatshi tangua wana jiya egi tuana khala mu giamatshidia?

AKOMBELEDI a Yehowa ana zumba giamatshidia gidi mu Biblia. Gutshigina guetu guana katuga mu giamatshidia giene. (Roma 10:17) Tuana sha gutshigina egi Yehowa wahagele hungu dia Uklisto gifua “kunji nu fondasio ya giamatshidia.” (1 Tim. 3:15) Tuana khala nu gusuanguluga ha gutumagela ‘athu adi gututuameza’ handaga ana gutukotelesela giamatshidia gidi mu Biblia, nu ana gutuhana malongo ana gutukuatesa ha gukalagala gutshigina gua Nzambi.​—Heb. 13:17.

2. Ikhale tuajiyile gale giamatshidia, ndaga itshi yajiya gutubuila? (Yakoba 5:19)

² Tuajiyile gale giamatshidia, tuana jiya nji egi ulondegi wa Nzambi wana gututuameza mu luholo luabonga, uvi matangua ako tuajiya nji gujimbila njila. (Tanga Yakoba 5:19.) Satana wana tshigina egi tubembe gusha mutshima mu ndaga jiana zuela Biblia nu mu malongo ana gutuhana ulondegi wa Nzambi.​—Ef. 4:14.

3. Mukunda natshi tudi naye gutumagela giamatshidia? (Efeso 6:13, 14)

³ Tanga Efeso 6:13, 14. Gualeha ndo, Diabulu mbawumba mambo ha guhuiga ifutshi yagasue ha gulumbugila Yehowa. (Gumo. 16:13, 14) Tujimbilago egi Satana mbawutshita yagasue ha guhuiga akombeledi a Yehowa. (Gumo. 12:9) Gishina giene, tudi naye gukamba gukotelesa gudisha gudi mukatshi dia giamatshidia nu mambo; tudi naye nji gutumagela giamatshidia. (Roma 6:17; 1 Phet. 1:22) Gula tuatshita ngenyi, mbatuhuluga mu tangua dia lamba diakola!

4. Itshi tuza muzuelela mu longo edi?

⁴ Mu longo edi, tuza muzuelela makalegelo mbadi ajiya gutukuatesa ha gujiya giamatshidia gidi mu Biblia nu gutshigina malongo ana gutuhana ulondegi wa Nzambi. Gungima, tuza mumona ndaga thathu tudi naye gutshita ha gusala mu giamatshidia.

MAKALEGELO AJIYA GUTUKUATESA HA GUJIYA GIAMATSHIDIA

5. Luholo lutshi guvila Nzambi woma guana gutukuatesa ha gujiya giamatshidia?

⁵ Guvila Yehowa woma. Gula tuakudisa khadilo dia guvila Yehowa woma, mbatumuzumba muavula, mbatushigo mutshita nga ndaga imoshi yabola yajiya gumuhana gikenene. Tuana khala hehi ha gulonguga gudisha gudi mukatshi dia ndaga jiabonga nu jiabola, nu gudisha gudi mukatshi dia giamatshidia nu mambo hagula Yehowa atutshigine. (Ish. 2:3-6; Heb. 5:14) Tuajiyilego gubemba nga hazonda egi woma wa athu ubalege guzumba guetu mukunda nu Yehowa, nga ututume ha gutshita ndaga ha gusuanguluisa athu uvi Yehowa ndo.

6. Luholo lutshi woma wa athu watumile mala 10 a gu Isalele ha gutuna gushila Yehowa mutshima?

⁶ Gula tudi muvuila athu woma wavula gubalega woma tuana vua mukunda nu Nzambi, tuajiya gubemba giamatshidia. Tuzuelelenu gifezegeselo gia mala 12 atumiwe ha guya mutala gifutshi ginyi Yehowa walayele ha guhana enya Isalele. Mala 10 mukatshi diawo avuidile enya gu Kanana woma wavula gubalega guzumba guawo mukunda nu Yehowa. Tangua avutugile, awambelele aphangi’awo egi: ‘Tushigo nu luholo lua guluisa athu ene handaga atubalega ngolo.’ (Lutang. 13:27-31) Idi yadiago egi enya Kanana akhalele nu ngolo jiavula gubalega enya Isalele. Uvi muthu wagasue mukatshi diawo munu watangijile egi enya Isalele ajiyilego gubinga enya Kanana, gakhalelego mushila Yehowa mutshima. Mala ene akhalele naye gusha mutshima mu ndaga jinyi Yehowa wakhalele mutshigina egi enya Isalele akalagale. Akhalele naye nji gutangingiza ndaga jia gushimana jiaakalegele Yehowa mu masugu abalega. Ngenyi akhalele naye gukotelesa egi Yehowa udi nu ngolo jiavula gubalega enya Kanana. Uvi Yoshua nu Kalebe akhalele mutshigina gusuanguluisa Yehowa, akhalelego gifua mala ako anyi 10. Awambelele enya Isalele egi: ‘Gula tuatumagela Yehowa, muene mbawusuanguluga nu esue, mbawutubata diago mu gifutshi giene.’​—Lutang. 14:6-9.

7. Itshi yajiya gutukuatesa ha gulandula guvuila Yehowa woma? (Tala nji gifuanesa.)

⁷ Ha gulandula guvuila Yehowa woma, tudi naye gutshita ngolo ha gukalagala ndaga jidi gumusuanguluisa. (Ngi. 16:8) Gula udi mutanga lumene lumoshi mu Biblia, wajiya gudihula egi: ‘Itshi ngakhalele naye gutshita gula nga ndaga eyi yangubuidile ame?’ Ha gufezegesa, tangiza gale egi wakhalele hene tangua mala 10 azuelele egi enya Isalele mbaashigo mubinga enya Kanana. Wakhalele naye gutshigina ndaga jiazuelele mala ene nu guvua woma, nga wakhalele naye gukolesa guzumba guaye mukunda nu Yehowa? Enya Isalele agasue atshiginyilego egi ndaga jiazuelele Yoshua nu Kalebe jiakhalele jia giamatshidia. Gishina giene anginyilego mu Mavu a Gutendelela.​—Lutang. 14:10, 22, 23.

8. Khadilo ditshi tudi naye gukudisa? Mukunda natshi?

⁸ Khadilo dia gudibulumuisa. Yehowa wana kuatesa athu a gudibulumuisa ha gukotelesa giamatshidia. (Mat. 11:25) Tuana tshigina nu gudibulumuisa guagasue ha gulonguga giamatshidia giene. (Makal. 8:30, 31) Uvi tudi naye gumonesa gutema ha gutuna gubua enya lulendo. Gula tudi nu lulendo tuajiya gusendesa gutangiza egi matangi etu adi abonga gifua malongo a Biblia nu utuameji wakatuga mu ulondegi wa Yehowa.

9. Itshi yajiya gutukuatesa ha gulandula gukhala athu a gudibulumuisa?

⁹ Ha gulandula gukhala athu a gudibulumuisa, tudi naye guwunguluga egi gu meso a Yehowa tudi gifua ana a zonda ashigo mujiya ndaga jiavula. (Ngi. 8:3, 4) Tuajiya nji gutoga Yehowa ha gutukuatesa ha gukudisa khadilo dia gudibulumuisa nu gutshigina malongo ana gutuhana muene. Ngenyi, Yehowa mbawutukuatesa ha guzula nu ndando ndaga tudi mulonguga mu Mbimbi yenji nu mu ulondegi wenji gubalega matangi etu. Tangua udi mutanga Biblia, kamba ndaga jidi mumonesa egi Yehowa wana zumba athu a gudibulumuisa uvi ganago gutshigina nga hazonda enya lulendo nu athu ana gudisunzula nga athu ana gudikanduisa. Tshita nji ngolo ha gusala muthu wa gudibulumuisa gula waheta inemo mu ulondegi wa Yehowa.

LUHOLO TUAJIYA GUSALA YAGUJINGINYINA MU GIAMATSHIDIA

10. Akuatshi Yehowa watombele ha guhana malongo nu gutuameza akombeledi enji?

¹⁰ Sha mutshima mu utuameji wana hana ulondegi wa Yehowa. Mu tangua dikulu Yehowa watombele Moize ha guhana malongo gudi akombeledi enji, gungima watombele Yoshua. (Yosh. 1:16, 17) Tangua enya Isalele akhalele munemesa amoneshi ene a Yehowa, akhalele muheta gubonga. Ivo yavula gungima, apostolo 12 akhalele muhana malongo gudi akombeledi a Nzambi tangua hungu dia Uklisto dia sendesele. (Makal. 8:14, 15) Gungima, tangua hungu diene diakomele apostolo asendesele nji gutshita mudimo hamoshi nu akulu ako gu Yelusalema. Tangua Aklisto akhalele mulandula utuameji wa mala ene akhalele muzumba Nzambi, ‘gutshigina gua aphangi mu mahungu guakhalele mukola lusugu nu lusugu.’ (Makal. 16:4, 5) Mangino esue nji tuana heta gubonga gula tudi mutumagela malongo ana gutuhana ulondegi wa Yehowa. Uvi Yehowa mbawudivua luholo lutshi gula tudi mutuna gutumagela athu atombele muene ha gututuameza? Ha guheta mvutu gu muhu wene, tutadilenu ndaga jiakalegewe tangua enya Isalele akhalele mutshigina gungina mu Mavu a Gutendelela.

11. Ndaga itshi yabuidile athu atunyile gunemesa Moize munu Yehowa watombele ha guatuameza? (Tala nji gifuanesa.)

¹¹ Tangua enya Isalele akhalele muya mu Mavu a Gutendelela, mala a lukuma alumbugidile Moize, akhalele nji muzuela ndaga jiabola mukunda nu ginemo giamuhanele Yehowa. Azuelele egi: ‘Enya Isalele agasue adi athu a gijila, Yehowa nji udi mukatshi diawo [uvi ishigo phamba Moize].’ (Lutang. 16:1-3) Gumeso a Nzambi ‘enya Isalele agasue’ akhalele athu agijila, uvi mutangua diene Yehowa watombele phamba Moize ha guatuameza. (Lutang. 16:28) Idi yadiago egi tangua akhalele muzuela ndaga jiabola mukunda nu Moize, akhalele gujiwambela Yehowa. Akhalelego mutangiza ndaga Yehowa wakhalele mutshigina, uvi akhalele mutshigina gujiyiwa gifua enya ngolo jiavula nu enya lukuma. Nzambi washiyile enya lukuma ene nu athu agasue a alanduile. (Lutang. 16:30-35, 41, 49) Mangino nji Yehowa gana suangulugago nga hazonda nu athu anyi ana tuna gutumagela malongo ana gutuhana ulondegi wenji.

12. Mukunda natshi tuajiya gulandula gushila ulondegi wa Yehowa mutshima?

¹² Tuajiya gulandula gushila ulondegi wa Yehowa mutshima. Gula aphangi ana gututuameza amona egi, adi naye gusombegesa longo dimoshi diazogele mu mikanda yetu hagula didivue nu ndaga Biblia yana zuela nga luholo mudimo wetu wa Ufumu udi naye gukalegewa, ana sombegesa ndaga jiene. (Ish. 4:18) Ana kalagala usombeshi wene handaga ana tshigina diago gusuanguluisa Yehowa. Ana kalagala nji yagasue hagula malongo awo adivue nu Mbimbi ya Nzambi, handaga yene idi nu mbimbi jiabonga akombeledi a Nzambi agasue adi naye gulandula.

13. a) “Gifezegeselo gia mbimbi jiabonga” gidi itshi? b) Itshi tudi naye gutshita nu mbimbi jiene?

¹³ “Landula gifezegeselo gia mbimbi jiabonga.” (2 Tim. 1:13) “Gifezegeselo gia mbimbi jiabonga” gidi mumonesa malongo a giamatshidia adi mu Biblia. (Yone 17:17) Giamatshidia giene gidi ha gishina gia malongo agasue tuana sha gutshigina. Mu ulondegi wa Yehowa ana gutulongesa ha gukamba gujiya gula gutshigina guetu guana gudivua nu giamatshidia giene. Gula tudi mutshita ngenyi, tuana heta gubonga.

14. Luholo lutshi Aklisto ako abembele gulandula “gifezegeselo gia mbimbi jiabonga”?

¹⁴ Ndaga itshi yajiya gutubuila gula tushigo luko mulandula “gifezegeselo gia mbimbi jiabonga”? Tutadilenu gifezegeselo gimoshi. Mu siekle ya thomo, Aklisto ako akhalele mumuanga ndaga jia mambo egi lusugu lua Yehowa luajile gale. Yajiya gukhala egi guakhalele nu mukanda umoshi wakhalele muzuelela ndaga jiene. Yajiya gukhala akhalele mutangiza egi mupostolo Phaula wawusonegele. Aklisto ako a gu Tesalonike, akambelego gujiya gula ndaga jiene jiakhalele jia giamatshidia, uvi ayile nu gujiwambela athu ako. Gula nga awungulugile ndaga jiaalongesele Phaula tangua diakhalele muene nawo, nga ahuigiwego. (2 Tes. 2:1-5) Phaula wahanele Aklisto ene malongo ha gutuna gutshigina ndaga yagasue adi muvua. Ha guakuatesa mukunda nu masugu adi muza, wasugishile mukanda waasonegele muene egi: “Ame Phaula ngasonega mukanda wuwu nu koko guami, ngamitumina lumene. Ngana sonega ngenyi mu mikanda yami yagasue, hagula mujiye egi ame ngasonega.”​—2 Tes. 3:17.

15. Luholo lutshi tuajiya gudibamba gu ndaga jia mambo jiana monega gifua jidi jia giamatshidia? Hana gifezegeselo. (Tala nji ifuanesa.)

¹⁵ Malongo atshi tuajiya guzula mu ndaga mupostolo Phaula wasonegele Aklisto a gu Tesalonike? Gula tuavua ndaga imoshi ishigo gudivua nu ndaga tualongugile mu Biblia nga idi gutusagesa, tudi naye gumonesa gutema. Mu ivo yabalega, gu Union soviétique mbalagaji jiahanele aphangi mukanda umoshi, a awambelele egi mukanda wene wakatuga gu biro diakoma dia Matemue a Yehowa. Mukanda wene wakhalele mumonesa egi aphangi ako ajiya guzoga mu ulondegi wa Yehowa, ha guzola ulondegi wawo hakhawo. Luholo mukanda wene wasonegewe, wakhalele mumonega gifua wakatuga diago gu biro diakoma dia Matemue a Yehowa. Uvi aphangi anyi akhalele nu gutshigina guakola, ahuigiwego. Akotelesele egi ndaga jiakhalele mu mukanda wene jiakhalelego gudivua nu malongo a Biblia akhalele gualongesa. Mangino nji mbalagaji jietu jiana kalegela Internet nu televizio nga ima iko ha gutuhuiga nga gukamba gutukhaphumuna. Ha fundo dia ‘gubuisa matangi’etu tunga-tunga,’ tuajiya gudibamba gula tudi mukamba gujiya gula ndaga jiene tuavui nga tuatangi jidi gudivua nu giamatshidia tualongugile.​—2 Tes. 2:2; 1 Yone 4:1.

16. Ha gutadila Roma 16:17, 18, itshi tudi naye gutuna gula athu ako ashigo luko mutumagela giamatshidia?

¹⁶ Khala mu gudivua guabonga nu athu ana zumba Yehowa. Nzambi wana tshigina egi tukhale mu gudivua guabonga nu aphangi. Mbatulandula gudivua muabonga nu aphangi gula tudi yagujinginyina mu giamatshidia. Muthu wagasue udi mumuanga ndaga jishigo gudivua nu giamatshidia wana khaphumuna aphangi mu hungu, hene Nzambi udi gututemesa ha ‘gutuna athu a luholo elu.’ Gula ndo esue nji tuajiya gutshigina malongo a mambo nu gubolesa ufuta wetu nu Yehowa.​—Tanga Roma 16:17, 18.

17. Gubonga gutshi tuana heta gula tuajiya giamatshidia nu tuasala yagujinginyina mu giamatshigia giene?

¹⁷ Tangua tuana jiya giamatshidia nu tuana jinginyina mu giamatshidia giene, tuana kolesa gutshigina guetu nu ufuta wetu nu Yehowa. (Ef. 4:15, 16) Giamatshidia giene giana gutubamba gu malongo a mambo a Satana nu mbagitukuatesa nji ha gukhala mu guhuima ha mago a Yehowa mu tangua dia lamba diakola. Hene landulenu gukhala yagujingiyina mu ndaga jia giamatshidia, “ngenyi Nzambi wa guhuima mbawukhala n’enu.”​—Fili. 4:8, 9.