Young Pipol Askim . . .

Hao Nao Mi Savvy Mekem Truth Hem Stap Long Mi?

“Mi grow ap olsem wanfala Witness Bilong Jehovah, and evritaem mi tingsay sapos iu grow ap olsem, iu savvy gud long Jehovah nao. Mi barava rong!”—Antoinette.

“WANEM nao truth?” Pontius Pilate, man wea givim go Jesus for olketa killim dae, askim disfala kwestin. (John 18:38) But, luk olsem Pilate laekem disfala kwestin for endim—no for startim—way for story. For tok stret hem nating interest long “truth.” But waswe long iu? Iu interest long truth?

For planti hundred year olketa savvyman ting raonem wanem nao truth, but sorry nao, olketa no kasem planti ansa. Nomata olsem, iu savvy faendem ansa long kwestin bilong Pilate. Jesus Kraest teachim hao Word bilong God hem truth. Hem tok abaotem hemseleva olsem “truth.” And aposol John raet olsem: “Truth hem kam thru long Jesus.” (John 1:17; 14:6; 17:17) Dastawe, evri part bilong Kristian teaching, wea bihaen kamap part bilong Bible, olketa tu kamap “truth” or “truth bilong gud nius.” (Titus 1:14; Galatians 2:14; 2 John 1, 2) Insaed olketa Kristian teaching hia hem olketa samting olsem nem bilong God, Kingdom bilong God wea rul distaem, resurrection, and ransom bilong Jesus.—Psalm 83:18; Matthew 6:9, 10; 20:28; John 5:28, 29.

Planti thousand young wan kasem teaching bilong Bible truth from Kristian dadi and mami. But waswe, diswan meanim olketa hia “wakabaot long truth”? (3 John 3, 4) Maet nomoa. Example, Jennifer wea hem 20 year hem grow ap olsem wanfala Witness Bilong Jehovah. Hem say: “Mami bilong mi tekem mi go long olketa Witness convention and encouragim mi for tingting abaotem way for baptaes. But mi tingting olsem long miseleva, ‘Mi nating want for kamap wanfala Witness. Mi laek hapi!’”

Samfala young wan believim samting wea olketa learnim, but olketa nating mekem grow deepfala way for meanim wanem Bible barava teachim. Wanem nao danger? Jesus givim warning hao samfala pipol “no garem root.” Olketa maet savvy “go ahed for lelebet taem, and bihaen olketa test and persecution kamap bikos long word, olketa stumble.” (Mark 4:17) Olketa narawan savvy meanim lelebet belief bilong olketa long Bible, but olketa no savvy long God olsem fren bilong olketa. Wanfala young woman wea nem bilong hem Aneesa say: “Mi no ting mi garem trufala way for fren withim Jehovah taem mi small . . . Luk olsem mi depend tumas long way wea dadi and mami bilong mi fren withim hem.”

Hao nao tingting bilong iu? Waswe, Jehovah hem God bilong dadi and mami nomoa? Or, olsem man wea raetem psalm long Bible, iu savvy say: “Long iu nao mi putim trust bilong mi, O Jehovah. Mi talem finis: ‘Iu nao God bilong mi’”? (Psalm 31:14) Maet iu needim strong for face-im tru samting. Wanfala young man wea nem bilong hem Alexander say: “For mi, firstfala step nao for lukluk gud long miseleva long honest way.” Bihaen iu barava lukluk gud long iuseleva, maet iu luksavvy hao iu nating barava pruvim truth (evri Kristian teaching) long iuseleva. Maet iu no barava believe strong, so laef bilong iu no garem goal, no garem really purpose.

Long olketa Kristian meeting, Olketa Witness Bilong Jehovah samfala taem singim wanfala singsing wea garem nem “Truth Mas Stap Long Iu.”a Datfala kaonsel maet fitim iu. But hao nao iu savvy duim? Wea nao iu savvy start?

Pruvim Long Iuseleva

Long Romans 12:2, iumi lukim kaonsel bilong aposol Paul: “Pruvim long iufala seleva, gudfala and stretfala and perfect will bilong God.” Hao nao iu savvy duim datwan? Long way for kasem “stretfala savvy bilong truth.” (Titus 1:1) Olketa wea stap long Beroea bifor nating acceptim stretawe samting wea olketa herem. Long different way evribit, olketa “lukluk long olketa Scripture evriday for pruvim evri samting hia [wea olketa learnim].”—Acts 17:11.

Wanfala young Kristian wea nem bilong hem Erin luksavvy hao hem need for duim diswan. Hem say: “Mi duim research. Mi askim miseleva, ‘Hao nao mi savvy diswan nao stretfala religion? Hao nao mi savvy wanfala God wea nem bilong hem Jehovah really stap?’” Waswe, iu savvy markem schedule for study seleva? Maet iu start withim disfala Bible buk Savvy Wea Lead Go long Laef Olawe.b Readim long careful way. Lukim evri Scripture wea olketa markem and lukim hao nao hem join withim samting olketa raetem. Maet iu sapraes taem iu lukim hao tingting bilong iu abaotem truth hem barava different taem iu kamap “wanfala workman wea no shame long eni samting, wea iusim word bilong truth long stretfala way”!—2 Timothy 2:15.

Aposol Peter talem hao samfala samting insaed Bible hem “hard for meanim,” and bae iu lukim hao diswan hem tru. (2 Peter 3:16) But spirit bilong God savvy helpem iu meanim nomata olketa hardfala samting. (1 Corinthians 2:11, 12) Prea for help bilong God taem iu garem problem for meanim samting. (Psalm 119:10, 11, 27) Trae for duim moa research insaed olketa pablikeson bilong Watch Tower Society. Sapos iu no sure hao for duim datwan, askim samwan for helpem iu. Maet dadi and mami or narafala Kristian long kongregeson wea mature savvy helpem iu.

Tingim diswan, iu no study mekem iu showoff withim savvy bilong iu long nara pipol. Wanfala young wan wea nem bilong hem Collin say: “Iu go ahed for savvy gud long olketa fasin bilong Jehovah.” Ting raonem gud samting wea iu readim mekem hem sink daon kasem heart bilong iu.—Psalm 1:2, 3.

Way for kaban withim kongregeson long olketa Kristian meeting savvy helpem iu tu. Bikos, olsem aposol Paul raetem, kongregeson hem olsem “wanfala post and support bilong truth.” (1 Timothy 3:15) Samfala young wan complain and say olketa Kristian meeting no interesting. “But sapos iu no prepare for olketa meeting,” Collin say, “bae iu no kasem planti samting from olketa.” So prepare firstaem. Olketa meeting barava interesting sapos iu tek part—no just lukluk nomoa.

Waswe, Iu Busy Tumas for Study?

Hem tru, from evri skul work and work for duim long haos, maet hem wanfala challenge for faendem taem for study. Wanfala young wan wea nem bilong hem Susan raet olsem: “For planti year mi faet withim tingting wea mi savvy mi need for prepare for olketa meeting and duim study seleva, but mi no savvy duim.”

Susan learn for “baem taem” from olketa samting wea no important tumas. (Ephesians 5:15, 16) First samting, hem mekem list long evri samting wea hem need for studyim. Then, hem markem taem for studyim olketa. But hem markem tu taem insaed long schedule bilong hem for hapitaem. Hem say: “No mekem schedule hem fulap evritaem. Iumi evriwan needim taem for rest.” Way for garem schedule savvy helpem iu tu.

Sharim Wanem Iu Learnim

Sapos iu iusim wanem iu learnim diswan bae barava helpem way for mekem truth kamap part long iu. Trae for teachim long narawan. Man wea raetem psalm say: “Mouth bilong mi bae talem toktok bilong wisdom, and heart bilong mi bae ting raonem samting for meanim.”—Psalm 49:3.

Sapos iu no shame long gud nius, bae iu no hol back for talem long olketa skulfren and nara pipol wea iu meetim. (Romans 1:16) Taem iu iusim gud olketa chance olsem for storyim truth long nara pipol, iu bae iusim samting wea iu learnim; and long disfala way truth bae stap strong long mind and heart bilong iu.

Lukaot Gud Long Olketa Fren Bilong Iu

Samfala Kristian long first century kamap gud long spiritual way. But no longtaem bihaen aposol Paul mas raet long olketa and ask: “Hu nao stopem iufala for go ahed for obeyim truth?” (Galatians 5:7) Samting wea klosap semsem kasem wanfala young wan wea nem bilong hem Alex. Hem talemaot hao hard work bilong hem for studyim Word bilong God kamap weak from hem “liu withim olketa badfala fren.” For iu savvy grow long spiritual way, maet iu need for mekem samfala change long diswan.

Long different way, olketa gudfala fren savvy barava helpem iu for muv ahed. Proverbs 27:17 say: “Iron seleva savvy sharpenem iron. So wanfala man savvy sharpenem face bilong narafala man.” Lukaotem olketa gudfala example—pipol wea followim truth insaed living bilong olketa. Maet iu faendem insaed long famili bilong iu. Jennifer say: “Grandadi nao best example bilong mi. Evritaem hem iusim threefala hour for prepare for kongregeson Bible study for Sunday. Hem faendem evri scripture insaed long leson from olketa different Bible and lukluk gud long olketa word insaed dictionary bilong hem. Hem barava savvy long olketa samting insaed Bible wea no planti pipol savvy abaotem. Iu savvy askim hem eni samting and bae hem faendem ansa.”

Taem iuseleva acceptim truth, hem olsem iu kasem wanfala spesel samting—samting wea bae iu no want for lusim. So no ting long truth olsem “religion bilong dadi and mami bilong mi” nomoa. Samting wea iu believe strong long hem mas olsem wanem man wea raetem psalm talem: “Sapos dadi bilong mi and mami bilong mi lusim mi, Jehovah nao bae keepim mi.” (Psalm 27:10) Taem iu barava savvy wanem Bible teachim, iu believim, talemaot belief bilong iu long nara pipol and, winim evri samting, live followim olketa belief hia, bae iu showimaot hao iu mekem truth hem stap long iu.

[Olketa footnote]

[Piksa long page 27]

Pruvim truth long iuseleva taem iu duim research and study seleva