Jehovah Hem Kea for Olketa Man Nating

WASWE, iumi mas kamap difren or barava spesol long samfala wei for mekem God luksavve long iumi? Abraham Lincoln, mek-16 president bilong United States, hem talem olsem: “Lord hem laekem olketa man nating. Dastawe hem wakem staka long olketa.” Staka ting long olketa seleva olsem wanfala man nating nomoa wea no garem eni spesol savve. For olsem man nating maet minim for poor and low tumas long living. Maet hem minim tu, for no garem olketa sem right and chance wea olketa hae class pipol garem, or spesol position, or barava lokol tumas. Wanem kaen pipol nao iu laek stap witim olketa? Olketa wea bighed tumas and praod? Or waswe, iu laek stap witim pipol wea fren gud, hambol, no ova tumas, honest, and wea showimaot trufala interest long narafala pipol?

From wei for spoelem feeling and tok spoelem man kamap evritaem insaed long world distaem, samfala faendem hard for bilivim dat God bae interest long olketa. Wanfala man wea savve readim olowe disfala magasin hem raet: “Mi kam from wanfala famili wea no savve showimaot love long narawan. Olketa tok daonem mi, spoelem mi, and laflaf long mi. So, taem mi growap kam mi feel iusles nao. Mi still garem olketa strongfala feeling wea mi kasem bifor wea savve barava mekem mi wikdaon taem mi kasem trabol.” Bat, olketa reason stap for biliv hao God hem interest long olketa man nating.

Interest Bilong God Long Olketa Man Nating

King David hem raet: “Jehovah hem nambawan and barava fit for kasem praise, and wei wea hem nambawan hem samting wea man no savve evribit.” (Psalm 145:3) Nomata olsem, diswan no stopem Jehovah for feel sorre and kea for iumi long loving wei. (1 Peter 5:7) Olsem example, man wea raetem psalm talem: “Jehovah hem stap klosap long olketa wea heart bilong olketa brek; and hem sevem olketa wea spirit bilong olketa pisis.”—Psalm 34:18.

Olketa samting wea pipol long world tinghae long hem, olsem wei for luk naes long body, garem bignem, richfala living, hem no wanem God ting long hem olsem important samting. Law bilong God for Israel showimaot wei wea hem kea long olketa poor pipol, pikinini wea no garem dadi or mami, olketa widow, and man from difren kantri. God talem olketa Israelite, wea bin kasem barava nogud treatment long Egypt: “Iufala mas no spoelem wanfala man from difren kantri or putim bigfala hevi long hem . . . Iufala pipol mas no mekem eni widow woman or boy wea no garem dadi safa. Sapos iu mekem hem safa, then sapos hem singaot long mi, bae mi no fail for herem singaot bilong hem.” (Exodus 22:21-24) And tu, profet Isaiah talemaot trust bilong hem long wei wea God kea for olketa man nating: “Iu kamap olsem strongfala ples long man nating, wanfala strongfala ples for poor man wea kasem hard taem, wanfala ples for haed from big rain, wanfala ples for haed from hot sun, taem olketa raf man hem olsem big rain wea bangam wanfala wall.”—Isaiah 25:4.

Long full ministry bilong hem, Jesus Christ, wea “garem evribit olketa fasin” bilong God kamap example for olketa disaepol long wei for showimaot trufala interest long olketa man nating. (Hebrews 1:3) Taem hem lukim olketa pipol wea “garekil and stap olabaot olsem olketa sheep wea no garem eni shepherd,” Jesus “feel sorre long olketa.”—Matthew 9:36.

Lukim tu wanem kaen pipol nao Jesus chusim olsem olketa aposol bilong hem—olketa storyim olketa olsem “no skul gud and man nating.” (Acts 4:13) Bihaen Jesus hem dae, olketa follower bilong hem start for invaetem kam evri difren kaen pipol for lisin long Word bilong God. Aposol Paul hem raet dat “eni man wea no biliv or man nating” savve kam insaed Christian kongregeson and kamap wanfala wea biliv. (1 Corinthians 14:24, 25) Winim wei for chusim only olketa wea pipol long world tinghae long olketa, God chusim planti man nating wea garem simpol living for service bilong hem. Aposol Paul hem sei: “Iufala lukim wei wea hem kolem iufala, olketa brata, hao hem no kolem planti wea wise long saed bilong world, no olketa wea garem paoa, no olketa wea born kam from olketa bigman; bat God chusim olketa krangge samting bilong world, for mekem olketa wisefala man feel shame; and God chusim olketa wik samting bilong world, for mekem olketa strongfala man feel shame; and God hem chusim olketa wea world lukdaonem, olketa wea world sei olketa iusles, mekem hem savve finisim olketa wea world sei olketa important, mekem no eni man savve tok praod long eye bilong God.”—1 Corinthians 1:26-29.

Long sem wei, God really interest long iumi distaem. Will bilong God hem for “evri difren kaen man mas sev and kasem stretfala savve bilong truth.” (1 Timothy 2:4) Sapos God hem lovem tumas olketa man and sendem Son bilong hem long earth for dae for iumi, iumi no garem reason for tingse no eniwan lovem iumi or iumi iusles. (John 3:16) Jesus Christ showim long olketa follower bilong hem hao hem important for deal witim wanfala spiritual brata bilong hem wea no important tumas long sem wei wea olketa bae deal witim Jesus seleva. Hem sei: “Long wei wea iufala duim long wanfala long olketa brata bilong mi wea no important tumas, iufala duim long mi tu.” (Matthew 25:40) Nomata hao nao world ting long iumi, sapos iumi lovem truth, long eye bilong God iumi spesol.

Francisco,a wanfala boy long Brazil wea no garem dadi, hem feel olsem bihaen hem mekem grow wei for fren witim God. Hem sei: “For savve long Jehovah and organization bilong hem, hem helpem mi for winim olketa feeling bilong mi for no sure long miseleva and for fraet. Mi lanem dat Jehovah seleva hem interest long each wan long iumi.” Long Francisco, Jehovah kamap really dadi long hem.

Interest Long Olketa Young Pipol

Jehovah showimaot trufala interest long olketa young pipol no olsem wanfala grup nomoa, bat olsem man wanwan. Nomata iumi young or olo, iumi shud no tinghae tumas long iumiseleva. Bat, maet iumi savve long samfala samting and garem samfala fasin wea God fit for iusim long future. Jehovah savve wanem kaen change and training iumi needim, for duim wanem iumi each wan savve duim. Olsem example, lukim story long 1 Samuel chapter 16. Long profet Samuel samfala man long Israel luk olsem olketa moa fit for rul, bat Jehovah explainim reason bilong hem for chusim David, last born son bilong Jesse, olsem future king bilong Israel: “No lukim lukluk bilong hem or hao big nao hem, from mi rejectim hem [big brata bilong David]. From God no lukim samting olsem man hem lukim samting, from man hem lukim samting wea eye nomoa lukim; bat Jehovah, hem lukim heart.”—1 Samuel 16:7.

Waswe, olketa young pipol distaem savve feel sure Jehovah showimaot trufala interest long olketa? Tingim Ana, wanfala young woman long Brazil. Olsem planti nara young wan, hem wari nao for lukim raverave fasin and fasin wea no followim justice. Then dadi bilong hem start for tekem hem and olketa nara sista bilong hem long olketa Christian meeting. Gogo, hem start for enjoyim nao wanem hem lanem abaotem Word bilong God. Ana start for readim Bible witim olketa Christian pablikeson and for prea long Jehovah God. Isisi, hem mekem grow klos wei for fren witim God. Hem storyim olsem: “Mi barava enjoyim for raedem bicycle bilong mi go long wanfala hill klosap long haos bilong mi wea mi savve lukim skae wea kalakala tumas taem sun hem gogo daon. Mi prea long Jehovah and thankiu long hem for kaenfala fasin bilong hem and wei wea hem givim staka samting, mi barava trae for talemaot haomas mi lovem hem. For savve long Jehovah God and olketa purpose bilong hem givim mi peace long mind and mekem mi feel sef.” Waswe, iu tu trae for faendem taem for ting raonem wei wea Jehovah kea for iumi long loving wei?

For tok stret, living bilong iumi taem iumi growap maet mekem hem no isi for enjoyim klos wei for fren witim Jehovah. Tingim example bilong Lidia. Taem hem storyim long dadi bilong hem wanfala samting wea hem barava wari long hem, hem just tok strong long hem and sei: “Datwan hem krangge.” Nomata hem savve dadi bilong hem laekem hem for forgetim datfala problem, Lidia sei: “Study long Bible nao givim mi evriting wea mi barava wantem and staka samting moa. Olketa naesfala fasin bilong Jehovah nao mekem hem best fren bilong mi. Distaem mi savve talemaot olketa feeling bilong mi and olketa samting wea mi savve fraetem tumas long wanfala loving Dadi wea minim samting. Mi savve iusim staka hour for story long barava important Man insaed long universe, and mi sure hem bae lisin long mi.” Olketa Bible scripture olsem Philippians 4:6, 7 helpem hem for feelim loving kea bilong Jehovah. Datfala verse hem sei: “No wari long eni samting, bat long evri samting thru long prea and wei for barava askem witim wei for sei thankiu, talem evri samting long God; and peace bilong God wea winim evri tingting bilong man bae protectim heart and tingting bilong iufala thru long Christ Jesus.”

Help for Lukaftarem Olketa Need Bilong Iu

Jehovah showimaot interest long olketa servant bilong hem wanwan and tu for olketa servant bilong hem evriwea long world. Iumi savve showim tu love for Father bilong iumi long heven long wei for markem taem for story long hem. Iumi shud nating ting smol long wei wea iumi fren witim hem. David hem evritaem tingim wei wea hem fren witim Jehovah. Hem sei: “Mekem mi savve long olketa wei bilong iu, O Jehovah; teachim mi olketa road bilong iu. Mekem mi wakabaot long truth bilong iu and teachim mi, from iu nao God wea sevem mi. Long iu nao mi hope evriday.”—Psalm 25:4, 5.

Datfala idea for fren klos witim God maet hem niu samting long iu. Nomata wanem problem iu garem, iu savve evritaem feel sure dat Most Hae bae hem fit for helpem iu, fitim will bilong hem. (1 John 5:14, 15) So, lane for mekem olketa prea bilong iu targetim point, olsem living and olketa need bilong iu.

Insaed prea wea King Solomon offerim taem hem dedicatem temple, hem mekhae long wei wea hem important for luksavve long olketa need bilong iumi: “Sapos wanfala bigfala hangre kamap long land, sapos wanfala bigfala sik kamap, sapos barava hot sun and tumas rain, olketa grashopa and olketa cockroach kamap, sapos olketa enemy raonem olketa insaed land bilong olketa taon bilong olketa—enikaen trabol and enikaen problem—nomata wanem prea, nomata wanem help eni man or evri pipol bilong iu long Israel maet askem, bikos evriwan long olketa savve long trabol and pain bilong hemseleva . . . Then plis iuseleva herem long heven, . . . and iu mas forgive and givim each wan samting wea fitim wei bilong hem.” (2 Chronicles 6:28-30) Tru tumas, only iuseleva ‘savve long trabol and pain bilong iuseleva.’ So, hem barava important, for luksavve long olketa barava need and feeling bilong iuseleva. Sapos iu duim olsem, “[Jehovah] bae givim samting wea heart bilong iu wantem.”—Psalm 37:4.

Strongim Wei wea Iu Fren Witim Jehovah

Jehovah hapi for letem olketa man nating enjoyim klos wei for fren witim hem. Word bilong hem promisim iumi: “ ‘Mi bae kamap dadi long iufala, and iufala bae kamap olketa son and dota long mi,’ Jehovah Olmaeti hem sei.” (2 Corinthians 6:18) Tru nao, Jehovah and Son bilong hem wantem iumi for win and kasem laef olowe. Hem barava encouragem iumi for savve Jehovah bae helpem iumi kea for olketa responsibility long famili, long waka, and long Christian kongregeson!

Nomata olsem, iumi evriwan feisim olketa hardfala taem. Nogud health, olketa famili problem, no inaf selen, or nara samting maet kosim hevi long iumi. Maet iumi no savve hao for deal witim wanfala test. Olketa hevi wea kamap big hem kam stret or kam long difren wei from datfala wicked man for accusim man, Devil Satan, wea go ahed long wanfala spiritual faet againstim olketa pipol bilong God. Nomata olsem, samwan wea minim iumi and helpem iumi for keepim gudfala wei for fren witim Jehovah hem stap. Disfala man hem Jesus Christ long hae position bilong hem long heven. Iumi read: “Iumi garem olsem hae priest, no man wea no savve minim olketa wik point bilong iumi, bat man wea kasem test long evri wei olsem iumi, bat wea no garem sin. Dastawe, iumi savve kam front long throne bilong kaeness wea man no fit for kasem witim wei for feel free for toktok, mekem iumi savve kasem mercy and faendem kaeness wea man no fit for kasem for kasem help long barava taem.”—Hebrews 4:15, 16.

Hem barava encouragem iumi for savve iumi no need for garem bignem or riches for mekem God acceptim iumi! Nomata long hardfala taem, kamap olsem man for raetem psalm wea prea: “Mi safa and mi poor. Jehovah seleva tingim mi. Iu nao helpem mi and Man for Provaedem sef ples for mi.” (Psalm 31:9-14; 40:17) Iumi savve sure Jehovah lovem olketa hambol, man nating. Barava nao, ‘iumi savve torowem evri wari bilong iumi long hem bikos hem kea for iumi.’—1 Peter 5:7.

[Footnote]

[Olketa Piksa long page 29]

Planti long olketa follower bilong Jesus no skul gud and man nating

[Piksa long page 30]

Olketa Christian waka hard for strongfala faith

[Olketa Piksa long page 31]

Iumi no need for garem bignem or riches for mekem God acceptim iumi