Comfort for Olketa wea Sorre

OLKETA terrorist attak wea happen long September 11, 2001, long New York City and Washington, D.C., mekem pipol evriwea long world seke fogud. Insaed wanfala day, planti thousand dae, wea insaed diswan hem olketa fireman, police, and olketa from hospital.

Start from taem datfala samting hem happen, Olketa Jehovah’s Witness waka hard for comfortim olketa wea samwan olketa lovem dae long trabol hia. Olketa duim diswan “for helpem olketa wea feel sorre” and “for comfortim evriwan wea feel sorre.”—Isaiah 61:1, 2.

Insaed olketa year wea go pas, Olketa Jehovah’s Witness faendem hao pipol wea lusim samwan olketa lovem long dae planti taem savve ting raonem olketa kwestin long daon. Bible garem ansa. Hem bae gud for iu lukim olketa Scripture long daon insaed Bible bilong iu.

Waswe, God markem finis day for man dae?

Long Ecclesiastes 9:11, Bible hem sei “taem and samting wea iumi no expectim” (“chance,” New English Bible) hem kasem evri man. Sapos God markem finis day for man dae, why nao Bible encouragem iumi for duim olketa samting for protectim iumi from accident?—Olsem example, lukim Deuteronomy 22:8.

Why nao iumi dae?

God putim firstfala man and woman, Adam and Eve, long wanfala paradaes earth. Sapos tufala go ahed for obey, tufala bae no dae. Dae bae kamap only sapos olketa man no obeyim God. (Genesis 1:28; 2:15-17) Sorre nao bat Adam and Eve no obeyim Creator bilong tufala. From diswan, tufala kasem panis bilong samting tufala duim—dae. From evri man kam from Adam and Eve, evriwan long olketa kasem sin and dae. Bible explainim: “Thru long wanfala man [Adam] sin hem kam insaed long world and dae hem kam from sin, dastawe dae hem kasem evri man.”—Romans 5:12.

Hao Nao Man wea Dae?

Bihaen Adam no obey, God hem sei: “Iu [bae] go bak long graon, bikos iu kamaot from hem. Iu dust nomoa and iu bae go bak long dust.” (Genesis 3:19) So, dae hem wei for no stap laef—wei for no stap eni ples. Bible hem sei: “Olketa wea laef savve olketa bae dae; bat olketa wea dae finis, olketa nating savve long eni samting.” (Ecclesiastes 9:5) Bible talem tu hao taem wanfala man hem dae, “hem go bak long graon; long datfala day tingting bilong hem finis evribit.”—Psalm 146:3, 4.

Waswe, Iumi Garem Soul wea Laef Bihaen Long Dae?

Bible teachim klia hao soul bilong iu hem iu nomoa, hem no difren samting wea go ahed for laef bihaen man dae. (Genesis 2:7; Proverbs 2:10; Jeremiah 2:34) Dastawe iumi fit for sei, taem wanfala man hem dae, wanfala soul hem dae. Bible talem klia: “Soul [man seleva] wea hem sin . . . bae dae.”—Ezekiel 18:4.

Wanem hope nao stap for olketa wea dae finis?

Bible talem hao hem purpose bilong God for givim laef long olketa wea dae thru long wanfala resurrection long wanfala paradaes earth, wea sik and dae bae finis evribit. Jesus hem sei: “Hour bae kam wea evriwan wea stap long olketa memory grev bae herem voice bilong hem and kamaot.”—John 5:28, 29; Revelation 21:1-4.

Taem hem story abaotem fren bilong hem wea just dae, Lazarus, Jesus markem dae olsem sleep. (John 11:11-13) And tu, bihaen Jesus resurrectim hem, Lazarus nating sei hem go long ples for safa or ples for hapi insaed taem wea hem dae. (John 11:37-44) Diswan hem fitim bikos olketa wea dae no savve long eniting. Olketa no safa bat weitim “hour” wea olketa bae resurrect. Bat important samting nao hem hao, wei wea Jesus resurrectim Lazarus hem showaot hao olketa wea dae savve laef bak moa. Tru nao, thru long disfala mirakol Jesus showim long smol wei wanem bae kamap long earth anda long rul bilong Kingdom bilong God. (Acts 24:15) Hem nambawan comfort for olketa wea lusim samwan olketa lovem long dae insaed disfala nogud taem!