Mehn Kasansal akan me Pid Wehin Koht Wiahier Mehkot Mehlel

“Kumwail kin rongorong mwahu kokohp mahseno pwe e rasehng marain ehu me kin dakedaker wasa rotorot.”​—2 PITER 1:19.

1. Uhpenehn madamadau dahieu me kitail kilang me mie nan sampah rahnwet?

KAHNGEN kahpwal akan​—iei ire lap en sampah. Sangete keper oh kahpwal kan nan wehwe, oh lelohng terrorism, ahn tohnsampah kahpwal akan kin wie lalaudla oh sohte mehkot aramas kak wiahiong. Pil ahn sampah pelien sarawi kan sohte kak kihda sawas. Ni mehlel, irail kin kalaudehla kahpwal pwukat sang ni arail kin utungada moromor akan, kailok oh uhpali wehi oh kaliaktohrepeseng aramas. Ei, duwen me kokohp koasoia, “rotorot mosul” pwaindi “pwihn en wehi kan.” (Aiseia 60:2) Ni ahnsowohte, aramas rar ekei kin ahneki koapworopwor kaselel ong ahnsou kohkohdo. Pwekihda? Pwehki irail kin tehk kanahieng sapwellimen Koht mahsen en kokohp “rasehng marain ehu me kin dakedaker wasa rotorot.” Irail kin mweidong “mahsen” en Koht me mih nan Pwuhk Sarawi, e kahluwa arail elen kahk kan.​—2 Piter 1:19.

2. Nin duwen ahn Daniel kokohp me pid “ahnsou en imwi,” ihs irail kante me mweimwei en ale loalokong en pali ngehn?

² Me pid “ahnsou en imwi,” soukohp Daniel ntingihdi: “Me tohto pahn raparapahki, oh loalokong mehlel pahn ngederla. Aramas ngeder pahn kamwakelda. Me suwed kan sohte pahn dehdehki, ahpw re pahn usehla wiewia ar mour suwed kan; irail kante me kupwurokong me pahn dehdehki.” (Daniel 12:4, 10) Loalokong ni pali ngehn kin nekinekiongete irail oko me kin “raparapahki” ni mehlel de kin kaukaule sukuhliki Mahsen en Koht, oh kapwaiada sapwellime koasoandi, oh nantiong wia sapwellime kupwur.​—Madiu 13:11-15; 1 Sohn 5:20.

3. Mpen pahr 1870, padahk mehlel kesempwal dahieu me Bible student en mahs akan wehwehki duwe?

³ Sangete nan pahr 1870 samwa, mwohn “imwin rahn akan” ah tapiada, Siohwa Koht tepidahr kasalehda duwen “rir sarawi en Wehin nanleng.” (2 Timoty 3:1-5; Madiu 13:11) Ni ahnsou pwihn en “Bible Students” pohnese​—weksang pali moron en aramas—​me pwarodohng Krais pahn sohte sansal ong mesen aramas. Mwurin Sises ah pahn kesepwildahng nan mwoalen nanmwarki nanleng, e pahn sapahldo ni mwohmw wet me e pahn ketikihong sapwellime kupwur lapalap ong sampah. Kilel kapatapat sansal ekei pahn kapehmehki sapwellime tohnpadahk kan me sapwellime sapahldo ni irair soh sansal tepidahr.​—Madiu 24:3-14.

Ni Ahnsou Me Kasansalo Pahn Pweida

4. Iaduwen Siohwa ah ketin kakehlailiahla pwoson en sapwellime ladu kan nan atail ahnsou?

⁴ Kasansal me Sises wiahiong sapwellime tohnpadahk kan ni ah ketin linganla mwohrailo wia me karasa lingan me e pahn sapwellimaniki nan sapwellime Wehio. (Madiu 17:1-9) Kasansalo kakehlailiada ahn Piter, Seims oh Sohn pwoson ni ahnsou me irail tohto uhdihsang arail idawehn Sises pwehki ah sohte ketin kaitar dahme pein irail pehm me Sises konehng wia. Pil duwehte ahnsou en imwi wet, Siohwa kin ketin kakehla pwoson en sapwellime ladu kan en mwehiet ni ah kin kalaudehla marain en wehwehki pweidahn kaudiahl kapwuriamwei oh kokohp akan. Kitail tehkpene mahs ekei pweidahn mehkan ni pali ngehn me kin utung kakehlepen atail pwoson.

5. Ihs me Usuhrahn, oh iahd oh ia mwomwen e ‘pwarada’?

⁵ Me pid ahnsou me Sises ketin linganla, wahnpoaron Piter ntingihdi: “Eri, se kin koapworopwor laudki kokohp me soukohp ako lohkidohr, kumwail kin rongorong mwahu pwe e kin rasehng marain ehu me kin dakedaker wasa rotorot, wasa lao rahnpeseng oh marain en usuhn rahn ahpw pahn kamarainihada kapehdamwail kan.” (2 Piter 1:19) Usuhn rahn ni karasaras, de “usu mwakereker,” kin wehwehiong lingan en Sises Krais nan sapwellime Wehio. (Kaudiahl 22:16) E ketin ‘pwaradahdo’ nan 1914 ahnsou me Wehin Koht ipwidi nanleng, oh met wia kilelepen tepin mwehi kapw. (Kaudiahl 11:15) Nan kasansal me Sises linganla, Moses oh Elijah pwarada mpen Sises, oh irail eri mahmahsen. Ihs me ira kin wia mwete de kilelepe?

6, 7. Ihs me kin rasehng Moses oh Elijah nan ahnsou me Sises ketin linganlahr, oh oh oaritik kesempwal dah kan me iren Pwuhk Sarawi kan kasalehda duwen ira me wia wehwehn Moses oh Elijah?

⁶ Pwehki Moses oh Elijah iang Krais nan sapwellime lingan, ira sounkadehde lelepek riemen pwukat uhdahn kin wehwehkiong irail oko me kin iang Sises kaunda nan sapwellime Wehio. Wehwe wet me mie me pahn iang Sises kaunda sapwellime Wehio kin pahrekiong kokohp me Daniel wia me pid ahnsou me Mesaia ketidiong pohn mwoale. Daniel kilangadahr “aramas emen me rasehng nein aramas” me alehier “kaunda poatoapoat soh imwi,” sang rehn “Ih me sapwellimaniki Mour Poatoapoat,” iei Siohwa Koht. Ahpw tehk kanahieng dahme pil kasansal pil kohiong rehn Daniel ekiste mwurin mwo. E ntingihdi: “Eri, manaman oh roson en wehi koaros en sampah ahpw pahn kohieng aramas akan me sapwellimen Koht, Wasa Lapalahpie.” (Daniel 7:13, 14, 27) Pohnangin sounpar 500 mwohn sapwellimen Sises kasansalepen linganla, Koht ketin kasaledahr me pahn mie irail “aramas sarawi” kei me pahn iang ale sapwellimen Krais mwoahl lapalap lingano.

⁷ Ihs irail aramas sarawi kan me mih nan kaudiahl me kohwong Daniel? Irail pwukat me Pohl mahsanih: “Ngenen Koht kin ketin ehuong ngenitail oh kadehdehda me kitail sapwellimen Koht seri. Pwehki atail wialahr sapwellime, kitail pahn pil paieki pai kan me e ketin nekinekidohng sapwellime seri kan, oh kitail pil pahn iang Krais paieki dahme Koht ketin nekinekidohng; pwe ma kitail iang Krais ni sapwellime lokolok, eri, kitail pil pahn iang ni sapwellime lingan.” (Rom 8:16, 17) Aramas sarawi pwukat iei sapwellimen Sises tohnpadahk keidi kan. Nan Kaudiahlo, Sises mahsanih: “Me kin dadaurete lao powehdi me suwed koaros, I pahn mweidohng en iang mwohd limwahn mwoalei, duwehte ei mwohd limwahn mwoalen Semei ahnsou wet.” Irail ‘soun kalowehda’ iasada pwukat me tohtohrail mih ni meh 144,000, oh iang Sises pahn kaunda sampah pwon.​—Kaudiahl 3:21; 5:9, 10; 14:1, 3, 4; 1 Korint 15:53.

8. Iaduwen sapwellimen Sises werek keidi kan ar wia mwetehn Moses oh Elijah, oh ia imwilahn met?

⁸ Dahme kahrehda, Moses oh Elijah kin wiahki kilelepen irail Kristian keidi kan? Pwehki Kristian pwukat ni ahnsou me irail momour ni pali uduk kin wia doadoahk me mwomwiong dahme Moses oh Elijah kin wia. Karasepe, irail wia Sounkadehdehn Siohwa kei mehnda ma irail kin lelohng kalokolok. (Aiseia 43:10; Wiewia 8:1-8; Kaudiahl 11:2-12) Nin duwen Moses oh Elijah, irail pil kin kasalehda ni eimah duwen sarawi likamw oh eri kin kangoangehki aramas mehlel akan en kolokolete arail lelepek ong Koht. (Eksodus 32:19, 20; Deuderonomi 4:22-24; 1 Nanmwarki 18:18-40) Iaduwen—arail doadoahk kin mie wah? Ei! Likin arail kin wia doadoahk en kihpene koaros irail me keidi kan, irail pil kihiongehr sawas rehn aramas rar kei me wia “sihpw teikan” pwe irail en mihla pahn kaundahn Sises Krais.​—Sohn 10:16; Kaudiahl 7:4.

Krais Kanekelahr Sapwellime Doadoahk en Kalowehdi

9. Ia mwomwen Sises rahnwet nin duwen me Kaudiahl 6:2 kasalehda?

⁹ Sises solahr wiewiahte aramas me dakehlong ahs pwul nan kahnimw, ahpw me e wia ahnsou wet, e wiahier nanmwarki roson emen. Kasansal kin kihda me e dakedake oahs emen​—ni mahsen en Pwuhk Sarawi kin wia kilel en mahwen. (Lepin Padahk 21:31) Kaudiahl 6:2 mahsanih: “I ahpw kilangada oahs pwetepwet men. Me dakeo weuwa kesik ketieu pwoat oh nihn ehu kohieng. E ahpw mwesel kohkohla, kolahng kalowehdi eh imwintihti kan.” Pil soun melkahka Depit ntingihdi: “Kauno pahn ketin katelapahla sapwellimomwi manaman en kaunda wehi pokon sang Saion. E mahsanih: ‘Komwi en kaunda sapwellimomwi imwintihti kan.’”​—Melkahka 110:2.

10. (a) Iaduwen sapwellimen Sises dake oahs oh tangewehn kalowehdi ah tepida mwahu? (b) Iaduwen keieu en sapwellimen Krais doadoahk en kalowehdi ah kamwekidada sampah pwon?

¹⁰ Tepin sapwellimen Sises kana iei me wiawihiong sapwellime imwintihti keieu kehlail akan—Sehdan oh ngehn saut akan. E ketin keseirail sang nanleng keseiraildihdohng sampah. Pwehki ngehn suwed pwukat arail ese me arail ahnsou mwotomwotalahr, irail kihong arail lingeringer rehn aramas akan, wiadahr me kamasepwehk laud. Oh irair en kamasepwehk laud pwukat kei me karasepe pwarada nan Kaudiahl me pid soun dak oahs silimen. (Kaudiahl 6:3-8; 12:7-12) Nin duwen met sapwellimen Sises kokohp kin pid “kilelepen sapwellime ketiket nan mwoahle nanleng oh imwin koasondi wet,” oh dakepen oahs oko pahn imwikihla mahwen, duhpek, oh soumwahu laud kan. (Madiu 24:3, 7; Luk 21:7-11) Duwehte medek en neitik, “medek apwal” pwukat pahn wie lalaudla oh ukuhkla lao lel ahnsou me Krais pahn ketin ‘kanekehla sapwellime irair en kalowehdi’ ni ah pahn ketin karosehsang douluhl nein Sehdan pwihn sansal.a​—Madiu 24:8.

11. Iaduwen poadoapoad en mwomwohdiso en Kristian a wia kamehlelpen sapwellimen Krais kaunda en wia soupeidi?

¹¹ Sapwellimen Sises kaundahn sohpeidi kin sansaliki a kin ketin kolokol mwomwohdiso en Kristian pwe en kak kanokehla ah doadoahk en kalohkiseli duwen Wehio nan sampah pwon. Mendahki soahng uhwong suwed me kin kohsang Papilon Lapalap​—me iei minimin en kaudok likamw akan—​oh pil mwekid kehlail akan en koperment akan, doadoahk en kalohk sohte kin ihte wenwenlahte mwowe, ahpw a kekeirada kin keieu laud nan poadoapoad en sampah. (Kaudiahl 17:5, 6) Met kin wia kadehde kehlail ieu ohng sapwellimen Krais kaunda nin duwen nanmwarki!​—Melkahka 110:3.

12. Dahme kahrehda pali laud en aramas sohte kak esehki ketido en Krais me sohte sansal ong mesen aramas akan?

¹² Meid kapahtou, pwe aramas tohto pil iangahki irail aramas rar ekei me kose me irail Kristian, irail sohte iang tehk mwekid soh sansal akan me poahsoanehda wiewia apwal akan me miehier nan sampah, me mihier ni irair akan me dauliala dahme kin wiewiawi sangehr kawao. Irail pil kin kepitki irail oko me kin kalohki duwen Wehin Koht. (2 Piter 3:3, 4) Pwekihda? Pwehki Sehdan kin karotongala arail madamadau kan. (2 Korint 4:3, 4) Ni mehlel e kin pwainekihda rotorot en ngehn irail akan me kin kose me irail Kristian sangete pahr epwiki kei samwalahr oko, oh pil kahrehiong irail en kesehla arail koapworopwor kesempwal me pid Wehio.

Kesehla Koapworopwor en Wehio

13. Dahme kaduhpwel rotorot en pali ngehn wiahiong irail akan me kose me irail Kristian ekei?

¹³ Sises kohpada me irail akan me kesehla pwoson, duwehte dihpw me mwerediong nanpwungen wihd, oh met pahn kadirehla mwomwohdiso en Kristian ah pahn kahrehda me tohto pahn salelepekla. (Madiu 13:24-30, 36-43; Wiewia 20:29-31; Sud 4) Erein ahnsou dower powe, irail akan me kose me irail Kristian alehiong irailehr kasarawi en mehn liki kan, wiewia oh padahk en kaudok likamw oh pil kahdanekihla mehpwukat kasarawi mwekid oh padahk en “Kristian.” Karasepe, Kristmas kin tepisang wiewiahn kaudok ong koht likamw Mithra oh Saturn. Ahpw, dahme poasoanehda irail akan me kose me irail Kristian en alehda soangen kasarawi pwukat me kaidehn ahn Kristian? The New Encyclopædia Britannica (1974) koasoia: “Kristmas, kasarawi en ipwidi en Sises Krais, wiawihda pwehn kasarehsang kasikasikpen pwarodohn Krais me nektehn wiawi.”

14. Iaduwen padahk kan en Origen oh Augustine ar weliwelian sapwung padahk mehlel en Wehio?

¹⁴ Kitail pil tehk duwen sapwungalahn wehwehpen lepin lokaia “wehio.” Pwuhk ehu me ede The Kingdom of God in 20th-Century Interpretation koasoia: “Ohl me ede Origen kilelehdi wasaht duwen Kristian ahr wekidala doadoahkepen lokaia ‘wehio’ pwe en uhd wehwehki kaunda en Koht nan mongiong en aramas.” Dahme Origen poahsoanehda ah padahk wasaht? Kaidehn iren Pwuhk Sarawi kan, ahpw sang ni “doadoahk oh madamadau en aramas loalokong en sampah me weksang madamadau en Sises oh tepin mwomwohdiso.” Augustine en Hippo (354-430 C.E.) ntingihdi nan nah pwuhk me ede De Civitate Dei (The City of God), me mwomwohdiso iei Wehin Koht. Soangen madamadau wet me sohte poasoanepe nan Pwuhk Sarawi kihong sarawi kan nan Kristendom kahrepen ren patehng oh alehiong irail kehl en palien politik. Oh irail kolokolehr kehl wet erein pahr epwiki kei oh doadoahngki ni ahl en lemei.​—Kaudiahl 17:5, 18.

15. Iaduwen Kalesia 6:7 ah pweida me pid pali tohtohn pelian lamalam en Kristendom?

¹⁵ Rahnwet, sarawi kan dolung dahme re kamwerehdi. (Kalesia 6:7) Sarawi tohto sohsohlahr arail kehl oh pil mweremwerpeseng. Irair wet inenen sansal nan Europe. Pwuhk me ede Christianity Today koasoia, “met imwen sarawi en mahs akan nan Europe sohlahr wia wasahn kaudok ahpw uhd wiahla poudiahl, solahr tohnsarawi ahpw me dir iei aramas me mwemweitla wasao (tourists).” Soangen mwekid wet pil mie wasa teikan nan sampah. Dahme met padahkiong kitail duwen kaudok likamw? E pahn ohla pwehki e sohte alehdi utuht en aramas? Oh iaduwen met ohng kaudok mehlel?

Kaunopada Ohng Rahn Lapalap en Koht

16. Dahme kahrehda lalaudlahr kamakam ong Papilon Lapalap wiahki mehkot kesempwal?

¹⁶ Duwehte ediniei oh pehs ah kin kusdahsang ni volcano iei me memeir ahnsou werei ah kin wia kasalepen me e pahn pospeseng ni ahnsou keren, pil duwehte mwekid en aramas akan me tepida lalaudla arail uhwong palien lamalam nan wasa tohto nan sampah, e wia kilel me kaudok likamw pahn kereniongehr ohla. Ahnsou keren, Siohwa pahn kamwekid palien politik kan en miniminpene oh kauwehla lih suwed karasaraso, Papilon Lapalap. (Kaudiahl 17:15-17; 18:21) Eri iaduwen—Kristian mehlel akan anahne masakada mwekid wet oh pil iangahki irair teikan en “Kahn Kamakam Kowahlap” me pahn kohdo mwurin met? (Madiu 24:21) Soh! Mie kahrepen irail en perenda ni ahnsou me Koht pahn ketin pelianda aramas suwed akan. (Kaudiahl 18:20; 19:1, 2) Kitail tehkpene mehn kahlemeng en tepin Kristian akan nan Serusalem me kousoan wasao.

17. Dahme kin kakehlailih kapehden sapwellimen Siohwa ladu kan ni imwin koasoandi wet?

¹⁷ Ahnsou me sounpei en Rom akan kalowehdi Serusalem nan pahr 66 C.E., Kristian pehmtik ni pali ngehn akan sohte pwuriamwei oh sohte masepwehkada. Pwehki irail wia tohnsukuhl en Koht mwahu kei, irail wehwehki ‘me ohlahn wasahu kerendohr.’ (Luk 21:20) Irail pil ese me Koht pahn ritingohng irail ahnsou, Kristian akan tangasang wasao. Ni Koht ah ketin ritingohng irail ahnsou, Kristian akan tangasang wasao. (Daniel 9:26; Madiu 24:15-19; Luk 21:21) Pil duwehte rahnwet, irail oko me ese Koht oh peikiong sapwellime ohlo kak ahneki koapworopwor ni ahnsou me koasondi suwed wet pahn ohla. (2 Deselonika 1:6-9) Ni mehlel, ni ahnsou me Kahn Kamakam Kowahlap pahn wiawi, irail pahn perenda ‘kesihnenda inen, oh sarada, pwe kamourparail kerendohr.’​—Luk 21:28.

18. Ia pahn imwilahn ahn Kok uhwong koaros me e pahn wiahiong sapwellimen Siohwa ladu kan?

¹⁸ Mwurin ohlahn Papilon Lapalap, Sehdan nin duwen Kok en Makok pahn wia kaimwiseklahn mahwin pwehn pelianda sapwellimen Siohwa Sounkadehde onepek mwahu kan. Nein Kok sounpei kan pahn kohda “duwehte depwek me kin pwaindi sahpwo,” oh irail pahn kasik me e pahn mengei irail en kana. Ia uwen pwuriamwei me re pahn ahneki! (Esekiel 38:14-16, 18-23) Wahnpoaron Sohn ntingihedi: “Mwuhr I ahpw kilangada nanleng eh ritida oh oahs pwetepwet men pwarada. Soundake oahso mwarenki Loalopwoat oh Mehlel. . . Kedlahs keng pwoat uhsang ni ewe, me e pahn kin kalowehkihdi wehi kan.” “Nanmwarki en namwarki kan” kehlail menet pahn kapitala sapwellimen Siohwa tohnkaudok lelepek kan ahpw uhd kamwomwala imwintihti kan. (Kaudiahl 19:11-21, NW) Ia uwen kapwuriamwei en pweidahn kokohp me pid sapwellimen Sises kasansal en linganla!

19. Dahme sapwellimen Krais kana unsek pahn wiahiong sapwellime tohnpadahk lelepek kan, oh dahme ren nannantiong wia ahnsou wet?

¹⁹ Sises pahn “wia mehkot lingan, ni rahno, ong irail akan koaros me kin ahneki pwoson.” (2 Deselonika 1:10) Ke men iang kisehn irail oko me pahn iang kapikaping pwehki sapwellimen Koht Ohlo ah kana? Eri wonoweite mwowe oh apwahpwalih mwahu omw pwoson oh ‘wia kadehdehpen me ke onopadahr, pwe ni awa ieu me ke sohte pahn kasik, nein aramas pahn ketido.’​—Madiu 24:43, 44.

Pehmitik

20. (a) Iaduwen atail pahn kak kasalehda me kitail perenki sapwellimen Koht kisakis en “ladu lelepek oh loalokong”? (b) Soangen peidek dah kan me kitail en idek ong pein kitail?

²⁰ “Ladu lelepek oh loalokong” kin kaukaule kangoange sapwellimen Koht aramas akan en kolokol arail ngiangi ni pali ngehn oh pehmitik. (Madiu 24:45, 46; 1 Deselonika 5:6) Ke kin kapingki mehn kataman pwukat? Ke kin doadoahngki mehn kataman pwukat pwehn koasoanehdiong uhk dahme kesempwal nan omw mour? Ke soh pein idek rehmw: ‘Ai kilikilang wei ni pali ngehn me marain oh kak kahrehiong ie en kilangadahr me Sapwellimen Koht Ohlo wie kakaunehr nanleng ni ahnsouwet? I wehwehkihsangehr nan loalei me e ketin onopadahr en ketikihda sapwellime kadeik sarawi ohng Papilon Lapalap oh pil iangahki koaros me mih pahn ahn Sehdan koasoandi wet?’

21. Dahme kahrehda ekei kak mweidongki masarail en ngehn en rotorotkihla, oh dahme irail en karuwaru wia?

²¹ Ekei aramas me kin iang sapwellimen Siohwa aramas akan kin mweidohng masarail en ngehn en wia rotorotala. Iaduwe, e kak kohsang ni arail sohlahr ahneki kanengamah de solahr kak awiawih, duwehte ekei sapwellimen Sises werek kan en mahs? Ahneki kapwunod en mour oh men ahneki dipwisou, de kalokolok kan kan kin kauwe irailla? (Madiu 13:3-8, 18-23; Luk 21:34-36) Mwein ele ekei irail kin diar me ekei ire kan me irail “ladu lelepek oh loalokong” kin ntingada kan re sohte kak wehwehki mwahu. Ma mepwukat kin wiawihong uhk, se kangoange uhk en pwurohng kakehl sapahl omw sukuhiki Mahsen en Koht oh peki rehn Siohwa pwe ken kak pwurehng kehlailda oh karanihala Ih.​—2 Piter 3:11-15.

22. Iaduwen medemedewe kasansal me pid Sises ah linganlahr oh pil kokohp teikan me pid irewet ah kin kamwekid omw mour?

²² Ni kasansal me Sises ketin marainlao me e ketin wiahiong sapwellime werek kan e wiawi ni ahnsou me re anahne kangoang. Rahnwet, kitail ahnekihier mehn kakehl me laud sang met—uhdahn lingano miehier nan atail ahnosu oh pweidahn kokohp tohto me pid dahme pahn wiawi ni ahnsou linganlahn Sises pil pweidahr. Ni atail pahn medemedewe kanahieng linganpen pweidahn kokohp pwukat oh kesempwalparail ong ahnsou me kohkohdo, kitail en pil iang wahnpoaron Sohn ki pepehm en peren unsek en mohngiong oh koasoia: “Amen! Ketido Kaun Sises.”​—Kaudiahl 22:20.

[Footnote]

Ke Tamataman?

• Nan pahr 1870 samwa, dahme pwihn en “Bible Students” malaulau ieu wehwehkihdahr me pid sapahldohn Krais?

• Ia mwomwen kasansal me pid Sises ah linganlahr ah pweidahr?

• Imwila dah me sapwellimen Sises dake oahs kohlahng kalowehdi wiahiong sampah oh pil wiahiong mwomwohdiso en Kristian?

• Dahme kitail en wia pwe kitail en iang wia kisehn irail oko me pahn mourla ni ahnsou me Sises pahn kaimwisekala sapwellime doadoahk en kalowehdio?

[Kawehwehpen kilel kan nan ehu ehu pali 21]

Mehn kasansal ieu wiahier mehkot mehlel

[Kawehwehpen kilel kan nan ehu ehu pali 22]

Ke ese dahme wiawi ni ahnsou me Krais tepida ah kana?