E Kesempwal Mehnia Pelien Lamalam Ke Pahn Pilada?
PALI laud en kitail kin men kohla net nan sidohwa me mie kepwe tohto ie pwe kitail en kak pilada dahme kitail keieu inengieng. Ma sidohwa ieu kin netiki soahng soangen wahn tuhke oh wahn sahpw tohto kan, kitail kak pilada mehnia me kitail keieu iouki oh dahme mwahu ong roson en atail peneinei. Ma sidohwahn likou me soahng soangen sidail oh pohn likou tohto mih loale, kitail kak pilada dahme keieu konehng emen emen kitail. Ekei pilipil kan me kitail kin wia nan atail mour kin kasalehda dahme kitail mwahuki. Ahpw, pilipil teikan pahn dokedoke dahme pahn wia kamwahupatail, karasepe, atail pilipil ong mwenge mwahu de kompoakpatail loalokong kan. Ahpw, iaduwen atail pilipil me pid pelien lamalam? Elen atail kaudok anahne en ihte wia kasalepen dahme emen emen kitail kin mwahuki? De e pahn poahsoankihda dahme pahn wia kamwahupatail?
Mie soahng soangen pelien lamalam tohto me kitail kak wia atail pilipil sang ie. Wehi tohto kin mweidong aramas kan saledek en pilada pein arail pelien lamalam, oh me tohto kin pehm saledek en kesehla pelien lamalam me arail pahpa oh nohno kan kin keirda loale. Ehu roporop me wiawi nan United States kasalehda me persent 80 en mehn America kan kin “kamehlele me mie ahl tohto me kak kahluwalahng komour.” Nin duwen roporop wet, “emen sang nanpwungen aramas limen kin sapengla oh nda me re wekidala arail pelien lamalam kan mwurin arail laudla.” Ehu roporop me wiawi nan Brazil kasalehda me kereniong pahkis ehu en mehn Brazil kan wekidalahr arail pelien lamalam.
Mahs, aramas akan kin kalapw akamaikihda padahk kan me kin kasalehda wekpeseng en palien lamalam kan. Ahnsouwet, aramas tohto kin ahneki soangen madamadau me, ‘E sohte katepe ma mehnia pelien lamalam ke pilada.’ Ahpw mehlel ieu met? Ahmw pilipil kak wia mehkot kesempwal ong pein kowe?
Me rasehng irail aramas koahiek en netinet me kin idek iawasa kepwe kan kohsang ie, e pahn pil wia elen loalokong ken idek, ‘Ia wasa soangsoangen pelien lamalam pwukat kin tepidohsang ie, oh pwekida?’ Paipel kin kihda pasapeng kan.
Iaduwen Pelien Lamalam kan Ahr Tepin Wiawihda?
Nan Israel en kawao, Nanmwarki Seropoham tepiadahr ehu pelien lamalam kapw mpen sounpahr kid mwohn Sises ah ketidihdo sampah. Seropoham wia keieun nanmwarki en paliepeng en wehin Israel. E ahneki kahpwal en kaminiminpene aramas akan ong ah mehn akadei. “Mwurin eh kupwukupwure mepwukat, e ketin wiahda sansal en kouwol riemen me wiawihkihda kohl. E ahpw mahsanihong aramas akan, ‘E pil wereilahr amwail kin pwurepwure Serusalem pwe kumwail en kaudok ie. Kumwail mehn Israel kan, iet amwail koht kan.’” (1 Nanmwarki 12:28) E sansal mwahu me nanmwarkio men doadoahngki pelien lamalam en kihsang lelepek en aramas akan ong koasoandi me mih nan Serusalem, wasa me re kin wia arail kaudok. Pelien lamalam me Seropoham tepidahr mihmiehki erein pahr epwiki kei oh imwikihla suwed ong aramas rar kei ni ahnsou me Koht ketin kadeikada wehin Israel salelepeko. Ahn Seropoham pelien lamalam en Seropoham wiahdahr pilahn ieu en alehdi manaman en palien politik. Ekei pelien lamalam en wehi kan me kin mihmihte leledo rahn wet kin miehla pwehki arail alehdi manaman en palien politik.
Wahnpoaron Pohl kasalehda pil ehu kahrepen aramas akan ahr kin tepida pelien lamalam kapw: “I ese me mwurin ei pahn mwesel kidien wel kan pahn kohdo nanpwungamwail oh re sohte pahn mweidohng pelin sihpwo en pitla. Pil mie ekei aramas me pahn pwarada sang nanpwungamwail me pahn pitiheki me pwoson akan lokaia likamw, pwe re en idawehnirailla.” (Wiewia 20:29, 30) Kaun aklapalap kan kin kalapw doadoahngki pelien lamalam kan pwe aramas akan en poupali kin irailada. Pelien lamalam kan me kose me irail Kristian ekei kin wiahdahr pwihn tohto kei.
Ihs me Pelien Lamalam kan Men Kaperenda?
Ekei kin tepida ehu pelien lamalam kapw pwehn kaitar dahme aramas tohto mwahuki. Karasepe, makasihn me ede Economist ripohtki duwen pelien lamalam laud kan nan United States. Artikelo kasalehda me pelien lamalam pwukat kin tohtohla mwadang pwehki re kin “doadoahngki wiepe kan me pwihn en pisnis pweida kan kin doadoahngki me iei: en kaperenda towe kan mahs.” Ekei pwihn pwukat kin doadoahngki “video kan, drama kan oh keseng kan nan arail sarawi.” Ekei kaunen pelian lamalam akan nan soangen pwihn pwukat kin kose me re kin padahkiong towe kan en “kepwehpwehla, ahneki roson oh sohte perki mehkot.” Mendahki mie me kin kauwe soangen pwihn pwukat oh nda me irail kin wia pwihn en pisnis en mehn kamweit kan de “pisnis en kihda kaweid kan,” artikelo pil koasoia, “irail kin kihdahte dahme tohn arail pwihn kan mwahuki.” Ripoht wet kaimwisengkihla: “Patpene en pisnis oh pelien lamalam kin uhdahn pweida.”
Mendahki ekei pelien lamalam akan ahr sohte kin nohk duwehte pwihn en pisnis kan, pwihn en palien lamalam pwukat me kin “kaitar dahme towe kan mwahuki” kin katamandohng kitail peneu ieu me Pohl kihda. E ntingihdi: “Aramas akan sohla pahn men rong padahk mehlel, ahpw re pahn idawehnla pein nsenarail; oh re pahn piladahng pein irail sounpadahk tohto me pahn kin koasoiaiong irail soahng kan me re kin men rong. Re pahn sohpeiweisang ni ar rongorong me mehlelo, oh mweidohng ar ahnsou poadopoad mwahl akan.”—2 Timoty 4:3, 4.
Pwehki pelien lamalam tohto kin poahsoankihda ineng en ahneki manaman nan pelien politik, oh ineng en kaperenda aramas akan kin laud sang ineng en kaperenda Koht, e sohte wia mehkot kapwuriamwei me pelien lamalam kin iang pidada wiewia suwed kan duwehte tiahk suwed ong seri kan, pitih aramas akan, mahwen, oh terrorism. Pelien lamalam kan kin kalapw likamw. Iaduwen atail pahn ireikitailsang pwe kitail en dehr mweidong ren pitihkitaildi?
[Kawehwehpen kilel kan nan ehu ehu pali 4]
Pelien lamalam tohto kin poahsoankihda ineng en ahneki manaman nan palien politik, oh ineng en kaperenda aramas akan laud sang ineng en kaperenda Koht