Rar!

Met iei nempehn sounkalohk kan me kitail men kilang nan arail ripoht en kalohk en sounpwong en August 1998 nan United States. Re kak lelohng mehn akadei wet? Ehi, re kak! Nin doken nempehn mwomwohdiso koaros me ahpwtehn wadawadi kasalehda nempehn sounkalohk me mihmi ni uwen meh 1,019,518. Uwen keieu tohto me kapidelong neirail ripoht nan August en 1996 mihmi ni uwen meh 975,829.

Iaduwen wasahn kalohk kan wasaht nan Micronesia me mihmi pahn epwelpen Rahn Ohpis en Guam? Atail mehn akadei iei en kilang sounkalohk 1,300 kapidelong neirail ripoht en kalohk ong sounpwong en August. Atail kak lelohng nempeo ma emen emen sounkalohk wiahda koasoandi en iang kalohk. Ma kitail pahn mwadang tepiada kalohk ni tepin sounpwongo, kitail sohte pahn katiasang wiahda awa tohto nan doadoahk en kalohk erein sounpwong en August.

Atail lamalam ong doadoahk en kalohk pil kak sewese kitail en lel atail mehn akadei. Komw kin kalahnganki kesempwalpen en mwadang ripohtki ahmw awahn kalohk? (Mark 6:30) Pahpa oh nohno kan, kumwail kin nantiong sewese sounkalohk pwulopwul kan me saikinte papidais en kin iang kalohk ahnsou koaros? (Madiu 21:​15-16) Oh elder kan, kumwail kak kangoange mwomwohdiso ni amwail pahn idipek tiengla mwowe nan kalohk?

Ni atail kin miniminpene nannanti, kitail kak lelohng atail mehn akadei kan nan Micronesia oh irail nan United States pahn pil kak lelohng arail mehn akadeio. Ia uwen met pahn wia ehu kaping ong Siohwa!​—⁠Melkahka 47:⁠1.