Padahkiong Meteikan Lokaia Min
1 Mendahki irail kohsang ‘wehi, keinek, aramas oh lokaia’ wekpeseng, Sounkadehdehn Siohwa kan kin wia aramas kei me miniminpene oh pil wia pirien mehlel nan sampah pwon. (Kaudiahl 7:9) Met kin wia mehkot kaselel pwehki rahnwet tohnsampah kin katohrohrpeseng. Iaduwen met a kak wiawi? Pwehki “mie wekidekla en lokaia min” rehrail.—Sepanaia 3:9.
2 Imwila Mwahu kan: Dahkot lokaia min wet? Met iei wehwe pwung en padahk mehlel me dierek nan sapwellimen Koht Mahsen me pid Siohwa oh sapwellime kupwur kan, ahpw mehlel me pid Wehin Koht. Nin duwen me Sises kohpadahr, padahk mehlel kin kalohkseli ki sapwellime pwihn sansal, “ladu lelepek oh loalokong,” oh pwehki met, aramas tohto me kin doadoahngki soangsoangen lokaia kan pil alehdier kaudok mehlel.—Madiu 24:45; Sekaraia 8:23.
3 Ni ahnsou me aramas akan kin sukuhliki lokaia min, irail kin mwekidiki oh kapwungala arail mour en pahrekiong sapwellimen Siohwa kosonned akan. Irail sukuhliki “en kin ahnekipene lamalam tehieu oh kupwurtehieu.” (1 Korint 1:10) Sapwellimen Koht padahk kan kin kahrehong irail en wiewia me pwung oh lokaia min oh mehlel, ahpw keieu ni atail kin padahkiong meteikan Rongamwahu. (Taitus 2:7, 8; Ipru 13:15) Soangen wekidekla mwahu pwukat kin kandandihala Siohwa.
4 Karasepe ieu, ohl emen kasamwohlong ira me kalohk reh oh wia peidek tohto, oh ah peidek kan koaros alehdi pasapengparail sang nan Paipel. Kapehde mwekidki met, kahrehda e tepida onop Pwuhk Sarawi pak 2 nan ehu wihk oh tepida towehda mihding kan. E inenen pwuriamweiki kadek en aramas akan ong ih nan Kingdom Hall, ahpw mehlel pwehki irail soangsoangen tohn wasa kei. Ni ahnsou mwotomwot, ih oh ah pwoud eri wiahda wekidekla tohto nan ara mour oh papidaisla. Sangehr mwo kohla, e sewesehkihong aramas tohto sang 40 pwe ren iang papah Siohwa, iangahki pein ara peneinei tohto. Mendahki e kohwa soumwahu ieu, nan rahn pwukat, e tepida wiahla Regular Pioneer.
5 Padahk ong Meteikan: Irair akan me kin pwarada nan sampah kin kahrehong aramas mohngiong mwahu tohto kei en pwurehng kasawih arail madamadau oh arail elen mour. Kitail en duwehte Sises oh ahneki ineng en sewese irail. Ma kitail pahn pwurehng pwurala rehn aramas me perenki rong oh onop Paipel rehrail iei “kih” ohng sewese irail me nan kapehd mehlel akan en kak sukuhliki lokaia min.
6 Ehu ahl me kin doadoahk mwahu ong aramas akan me soupisek iei en wia onop en Paipel mwotomwot ni ahmw kin kesihnente nan ewen arail wenihmw. (km 5/02 p. 1) Ke songehr met? Ma ke kaunopada ong pwurehng pwurala rehn emen, pilada sang nan Atail Doadoahk Ong Wehio en January 2002 (insert) ehu padahk mwotomwot me pahn pahrekiong irair en mour en tohnihmwo. Pali tohto en padahk mwotomwot akan nan “inserto” wiawihda pwe en imwikihla amwa en uhd koasoia Kupwurki brochure de pwuhken Knowledge. Kaunop mwahu padahk mwotomwot pwukat pwe ken kak tepidahte koasoi a ken mwadangete kihlahng kumwa en wadekpene ehu parakrap akan. Pilada ehu de riau iren Paipel sang nan parakrapo me kumwa pahn wadek oh koasoiapene, oh wia peidek kan me kumwa pahn diar pasapeng mwahu. Met pahn sewese kumwa en pil onop pene ehu parakrap ni ahmw pahn pwurodo mwuhr.
7 Sapwellimen Siohwa aramas akan kin ale kapai tohto pwehki arail kin sukuhliki lokaia min. Kitail nsenohki oh lelepekiong atail sewese meteikan en iang kitail ‘likweriong mwaren Siohwa’ oh ‘iang papah Ih ni minimin.’—Sepanaia 3:9.