Maiou Sang Isip Leldo Keieu en Nanmwahrki en Israel

Moses kahluwa mehn Israel kan sang lidlidu nan Isip ong Dohl en Sainai, wasa me Koht ketikihong sapwellime kosonned kan. Mwuhri, Moses kadarala ohl 12 pwen lipahrok seli nan sahpwen Kenaan. Ahpw irail 10 pwurohdo oh wia neirail ripoht kan me suwed. Kahrehda aramas kan en masapwehk oh men pwurala Isip. Pwehki arail soh pwoson, Koht kaloke mehn Israel kan oh kahreong irail en keikeiru nan sahpwtehn sounpahr 40.

Mwuhri, Sosua eri pilipilda pwen kahluwa mehn Israel kan ong nan sahpwen Kenaan. Pwen sewese irail kalowehdi sahpwo, Siohwa ketin wiahda manaman tohto. E kahreong Pillap Sordan en uhdi sang pwilipwilwei, kehl en Seriko en pwupwedi, oh ketipin en uhdi sohte mwekid erein rahn ehu pwon. Mwehrin sounpahr wenou, irail kalowehdi sahpwen Kenaan.

Sang Sosua kohdo, impan sounpahr 356 mehn Israel kan kin mi pahn epwelipen sounkopwong kan. Kitail sukuhliki tohto en irail pwukat, iangahki Parak, Kidion, Samson oh Samuel. Kitail kin pil wadek duen lih kan duwehte Rehap, Deporah, Sael, Ruhd, Naomi oh Delailah. Pali SILUH kin audaudki poadoapoad en sounpahr 396.