Dahme Kahrehda Ahnsou Inenen Mwotomwotkihla?

AHNSOU. Ele kitail pahn apwaliki kawehwehda ni pwung lepin lokaia wet, ahpw kitail uhdahn wehwehki me atail ahnsou sohte kin kalapw itar. Kitail pil ese me atail ahnsou kin mwadang sohla. Kitail kin kalapw kaulimki koasoia, “Ahnsou nohn mwadang.”

Mendahki met, e sansal me sounnting en poem kan ni lokaiahn wai, Austin Dobson, kin pwung ni ah kosoia nan 1877: “Ahnsou kin mwadang sohla, komw koasoia? Eri, soh! Ahnsou kin mihmihte, kitail me kin sohla.” Sangete ah mehla nan 1921, Dobson solahr mourki sounpar 80 samwa; ahpw ahnsou miemiehte.

Ahnsou Laud

Me pid en tohnsampah Sounkapikada, Paipel padahkihng kitail: “Mwohn nahna kan ar wiawihda, mwohn omwi ketin kapikada sampah, komwi Koht poatopoat emen, oh pahn wia Koht kohkohlahte.” (Melkahka 90:2) De nin duwen me The New Jerusalem Bible kin kawehwe ire wet, “sang ahnsou soutuk lel ahnsou soutuk komwi me Koht.” Ihme ahnsou pahn mihmihte uwen pein Koht pahn ketin ieiaste​—kohkohlahte!

Me weksang Koht, me ketin sapwellimaneki ahnsou poatopoat me E kak ketin doadoahngki nin duwen E kupwurki, kitail kin wadek duwen aramas: “At mour kin mwotomwotkihla omwi engieng; at mour kin mwadang sohrala, rasehng mwenginingin ehu. Sounpar 70, ihte werein at mour​—a ma se kehlail, e pahn lel 80; ahpw pahr pwukat kin kahrehiong kiht pwunodte oh apwal; mour kin mwadang imwisekla, oh se solahr mie.”​—Melkahka 90:9, 10.

Dahme karehda mour rahnwet me inenen mwotomwot, ni en Paipel padahngki ni sansal me kupwuren Koht iei me aramas en mour kohkohlahte? (Senesis 1:27, 28; Melkahka 37:29) Dahme kahrehda aramas kin mourkihte ma keieu werei mwotomwot sang rahn 30,000 ahpw kaidehn mour soh imwi me Koht ketin kupwurki? Dahme kahrehda mouren aramas me mwotomwot? Ihs de dahkot me kin pwukoahki irair kansensuwed wet? Paipel kin ketikihda pasepeng kan me sansal oh kansenamwahu.a

Ahnsou Wie Mwotomwotlahte

Me mah kan pahn kadehde me nan ahnsou keren kan mwekimwekid en wiewia kan nan mour kin wie mwadamwadangla. Emen sounnuhs, Dr. Sybille Fritsch, kasalehda me erein sounpar 200 samwalahro, wihk en doadoahk kin katikitikla sang awa 80 kohdi lel awa 38, “ahpw met sohte kin kauhdi atail kaulimki me sohte atail ahnsou.” E kawehwehda: “Solahr ahnsou; ahnsou inenen kesempwal; kasikasik ahnsou kin duwehte kasikasik iahd ke pahn esingek; mour ehu me nohn kedirepw.”

Kepwe kapw kan kin ritingada ahnsou mwahu kan oh irair kan me dih en mahs akan sohte leme me kak wiawi. Ahpw uwen laud en omw ahnsoun wiahda soahng tohto, kin pil kalaudehla kansensuwed en sohte ahnsoun wiahda soahng pwukat. Nan rahnpwukat, nan wasa tohto nan sampah, aramas kan kin ahneki koasoandi kan me nohn kedirepw, ni arail kin nantihong wiahda soahng kan me re koasoanehdi mwohn e pwandehsang ahnsowo me re kileleiong. Pahpa anahne mwesellahng doadoahk kuloak 7:00 ni menseng, Nohno anahne kaunopada seri kan en lellahng sukuhl kuloak 8:30 ni menseng, Pahpa kahlap anahne tuhwong toahkte kuloak 9:40 ni menseng, oh kitail koaros anahne en onopada pwehn iang mihding kesempwal ehu kuloak 7:30 ni soutuk. Ni atail kin karuwaru kapwaiada koasoandi pwukat, kitail sohte kak ahneki ahnsoun kommoal. Oh kitail kin kaulimki mour en ehuehu rahn me kitail kalapw kapwukapwurehiong.

Kitail Sohte Kelehpw Ahneki Ahnsou Mwotomwot

Imwintihti en Koht, Sehdan me Tepil, meno me ah pilahn mwersuwed kahrehiong en kamwotehla mouren tohnsampah, kin ahnsouwet wiahla emen me kin pein mihla pahn eh suwed. (Pil kilang Kalesia 6:7, 8.) Ni ah koasoia duwen ipwidi en Wehin Mesaia nanleng, Kaudiahl 12:12 kihong kitail koapworopwor ni ah mahsanih: “Eri, ihme kumwail nanleng kan, kumwail perenda, oh koaros me kin kousoan nanleng! Ahpw meid suwediong sampah oh madau! Pwe Tepilo leledohr rehmwa, oh e inenen lingeringer kowahlap pwehki eh ese me eh ahnsou mwotomwotalahr.”

Nin duwen me ireirekdo en ahnsou nan Paipel oh pweidahn kokohp en Paipel kasalehda, kitail ahnsouwet kin momour ni kaimwiseklahn “ahnsou mwotomwoto.” Ia uwen kaperen en ese me en Sehdan ahnsoun saledek pahn ahnsou keren sohla! Ni ahnsou me e pahn selidi, aramas peik kan pahn kaunsekla, oh re kak ale mour soutuk me Siohwa kupwurki ong irail sang ni tepio. (Kaudiahl 21:1-4) Sohte ahnsou solahr pahn wia kahpwal ehu.

Komw kak medewehla ia wehwehn en mour soutuk​—en mour kohkohlahte? Komw solahr pahn nsensuwedki soahng kan me komw sohte wiahda. Ma komw anahne ahnsou laud, komw kak wiahda lakapw, de nan wihk kohkohdo, de nan pahr kohkohdo​—ni mehlel, komw ahneki ahnsou soutuk mwohmwi!

Doadoahngki ni Erpit Ahnsou me Kitail Ahneki Ahnsouwet

Pwehki e wehwehki me ah ahnsoun pitih aramas mwotomwotlahr, Sehdan kin song en kahrehong aramas kan en soupisekla pwe ren sohte ahneki ahnsou en rong Rongamwahu en Wehin Koht. Ihme kahrehda, kitail anahne en kapwaiada kaweid sarawi wet: “Eri, kumwail kanahieng duwen amwail mour me kumwail weweidki. Kumwail dehr duwehte aramas me loalopwon kan, ahpw kumwail duwehla me loalokong kan. Kumwail isaneki ahnsou mwahu koaros, pwe ahnsou pwukat ahnsou suwed kei. Kumwail dehr pweipwei, a kumwail song rapahki dahme Kauno [“Siohwa,” New World Translation] ketin kupwukupwure kumwail en kin wia.”​—Episos 5:15-17.

Ia uwen kesempwal kitail en doadoahngki atail ahnsou ni elen erpit ong mehkan me kesempwal ahpw kitail en dehr kauwehla doadoahngki ong wiewia kan me sohte katepe me sohte pahn wahdo kamwahu soutuk! Kitail en kekeirada lamalamohte me Moses ahneki ni ah pekih rehn Siohwa ni mahsen pwukat sang nan mohngiongih: “Komw ketin padahkihong kiht duwen mwotomwot en at mour, pwe se en loalokongkihla.”​—Melkahka 90:12.

Mehlel, nan sampah nan rahnwet, aramas koaros kin soupisek. Mendahki met, Sounkadehdehn Siohwa kan kin kangoangehkin komwi en doadoahngki ekis omw ahnsou kesempwal en sukuhliki kosonned kan en Koht pwe komw en kak alehdi mour soutuk pahn kaundahn sapwellime Wehio. Ma komw pahn doadoahngkihla awa ehu wihk ehu onopki Paipel, oh “kadehde dahme kupwuren Siohwa,” komw pahn kak pein pehm pweidahn mahsen pwukat: “Sohpeisang me suwed, oh wia me mwahu, eri kadaudokomw kan ahpw pahn koukousoan nan sahpwo kohkohlahte. Me pwung kan pahn koukousoan nan sahpwo oh re pahn sapwenikihla kohkohlahte.”​—Melkahka 37:27, 29.

[Nting tikitik me mi pah]