“Me Tikitik” Wiahla Duwehte “Aramas Kid”
“Me tikitik wiahla duwehte aramas kid, oh wehi tikitik pahn lapalapala rasehng wehi kehlail ehu.”—AISEIA 60:22, New World Translation.
1, 2. (a) Dahme kahrehda rotorot kin kihpedi nan sampah pwon nan rahn pwukat? (b) Iaduwen Siohwa ni ekis ekis kamarainihada sapwellime aramas akan?
“ROTOROT pahn kipehdi wehi teikan en sampah, ahpw ong komwi, marain en Kauno [“Siohwa,” NW] pahn kapiluhkpene. Lingan en sapwellime roson pahn ieiang uhk.” (Aiseia 60:2) Mahsen pwukat kin kawehwehda mwahu irairen sampah tepida sang nan sounpahr 1919 lel met. Pelien Kristendom soikala kilel en Sises Krais ah ketiketier nan mwoahle nanleng me iei ih “marain en sampah.” (Sohn 8:12; Madiu 24:3) Pwehki Sehdan kaunen “me lapalap akan me ahneki manaman nin sampah,” kin “inenen lingeringer kowahlap,” keriesek en senturi wet me inenen lemei, ahnsou me keieu suwed nan poadoapoad en aramas akan. (Kaudiahl 12:12; Episos 6:12) Pali moron en aramas kin mih nan rotorot ni pali ngehn.
2 Pil nan rahnpwukat, marain kin dakedakerte nan wasa kan. Sapwellimen Siohwa marain kin ‘dakada’ pohn sapwellime ladu kan, irail luwen me keidi kan, me kin wie kisehn “lih” en lahng ahpw kin wiliwilian “liho” nin sampah. (Aiseia 60:1) Ahpw, ni mehlel, sangehr ahnsou me re saledekla sang Papilon nan pahr 1919, irail kin kasansalehda lingan en Koht ni ahr kin mweidong ahr ‘marain en sansal mwohn aramas akan pwe re en kilang arail wiewia mwahu kan.’ (Madiu 5:16) Sang nan pahr 1919 lel nan pahr 1931, marain en Wehio kin ekis ekis maramarainla ni en aramas pwukat kin kesehla padahk kan en Papilon kan. Re tohtohla lellahng aramas nen kei nin duwen Siohwa kapwaiada sapwellime inou: “Ahpw I pahn kapokoneikumwailpene, rasehng pelin sihpw me pwurodohng nan kehl ehu. Sapwamwailo eri pahn pwurehng direkihla aramas, rasehng mohs kaselel me diren sihpw.” (Maika 2:12) Nan pahr 1931, sapwellimen Siohwa lingan pohn sapwellime aramas kin sansalda ni ahnsou me re alehdi ahd wet: Sounkadehdehn Siohwa kan.—Aiseia 43:10, 12.
3. Iaduwen e sansalda me sapwellimen Siohwa marain pahn pil dakerada pohn aramas teikan likin irail pwihn me keidi kan?
3 Ahpw marain sang Siohwa pahn ihte kohwong irail luhwen “pwihn tikitik”? (Luk 12:32) Soh. Nan makisihn en September 1, 1931, The Watch Tower kawehwehda duwen pil ehu pwihn. E kawehwehda mwahu duwen Esekiel 9:1-11, oh e kasalehda me ohlo me kin weuwa mehkot me e pahn ntingki kin rasehng luwen me keidi kan. Ihs irail me pahn ale kilel ehu ni temwarail kan sang rehn “ohlo”? “Sihpw teikan” iei irail akan me kin ahneki koapworopwor en mour nin sampah paradais ni ahnsou kohkohlahte. (Sohn 10:16; Melkahka 37:29) Nan pahr 1935, irail dehdehkihla me pwihn wet, “sihpw teikan,” iei irail pwihn en “pokon kalaimwun . . . me kin kohsang wehi koaros” nan kasansal me wahnpoaron Sohn kilangada. (Kaudiahl 7:9-14) Sang pahr 1935 lao lel met, re kin nsenohki en kapokonepene pwihn en pokon kalaimwun.
4. Ihs irail “nanmwarki kan” oh “wehi kan” me Aiseia 60:3 kasalehda?
4 Kokohp en Aiseia kin koasoiada duwen doadoahk en kapokonepene aramas akan: “Wehi kan pahn men iangada paieki omw marain, oh nanmwarki kan pahn men iangada paieki lingan kapw en omw mour.” (Aiseia 60:3) Ihs irail “nanmwarki kan” me kileledi wasaht? Irail iei luwen 144,000, me kin iang Sises Krais, me wiahla ienge nanmwarki kan ong Wehin nanleng oh irail kin tiengala nan doadoahk en kalohk. (Rom 8:17; Kaudiahl 12:17; 14:1) Rahnwet, irail luwen me keidi kid te me ni sansal kin malaulau sang “wehi kan,” oh “wehi kan” iei irail akan me kin ahneki koapworopwor en mih nin sampah oh kin sohpeiong Siohwa pwehn ale kaweid kan oh pil luke aramas teikan en wie duwe.—Aiseia 2:3.
Sapwellimen Siohwa Ladu Ngoang kan
5. (a) Dahme kin kasalehda me ngoang en sapwellimen Siohwa aramas akan sohte luwetala? (b) Mehnia wehi kan me sounkalohk kan tohtohla wasa ko nan pahr 1999? (Kilang chart nan pali 17-20.)
5 Erein senturi wet, Sapwellimen Siohwa Sounkadehde kan kasalehdahr ahr ngoang! Oh mendahki ahr kin lelohng kahpwal akan, ahr ngoang sohte tikitikla ni ahnsou me pahr 2000 leledohr. Re kin nsenohki sapwellimen Sises kehkehlik: “Kohwei wasa koaros oh padahkiong tohn wehi kan koaros pwe re en wiahla nei tohnpadahk.” (Madiu 28:19, 20) Nan pahr me ahpwtehn nek, nempe en irail sounkalohk kan en rongamwahu lellahng nempe me keieu tohto: 5,912,492. Oh irail kin doadoahngkihla awa 1,144,566,849 koasokoasoiong aramas teikan duwen Koht oh sapwellime kupwur kan. Irail kin pwurala rehn aramas akan me kin perenki rong pahn pak 420,047,796 oh re kin onop Paipel rehn aramas 4,433,884 ni soh isepe. Ia uwen kaselel ahr kin ngoangki wia doadoahk wet!
6. Koasoandi kapw dahieu tepida wiawi ong pioneer kan, oh ni ahl dahieu me sounkalohk kan mwekidki koasoandi kapw wet?
6 Nan sounpwong en January nan pahr samwalahro, pwihn en Governing Body wekidala koasoandi en awa kan ong pioneer kan. Pwehki koasoandi kapw wet, sounkalohk tohto kakehr iangala doadoahk en regular oh auxiliary pioneer. Karasepe ieu, sang keieun sounpwong lel kapahieun sounpwong en pahr 1999, rahn ohpis en Netherlands aleier doaropwe en iang doadoahk en regular pioneer pahn pak pahieu tohto sang pahr samwalahro. Ghana ripohtki met: “Ni ahnsou me koasoandi kapw ong awa kan en pioneer tepidaher, irail akan me iang doadoahk en regular pioneer kan tohtohla.” Nan pahr en kalohk en 1999, nempe en pioneer kan nin sampah pwon kin lella meh 738,343—mehn kahlemeng mwahu ehu en ‘ngoangkihte wiewia me mwahu.’—Taitus 2:14.
7. Iaduwen Siohwa kapaiada sapwellime ladu kan ni ahr kin inenen pwerisek nan arail papah Koht?
7 Siohwa me kapaiada irail akan me kin ngoangki wia doadoahk wet? Ei. E padahkiong soukohp Aiseia en koasoia met: “Kilengseli oh kilang dahme wiewiawi: noumw aramas akan pokonpenehr pwe re en pwarodohng rehmw! Noumw pwutak kan pahn kohdo sang nan sahpw doh kan; oh noumw serepein kan pahn pelikilik kohdo rasehng seri kei.” (Aiseia 60:4) Sapwellimen Koht “ohl” oh “lih” keidi kan me kohpenehr kin inenen pwerisek nan arail papah Koht. Oh ni ahnsou wet, sapwellimen Sises sihpw teikan kin iang sapwellimen Siohwa “ohl” oh “lih” keidi kan pokonpene nan sahpw oh deke 234 kan.
“Soangen Wiewia Mwahu Koaros”
8. Mehnia ‘doadoahk mwahu kan’ me Sounkadehdehn Siohwa kan kin wia?
8 Kristian akan ahneki pwukoah en kalohki rongamwahu en Wehio oh sewese aramas akan me kin perenki rong en wiahla tohnpadahk kan. Ahpw re kin kak wia oh koahiekla ni “soangen wiewia mwahu koaros.” (2 Timoty 3:17) Ihme kahrehda, re kin, ni limpoak sewese ahr peneinei kan, kadek ong meteikan, oh mwemweitla rehn me soumwahu kan. (1 Timoty 5:8; Ipru 13:16) Oh pil mie irail akan me kin pein toukihda ahr ahnsou kan en iang doadoahk en kauwada Kingdom Hall kan—met ehu doadoahk me pil kin wia kadehde mwahu.Nan Togo, mwurin Kingdom Hall ehu koukouda nek, mie ekei kaun akan en pelien lamalam ehu, irail men ese dahme kahrehda Sounkadehdehn Siohwa kan kak kawauda pein ahr ihmw sarawi kan ahpw pein arail pelien lamalam anahne pwain aramas akan en kauwada arail ihmw sarawi kan! Mie ripoht sang Togo me koasoiada duwen Kingdom Hall kan me kin kokouda me inenen mwahu oh aramas akan me kin mih limwahn Kingdom Hall pwukat kin inenen pwungki mehlel oh ekei aramas kin song en rent de kauwada ihmw akan nan wasa kan me Kingdom Hall kan pahn kokouda ie.
9. Iaduwen Sounkadehdehn Siohwa kan mwekidki ni ahnsou me kahpwal kan kin pwarada?
9 Ekei ahnsou, pil ehu soangen ‘doadoahk mwahu’ kin wiawi. Nan pahr me ahpwtehn nek, mie sahpw tohto me kin lelohng kahpwal kan duwehte melimel oh lapake, oh pali laud en ahnsou, irail akan me kin keieu mwadang pwarada oh sewese aramas akan me anahne sawas iei Sounkadehdehn Siohwa kan. Karasepe ieu, pali laud en sapwen Honduras ohkihla melimel me adaneki “Mitch.” Rahn ohpis en wasao mwadangete koasoanehdi pwihn en aramas akan me pahn koasoanehdi prokram en sawas. Sounkadehde kan nan Honduras oh sahpw teikan kin sawaskihda likou kan, mwenge, wini, oh anahn kesempwal teikan. Pwihn en kauwada Kingdom Hall kan kin doadoahngki ahr koahiek kan en pwurehng onehda sapahl ihmw akan. Ni ahnsou mwadang, riatail brother kan me kin lelohng kahpwal kin alehdi sawas oh met kin sewese irail pwurehng wia ahr wiewia kan. Nan sapwen Ecuador, Sounkadehdehn Siohwa kan pil sewese riarail kan ni ahnsou me lapake kauwehla ekei ihmw akan. Ni ahnsou me aramas kilangada ia uwen koahiek Sounkadehde kan ni ahr kin kihda ahr sawas mendahki kahpwal kan me re lelohng, emen kaun nan koperment nda: “Ma I kak doadoahngki pwihn wet, I kak wia soangen doadoahk tohto! Aramas duwehte kumwail anahne en mihla wasa koaros nin sampah pwon.” Soangen doadoahk mwahu pwukat kin wahdohng Siohwa Koht kaping oh met kin kadehde duwen atail “kaiahn en pali ngehn me inenen katapan mehlel ni soahng koaros.”—1 Timoty 4:8.
Irail “Pipihr Kohdo Duwehte Depwek kei”
10. Mendahki irail pwihn en me keidi kan kin malaulaula, dahme kahrehda mwaren Siohwa wie lohkiseli laudsang mahs?
10 Siohwa ketin mahsanih: “Soahng dah kei me tangatang kohdo likamwete depwek kei, likamwete mwuroi kei me pipihr pwurupwurodong nan pasarail kan? Iei sohp kei me tangatang kohdo sang sahpw doh kan; re weuwa kohdo sapwellimen Koht aramas akan ong nan uhdakarail. . . . Mehn liki kei pahn onehda sapahl omw kehl kan, oh ar nanmwarki kan pahn papahiuk.” (Aiseia 60:8-10) Irail me keieu mwekidki sapwellimen Siohwa ‘marain’ iei sapwellime “seri kan,” Kristian me keidi kan. Mwuri, “mehn liki kei,” me wehwehki irail me iang pokon kalaimwun, me kin ni lelepek papah riarail me keidi kan oh idawehnla ahr mehn kahlemeng mwahu en kalohki rongamwahu. Mendahki irail me keidi kan kin malaulaula, mwaren Siohwa kin lohkiseli nin sampah pwon laudsang mahs.
11. (a) Dahme kin wiawi lel nan atail ahnsou oh met kin imwikihla dah nan pahr 1999? (b) Mehnia wehi kan me aramas tohto papidaisla nan pahr 1999? (Kilang chart nan pali 17-20.)
11 Ihme kahrehda, aramas rar kei kin kohpene “likamwete mwuroi kei me pipihr pwurupwurodohng nan pasarail kan,” oh re kin diar meleilei nan mwomwohdiso en Kristian. Aramas lop kei kin iangala padahk mehlel nan pahr koaros, oh wenihmwo wie langalangete ong aramas akan en pedolong. Aiseia mahsanih: “Omw ewen kehl kan pahn kin langalang nin rahn nipwong, pwe nanmwarkien wehin liki kan en kin ketikidohng uhk ar kepwe kesempwal kan.” (Aiseia 60:11) Nan pahr samwalahro, aramas 323,439 papidaisla pwehn kadehde duwen ahr inou ong Siohwa, oh e saikinte ritingihdi wenihmw akan. “Dipwisou kesempwal kan en wehi kan koaros,” me wehwehki irail me kisehn pokon kalaimwun, kin pedolongete nan wenihmw pwukat. (Akkai 2:7) Aramas koaros me men kohkohlahsang rotorot kakete pedolong nan wenihmw pwukat. (Sohn 12:46) Kitail en koapworopworki me aramas pwukat koaros sohte pahn kesehla ahr kalahnganki maraino!
Eimah Mendahki Kalokolok
12. Iaduwen irail akan me kin poakohng rotorot kin song en kakunla maraino?
12 Irail akan me kin poakohng me rotorot kin kailongki sapwellimen Siohwa marain. (Sohn 3:19) Ekei pil kin song en kakunla maraino. Kitail wehwehkier me met pahn wiawi. Pil Sises, “me iei marain mehlelo me pwarodohng sampah pwe en kamarainih aramas akan koaros,” aramas akan me kauwe oh uhwong ih, oh kaimwisekla, ienge mehn Suhs akan kemehla ih. (Sohn 1:9) Erein senturi 20, Sounkadehdehn Siohwa kan pil kin lelohng kauwe kan sang aramas akan, oh re kin lekidekiong nan kalabus, oh arail doadoahk kin irairdi, ekei kamakamalahr, ni ahr kin ni lelepek kasansalehda sapwellimen Siohwa marain. Nan pahr keren samwalahr kan, irail kan me kin uhwong kin uhd doadoahngki palien nuhs en kaparaseli likamw akan me pid duwen irail akan me kin weuwa sapwellimen Koht marain. Ekei men pitihdi aramas akan oh kahrehong irail en kamehlele me Sounkadehdehn Siohwa kan iei pwihn keper ehu oh koperment kan inapwihiraildi sang wia ahr doadoahk. Ahpw aramas pwukat pweida?
13. Dahme imwila sang ni atail kin doadoahngki atail loalokong en kihla ire kesempwal kan me kin pid atail doadoahk ong pelien nuhs kan?
13 Soh. Ni ahnsou me konehng, Sounkadehdehn Siohwa kan kin doadoahngki palien nuhs kan pwehn kawehwehda duwen dahme mehlel. Met kin imwikihla mwaren Siohwa en mih nan nuhspepa oh makisin kan, radio, oh TV. Met kin imwila mwahu nan doadoahk en kalohk. Karasepe ieu, nan Denmark, mie prokram ehu nan TV me kin pid oaralap wet “Dahme Kahrehda Pwoson en Mehn Denmark kan kin Kohkohdi.” Re koasoiong aramas me kin wiliandi Sounkadehdehn Siohwa kan oh pelien lamalam teikan. Mwurin prokram wet, emen lih me kilang prokramo koasoia: “E sansal mwahuehr ihs me sapwellimen Koht ngehn sarawi kin ketiket rehrail.” Lih menet tepida onop Paipel.
14. Irail akan me kin uhwong Sounkadehdehn Siohwa kan pahn pwuriamwei ni arail pahn diarada dah?
14 Sounkadehdehn Siohwa kan esehla me aramas tohto nin sampah wet pahn uhwong irail. (Sohn 17:14) Ahpw re kin kehlailkihda kokohp en Aiseia: “Seri kan me nein irail ko me kahpwalihkumwaillahr pahn kohdo oh poaridihsang uhk pwe re en waunekin uhk. Koaros me mwamwahlikin uhk mahso pahn pil poaridihsang uhk oh ekerkin uhk, ‘Kahnimw en Kauno [“Siohwa,” NW],’ ‘Saion, kahnimw en Koht sarawien Israel.’” (Aiseia 60:14) Irail me kin uhwong kan pahn pwuriamwei ni arail pahn ahnsou keren diarada me irail kin wia peipei ong Koht. Ihs pahn kak kana nan soangen mahwen duwehte wet?
15. Iaduwen Sounkadehdehn Siohwa kan kin “mihk pilen dihdi en wehi kan,” oh iaduwen met kin sansal nan arail doadoahk en kalohk?
15 Siohwa pil inoukihda met: “I pahn wiakinuhkala mehkot mehn kalahki ong ahnsou kohkohlahte . . . Ke pahn mihk pilen dihdi en wehi kan oh ahn nanmwarki kan dihdi ke pahn pil mihk oh ke pahn uhdahn ese me ngehi Siohwa, Sounkomourpomw.” (Aiseia 60:15, 16, NW) Ei, Siohwa kin wie Sounkomour ong sapwellime aramas akan. Ma re pahn likih ih, irail pahn kak “mour kohkohlahte.” Oh re pahn “mihk pilen dihdi en wehi kan,” ni arail pahn doadoahngki soahng kan pwehn kak utungada kaudok mehlel. Karasepe ieu, doadoahngki ni loalokong computor kan oh mehn lokaia teikan kin sewesehda ntingpen The Watchtower en kak wiahki teieu wiawihda ni lokaia 121 oh Awake! ni lokaia 62. Mie prokram en computor ehu me wiawihda pwehn sewese Paipel me adaneki New World Translation en kawehwehdi ni lokaia teikan, oh kawehwe pwukat kin wahdohng peren ong aramas akan. Ni ahnsou me Pali Nting en Krihk wiawihda ni lokaiahn Croatian nan pahr 1999, aramas kid kei kin sengisengki ahr peren. Mie brother mah men me koasoia: “I awiawih Paipel wet ni ahnsou reirei. Met I kak mehla oh nsenamwahu!” Uwen tohtohn Paipel en New World Translation me kawehwehdi unsek oh ekei soh kin daulihla me rar pak 100 ni lokaia 34.
Koasoandi en Tiahk Ileile Ehu
16, 17. (a) Dahme kahrehda e kesempwal en kolokolte sapwellimen Siohwa koasoandi ileile kan mendahki e apwal en wia? (b) Ekspiriens dahieu kin kasansalehda me irail me pwulopwul kan kak liksang samin kan en sampah wet?
16 Sises mahsanih: “Pwehki mehmen me kin wia me suwed kin kailongki marain en me mehlel.” (Sohn 3:20) Ni pali teio, irail akan me kin mih nan maraino, irail kin poakohng sapwellimen Siohwa koasoandi en tiahk ilelei kan. Siohwa doadoahngki Aiseia en koasoia met: “Noumw aramas akan koaros pahn kin wia dahme pwung.” (Aiseia 60:21a) E kak wia apwal ehu en kolokolte tiahk pwung kan nan sampah ehu me dipen nenek, likamw, noarok, oh aklapalap kin inenen reklahr wasa koaros. Karasepe ieu, nan ekei sahpw, doadoahk en mwohni kan kin kekeirada, oh e inenen mengei en uhd mwohniki mwohni kan. Ahpw, Pohl kihda kaweid wet: “Ahpw irail kan me men kepwehpwehla kin pwupwudiong nan songosong oh lohdiong nan lidip en ineng pweipwei oh keper tohto, me kin kauweirailla.” (1 Timoty 6:9) Ia uwen ah pahn nok wia irair en paisuwed ehu ni ahnsou me emen pahn mwohniki palien pisnes kan oh sohlahr kesempwaliki mehkan me kesempwal, duwehte werekiong rie Kristian akan, papah sarawi, tiahk mwakelekel kan, oh pwukoah en peneinei kan!
17 Kolokolte koasoandi en tiahk pwung kan kak wia mehkot apwal ong me pwulopwul kan, pwe iengarail me tohto kin doadoahngki wini suwed oh wia dipen nenek. Nan ehu sukuhl nan sapwen Suriname, pwutak mesamwahu men kasonge emen serepein me sounpar 14 en wia nsen pwopwoud. Serepein menet kahng, e uhd kawehwehda me Paipel kin keinapwidi tiahk wet likin pwopwoud. Nan sukuhl, serepein teikan kin kapailoke ih oh nantihong en kawukihla eh madamadau, irail uhd ndaiong ih me serepein kan koaros men wendi rehn pwutako. Ahpw, serepein menet kesihnenda teng. Wihk kei mwurin met, irail diarada me pwutak menet ahneki soumwahu HIV oh e soumwahuda laud. Serepein menet inenen peren pwehki e peikiong sapwellimen Siohwa kaweid en ‘liksang dipen nenek.’ (Wiewia 15:28, 29) Sounkadehdehn Siohwa kan kin perenkihda kilangada me pwulopwul kan nanpwungarail me kin kesihnenda teng ong dahme pwung. Ahr pwoson, oh pwoson en ahr pahpa oh nohno kan, kin ‘kalinganada’—kawauwih—mwaren Siohwa Koht.—Aiseia 60:21b.
Siohwa kin Kahrehda Doadoahk wet en Kekeirada
18. (a) Wiewia kesempwal dahieu me Siohwa wiaiong sapwellime aramas akan? (b) Mehn kadehde dahieu mie me pahn kasansalehda me pwihn en Siohwa pahn kekeirada, oh koapworopwor dah kei kin awiawih irail kan me kin mih nan marain?
18 Ei, Siohwa kin kamarainihda sapwellime aramas akan, kapaiada oh kahluwa oh kakehle irail. Erein senturi 20, re kilangehr pweidahn mahsen en Aiseia: “Me tikitik wiahla duwehte aramas kid, oh wehi tikitik pahn wiahla duwehte wehi kehlail ehu. Ngehi, Siohwa pahn koasoanehdi pwe irair wet en kak pweida mwadang ni ahnsawi eh pahn leledo.” (Aiseia 60:22) Nan pahr 1919, irail me malaulau, ahpw “me tikitik” uhd tohtohla oh wiahla “aramas kid.” Oh kekeirada wet saikinte nek! Nan pahr me ahpwtehn nek, aramas 14,088,751 iang towehda Katamanpen Kamatalahn Sises. Pali laud en irail kaidehn Sounkadehdehn Siohwa kan. Kitail kin perenki kilang irail pwukat kan me kin iang towehda wiewia kesempwal wet, oh kitail kin luke irail en wonoweite nan maraino. Siohwa kin kamarainihda sapwellime aramas akan. Wenihmw akan en pedolong nan sapwellimen Siohwa pwihn kin langalangete. Kitail koaros en nantihong en mih nan sapwellimen Siohwa marain. Kapai kaselel kan pahn kohwong kitail ni ahnsouwet! Oh ia uwen laud atail peren ni ahnsou kohkohdo ni ahnsou me kapikapikda kan koaros pahn kapinga Siohwa oh perenkihda sapwellime lingan!—Kaudiahl 5:13, 14.
Komw Kak Kawehwe?
• Ihs me kin kasansalehda sapwellimen Siohwa lingan nan imwin rahn pwukat?
• Dahme kin kasansalehda me ngoang en sapwellimen Siohwa aramas akan sohte tikitikla?
• Ia ekei doadoahk mwahu kan me Sounkadehdehn Siohwa kan kin kedirepwki wia?
• Mendahki kalokolok lemei kan kin wiawi, dahme kitail kak likih?
[Chart nan Pali 17-20]
1999 SERVICE YEAR REPORT OF JEHOVAH’S WITNESSES WORLDWIDE
(See bound volume)
[Kilel nan Pali 15]
Aramas akan kin wia pokopokondohngete Sapwellimen Siohwa Pwihn
[Kilel nan Pali 16]
Kitail kin peren pwe Siohwa kin mweidong wenihmw akan en langalangete ong irail akan me kin poakohng maraino