Kalohkiseli Rongamwahu nan Mweten Rais kan en Taiwan

Kitail Soangen Aramas Me Ahneki Pwoson

Kalohkiseli Rongamwahu nan Mweten Rais kan en Taiwan

TAIWAN kin kalap keteu, me kahrehda eh kak dolung rahk en rais riau ehuehu sounpar. Ahpw, ekei pak, sohte kin keteu, oh kisin weren rais kan kin mehla. Ni ahnsou me met kin wiawi, soumweto kin pwangada? Soh. E ese me e anahne en dadaurete. E kin padokedi wahr kapw kan oh pwurehng padokala mwahto. Eri, ma irairo mwahula, soumweto pahn dolung rahk tohto. Padokedi oh dolung ni pali ngehn pil duwehte met.

Dadaurete nan Rahk en Pali Ngehn

Erein sounpar tohto Sounkadehdehn Siohwa kan nan Taiwan kin doadoahk laud pwehn padokedi oh dolung weren padahk mehlel en Pwuhk Sarawi nan ekei wasa me sohte mwomwen pahn mie wah. Ehu karasepe iei nan Miao-li County. Aramas sohte kin kalap perenki rong kalohk me kin wiawi wasao. Ihme nan 1973 ehu pwopwoud en special pioneer ale pwais en kalohk wasao nin duwen sounkalohk en Wehio kaukaule. Nin tepio, ekei kasalehda arail perenki rong rongamwahuwo. Ahpw, kedekedeo re pil sohla perenki. Special pioneer riemenet eri kosoulahng ehu wasa tohrohr.

Nan 1991 special pioneer riemen ale pwais en kalohk wasao. Ahpw pil pwurehng dahme wiawi kasalehda me irairo saikinte konehng ahnsoun kekeirada ni pali ngehn. Mwurin sounpar kei, special pioneer ko pil pwurehng ale pwais ong wasa me re koapworopworki me aramas tohto pahn men rong. Ihme kahrehda, sahpwo ni karasaras sohla me kin kamwerek weren tuhke erein sounpar tohto.

Pwurehng Kamwerek Dolung Pweida Mwahu

Nan September 1998 re pil koasoanehdi en rapahki wasa kan me aramas kan pahn perenki rong nan wasa kan nan Taiwan me kalohk saikinte lel. Iaduwen re pahn wia met? Ni arail kihong special pioneer 40 en lepin ahnsou en kalohk nan wasa kan aramas tohto kin mie me kalohk saikinte wiawi ie.

Kahnimw riau me karanih Miao-li County iang pilipilda ong doadoahk en kalohko. Sister kiripw pahmen me pilipilda en kalohk wasao erein sounpwong silu pwehn tehk mahs ma mie aramas me pahn perenki rong. Mwurinte arail lel wasao, re ntingihdi ripoht kaselel kan duwen nempehn aramas kan me perenki rong me re diarada. Lao lel ahnsou me re kanekehla sounpwong siluh en arail pioneer nan wasao, re wiadahr onop en Paipel tohto rehn aramas akan. Re pil wiadahr ehu pwihn en onop pwuhk ki sawas en emen elder sang ehu mwomwohdiso me karanih wasao.

Meh silimen sang nanpwungen sister pahmeno kasalehda me re men kaukaulehte apwalih “war pwulopwul” kan me wie kekeirada mwahu. Kedekedeo, riemen rehrail pilipilda en wia special pioneer kaukaule, oh me kasilimeno kaukaule kalohk nin duwen regular pioneer men. Emen elder sang ehu mwomwohdiso me karanih wasao kosoudo rehrail pwehn sewese irail. Tohtohsang aramas 60 iang towehda tepin kapahrek ong wehipokon me wiawi wasao. Ahnsouwet mwomwohdiso me karanih irail kin sewese pwihn wet me ahpwtehn tepida en kaukaule wia mihding en Rahn Sarawi iangahkihte onop en pwuhk tohto. Ahnsou keren mwomwohdiso kapw ehu pahn kokouda wasaht.

Dadaurete Wahdo Kating kan nan Ekei Sapwen Taiwan

Wasa teikan pil mwekidiki rongamwahuwo ni ahlohte. Nan I-lan County ni paliepeng en palimese en sahpwo, ehu Onop en Pwuhk en Mwomwohdiso wiawihda nan wasa me special pioneer en lepin ahnsou kin kalohk ie.

Nindoken e wia kalohk en ihmw lel ihmw ni ehu ni soutik, emen special pioneer en lepin ahnsou tuhwong emen pwutak oh pioneero kasalehong ehu doaropwehn luhk me kin kileledi mihding kan en mwomwohdiso. Pwutako mwadangete idek: “I kak towehda mihding pwong en lakapw? Ma ehi, dahme I pahn likouwih?” Pioneer menet kin wia onop en Paipel rehn aramas walimen ehuehu wihk. Tohtohn irail kan me kin onop Paipel kin mwadangete wiahda pilahn en wiahla sounkalohk en rongamwahuwo, ki mehn akadei en papidaisla.

Emen aramas nan kahnimw wette kin iang sarawi sounpar tohto ahpw e sohte kak diarada emen me pahn padahkihong ih Paipel. Ni ahnsou me e rongada duwen koasoandi en onop Paipel, e isanekihla ahnsou mwahuwo. E ale kangoang en kaunopada nah mehn kasukuhl kan mwowe. Ni ahnsou me special pioneer en lepin ahnsou pwaredo pwehn wia onopo, e diarada me liho wiadahr ah “homework” ni ah pwainda ehu pwuhken nting oh kin ntingihdi nan pwuhko peidek kan me ntingdi nan pwuhko me re onopki. Mwurin met e kin ntingihdi ah pasepeng kan ong ehuehu peidek ko. E pil ntingihdi nan nah pwuhko iren pwuhk sarawi kan me audepahr sohte ntingdi pwon. Lao lel ahnsou me sistero pwaredo pwehn wiahda keieu onopo, liho kaunopadahr tepin mehn kasukuhl siluwo!

Soangen imwila mwahu me duwehte met kin pil sansal nan kahnimw en Dongshih nan werengen Taiwan. Special pioneer en lepin ahnsou kan kihla brochure daulih 2,000 nan erein sounpwong silu me re kalohk wasao. Lao lel ni sounpwong kesiluwo, re kin wia onop en Paipel rehn aramas 16. Kahnimwo ohkihla laud rerrer en sahpw ehu me lel nan werengen Taiwan ni September 21, 1999, ahpw ekei aramas kan me perenki rong kaukaulehte kekeirada ni pali ngehn, mendahki re anahne en seiloki awa ehu kohlahng ni Kingdom Hall me keieu karanih irail pwehn iang towehda mihding. Ehi, dadaurete me anahn pwehn dolung rahk mwahu, mendahki ma rahk en war de rahk en pali ngehn.

[Map]

(For fully formatted text, see publication)

SAINA

Taiwan Strait

TAIWAN

[Credit Lines]