Iaduwen Kitail Kak Diarada Kaudok Mehlel
PALI laud en pelien lamalam kan kin nda me dahme re kin padahngki kin pwildohsang rehn Koht. Kahrehda, kitail anahne medemedewe mahsen kan en sapwellimen Sises wahnpoaron Sohn, me ntingihdi: “Kompoakepahi kesempwal ko! Kumwail dehr kamehlele irail koaros me kin koasoia me Ngehn Sarawio kin ketiket rehrail, ahpw kumwail song irail pwe kumwail en wehwehki ma ngehn me mihmi rehrailo iei Ngehno me ketido sang rehn Koht. Pwehki soukohp likamw tohto kin kohkohseli wasa koaros.” (1 Sohn 4:1) Iaduwen kitail kak song mehkot pwehn ese ma e kohsang rehn Koht?
Soahng koaros me kin kohsang rehn Koht kin kasalehda sapwellime irair kan, ni mehlel sapwellime irair me keieu kehlail, iei limpoak. Karasepe, atail koahiek en ned, me kak kahrehiong kitail en perenki pwohmwahu en tuhkehn wini kan (herb), wahnrohs kan, de pilawa me ahpwtehn umwda, iei kasalepen sapwellimen Koht limpoak. Atail koahiek en kilang kihrlahn ketipin, menpihr, de pohkomwokomw en seri men kin kasalehda sapwellimen Koht limpoak ong kitail. Pil duwehte atail koahiek en rong keseng kaselel, ngilen menpihr, de ngilen emen me ke poakepoake. Mwomwen atail wiawihda pil kin kasalehda sapwellimen Koht limpoak mendahki atail wia aramas sou unsek kei. Ihme kahrehda kitail kin kalapw kilang mehlelpen mahsen en Sises kan: “Kihwei kaperen sang ale.” (Wiewia 20:35) Kitail kin perenki kasalehda limpoak pwehki kitail wiawihda “duwehte [Koht].” (Senesis 1:27) Mendahki Siohwa ah pil ketin sapwellimaniki irair teikan, limpoak me keieu sikla nanpwungen sapwellime irair kan.
Nting kan me kohsang rehn Koht anahne kasalehda sapwellime limpoak. Pelien lamalam en sampah kan kin mie neirail nting en kawa ko me tohtohie. Iaduwen, soangen nting pwukat kin uhdahn kasalehda sapwellimen Koht limpoak?
Ni mehlel, pali laud en pwuhken pelien lamalam en kawa ko sohte kin nohn kawehwehda iaduwen Koht ah kin ketin poakohng kitail de iaduwen atail kak poakohng Koht. Kahrehda, aramas rar kei sohte kin ale pasapengpen arail peidek me duwehte, “Dahme kahrehda kitail kak kilangki mehn kadehdepen sapwellimen Koht limpoak nan sapwellime kapikipikda kan, ahpw lokolok oh me suwed kan kin mihmihkihte?” Paipel, ni pali teio, wia ihte nting en palien lamalam en kawao me kin kawehwehda mwahu duwen sapwellimen Koht limpoak. E pil kin padahkiong kitail iaduwen atail kak kasalehda limpoak.
Pwuhk Ieu Duwen Limpoak
Mahsen en Koht, Paipel, kin kasalehda me Siohwa iei “[Koht] en limpoak.” (2 Korint 13:11) Paipel kin kasalehda iaduwen limpoak ah kin kamwekid Siohwa en ketikihong tepin aramas akan mour me sohte soumwahu oh mehla. Ahpw uhwong sapwellimen Koht kaunda me kahrehdo lokolok ong tohnsampah. (Deuderonomi 32:4, 5; Rom 5:12) Siohwa ketin koasoanehdi en kasapahldo dahme salongalahro. Mahsen en Koht mahsanih: “Pwe iei uwen Koht eh ketin loalloale sampah, me e ketikihdohki Sapwellime Iehros, pwe mehmen me kin pwosonla ih en dehr salongala, a en ahneki mour soutuk.” (Sohn 3:16) Pwuhk Sarawi kin kasalehda sapwellimen Koht limpoak ni oaritik ni ah kawehwehda iaduwen Koht ah ketin koasoanehdi koperment unsek ieu me pahn mih pahn kaundahn Sises pwehn kasapahldo popohl ong tohnsampah peik kan.—Daniel 7:13, 14; 2 Piter 3:13.
Paipel oaralapihada pwukoahn aramas ni mahsen pwukat: “‘Ke pahn poakohng Kauno omw Koht sang nan kapehdomw unsek, sang ni ngenomw unsek, sang ni omw lamalam koaros unsek.’ Ih met kosonned me keieu lapalap oh kesempwal. A me keriaun kesempwal, me rasehngete met, iei: ‘Ke pahn poakohng mehn mpomw duwen omw kin poakohng pein uhk.’ Kosonned riau pwukat, iei me poahsoanen pelien Kosonned.” (Madiu 22:37-40) Paipel mahsanih me e kohsang rehn Koht. Pwehki e kin uhdahn kasalehda mwahu sapwellime irair kan, kitail kak kamehlele me e kohsang rehn “Koht en limpoak.”—2 Timoty 3:16.
Ni atail kin doadoahngki koasoandi wet, kitail kak dehdehki mehnia nting en kawa ko me uhdahn kohsang rehn Koht. Limpoak pil kin kasansalehda ihs tohnkaudok mehlel kan, pwehki re kin kahlemengih Koht ni arail kin kasalehda limpoak.
Iaduwen Kitail Kak Diarada Aramas akan me Kin Poakohng Koht
Irail akan me kin uhdahn poakohng Koht kin sansalda, keieu ni ahnsouwet, pwe kitail kin momour nan ahnsou ieu me Paipel kin kahdaneki “imwin rahn akan.” Aramas kan kin “roporop ong pein irail, mehwo, . . . inengieng pein arail peren laudsang kupwur en Koht.”—2 Timoty 3:1-4.
Iaduwen ke kak diarada ihs aramas akan me kin poakohng Koht? Paipel mahsanih: “Iet duwen wehwehn poakohng Koht: kitail en peikiong sapwellime kosonned akan.” (1 Sohn 5:3) Limpoak ong Koht kin kamwekid aramas akan en wauneki koasoandi en Paipel me pid duwen tiahk kan. Karasepe, nan Mahsen en Koht, mie kosonned me pid duwen nsenen pwopwoud oh koasoandi en pwopwoud. Wia nsenen pwopwoud kin mweimwei ongete nanpwungen ohl pwopwoud oh lih pwopwoud, oh pwopwoud wia koasoandi poatopoat ieu. (Madiu 19:9; Ipru 13:4) Ni ahnsou me emen lih nan Spain me kin suksukuhliki duwen pelien lamalam ah iang towehda ehu mihding en Sounkadehdehn Siohwa kan oh kilangada me re kin nantiong sukuhliki kosonned en Paipel me pid duwen tiahk, e koasoia: “I mwesel sang nan wasahn mihdingo oh ahneki nsenamwahu, kaidehn pwehki padahk mwahu en Paipel kante ahpw pwehki aramas akan arail kin miniminpene, arail tiahk mwakelekel, oh arail wiewia mwahu kan.”
Kapatahiong arail limpoak ong Koht, Kristian mehlel kan kin sansalda sang ni elen arail kin kasalehda limpoak ong mehn mparail kan. Arail doadoahk me keieu kesempwal iei en koasoiaiong meteikan duwen Wehin Koht me ihte koapworopwor ohng tohn sampah. (Madiu 24:14) Sohte mehkot me kak wahdo kamwahu poatopoat ong mehn mparail kan sang arail pahn sewese irail en ale loalokong me pid duwen Koht. (Sohn 17:3) Kristian mehlel kan pil kin kasalehda arail limpoak ni ahl teikan. Re kin kihda sawas ong irail kan me kin lelong apwal. Karasepe, ni ahnsou me rerrer en sahpw wiawi nan Italy, ehu newspaper nan wasao ripohtki me Sounkadehdehn Siohwa kan kin wia “koasoanehdi ni soandi mwahu ong sewese irail kan me kin lelong kahpwal, oh re sohte lipilipilki mehnia pelien lamalam re kin iang.”
Likin arail poakohng Koht oh mehn mparail, Kristian mehlel kan kin limpoakpene. Sises mahsanih: “I pahn kihong kumwail kosonned kapw ehu: kumwail en poakpene nanpwungamwail. Duwen ei poakohng kumwail, iei duwen kumwail en poakpene. Pwe ihme aramas koaros pahn esehki me kumwail nei tohnpadahk, ma kumwail pahn limpoakpene.”—Sohn 13:34, 35.
Limpoak me Kristian mehlel kan kin ahneki nanpwungarail kin uhdahn weksang meteikan? Emen lih me kin wia doadoahk en sounsawaspen nan ihmw, Ema, pil diarada wekpeseng wet. E kin doadoahk nan La Paz, Bolivia, wasa me wekpeseng en keinek kin kalapw katohrohrpeseng me kepwehpwe oh me semwehmwe. E koasoia: “Ni ahnsou me ehdin ahi kohla iang towehda mihding en Sounkadehdehn Siohwa kan, I kilangada emen ohl me likouda mwahu mwomwohd rehn lihen India men oh koasoakoasoi ong ih. I saikinte kilang soahngo mahs. Ni ahnsowohte, I esehda me irail sapwellimen Koht aramas akan.” Duwehte met, emen lihen Brazil pwulopwul me adaneki Miriam koasoia: “I kin sohte ese nsenamwahu, mendahte nan pein ahi peneinei. Ehdin ahi kilangada limpoak me kin sansalda iei sang wiewia kan nanpwungen Sounkadehdehn Siohwa kan.” Nan United States, emen kaunen nuhs en television station ntingihdi: “Ma aramas tohto pahn mourki elen pwoson me kumwail ahneki, irair en wehi wet pahn weksang met. Nin duwen tohndoadoahk en nuhs men, I ese me amwail pwihn kin poahsoankihda limpoak oh pwoson kehlail ohng Soun Kapikadao.”
Rapahki Kaudok Mehlel
Limpoak me kin wia kasansalepen kaudok mehlel. Sises kin karasahiong diarada kaudok mehlel, duwehte diarada ahl pwung oh pilada en kekeid ie. Ieite ahl me pahn kahluwa aramas ong mour soutuk. Sises mahsanih: “Kumwail keid nan ewen kehl wetikitk, pwe elen kolahng nan ehl me tehlap oh mengei, oh aramas ngeder kin keid ie. A wenihmw me kolahng mour me wetikitik oh elen kolahng ie me apwal, eri, me malaulau me kin diar.” (Madiu 7:13, 14) Pwihn en Kristian ehute me kin iang Koht kekeid pohn elen kaudok mehlel. Kahrehda, e kesempwal mehnia pelien lamalam me ke pahn iang. Ma ke pahn diarada ahlo ah ke pilada ken kekeid loale, ah ke pahn diarada elen mour me keieu mwahu, pwe met iei elen limpoak.—Episos 4:1-4.
Medewehla duwen uwen laud en peren me ke pahn ahneki ma ke pahn kekeid nan elen kaudok mehlel! Met duwehte iang Koht kekeid. Ke pahn sukuhlikihsang rehn Koht duwen erpit oh limpoak pwe ken kak ahneki nanpwungmwahu ong aramas teikan. Sang reh, ke kak sukuhliki duwen kahrepen mour, oh ke kak wehwehkihla sapwellimen Koht inou kan oh ahneki koapworopwor ong ahnsou kohkohdo. Ke sohte pahn koluhkihla ahmw raparapahki kaudok mehlel.
[Kawehwehpen kilel kan nan ehu ehu pali 5]
Nanpwungen nting kan en pelien lamalam en kawa ko, Paipel kelehpw kin kasalehda sapwellimen Koht limpoak
[Kawehwehpen kilel kan nan ehu ehu pali 7]
Kristian mehlel kan kin sansalda pwe re kin kasalehda limpoak