Kitail En Pwurpwurehng Kalohkiohng Aramas Kan Rongamwahuwo
1 Ke kin perenki rong rongamwahuwo ni ahnsou me ke tepin rong? Ma soh, ke pahn kalahnganki me Sounkadehdehn Siohwa kan kin pwupwure iuk lau ke uhd perenkihla onop Paipel. E mwahu en medemedewe duwen met ni ahnsou me ke kin pwurpwurehng kalohk nan wasahn kalohk kan me kilelediong uhk en kalohk ie.
2 Mour en aramas kan kin ahnsou koaros wekiwekila. Re kin lelohng kahpwal kapw kan de irair kapw kan, de re kin rong duwen wiewia kapwunod kan nan arail wasahn kousoan de nan sampah, de re kin apwalkihla pelien mwohni, de lelohng soumwahu de emen nan arail peneinei kin mehla. Soahng pwukat ele pahn kahreong irail en men sukuhliki dahme kin kahrehda soahng kapwunod pwukat. Kitail anahne pohnese ire kan me kin katoutouwih madamadau en aramas kan oh eri padahkihong irail rong en kamweito.
3 Met Iei Doadoahk en Doarehla Aramas: Medemedewe duwen tohndoadoahk kan me kin doarehla mouren aramas kan me kin lelohng nan kahpwal me ele duwehte rerrer en sahpw. Mendahki ekei irail tohndoadoahk kan pahn raparapahki aramas nan wasa ehu me aramas malaulaute kak dierekda oh mourla, re sohte kin wawaila nan arail doadoahk de uhdi pwehki iengerail tohndoadoahk teikan diaradahr aramas tohto teikan me mourla wasa teikan. Atail doadoahk en doarehla mehteikan saikinte uhdi ahnsouwet. Ehu ehu sounpar, aramas epwiki pak kid kei me men pitsang “kahn kamakam kowahlap” kin dierekda.—Kaudiahl 7:9, 14.
4 “Mehmen me kin likweriong mwaren Siohwa pahn komourla.” (Rom 10:13-15, New World Translation) Mahsan pwukat en kapehmihkin emenemen kitail anahnepen kitail en kaukaule kalokalohk. Sangete ahnsou me kitail tepida kalohk nan wasahn kalohk kapw ehu, seri kan en wasao laudlahr oh ahnsouwet kakehr ahneki pein arail madamadau ong arail ahnsou kohkohdo oh karepen mour. Kitail sehse ihs me pahn rongamwahuwo. (Ekl. 11:6) Irail me tohto kan me mahso kin uhwong, ahnsouwet pwungkiehr padahk mehlel. Atail doadoahk, kaidehn en kadeikada aramas, ahpw en kaukaule kihong irail ahnsou mwahu en rong rongamwahuwo oh en pitsang sampah mering wet. Nin duwen me sapwellimen Sises werek kan en mahs kin wia, kitail en “kaukaule kohla” rehn aramas akan oh nantiong en kamwekid irail en perenki rong rongen Wehio.—Madiu 10:6, 7.
5 Ire mehlelo me miehte atail ahnsou mwahu en kalohk kin wia kasalepen sapwellimen Siohwa mahk kalahngan. (2 Piter 3:9) Ni atail kin pwurpwurehng mweidohng mehteikan en rong rongen Wehio, kitail kin kasansalehda limpoak en Koht, oh ni ahl wet kitail kin kapinga ih.