Kasansalehda Mwaren Siohwa oh Sapwellime Wiewia kan
1 “Kumwail patohwan kapingkalahngan ong Siohwa, likweriong mware, oh kehsehki wehi kan wiepen nin lime kan. . . . Koaruhsie me kin kaudokiong en perenda.” (Melkahka 105:1, 3) Sounmelkahka menet me ntingihdi lepin lokaia pwukat kin diarada peren mehlel ni e kin koasoiaiong meteikan duwen Siohwa oh sapwellime “wiewia kan.” Mehnia wiewia kan me e kin koasoia? Sohte pekidpe, e kin perenki koasoia duwen sapwellimen Koht kaunda pwung oh pil “Rongamwahun Sapwellime Komour.”—Mel. 96:2, 3; 145:11, 12.
2 Ni atail kin kerenlahng ahnsou me Katamanpen Kamatalahn Krais pahn wiawi nan 2001, mie kahrepe tohto en perenki sapwellimen Siohwa wiewia kan ong kitail. Iaduwen? Sak en Soutik en Kauno kin wia kasarawi me keieu kesempwal ong Kristian mehlel kan. Sohte pil ehu wiewia me duwehte Kataman nin duwen kesempwalpe, kahrepe oh wiepe. Ih ahnsowo me kitail koaros en tamataman dahme Siohwa oh Sises wia pwehn ritingada ahlo pwe kitail en kak ale komourpatail. Ihme kahrehda, sounpwong kan mwohn Katamano, kitail kin kakete kilang sounkalohk tohto kin kalaudehla arail awahn kalohk, pwehki kitail koaros kin men kasansalehda “Rongamwahun Komour”!
3 Ke Pahn Auxiliary Pioneer? Nan April en pahr me ahpwtehn neko, kekeirada kapw wiawi ong irail me iang doadoahk en Auxiliary Pioneer iei sounkalohk 153,774. Nan pahr wet, kitail kak wiahki sounpwong en March oh April sounpwong tohrohr kei pwehn kak kalaudehla atail awahn kalohk? Nan sounpwong en March mie Rahn Kaunop limau, oh nan sounpwong en April mie Rahn Sarawi limau. Ma irail me kin doadoahk en mwohni Ni Ehd lel Ni Alem pahn koasoanehdi en iang kalohk Rahn Kaunop oh Rahn Sarawi koaros, re kakete diar me re pahn kakete wiahda arail awahn Auxiliary Pioneer. Pwehn kak lel awahn Auxiliary Pioneer (awa 50), emen anahne kalohk awa 12 ehu ehu wihk. Menlau tehk koasoandi kan me mihmi nan koakon ni pali 4. Ke lemeleme ke kak daur ehu koasoandi? Ma soh, ke kak koasoanehdi pein ahmw koasoandi pwehn kak iang doadoahk en Auxiliary Pioneer nan March oh April en pahr wet.
4 Elder kan kak tepida met kangoange sounkalohk kan en kalaudehla arail ahnsou nan kalohk. Nan pahr me ahpwtehn neko, nan ehu mwomwohdiso, elder kan oh ministerial servant kan koaros iang doadoahk en Auxiliary Pioneer nan April, iangahki 64 sang 121 sounkalohk kan nan arail mwomwohdiso! Mwomwohdisowohte pil perenki kilang irail meh 6 wiahla sounkalohk me saikinte papidais tepida kalohk nan sounpwong en March oh April. Ni mehlel, sounpwong kan en March oh April kin wia ahnsou mwahu ong seri kan oh me kapw kan en idek rehn elder kan ma re kakete tepida iang kalohk.
5 Nannanti me kin Wahdo Kapai kan: Mwomwohdiso kan me kin wiahda mehn akadei tohrohr kan oh kin nantihong lel mehn akadei pwukat kin kak alehdi kapai tohto. Ekei mwomwohdiso kan kin kalohk wasa kan me re sohte kin kalap kalohk, oh ekei mwomwohdiso kan kin kalaudehla arail kalohk ni pisnis kan de kalohk doadoahngki telephone—pwe met kin wia soangen kalohk me pahn mwahu en tuhwong irail me sohte kin kalap me ni imwarail akan de re kin mihmi wasa kan me lock ahnsou koaros.
6 Ma emen kin soumwahu de mahla, met wehwehki me e sohte kak wia uwen me e kak nan kalohk? Kaidehn ahnsou koaros. Karasepe ieu, emen sister me mahki sounpahr 86 oh ahneki soumwahu en kanser iang doadoahk en Auxiliary Pioneer mendahki neh kan mpwospeseng. E kak kalaudehla eh awahn kalohk oh kahrehda kihong Siohwa kaping laud pwehki e kalohk ni e kin doadoahngki telephone. Dahme e wia inenen kangoange pein ih iangahki irail nan mwomwohdiso.
7 Kaunopada Mwahu ong Katamano: Pahr wet, Katamanpen Kamatalahn Krais pahn wiawi nan April 8. Pwehki rahno Rahn Sarawi, met pahn kahrehda aramas tohto pahn kak iang towehda. Mwein irail me iang towehda pahret pahn keieu tohto ma (1) pein kitail pahn iang towehda oh (2) kitail pahn luhke aramas teikan en iang towehda. Ihs me kitail pahn luhke?
8 Kitail kak kilang neitail pwuhk kan me kitail kin ntingihdi eden aramas akan me kitail kin tuhwong nan kalohk oh kitail kak kileledi irail me kin perenki rong mendahki kitail sohte kin kaukaule kohla rehrail. Wihk riau de siluh mwohn Katamano, nantihong en kohla rehn aramas pwukat oh kihong irail doaropwehn luhk ong Katamano. Ma ke kak, koasoanehdi mehn peidaid ong irail me uhdahn pahn iang towehda Katamano.
9 Nan ekei mwomwohdiso kan, sounkalohk kan sohte kin doadoahngki doaropwehn luhk kan koaros. Irail me wia Secretary en Mwomwohdiso anahne tehk pwe sounkalohk kan kakete tepida mwadang kihla doaropwehn luhk pwe ren kak kihla neirail doaropwe kan koaros. E pahn mwahu ma kitail pahn type de nting ni sansal kuloak depe oh iawasa Kataman pahn wiawi pohn doaropwehn luhk. De ke kak kihong tohnihmw doaropwe me kileledi adres en Kingdom Hall (ma ih wasa me Kataman pahn wiawi) oh kuloak depe mihding kan koaros kin wiawi, e pahn pil mwahu. Se men pil wia mehn kataman ong sounkalohk kan koaros: E pahn keieu mwahu ma kitail pahn pein kihong aramas neirail doaropwehn luhk.
10 Tamataman Irail akan me Sohla Iang Kalohk: E inenen kaperen en kilang emen me kin onop Paipel inoukihong Siohwa eh mour oh papidaisla. Ahpw, ehu ehu pahr, ekei irail kin sohla iang towehda mihding kan oh patehng Sounkadehde kan, oh re pil sohla kin iang kalohki mwaren Siohwa oh sapwellime wiewia kan. Kitail anahne nsenohkin irail. Mendahki irail wehwehkihte me met padahk mehlel, re sohla kin iang kalohk pwehki nsensuwed, de kahpwal kan de kapwunod kan me re kin ahneki. (Madiu 13:20-22) Irail me luwetlahr ni pali ngehn anahne sawas pwehn pwurehng miniminiong sapwellimen Siohwa aramas akan pwe ren dehr luwetla oh Sehdan powehdi irail douluhl. (1 Pit. 5:8) Nan sounpwong en February, March oh April, kitail en nantihong sewese irail pwe irail akan me sohla kin iang kalohk en pwurehng iang kalohk ma re kasalehda me re tiahk mwahu oh re kakehr iang kalohk.
11 Secretary en Mwomwohdiso pahn katamankin irail brother kan me kin wia Pwuhk Study en Mwomwohdiso duwen ihs irail me sohla iang kalohk. Congregation Service Committee pahn tiengala mwowe nin duwen koasoanehdi tuhwong irail akan koaros me sohla iang kalohk. Ma irail nan Congregation Service Committee lemeleme me e pahn mwahu ma aramaso pahn anahne emen en kohla reh pwehn onop Paipel, re kak pilada emen me re lemeleme pahn mwahu ong aramaso pwehn onop Paipel reh. Mendahki re sohte pahn onop wereila, sounkalohko me brother kan pilada en onop rehn aramaso kak wadek eh awa kan, return visit kan oh Paipel study.
12 Nan April en pahr me ahpwtehn neko, emen sister me kalkalohk ihmw-lel-ihmw kihong emen ohl me mihmi nanial makisihn kan. Ohlo kasalehda me eh pwoud me kin kalohk mahs ahpw met sohla. E idek rehn sistero iawasa Kingdom Hall en wasao oh luhke sistero en kohla reh oh pil rehn eh pwoudo. Mwurin mwo, pwopwoudo iang towehda mihding oh tepida onop Paipel.
13 Kaunopada ong Kalaudehla Ahmw Kalohk! Sounmelkahkao kin kasansalehda mwaren Siohwa oh sapwellime wiewia kan oh e kapataiong: “Kumwail koul kapikapinga Siohwa, kumwail lohkiseli soahng kapwuriamwei koaros me e ketin wiahda. Kumwail en perenki kasansalehda mware sarawi.” (Mel. 105:2, 3) Kitail en kasalehda me kitail nsenohki mwaren Siohwa oh sapwellime “wiewia kapwuriamwei kan” ni atail pahn kalaudehla atail ahnsoun kalohk, oh kitail en wia uwen me kitail kak en sewese aramas tohto nan sounpwong pwukat mwohn Katamano pahn wiawi oh pil rahnen Katamano!
[Kaokon nan Pali 4]
Ahl kan me Ke Kak Koasoanehdi Awa 12 nan Wihk ehu Pwehn Kak Auxiliary Pioneer
Rahn Awa kan
Ni Ehd 1 2 − −
Ni Are 1 − 3 −
Ni Esil 1 2 − 5
Ni Epeng 1 − 3 −
Ni Alem 1 2 − −
Rahn Kaunop 5 4 3 5
Rahn Sarawi 2 2 3 2
Koaros Patpene: 12 12 12 12
Ke lemeleme ke pahn kak doadoahngki ehu koasoandi sang koasoandi pwukat? Ma soh, ke kak wiahda pein ahmw koasoandi?