“I Kesihnenda Teng! I Kesihnenda Teng! I Kesihnenda Teng!”
1 Ih me emen Kristian lelepek koasoia mwurin e pitsang Holocaust oh eh pepehm kan kin duwehte Sounkadehde kid kid kei—ekei irail memourte oh ekei irail melahr—me kin lelepek ong Siohwa mendahki tiahk lemei me mehn Nazi wia ong irail. (Episos 6:11, 13) Video cassette me oaralap koasoia Jehovah’s Witnesses Stand Firm Against Nazi Assault kin kasalehda duwen arail lelepek oh pwoson mendahki dahme wiawiong irail. E pahn mwahu ma koaros nan mwomwodiso pahn kilang video cassette wet oh koasoiapene duwen dahme re lemeleme oh duwen arail pepehm duwen dahme re kilang.
2 Kitail en medemedewe duwen peidek pwukat: (1) Ia kahrepe kan me Sounkadehdehn Siohwa kan kesihnenda teng ni eimah oh sohte lohdi pahn mehn Nazi kan? (2a) Iaduwen madamadau en aramas kin wekpeseng me pid rahnmwahu ieu, oh dahme kahrehda? (2b) Iaduwen met kin wiahda kahpwal ong irail peneinei kan en Sounkadehdehn Siohwa kan? (3) Sounkadehde depe me re kadarala pwehn mihmi nan imwen kaloke aramas akan (concentration camps), oh dahme kin kasalehda me irail Sounkadehde kan, oh dahme Gestapo kan kin wia ong irail? (4) Dahme Sounkadehde kan sohte kak kesehla pwehn saledek sang imwen kaloke aramas akan? (5a) Iaduwen oh iahd me Sounkadehde kan kasalehda arail sapwungki duwen wiewia lemei kan me wiawi ong Sounkadehde kan ahnsou me Hitler kin kakaun? (5b) Iaduwen Hitler mwekidki dahme re kasalehda? (6) Iaduwen ehupene oh limpoakpene me sapwellimen Siohwa aramas akan kin kasalehda wia mehn perepe ieu ong pein irail oh meteikan, ni paliwar oh pali ngehn? (7) Mehnia koul en Wehio me ntingdi nan imwen kaloke aramas akan (concentration camp)? (8) Ia ekei mehn kahlemeng mwahu kan me irail me lelepek kan (ohl, lih oh pil me pwulopwul kan) kin kamwekid uhk en lelepek ong Siohwa, sohte lipilipil dahme pahn wiawiong uhk? (Kilang 1999 Yearbook, pali 144-147.) (9) Nin duwen emen Sounkadehdehn Siohwa kan, soangen pepehm dah kan ke kin ahneki me kin pid atail en dehr kisehn sampah wet?
3 Mehn kahlemeng mwahu en Sounkadehde kan ni arail kin kasalehda eimah oh ngoang me kin sansalda nan video cassette wet kin kak sewese me pwulopwul kan, iangahki irail me kaidehn Sounkadehde kan, pwehn kak powehdi kasongosong kan duwehte iengerail me kin uhwong oh kapailoke irail oh pil kasongosong kan me pid arail nsen mwakelekel. Ma kowe emen pwulopwul me kin iang high sukuhl de sukuhl laud, ke kak kihong ahmw sounpadahk video cassette wet pwe ren kak doadoahngki ire kesempwal kan me re sukuhliki nan class de kasalehda video cassette wet nan class? Mwein ke kak kihong irail sounpadahk kan en kilang video cassette wet oh kawehwe ong irail me aramas malaulau kin ese duwen dahme wiawi nan video cassette wet oh kitail koaros kak sukuhliki mehn kasukuhl mwahu ehu sang video cassette wet.
4 Video cassette wet kin wia mehn doadoahk mwahu pwehn kasalehda iaduwen padahk mehlel sang powe kin kihong kitail kehl ni pali ngehn pwehn kaperenda Koht oh tengedi ong dahme pwung. (1 Kor. 16:13) Kasalehong koaros me kin perenki rong padahk mehlel video cassette wet.