Kosa Bondieu i ve mi fé dan mon vi ?

Sak la Bib i di

Bondieu i ve ke ou konsidèr ali kom in moun vréman, ke ou fé kamarad èk li, komsa ou va èm ali é ou va sèrv ali èk tout out keur (Matieu 22:37, 38 ; Jak 4:8). Ou va konèt koman fé la volonté Bondieu kan ou va aprann koman Jézu la viv é kosa li la ansénié (Jan 7:16, 17). Jézu la pa kontant ali rienk koz desu la volonté Bondieu. Li la viv sa osi. Pou sa mèm, li la di ke sak té plu zinportan dan son vi lété « pa fé [son] volonté, mé la volonté sak [lavé] anvoiy ali » (Jan 6:38).

Pou konèt kèl sé son volonté pou moin, èske mi doi atann ke Bondieu i koz èk moin, ke li fé konèt amoin sa par in sign oubien par in vizion ?

Non, lé pa komsa, parske Bondieu i ansèrv la Bib pou fé konèt domoun kosa li ve. Gras la Bib, ou pe èt « ékipé kom ki fo pou fé bann bon zaksion » (2 Timoté 3:16, 17). Kan ou lir la Bib, Bondieu i ve ke ou ansèrv out « kapasité pou rézoné » pou konprann kosa li ve pou ou (Romin 12:1, 2 ; Éfézien 5:17).

Èske mi gingn vréman fé sak Bondieu i demann amoin ?

Oui, ou gingn, parske la Bib i di ke bann « komannman [Bondieu] lé pa difisil » (1 Jan 5:3, Parole de Vie). Sa i ve pa dir ke réspèk son bann komannman lé fasil toultan. Mé bann zéfor ke nou va fé i vo vréman la pèn. Jézu li mèm la di : « Sak i ékout la Parol Bondieu é i mèt ali an pratik lé ereu ! » (Luk 11:28, Bible de l’Épée).