Соске и политика одвојнела е манушен — Со вакерела и Библија?

И политика одвојнела е манушен ко цело свето. Спрема јекх анкета која со сине керди ко 2022 берш, „65% таро возрасна мануша таро 19 пхувја коте со сине керде анкете вакерѓе кај ки ленгири пхув иси баре или бут баре несогласувања машкар о мануша со поддржинена различна политичка партие“ (Pew Research Center).

Дали ту да приметинѓан кај иси са побаре политичка поделбе ки пхув коте со живинеа? Соске тано аѓаар? Дали иси несаво решение? Дикх со вакерела и Библија.

Ставија со одвојнена

И Библија пророкујнѓа кај ко амаро време, сој опишимо сар „последна диве“, нане те овел јекхипе соске е манушен ка овен лен различна ставија.

• „Ко последна диве ка овел бут пхаро време. Соске о мануша ка манген коркори пес... нане те овен спремна башо било саво договор“ (2. Тимотеј 3:1-3).

Иако о мануша бут трудинена пе те шај о владе шукар те функциониринен, сепак џи акана на успејнѓе ко адава. Адалеске со о мануша иси лен различно мислење бут ленге пхаро, чак невозможно заедно те соработинен те шај те решинен о проблемија. Акала буќа докажинена кај адава сој пишимо ки Библија англедер бут време, тано точно.

• „О мануш владинела упро мануш ки лескири штета“ (Проповедник 8:9).

Ама и Библија сикавела кај иси решение — јекх влада сој водими некастар со шај те цидел са о проблемија со мучинена е манушен.

Јекх способно водачи со грижинела пе

И Библија керела лафи башо јекх совршено водачи кова со шај те решинел акала проблемија — о Исус Христос. Ле иси ле моќ, власт хем желба те анел јекхипе хем мир машкар о мануша.

• „Ко диве кеда ов ка владинел о праведнико ка цутинел хем ка овел баро мир“ (Псалм 72:7).

• „Са о нацие ка служинен леске“ (Псалм 72:11).

О Исус тано најшукар владетели соске грижинела пе е манушенге хем мангела те поможинел ленге, посебно околенге со доживинѓе бари неправда таро јавера.

• „Соске ка спасинел е чороле со ровела баши помош, околе со цидела муке хем секас со нане ле кој те поможинел ле. Ка перел леске жал е бедно манушеске хем е чоролеске, хем ка аракхел о живото е чороленгоро. Ка спасинел лен таро малтретирибе хем насилство“ (Псалм 72:12-14).

Поттикнинаја тут те дознајне нешто повише башо е Девлескоро Царство — и небесно влада која со водинела ла о Исус. Исто аѓаар дознајн сар шај те поддржине акале влада хем сар адава лично туке ка овел корисно.

• Дикх о видеоклипи Сој е Девлескоро Царство?

• Читин и статија „Божјето Царство — некорумпирана влада“.