O maribe tano strašno
O maribe tano jekh ando najlošna buća kola o manuš šaj te doživini. O vojnikija hem o manuša kola živinena ko phuvja kaj tano o maribe ki pi koža osetinđe kobor tano odova strašno.
O VOJNIKIJA
„Ked hijan ko maribe, stalno dikheja sar o manuša ovena mudarde hem povredime. Niked na đaneja so ka ovel tuvaja hem stalno živineja ki dar“ (Gari, Velika Britanija).
„Hijum le pogodimo ko dumo hem ko muj hem dikhljum sar but đene merena, a maškaro lende hine o ćhavore hem o phure. O maribe mudari te osećanja hem palo odova tano pharo te mothove saosećanje ked dikheja so avera patinena“ (Vilmar, Kolumbija).
„Ked neko tano pogodimo anglo tute, odija slika našti te cide andi ti godi. Odija pišta hem odola osoba našti niked te bistre“ (Zafira, Amerika).
O MANUŠA
„Mislinđum so više niked na ka ovav bahtali. Darandiljum me životose, ama pana pobuter darandiljum te na ovel mudardo neko andi mi porodica ja ando me amala“ (Oleksandra, Ukrajina).
„Terdiljam ko redija asi hrana ando 2.00 sabale đi o 23.00 raćate hem darandiljam te na pogodini amen disavo metko“ (Daler, Tadžikistan).
„Me roditeljija hine mudarde ko maribe. Aćhiljum ćori hem na hine man nikas ko šaj hine te brinini pe mandar“ (Mari, Ruanda).
Iako akala manuša but patinđe sebepi o maribe, on ipak uspinđe te arakhen o mir. On tane sigurna so pana hari o mariba više na ka oven. Ki akija Stražarsko kula ka dikha sar odova ka ovel.