Sar o maribe utičini upro sarinende amende?
„Pana ando Dujto Svetsko maribe, ko sveto na hine odobor oružana sukobija sar akana hem 2 milijarde manuša živinena ko thana kuri isi maribe.“
Amina Mohamed, i zamenica ando generalno sekretari kotar Ujedinjena nacije, 26. januar 2023.
O mariba šaj iznenada te oven hem ko thana kuri isi mir. Čak hem o manuša kola na živinena ko phuvja kaj tano o maribe šaj te osetinen o posledice. A čak hem palo odova so o maribe završini pe, o posledice trajinena pana but berša. Te dikha disave primerija:
O bokhalipe. Premalo Svetsko program asi hrana, o maribe tano glavno uzrok ando bokhalipe. Čak 70 posto ando manuša kola nane len so te han, živinena ko phuvja kaj tano o maribe.
O problemija sastipaja. Ked ko disavo than isi opasnost ando maribe, o manuša osetinena baro stres hem but tane uznemirime. O manuša kola živinena ko thana kuri isi maribe, nane samo ki opasnost so ka oven povredime, već palo odova verovatno ka ovel len psihička problemija. Ama nažalost, but putija on našti te dobinen medicinsko pomoć koja valjani lenđe.
O manuša mukhena pe ćhera. Premalo podatkija kotar Baro komesarijat ando Ujedinjena nacije aso izbeglice, ando septembar 2023. berš pobuter ando 114 milionija manuša morandilje te mukhen pe ćhera.
Finansijska problemija. Ked ki disavi phuv ovela maribe obično hem o cene barjona, a o manuša jedva ikljona ko krajo. O pare kola valjanđe te trošinen ko obrazovanje hem ko zdravstvo, i vlast trošini ki vojska hem ko oružje. A ked završini pe o maribe, but koštini te obnovini pe sa soj tano uništimo.
I phuv uništini pe. But manuša isi len problemija sastipaja sebepi so o pani, o vazduh hem i phuv palo maribe tane zagadime. A pana but manuša ovena mudarde sebepi o mine kola aćhilje ki phuv.
Ćaće, o maribe sa uništini hem but koštini sarinen amen.