СТАТЬЯ, КАЙ ТЭ СЫТЮВАС 52
Сар тэ улас о ԥаримос анда оди?
«Отдэ пэско ԥаримос лэ Иеговасти и во поможыя тути» (ПСАЛОМ 55:22).
ДИЛИ 38 О Дэл дэла тути зор
ПАЛА СО УӶАНАСА АНДА СТАТЬЯ?a
1. Со амэндэ по ди, кала умэкэнпэ и вас?
КАЖНО дес амэ пэрэандярас ԥаримос. Но тэ пэрэандярэс лэс май ԥарэс, кала умэкэнпэ и вас. Кала умэкэнпэ и вас, када одлэл амэндар и радость и о зор. Андэ Притчи 24:10 ԥэнэнпэ: «Если андэ ԥари время ту умэклян и вас, тоди тутэ на авэла зор».
2. а) Васо амэндэ можэт тэ авэл ԥарэс по ди? б) Пала со амэ подаса дума андэ кадэя статья?
2 Амэндэ можэт тэ авэл ԥарэс по ди бут состар. Еқэндэ дуқал оди кодэлэстар, кай вонэ терэн ошыбки. Аврэндэ кодэлэстар, кай лэндэ найлашо зор или кай лэнди на дэн почотно дила андэ собрания. Ай дэкасти ԥарэс, кай лэн на ашунэн андэ служэния. Андэ кадэя статья амэ подаса дума пала советоря, савэ поможына амэнди тэ на умэкас и вас.
КАЛА ТЕРЭС ОШЫБКИ И ГИНДОС, КАЙ ТУ НИСО НА АШЭС
3. Со поможый амэнди правильно тэ диқас пэр пэстэ?
3 Амэ най совершэни и терас ошыбки, через када амэндэ моӷут тэ умэкэнпэ и вас и амэ можэм тэ гиндосарас, кай нисо на ашас. Кадя тэ гиндосарас нэправильно. Васо? Андэ Библия ԥэнэнпэ, кай кати о Иисусо совершэно (Римлянам 3:23). И о Иегова на аштярэл, кай амэ тэ авас идеальни. Во заботийпэ, любий амэн и камэл тэ поможый. Во полэл пэ скати амэнди ԥарэс тэ парудювас и тэ улас пэстар и найлашэ привычки, ай кадяжэ полэл, сар амэнди дэ ԥарэс тэ парашас тэ гиндосарас, кай амэ нисо на ашас. И во камэл амэнди андэ када тэ поможый (Римлянам 7:18, 19).
О Иегова цэний вся о лашимос, саво амэ терас акана и саво терасас варикала (Диқэн о абзацо 5.)h
4, 5. Саво гиндо анда 1 Иоанна 3:19, 20 полинэ и ԥэя, и сар лэнди када поможысардя?
4 Подам дума пала дуй ԥэя анда собрания. Ек ԥэй на диқэлас, кай ла любин андо ери, и важ када вой ля тэ гиндой, кай вой нисо на ашэл. Если вой чуть тердя варисо най кадя, вой лэлас фартэ тэ пэрэжывает. Ай пэ авэр ԥэй о родо ԥэнэнас кацавэ алава, кай вой ля тэ гиндой, кай нисо на ашэл, и кай пэр латэ на трэбуй тэ стон патив. И дажэ кала и ԥэй ля тэ служый лэ Иеговасти, вой гиндояс, кай нэдостойно тэ авэл лэстирэ служытелёса.
5 И всаек кадэла дуй ԥэя на парашэнас тэ служын лэ Иеговасти. Лэнди поможыяс, кай вонэ анда вся оди мангэнаспэ лэ Дэвлэсти и росԥэнэнас вся, со лэндэ по ди (Псалом 55:22). Вонэ полэнас, кай о Иегова ӷанэн, васо лэндэ сас кацаво по ди, и васо вонэ кадя найдраго гиндонас пала пэстэ. Кадяжэ вонэ полинэ, кай о Иегова можэт тэ додиқэл андо мануш кода, со амэ екжэнэ андэр пэстэ нэ можэм тэ додиқас. (Адиносар 1 Иоанна 3:19, 20b.)
6. Со можэт тэ авэл по ди, кай о мануш, саво старыийпэ тэ улэл пэстар и найлашэ привычки?
6 Варико бэршэнца старыийпэ тэ улэл пэстар варисави найлащи привычка. И кала лэстэ на вижал када, во можэт тэ умэкэл и вас и лэсти тэ авэл ԥарэс кадэлэстар. И инке во можэт тэ лэл тэ гиндой, кай во нисо на ашэл (2 Коринфянам 7:10). Када драго, кала кацаво мануш полэл, кай дошало и стердя бэзэх. Но во на трэбуй фартэ пала када тэ загиндойпэ и тэ гиндой, кай во само найлашо мануш пэ люма. Через кацавэ гиндоря во можэт тэ парашэл тэ служый лэ Иеговасти. Во трэбуй тэ сэрэл, кай если умэкэла и вас, тоди лэстэ на авэла зор тэ улэл пэстар и найлащи привычка (Притчи 24:10). Кацавэ манушэсти трэбуй тэ рий пэстири дружба лэ Иеговаса, ай важ када лэсти трэбуй тэ мангэлпэ, кай о Иегова тэ простий лэс (Исаия 1:18). Кала о Иегова додиқэла, кай во анда вся оди каийпэ, о Иегова лэс простия. Кадяжэ во трэбуй тэ поджал каринг и старейшыноря. Вонэ поможына, кай лэстири дружба лэ Иеговаса упалэ тэ авэл лащи (Иакова 5:14, 15).
7. Васо на трэбуй тэ умэкас и вас, если амэнди ԥарэс тэ терас правильно англа Дэл?
7 Акэ со ԥэнэн о старейшына анда Франция: «Андэ лэ Иеговастирэ яқа лашо мануш най кодэва, ко никала на терэл ошыбки, ай кодэва, ко полэл, кай терэл ошыбка и каийпэ» (Римлянам 7:21—25). Важ када, если тумэ старыинпэ тэ улэн варисави найлащи привычка, но дэкала на вижал, никала на гиндон, кай тумэ нисо на ашэн. Всаворэ амэ терас ошыбки, и пэстирэ зорэса нико нэ можэт тэ авэл лашо англа Дэл. Лашо мануш англа Дэл можэт тэ авэл кати блаӷодаря кодэлэсти, кай о Иисусо витиндя амэн анда бэзэх и кай о Иегова добро (Эфесянам 1:7; 1 Иоанна 4:10).
8. Кастар амэ можэм тэ мангас помощь, если амэнди ԥарэс по ди?
8 Мангэн, кай и ԥрала и ԥэя тэ поможын тумэнди. Вонэ моӷут тэ виашунэн и тэ ԥэнэн лашо алав, саво подритярэла тумэн (Притчи 12:25; 1 Фессалоникийцам 5:14). Ек ԥэй анда Нигерия росԥэнэн, кай и ԥрала и ԥэя фартэ ла подритярэнас. Блаӷодаря лэнди вой поля, кай о Иегова ашундя латирэ молитвы. Ай кадяжэ вой сытеля екжэни тэ дэл зор кодэлэнди, кастэ умэкэнпэ и вас. Но дэкала и ԥрала и ԥэя на ӷанэн, кала амэнди ԥарэс по ди. Амэ можэм екжэнэ тэ пашувас каринг и ԥрала и ԥэя, савэндэ лащи дружба лэ Иеговаса, и тэ мангас лэндар помощь.
КАЛА НАЙЛАШО ЗОР
9. Сар амэн подритярэн и алава анда Псалом 41:3 и 94:19?
9 Мангэн лэ Иеговастар помощь. Кала наймишто или амэндэ исин насвалимос, саво бут бэрша на виличийпэ, тоди амэнди авэла ԥарэс тэ лошавас. И хоть о Иегова акана на виличий лэ манушэн, во всаек подритярэл амэн и дэл зор, кай амэ тэ пэрэандярас о ԥаримос. (Адиносар Псалом 41:3c; 94:19d.) О Иегова можэт тэ поможый через и ԥрала и ԥэя. Вонэ моӷут тэ авэн, тэ дэн зор амэнди, тэ поприлэн па цэр, тэ жан андо маӷазино, кала када трэбуй, или тэ мангэнпэ амэнца. Ай кадяжэ во можэт тэ подритярэл амэн через пэско алав и Библия. Котэ амэ можэм тэ проадиносарас и стихоря, кай англэ амэн аштярэл о лашимос и авэла кацави время, кай на авэла о ԥаримос и на авэла нико насвало (Римлянам 15:4).
10. Со поможысардя лэ ԥралэсти тэ пэрэандярэл и бида, сави тердяпэ лэса?
10 О ԥрал анда Нигерия попэля андэ бида и ашэля парализовано. Лэсти ԥэндэ, кай во никала на лэла тэ ԥирэл. Лэсти сас фартэ ԥарэс, но во на умэкля и вас. Со лэсти андэ када поможысардя? Во росԥэнэн, кай вонэ ла хулаяса кажно дес мангэнаспэ лэ Иеговасти и адинонас и Библия. Ай инке вонэ фартэ цэнинас вся, со лэнди дя о Иегова, и кода, кай во подария лэнди вечно жызня андо раё пэ ԥув.
Дажэ кодэла, кастэ найлашо зор, моӷут тэ росԥэнэн важ о Дэл, и лэнди када анэн радость (Диқэн и абзацоря 11—13.)
11. Сар кадэя ԥэй на парашэлас тэ радуийпэ, хоть латэ сас ԥаро насвалимос?
11 Ай акэ со сас еқа ԥьяса, сави жувэл андэ Мексика. Латэ виарақлэ о насвалимос, через саво вой моӷла тэ мэрэл. Со лати поможысардя тэ пэрэандярэл кадэва ԥаримос? Кала вой личияспэ, вой погиндосардя, кай лэла тэ росԥэнэн пала Дэл аврэнди кажно дес. Через када вой ужэ ля тэ гиндой най пала операцыя и, сар лати дэ ԥарэс, ай сар тэ поможый аврэ манушэнди. Кала вой камэлас тэ росԥэнэн пала Дэл, вой пушэлас лэндар, сар о ери и васо вонэ витидэ кацави ԥари бути. И тоди вой полэлас, пала со лэ манушэнди камэлпэ тэ подэн дума. Андэ больница и мануша ла блаӷодаринас пала кода, кай вой шолас лэн сама и ԥэнэнас, кай ридко, кала и мануша пушэн кай и врачоря, сар лэндэ и дила и дэсавэ дэнас дажэ пэско номеро лати и ԥэнэнас, кай вонэ жувэн. Вой ԥэнэн, кай ӷанэнас, кай о Иегова ла подритярэла андэ лако ԥаримос, но кай во дэла лати кадя дэ бут радость, вой и представить пэсти нэ моӷла! (Притчи 15:15).
12, 13. Сар и ԥрала и ԥэя, савэндэ найдраго лэ зорэса, росԥэнэн пала Дэл, и саво лашимос када лэнди анэн?
12 Бут ԥрала и ԥэя пэрэжывают, кай нэ моӷут скати тэ служын лэ Иеговасти, сар варикала, важ кода кай о зор лэндэ ужэ най во. Но вонэ всаек на парашэн тэ росԥэнэн важ о Дэл. Акэ со сас еқа ԥьяса анда США, савя ақарэнас Лорел. Вой 37 бэрш пропашлеля андо саструно аппарато. Через лэстэ вой моӷла тэ ԥурдэл. Латэ сас найлашо насвалимос и вой пэрэандярдя бут операцыи. Ай кадяжэ латэ на прожалас о насвалимос па тила. Но вой всаек на парашэлас тэ росԥэнэн пала лэ Дэвлэско Царство лэ врачонэнди, савэ авэнас латэ по цэр. И блаӷодаря лати лэ Иеговастирэ свидетеля ашэлэ май бут чем 17 мануша!e
13 Ек старейшына анда Франция ԥэнэн лэ ԥралэнди и лэ ԥэянди, савэ нэ моӷут тэ вижан цэрал через о насвалимос или савэ личинпэ андэ больница, кай паша лэндэ тэ пашлёл амари книжка или журнало. Кадя амари литература моӷут тэ додиқэн авэр мануша и закамэна тэ подэн дума. И хоть кай кадэла ԥрала и ԥэя исин насвалимос, через саво нащи вижан анда цэр, вонэ всаек моӷут тэ росԥэнэн пала Дэл и тэ авэн лошалэ. Кадяжэ вонэ моӷут тэ служын па телефоно и тэ пистрон письморя.
КАЛА АМЭНДИ НА ДЭН ПОЧОТНО ДИЛА АНДЭ СОБРАНИЯ
14. Сости амэ можэм тэ сытювас лэ Давидостар?
14 Можэт тэ авэл кацаво, кай тути нэ моӷут тэ дэн почотно дила андэ служэния лэ Иеговасти. Можэт тутэ найдраго лэ зорэса или ту андэ ԥурэ бэрша или инке важ варисо. Тоди на бистэр пала Давидо, саво фартэ камэлас тэ ваздэл о храмо. О Иегова лэсти ԥэндя, кай най во строия лэс, ай лэско шаво. И о Давидо подритярдя лэ Иеговастири ришэния. Во дажэ отдя фартэ бут сомнак и руп, кай тэ строин кадэва храмо. Амэ тожэ можэм тэ сытювас лэ Давидостар, саво сыкадя амэнди райкано примеро! (2 Самуила 7:12, 13; 1 Летопись 29:1, 3—5).
15. Со поможысардя лэ ԥралэсти тэ на умэкэл и вас?
15 Ек ԥрал анда Франция, савэс ақарэнас Андрийf, парашэля тэ служый старейшынаса. Лэстэ ашэля найдраго лэ зорэса, и во дажэ нисо нэ моӷ тэ терэл па цэр. Лэсти сас фартэ ԥарэс через када. Во умэкля и вас и гиндояс, кай нисо на ашэл. Но потом во поля, кай трэбуй тэ парувэл варисо. Во ля тэ радуийпэ, кай можэт варисо тэ стерэл андэ служэния лэ Иеговасти. И лэсти андэ када поможысардя о примеро пала Гедеоно и пала лэстирэ воиноря. Вонэ на парашэнас тэ марэнпэ пэ война, хоть фартэ сас цыенэ! (Судей 8:4).
16. Сости амэ сытювас кай и анӷелоря?
16 Лашо примеро амэнди сыкадэ и анӷелоря, савэ на парашэн тэ кандэн лэ Иеговас. Еқвар о Иегова пушля лэндар: «Ко можэт тэ обдилярэл лэ найлашэ царёс лэ Ахавос?» О Иегова виашундя всаворэ анӷелонэн, но витидя кати еқэс и ԥэндя лэсти, кай во стерэла кадэя дила (1 Царей 22:19—22). Авэр анӷелоря на холяйлэ пэ када. Лэндэ на сас гиндо: «Ай состэ амэнди сас тэ тратисарас скати время пэ када?». И анӷелоря на гиндон пала пэстэ бут. Важ лэндэ ӷлавно, кай вся и слава тэ дорэсэлпэ лэ Иеговасти (Судей 13:16—18; Откровение 19:10).
17. Сар тэ на умэкас и вас через кода, кай амэнди на дэн почотно дила андэ собрания?
17 Сэрэн, кай важ амэндэ бари бах тэ авас лэ Иеговастирэ свидетеля и тэ росԥэнас пала лэско Царство. Андэ лэ Иеговастири арӷанизацыя амэндэ можэт тэ авэл почотно дила, ай тэся ла амэндэ можэт и тэ на авэл. Но када на сыкавэл, кай о Иегова парашэля амэн тэ цэний. Важ лэстэ важно, кай амэ тэ на гиндосарас пала пэстэ бут. Именно важ када амэн любий о Иегова, и ԥрала и ԥэя андэ собрания. Важ када мангэн, кай о Иегова тэ поможый тумэнди тэ на заваздэн о шэро. Сэрэн пала лэстирэ служытеля, пала савэ пистромэ андэ Библия, савэ на заваздэнас о шэро. Гиндон, сар тумэ можэте тэ терэн лашимос лэ ԥралэнди и лэ ԥэянди андэ собрания (Псалом 138:6; 1 Петра 5:5).
КАЛА И МАНУША НА КАМЭН ТЭ АШУНЭН ПАЛА ЛЭ ДЭВЛЭСКО ЦАРСТВО
18, 19. Со поможыя амэнди тэ радосавас андэ служэния, дажэ если на камэн тэ ашунэн пала Дэл?
18 Можэт тумэнди дэкала ԥарэс кодэлэстар, кай и мануша на камэн тэ ашунэн пала лэ Дэвлэско Царство. Или тумэ пэрэжываете важ кода, кай лэ манушэн цэрэ никала нинай. Но со тэ терэн, кай тэ на хасарэн и радость андэ служэния? И со тэ терэн, кай и радость тэ авэл май бут? Тумэнди андэ када поможына и советоря анда рамка «Со тэ терас, кай тэ на хасарас и радость андэ служэния лэ Иеговасти». Кадяжэ важно тэ полас, васо амэ ԥирас андэ служэния.
19 Трэбуй тэ на бистрас, кай со май важно важ амэндэ, када тэ росԥэнас лэ манушэнди важ о Дэл и важ лэско Царство. О Иисусо ԥэндя, кай о дром андярэл каринг и вечно жызня, и лэс най всаворэ виарақэн (Матфея 7:13, 14). Андэ служэния амэ терас лэ Дэвлэстири дила, и амэнца терэл кадэя дила о Иегова, о Иисусо и анӷелоря (Матфея 28:19, 20; 1 Коринфянам 3:9; Откровение 14:6, 7). О Иегова родэл кодэлэн, ко камэл лэсти тэ служый (Иоанна 6:44). И можэт тэ авэл кадя, кай адес о мануш на ашунэна пала Дэл, ай кала аваса лэстэ пэ авэр разо, во закамэла амэн тэ ашунэл.
20. Сар и алава анда Иеремия 20:8, 9 поможын амэнди тэ на умэкас и вас андэ служэния?
20 Амэ бут сости можэм тэ сытювас кай о Иеремия. О Иегова ԥэндя лэсти тэ росԥэнэн пала лэстэ лэ манушэнди, савэ подасанаспэ лэстар и ԥэнэнас пэр лэстэ найлашэ алава. (Адиносар Иеремия 20:8, 9g.) О Иеремия камля тэ парашэл тэ росԥэнэн важ лэстэ, но во нэ моӷ тэ ашэл мулком. Лэстэ сар яг ԥаболас оди андэ служэния лэ Дэвлэсти, во нэ моӷ тэ ашэл мулком. Кадяжэ, если амэндэ авэла андо ди лэ Дэвлэско чачимос, амэ нэ сможэм тэ ашас мулком. Важ када амэнди трэбуй кажно дес тэ адиносарас и Библия и тэ гиндосарас, со котэ пистромэ. Кадя амэ аваса лошалэ и амэн андэ служэния лэна тэ ашунэн май бут мануша (Иеремия 15:16).
21. Со поможыя амэнди тэ на умэкас и вас?
21 Сар ԥэндя ек ԥэй, пала сави ужэ дям дума андэ кадэя статья, кай кала амэ умэкас и вас, через када о Сатана можэт тэ змарэл амэн па правильно дром. Но о Иегова май зорало, чем о Сатана. Важ када трэбуй тэ мангас лэ Иеговас, кай тэ поможый амэнди. Во поможыя правильно тэ диқас пэр пэстэ, кала терас ошыбки и кала амэндэ найлашо зор. Ай кадяжэ кала умэкэнпэ и вас, важ кода кай амэнди на дэн тэ терас почотно дила андэ лэ Иеговастири арӷанизацыя, или кала и мануша на ашунэн амэн андэ служэния. И пала вся, пала со пэрэжываем, можэм тэ росԥэнас амарэ небеснонэ Дадэсти лэ Иеговасти. Во поможыя тэ улас о ԥаримос анда оди!
ДИЛИ 44 Молитва анда вся ди
a Всаворэнди амэнди дэкала ԥарэс по ди. Но андэ кадэя статья амэ уӷанаса советоря, савэ поможына амэнди. Кадяжэ андэ кадэя статья амэ уӷанаса, кай лэ Иеговаса амэндэ вижала тэ виритярас любо ԥаримос и тэ на умэкас и вас.
b 1 Иоанна 3:19, 20: «Кадя амэ уӷанаса, кай амэндэ о чачимос пала Дэл и анда оди патяса, кай во любий амэн. И дажэ если амаро ди амэн дошалярэл, ласа тэ сэрас, кай о Дэл май бут ӷанэн амарэ одестар и ӷанэн вся».
c Псалом 41:3: «О Иегова подритярэла лэс, кала во пашлёла насвало. Ту диқэса пала лэстэ андэ время, кала во занасвавэла».
d Псалом 94:19: «Кала мандэ слинэ гиндоря, савэндар ԥарэс по ди, ту терэсас кадя, кай манди ашэлас май вушэро по ди».
e Пала ԥэй Лорел Низбет сас пистромэ андэ «Пробудитесь!» лэ 22 январёстар андо 1993 бэрш пэ английско шыб.
f Дэсавэ манушэн на ақарэн кадя, сар катэ пистромэ.
g Иеремия 20:8, 9: «Кажно разо, кала мэ дав дума мэ цыписавав и ԥэнав: „Ашунэн тумэ, кодэла, ко жэстоко и ко вся розмарэл!“. Важ лэ Иеговаско алав мэ цыло дес тэрписарав, кай пэр мандэ ԥэнэн найлашэ алава и асанпэ. И мэ ԥэндэм: „На лава будэр тэ ԥэнав пала лэстэ и на лава будэр тэ дав дума важ лэско алав“. Но лэско алав ԥабол мандэ андо ди, сар яг. Во сас сар яг андэ мэрнэ кокаля и мэ цыелэм кодэлэстар, кай ритярав лэс андэр пэстэ. Мэ будэр нэ моӷ тэ ашав мулком».
h ПЭ КАРТИНКА. Ла ԥьяти ԥарэс по ди и вой сгиндой пала кода, со терэлас варикала андэ служэния. Вой ӷанэн, кай о Иегова сэрэл вся латири лащи дила, сави вой терэл.