Yehova Ukat Kuyibangin Nich Rukat Atushalapol End Amapal

“Nzamb kadip wakad kutentam wa kuvuramen mudimu wen ni rukat riukata kumekeshilany mu dijin diend.”—HEB. 6:10.

1, 2. (a) Anch waman muntu ukweta nswich jitok yikuvurishin chom ik? (b) Mutapu ik Yehova uyimenayap in Kristu amapal?

PAUMENING mpal mu chikumangen ukweta nswich jitok, ov, uvurikin rusangu ra Daniel mu Bibil? Mu kuziurik Yehova Nzamb wimekesha kudiay Daniel amwinend mudi muntu ukweta nswich jitok. Daniel wafunda anch: “Pinading nitadil, matand akat kumatek mwi ndond yau. Umwing wading ukweta mwom kudiokal pakur wakad disambishil, washakama mu ditand dimwing. Yidjal yend yading yitokil too mud mbundu.”—Dan. 7:9.

² Mu kulond kwin, nswich jitok jikweting kamu ulomb utok. Chawiy, nswich jitok ni kulond anch “Umwing . . . ukweta mwom kudiokal pakur wakad disambishil” yilondil mulong wa kupam kwa Nzamb ni manangu mend, yiney yawonsu yitin kalimish ketu kakurikina kudiay ndiy. Chad, mutapu ik Umwing ukweta mwom kudiokal pakur wakad disambishil, Yehova, muyimenay atushalapol end apamina kal amakundj ni amband? Dizu dia Nzamb dilondil anch “jinvu jitok jidi chibangul cha uyaj, akat kujimen mwinjil ya kutentam.” (Jinsw. 16:31) Mwawiy, anch mwin Kristu ushinshamena ukweta nswich jitok, ap wamekena kal anch wakungin kal ukwet usey ku mes kwa Nzamb. Ov, uyimen akadivar ney ni anambaz ney akungina kal mudi muyimenay Yehova?

Mulong wak Kuyitongin ni Kuyilimish?

3. Mulong wak tufanyidin kumekesh rukat kudiau amapal?

³ Pakach pa akadivar inay akungina kal a Nzamb padi yid ya Chisak Chitakedila cha Atuman a Yehova, mu chisu chinech atulam a munyimuku, ayibol akweta mushiku, ni in kulejan a Want aswila kal—akadivar ni anambaz akata kusadilang ni kushinshaman mu yikumangen. Uyijaku amwing akweta mushiku wa kulejan rusangu ruwamp mivu yivud yasalau kal ni akweta yilakej yau yiwamp ayikwashin katat ansand ni kuyitakel mu mwom yau. Amapal amwing in kwitiyij akwet yisend yilimina nakash ni akat kujijaman mulong wa kuzengol kwa rusangu ruwamp. Yehova ni “kashalapol ushishamena ni kubabal” ajikitishin nakash mulong mudimu wau wasalau pasak ni usadilau katat mulong wa Want.—Mat. 24:45.

4. Mulong wak tufanyidin kuyilimish amapal in Kristu ni kulembil mulong wa awiy?

⁴ Amapal mudi inay awanyidin kamu kuyijikitish ni kuyilimish kudiau atushalapol akwau a Yehova Nzamb. Pa chinech, Chijil cha Nzamb chapanay kudiay Moses chadinga chovijadin kuyibangin ni kuyilimish amapal nich wom wa Yehova. (Lev. 19:32) Tufanyidin kulembilang chisu chawonsu mulong wa kushinshaman kwau ni kumujikitish Nzamb mulong wa mudimu wau usadilanau ni rukat. Mupostol Paul walembila mulong wa in mudimu nend pamwing, ansand nau amapal.—Tang 1 Tesalonika 1:2, 3.

5. Mutapu ik tukutaninamu mu kubombakanang pamwing nau amapal akata kumwifukwil Yehova?

⁵ Pa chinech, antu awonsu mu chikumangen akutwish kutaninaku mu kubombakanang pamwing nau amapal in Kristu. Mu kwilejang, mu kushinshikinang ni kuman-man kwau, atushalapol amapal amwifukwedila Yehova akwet usey ni ronganyin. Ilejin kal mutapu wa kusadil kushimpish ni kwitek pa ndond ya akwau, ni akat kusut mu yom yilejinau katat yiletididin musangar ujim ni kuchangumok. (Kus. 71:18) Ansand, ikalany in manangu ni chofany ku musul wa ronganyin mudi uvitinany mem mu dijiy dikurikina.—Jinsw. 20:5.  

6. Mutapu ik tukuyimekeshina amapal anch tuyinkin usey?

⁶ Ov, ukat kwimekeshang kudi amapal anch uyikatin mudi muyikatinay Yehova? Njil yimwing yidi ya kuyilejang mutapu uyikatina mulong wa kushinshaman kwau ni mutapu ukata kulimishang yitongijok yau. Pa chinech, mu kusadilang yiwilejina kudi awiy, ukumekesh anch kalimish key mudi awiy kadi kakin. In Kristu avud amapal akat kutambulang kubabesh kwa manangu kutambwilau kudiau amakurump ashinshamena ni akat kutaninamu mu mwom yau.a

Mekesh Rukat mu Jinjil Kushalijan

7. Anany inkay Yehova chisend cha kusambish mulong wa kuyilam amapal?

⁷ Nzamb wapana ku majuku ma amapal chisend cha kusambish mulong wa kuyilam. (Tang 1 Timote 5:4, 8.) Yehova ukat kusangarang anch majuku mawanyish yisend mulong wa anvaj au amapal ni kumekesh anch ayilamin mudi muyilaminingay amwinend. Nzamb ukat kukwashang majuku ni kumayukish mulong wa mausu mau masadilau ni mulong wa midimu yau.b

8. Mulong wak yikumangen yifadidin kubangin in Kristu amapal?

⁸ Chawiy chimwing, Yehova ukata kusangarang anch yikumangen yakwash amapal ashinshamena adia mu maswir akad kwikal nau in kwitiyij ap akad kukwashau kudi yid yau ya mu dijuku. (1 Tim. 5:3, 5, 9, 10) Yikumangen yikutwish kumekesh anch yikwet ‘yovil ya rukat ra ukadivar, ni ranaken’ mulong wa amapal. (1 Pita 3:8) Kubangin kwau mulong wa amapal mu chikumangen Paul walonda anch, anch muntu umwing uyedil awonsu afanyin kuyel nend pamwing, “yid yawonsu yikonk nau.” (1 Kor. 12:26) Kumekeshang ranaken, mulong wa amapal yikat kumekesh mbil pa chiyul cha Paul chalonday anch: “Sendijanany yisend ya muntu mukwau ni mukwau, chawiy uwanyishany yijil ya Kristu.”—Gal. 6:2.

9. Yisend ik yikwetau amapal?

⁹ Yisend ik yikwetau amapal? Yidi yivud. Akwet yom yivud yifanyidina kusalau—kuya kumutal dokiter, kufut nfalang, kukombang mu chikumbu, kwisukang yakudia—yidi yom yifanyidina kusalau. Kov nzal ni kov impu kwayikepin kakwau mulong wa kupam kwau kwapaminau kal, akat kutong anch kakutwishap kwau adia yom yivud ap kuna. Chidi kand chimwing kwilejang Bibil ni kushik ku yikumangen. Mes mau ni matu mau makuteshangap kand nawamp ku program usadikina, ni kuya ku yikumangen ya win Kristu kuyiziyishining. Yom ik yikutwishau kusal antu akwau mulong wa mapal?

Mutapu wa Kuyikwash

10. Mutapu ik ukumanau amakurump a chikumangen anch amapal akwet kuswir kwa ukwash?

¹⁰ Ku yikumangen yivud, amapal kudi muyilaminau kushalijan. Kuyikat akadivar ni anambaz kuyikwashang yakudia, kuyisukinang, ni kuyimbinang. Akat kuyikwash amapal kwilej, kuyiletang ku yikumangan, ni kuyikwash adandamen mu mudimu wau. Ansand adia Atuman akat kuyitwalangaku ni kuyisend kand. Anch ipal wakangany kutumbuk kwol kwend ufanyididin kumulej ku telefon. Choviken anch, amakurump akakuteshang yitenchik yiney yidi ya kusadil mulong wa kukwash maswir ma makurump mu chikumangen.c

11. Rumburil mutapu weza dijuku dimwing kukwash mukadivar ipal.

¹¹ Mwin Kristu mwawonsu ufanyididin kwakanang ni kupanang. Ipal umwing wafisha mukajend, yadinga yimukasikedin kufut nfalang. Ndiy ni mukajend ilejanga Bibil ni dichuku dimwing—tatuku, maku, ni anau ayangadim aading—adinga ni chikumbu chijim. Ayinkisha tupalikany twaad. Mu mivu 15, adiangang pamwing, kusanger pamwing, ni kusutish chisu chiwamp pamwing. Nsand wataninamu nakash mu kwilejang ni yamanay yeza kumukwash chakwel ikala ni musangar. Mukadivar winou mukurump wa chikumangen washakama nau kushik kamu pafilay nich mivu 89. Chawiy dijuku diadandamena kumujikitish Nzamb mulong wa mayukish mau mavud matambulau kushakam pamwing. Kashadishap ‘difut diau bwat’ mulong wa kuyikwashang anamakwau in kwilej a Yesu Kristu.—Mat. 10:42.d

12. Yom ik ukuyimekeshina akadivar ney ni anambaz ey akungina kal?

¹² Kiukutwishapu kumukwash mukadivar wapamina kal ap nambaz wapamina kal mudi mwasala dijuku dined, pakwez ukutwish kuyikwash kuyiletang ku chikumangen ni mu mudimu wa chingand. Ukutwish kand kuyitazuk ku chikumbu chey chakwel usangar nau pamwing. Ukutwish kuyendin, chisu chiyedinau ap chikangenau kwend. Chikwau kand, ukuyimekeshin chisu chawonsu mudi antu apamina kal. Mutapu uchikwetau kal manang, amapal in Kristu akutwish kusadil mipak yau yikutwisha kuyikwash. Ap ay ashadishila kal mwikadil wau wa manang akutwish kwiyov anch akwau ayisadidin nich ntumb ni kalimish.

Yehova Kadip Wakad Kutentam wa Kuvuramen Mudimu Wen

13. Mulong wak kuyibangin in Kristu amapal kukwet usey?

¹³ Yikwet usey kubanginang yovil ya amapal. Yoviken kamu anch amapal kakusangarap mulong wa kuwanyish yom yasalangau ku winsand wau ap padiau ni mijimbu yikwash. Pa chinech, nambaz umwing wamusadila Yehova nich kuchangumuk mu mivu 50 ni wadinga chibol wa rawonsu chadi ndiy wezang kuyel ni waziya ni yamukasikenang kand kukumangan. Chadi pafanikeshangay mudimu wend wa pakur ni wa katat, ndiy wadilanga. Wazendjik mutu pansh, walond mudi sot adil, “kinisadilap kand chom ap chimwing.”

14. Dikasikesh ik tutanina mu kuseng mulong wa amapal amusadidina Yehova?

¹⁴ Anch udi muntu wakungina kal, wovil niyey kusansan? Ap chawiy chisu umena anch Yehova wakulik kal? Mwin kuseng niyend wadinga nich chitong chimwing mu mivu ya kwinyim wamuchingejina Yehova: “Kangal wandjibul ku mivu ya kunanap kwam. Kangal wangipuk pakupwa kwa usu wam. Inge, anch nananap nchik ni kwikal nich nswich jitok to, A Nzamb kangal wanlik.” (Kus. 71:9, 18) Mwawiy kamu, Yehova kamulikap mwin kufund wa kuseng, niyey kakukulikap. Mu kuseng mukwau, David ulondil mulong wa ruchingej ni ukwasha wa Nzamb. (Tang Kuseng 68:19.) Ijik anch, anch udi kashalapol ipal mwin Kristu ushinshamena, Yehova udi niyeyey ni ukudandamen kukukwash dichuku ni dichuku.

15. Mutapu ik tukumukwasha ipal adandamena kuman yom mutapu uwamp?

¹⁵ En awonsu amapal udianya Atuman a Yehova wasadinany kal ni udandamedinany kusal mulong wa uyaj wa Nzamb ni kiudianyap kulemp ku manang mend. “Nzamb kadip wakad kutentam wa kuvuramen mudimu wen ni rukat riukata kumekeshilany mu dijin diend,” mwamu mulondinay Bibil. (Heb. 6:10) Pa chinech, lik kuman yom mutapu uyimp, yitongijok yiyimp anch mulong wapamin kal ni ukwetap usey kudi Yehova. Swinkesh pa ushon wey yitongijok yakin nich ya musangar. Sanger mulong wa mayukish mey ni ruchingej rey mulong wa machuku ma kurutu! Tukwet “machuku ma kurutu ni ruchingej”—yom yiswakela—yiney yidi kapopu ka Sakatang wetu. (Jer. 29:11, 12; Mid. 17:31; 1 Tim. 6:19) Mekesh ruchidngej, sal mudimu mudi nsand mu muchim wey ni mu manang mey, ni kangal ulika kumekesh usey wa kwezang ku chikumangen!e

16. Mulong wak mukadivar umwing chipal chatongay kwimik kusadil mudi mukurump wa chikumangen, chad mutapu ik wamukwashau kudi chisak cha amakurump?

¹⁶ Shinshikin Johan, padingay ni mivu 80 wadinga ushinshamen mu mudimu wa chisu chawonsu, wading chibid, wading ni mband, Sannie.f Anambaz ashakamanga pamwing ni Sannie pakwez Johan wayanga ku yikumangan ni kulejan. Pa chinech, Johan wiyovanga piswimp ni watongijokanga anch kakutwishap kand wasal mudi mukurump mu chikumangen. “Mulong wak kwintek mukurump?” mwamu mwipulay ni mansoj mend ku mes. “Nikwetap usey wa kusal machuku mavud ni chisend mu chikumangen.” Chad amapal akwau amukasikesha anch kuman-man kwend ni yitongijok yend kiyiwanyidinap bwat. Amukasikesha kudandamen kusal mudi mukurump, ap anch kadingap kand ni kufundishang. Chamukasikeshau chipandikena, Johan wandamena kusadil mudi mukurump, mulong wa mayukish ma chikumangen.

Yehova Udandamedining Kamu Kukwash

17. Bibil upanin kashinsh ik kudi amapal in Kristu?

¹⁷ Mifund yilondil kamu patok anch amakurump akudandamen kusal mudimu wau ap anch kudiap nchik milong ya kupam kwau. Mwin kuseng ulondil anch: “Ayikuna ku chikumbu cha Nsalejetu . . . Yikez kasong mabuj ni mu upal wau, yikwikal yitalel nich mem mau.” (Kus. 92:13, 14) Mupostol Paul, nindiy wamanaku mar ku mujimbu, ‘kalikap, ap anch muntu udi pol waziy.’—Tang 2 Korint 4:16-18.

18. Mulong wak amapal in kwitiyij ni akata kuyilamang aswiridin ukwash kudi akwau?

¹⁸ Yilikej yivud ya machuku minam yimekeshin anch amapal “adandamedin kamu kusal mudimu.” Pakwez, yakamish ya mayej ni ya kupam yikutwish kuyiletish wom, ap ay alaminau ni akwau akwashinau kudi yid ya dijuku. Muntu ukata kuyikwash ukutwish kwend waziy. Chikumangen chikwet yisend chifanyidin chimekesh rukat mulong wa mukadivar ipal winou ni ay akata kumulamang. (Gal. 6:10) Ukwash mudi winou, kitufanyidinap kumulej anch yangany “ukwotany kasu ni kwikut” pakad kumukwash chom.—Yak. 2:15-17.

19. Mulong wak in Kristu amapal ashinshamena afanyidin kuman machuku ma kurutu nich ruchingkej?

¹⁹ Kupam kukat kuswimpang mudimu wa win Kristu, pakwez chisu chikuswimpangap kwau kudiay Yehova mulong wa rukat rend ra atushalapol end amapal ashinshamena. Mu kushalijan, in Kristu in awonsu ashinshamena akwet usey ku mes ma Nzamb, ni kakutwishap wayilik. (Kus. 37:28; Isay 46:4) Yehova ukuyikwash ni kuyitakel kushik ni ku upal wau.—Kus. 48:14.

[Mazu madia kwishin kwa paj]

Mutapu ik Ukwakula?

• Mutapu ik ukumumanaku mwin Kristu udia ipal ushinshamena anch ukwet usey?

• Mutapu ik ukumekesha rukat mulong wa amapal atukata kwifukwil nau?

• Mutapu ik tukuyikwasha atushalapol a Yehova akungina kal chakwel ikala nich kuman kuwamp?

[Chipich chidia pa paj wa 18]

Yid ya chikumangen yikwet chisend mulong wa amapal