“Antwarubil a Want Akweta Mushiku” Chikunguril cha Distrik cha Atuman’a Yehova cha 2002
1 “Am nasangar panlejau anch, ‘tuyany ku chikumbu cha [Yehova, NW].’ ” (Kus. 122:1) Nich kushinshikin mazu ma nfund-a-kuseng, ukuman mutapu (1) wiyovay chisu chamutazukau kuya ni kumwifukwil Yehova, (2) wading ni arund awamp, antu adinga niyawiy ni kusanger nakash difukwil diakin, ni (3) yirijek yafanyidinay kusadik chakwel kupan diladikij, mulong wa kukumangan pamwing ni kukas weny wa kuya ku chikumbu cha Nzamb.
2 Ov umenap kwey anch mazu ma nfund-a-kuseng mamekeshin mutapu tukat kwiyov chisu tukata kutesh anch asadin yitenchik mulong wa chikunguril chetu chikulondulaku? Tukat kuchingel ni kushimpish muchim, mulong tukat kuvurik misangar yitwamena ku yikunguril yasutina kal ni ruchingej ra kwikal kand ku kukumangan kwinoku kwa pakampwil pamwing nau ambay netu amukatina Yehova. Akwatin kal yitenchik mulong wa Chikunguril cha Distrik cha machuku masatu “Antwarubil a Want Akweta Mushiku” mu teritwar mwawonsu wa mutiy wa Congo mu muvu wa 2002. Katat chawiy chisu chetwetu kwirijek chakwel kwez ni kukumangan ni kutambul ukwash ujim udiokila ku musambu wa muspiritu utuchingedina.
3 “Kashalapol wakin ukweta manangu,” wasambishin kal kurijek yakudia ya muspiritu ya pa chisu yikupanau ku chikunguril. (Luka 12:42) Chikumangen ni chikumangen achitumin ku chikunguril chijikena chakwel anch kangal kweza kwikal runtu ruvud chipandikena kwi ndond ya chikunguril ni ku ma otel a pa ndond yiney. Chikwau kand, akadivar avud asambishin kal kutenchik madepartema kushalijan ma chikunguril chakwel anch ‘yom yawonsu yisadika ni kuyirijek nawamp wakad kurumbangan.’ (1Kor. 14:40) Nich yom yivud yidiaku kal tayad mulong wa ukwash wetu ni kuwap kwetu, ov chom ik tukutwisha kusal ayinetu chakwel kwirijek mulong wa chikunguril?
4 Irijeka Kusambish Kamu Katat Mulong wa Kwikalaku Machuku Mawonsu Masatu: Ov ukwet kuswir kwa kumwit mukurump wey wa mudimu konje mulong wa kukumangan ku chikunguril chen chawonsu? Yehova wiji anch amakurump amwing a midimu ading antu “isumina.” (1Pit. 2:18) Pakwez yikunguril yetu yiding ya usey nakash, ni tusotin kusal usu wa kashinsh chakwel kukumangan ku program mwawonsu. Mwita Yehova mu dilembil piur pa milong mud yiney, ni kukimb umutakel wend mulong wa chibudikin chiwamp.—Neh. 2:4, NW.
5 Ndond ya kulal: Ndond ya kulal yiding chisu chivud yikumbu ya antu a chijikan. Tufanyidin kumekesh kujikitish kud akadivar ni anambaz itiyidina kutuladik kwol kwau. Chikwau kand, chiwapilap anch antu akinau mutapu winou asadila kuyak kwayakinau kwinoku mutapu uyimp ni kwit anch ayiladika machuku mavud kurutu ap kwinyim kwa chikunguril. Ndond ya kulal ayipanining ching kamu pa chisu cha chikunguril. Antu inkinau ndond ya kulal mud yiney afanyidin kulimish yom ya muntu wayakanga, pikil kuyipish chom ap chimwing, kangal aya kwi ndond kwakadau kuyitazuk, ni kutal nawamp anch anau asala chilik chimwing. Anch antu atwakina akwet matat kanang ku mutambu winou, afanyidin kapamp kamwing kwijikish departema wa ndond ya kulal, ni departema winou ukusangar kupan ukwash wend. Kusadil kuwamp ni kuwap kwa departema wa ndond ya kulal kwimanyidin pa kusadil pamwing kwa muntu ni muntu. (Heb. 13:17) Twatambwil jinsangu ja kwel anch amwing akat kushang ndond ya kulal yiyinkishinau mulong wa kuya ndond yindjing, ndond kukutwisha kwikal murund nau ap muntu wa chijiken nau. Chinech chikat kurumbangesh mudimu wa akadivar a departema wa ndond ya kulal. Tukwitinany amboku en awonsu kusadil pamwing ni departema winou.
6 Chakin anch Yehova upanining ukwash wend ku yisadilau mulong wa yikunguril ya muvu. Mud akadivar avud chikatau kukas weny wa kuya ku chikunguril cha distrik chikwetau kuswir kwa ndond ya kulal, tukutwish kwitiy chakin anch Yehova ukuwanyish nswir jau mutapu ufanyidina. Milong yiney chiyitadila difukwil diakin, tufanyidin kulondul nich musangar yany yipaninau. Tumekeshin anch tudi in kushinshaman mu tuyom tukemp; tukutwish chad lel kutambul yisakin yivud yichingedina antu amukatina Yehova. — Luka 16:10.
7 Banginany Yid Yikwau ya Chikumangen: Anch twiji anch mukadivar ap nambaz ukwet kuswir kwa yom kanang ya ku mujimbu yikutwisha kumukangesh kukumangan ku chikunguril, ov tukutwishap kwazuril “michim” yetu nich rukat ni kupan ukwash kanang? (2Kor. 6:12, 13; Kuv. 15:7) Chawiy chitongijok chakasikeshinay Paul mu 2 Korint 8:14. Ov mulong wak kulik kuyitazukap antu mud inay kuya nau pamwing ku chikunguril? Anch adi ayibol, chakin kamu akwikal ni jinsangu jivud jitambwilau mu mudimu wa kulejan ja kushimunin chisu chiyilau mu weny. Anch adi amapal (antu ananapina kal) a mu chikumangen, akutwish kwikal nich rusangu ripandakena kuwap ra uteokras riwakad kal ey kuteshap. Ov kwikal pamwing nau akadivar ni anambaz inay kukutwishap kwikal nich chibachikin chiwamp padi ey ni dijuku diey? Akusanger muchim wey wa kupan ni ukez kutambul difut kud Yehova.—Jinsw. 28:27; Mat. 10:42.
8 Ap anch antu akwet nswir ja pakampwil afanyidin bil kuyikwash kud anamakwau adia in Kristu, amakurump ni yid yikwau ya chikumangen ija mwikadil wau akutwish kuyikwash kwirijek nich rukat. (1Tim. 5:4) Anch atumin Komite wa Midimu wa Chikumangen fomu Demande de chambre pour cas particulier, komite ufanyidin kushinshikin nawamp anch mwin kwit mwawonsu uwanyishin yitinau kurutu kwa kumupan ku Departema utadila milong ya kulal.
9 Twitiyany Kamu Kusal Mud Mwin Kwikatin: Chisu cha chikunguril, yitot ya in kwikatin yikat kwipanang kamu swa nich kusadil kuwamp kwa madepartema. Akat kuyikwash in kukumangan mwi ndond ya kukumangen ni ndond ya kutek miotak ni jinking mu kupan umutakel mulong wa kutan ndond ya kushakam ni kulam miotak yetu ni jinking muten wawonsu wa kabuj. Departema utadila milong ya Kwinang ukwet chisend cha kulam katumb ketu kawamp mulong wa kwinang, kulam pa ndond yetu ya difukwil yinangina kupandakanamu mutapu wayadinga kurutu kwa kuyisadil. Ov tukutwish kuyikwash inay ap madepartema makwau makutwisha kusadil ukwash wetu? Ov ukez kupan ukwash wey amwiney chakwel kusadil “chikij ku chikij” pamwing ni akadivar ey?—Sof. 3:9, NW.
10 Ov Antu Amen Chakin Kamu Yitusadila? Chisu cha chikunguril cha distrik cha muvu wasutina ou, ikundj umwing wimika kwilej nau Atuman’a Yehova kusut kwa mivu 20 wading ni kusal mu otel. Wayileja Atuman amwing anch wadi utongidin katat kusambishiril kand dilejan diend dia Baibel ni kusambish kand kuyang ku yikumangan. Ov mulong wak? Mulong wa rukat ramumekeshidilau kud Atuman adinga ku otel winou.
11 Ikundj umwing mwin kulandish ku otel wayileja akadivar anch: “Chisak chen chidi chisak chimwing chipandikena kuwap chishicha ku otel wetu. En udiany antu amwing in kushimpish muchim ni akweta kalimish.” Chinech chifanyidin kusangaresh mud ik Tatukwetu wa mwiur patumenay tukat kulondul chiyul cha Yesu: “Chifanyidin uman wen ni yisalijok yen yimekan kurutu kwa antu chakwel amushiman Tatukwen udia mwiur.”!—Mat. 5:16
12 Tumekeshany ngikadil yadingay nich Mwant David, wadinga ni kutongin kurutu kwa chisu ni musangar kuyang ku chikumbu cha kumwifukwil Yehova. Yikunguril yetu ya distrik yidi musul wa yakudia ya muspiritu yikweta mwom ni chisu chimwing chakad kwilikej cha arund netu akatish. Chawiy lel, tukutazukinany nich musangar kusambish kwitenchik chakwel kukumangan ku yikunku yawonsu ya machuku mawonsu masatu ya Chikunguril cha Distrik cha muvu unou “Antwarubil a Want Akweta Mushiku”!
[Caption on page 3]
Program
[Caption on page 3]
[Picture on page 3]
Diakatan ni Diampos
9h:30—17h:00
Diarubing
9h:30—16h:00
[Caption on page 4]
[Picture on page 4]
Yitenchik yimwing yifanyidina kusal mulong wa kukumangan ku yikunguril “Antwarubil a Want Akweta Mushiku”
1. Anch ufanyidin kukas weny umwing ulemp mulong wa kukumangan ku chikunguril, sambish kulam nfalang mulong wa kufut ditike diey ni dia dijuku diey, ni ja kuland nich yakudia.
2. Tongin kand kukwatikesh dirijek dia chikunguril nich milambu yey. ‘Kangal muntu ap kusu umwing kwez kwimekesh kurutu kwa Yehova makas a makas,’ pakwez ‘mulimisha Yehova nich yom yey yawonsu ya usey.’—Kuv. 16:16; Jinsw. 3:9.
3. Tukutumbish kand dijin dia Yehova anch twikal ni ngikadil yiwamp pa chisu cha yikunguril ni kwikal ni yidjal yinangina ni yifanyidina.—1 Kor. 10:31.
4. Jijaman kusadil pamwing ni akadivar akweta mudimu wa kwandjik ni kushichik antu. Kangal wakwatin ndond chamwamu, ching kusu mulong wa yid ya dijuku diey ap antu wezina nau pamwing.
5. Pa yisu ya kupim, ukutal nawamp anch udia yakudia yipipela mulong wa kutwish kwisakin sens yikunku ya urel. Yakudia yilimina yikat kuzedishanang tul.—Luka 8:18.
6. Kwinang kumulimishining Yehova. Kwisudiel kwa chikunku ni chikunku, muntu ni muntu uwapidil kusal yawonsu yikutwishay chakwel kusha ndond ya chikunguril yinangina nich kunonol mapapel ni yom yikwau yifanikena nich mulong wa kuyidjibul mu mashitil matekilau mulong wa yishoshot.—1 Pita 1:15, 16.