Yikumangan ya Mudimu wa Chingand Yiwanyishin Rutong Ray

1. Ov, yikumangan ya mudimu wa chingand yikweting rutong ik?

¹ Pa yisu yimwing, Yesu wakumangan pamwing ni in kwilejend 70 kurutu ayituma kuya kulejan. (Luka 10:1-11) Ndiy wayikasikesha kusutil ku kuyivurish anch kakezap kwikal ayinau ni akez kuyitakel kamu kudi “Mwant wa jimbut,” Yehova. Ndiy wayinkisha kand yany yela kuyikwash chakwel asala nawamp mudimu winou ni wayituma “aad aad.” Nlel unou, yikumangan yitukweta yikweting rutong ra chilik chimwing ra kutukwasha mu mudimu wa kulejan​—chakwel yitukasikesha, yitukwasha ni yitenchika yom.

2. Ov, chikumangan cha mudimu wa chingand chifanyidin kusutish asaa inch?

² Nlel unou, chikumangan cha mudimu wa chingand chisutishining minit 10 ap 15, mu minit yiney muding kutenchik kwa yirund, kwangan kwa teritwar ni malembil. Pakwez, chikwikalap kand mwamu. Kusambil pa Ndol, chikumangan cha mudimu wa chingand chikez kusutish minit yitan ap sambwad. Pakwez, anch kukwikal kand chikumangen cha chikumangan chikusadika, chifanyidin kuswimpish chisu, mulong antu akukumangan akutwish kusanger kutesh Verse ukwisambinau. Kukepish chisu cha chikumangan cha mudimu wa chingand kukez kuyikwash in kulejan awonsu ipana nakash mu mudimu wa kulejan. Chikwau kand, anch ayibol ap in kulejan asambish mudimu wau wa kulejan kurutu kwa chikumangen cha mudimu wa chingand kusambish, chidi cha usey mu kachisu kakemp imikaku bil mudimu wau.

3. Ov, mutapu ik ufanyidinau kurijek yikumangan ya mudimu wa chingand chakwel yikala ya ukwash kudi in kulejan?

³ Yikumangan ya mudimu wa chingand afanyidin kuyirijek nawamp chakwel yikala ya ukwash nakash kudi in kulejan. Mu yikumangen yivud chiding cha usey yirund ya mudimu wa chingand kukumangan panrau pa ndond pa kuyibomb yawonsu pamwing mwindond yimwing. Chinech chikutwish chayiswapel in kulejan kuya kukumangan mulong wa mudimu wa chingand ni pamwing ap kuya mu teritwar. In kulejan akutwish kwirijek swa ni chikuyiswapel atulam a yirund chakwel ata muchim ku maswir ma in kulejan adia mu yirund yau. Chisak cha amakurump chikutwish kushinshikin mashakamin ma pol pau ni kukwat mupak ik uwamp ufanyidinau kulondul. Kurutu chikumangan cha mudimu wa chingand chipwa nich malembil, in kulejan awonsu afanyidin kwijik ndond yikuyau ni muntu ukuyau nend mu mudimu wa kulejan.

4. Ov, mulong wak chifanyidinap kuman yikumangan ya mudimu wa chingand mudi yikwet usey ukemp kupandakanamu yikumangan yikwau?

⁴ Kwikil Yikumangan ya Chikumangen Yipandakenamu Usey Yikumangan Yikwau: Mulong yikumangan ya mudimu wa chingand yidingaku mulong wa kuyikwash in kulejan ayilinga mu mudimu wa kulejan ni kadiap antu awonsu akat kukumanganamu. Pakwez, chinech chirumburikinap anch chikumangan chinech chidi cha kupipej ap chikwet usey ukemp kupandakanamu yikumangan ya chikumangen. Mudi yidinga yikumangan yetu yawonsu, yikumangan ya mudimu wa chingand yiding yitenchik ya Yehova yitukwashininga kwikasikesh mu rukat umwing ni mukwau ni mu yom yiwamp. (Heb. 10:24, 25) Chawiy lel, mwin kutakel ufanyidin kwirijek nawamp chakwel minsamb yiney yimutumbisha Yehova ni in kulejan awonsu akukumangan ataninamu. Anch chiwapin kusal mwamu, in kulejan akuya mu mudimu wa kulejan afanyidin kusal usu wa kukumangan.

5. (a) Ov, chisend ik chikwetay kalam wa mudimu mu kutenchik kwa yikumangan ya mudimu wa chingand? (b) Ov, mutapu ik ufanyidinay nambaz kutakel chikumangan cha mudimu wa chingand?

⁵ Mutapu Ufanyidinay Ntakel Kwirijek: Chakwel mwin kulejan kanang irijeka nawamp mulong wa chikunku cha chikumangan chinech, afanyidin kumwijikish kurutu kwa chisu. Chidiap cha kupipej chakin kamu pa mulong utadina chikumangan cha mudimu wa chingand. Chakin kamu, anch yirund ya mudimu wa chingand yakumangan panrau, atulam a yirund ap ankwash au awiy akutakedina yirund yau. Pakwez, anch chikumangen chikez kubomb chikumangan cha mudimu wa chingand pamwing, kalam wa mudimu ukez kutond mwin kulejan kanang chakwel achitakedila. Atulam amwing a mudimu apanining program kudi in kutakel awonsu ni atekining kopi wa program winou ku tablo wa yijikish. Kalam wa mudimu ufanyidin kusadil manangu payinkishiningau in kutakel chisend chinech, ufanyidin kwijik anch kusadik kuwamp kwa yikumangan yiney kukez kand kwimedin pa malejan ni ukaliweny wa kurijek wa in kutakel. Anch kwikil mukurump, nkwash wa mudimu ap mwin kulejan wabatishau kal ukweta uman ufanyidina kutakel pa dichuku kanang, kalam wa mudimu ufanyidin kutond nambaz wabatishau kal ukweta uman chakwel atakedila.​—Tal mutu wa mulong ulondina anch: “Anch Nambaz Ndiy Ufanyidinay Kutakel”.

6. Ov, mulong wak chidia cha usey kudi ntakel kwirijek nawamp?

⁶ Patwinkishiningau chikunku cha kusal ku Shikol ya Mudimu wa Uteokras ap ku Chikumangan cha Mudimu, tuchikwatining nich usey ni twirijekining nawamp kamu. Amwing pakach petu achingejining kuya kukumangan chakwel atesha yom yikulondau. Chikunku cha kutakel chikumangan cha mudimu wa chingand chifanyidin kuchiman chilik chimwing ni yikunku yikwau. Katat chikumangan cha mudimu wa chingand chikwikal cha chisu chikemp, chawiy lel kwirijek nawamp kudi kwa usey chakwel chikumangan chinech chikala cha usey ni chipwa pa chisu chiwanyidina. Kwirijek nawamp kwitining kand kutambul teritwar wa kulejan kurutu kwa chisu.

7. Ov, yom ik yimwing yifanyidinay ntakel kwisambin?

⁷ Yom ya Kwisambin: Mulong mashakamin ma antu mashalijadin mu teritwar umwing ni mukwau chawiy lel, kashalapol ushinshamena kabudishiningap mutu wa mulong wa pakampwil wa kwisambin mu chikumangan chin chawonsu cha mudimu wa chingand. Mushet ulondina anch: “Pa Chisu cha Kutakel Chikumangan cha Mudimu wa Chingand, Ukutwish Kushinshikinany pa” mitapu yimwing ya kusadil. Yisu yivud, chikumangan chinech chikwikal mudi cha minsamb. Kapamp kamwing, chikutwish kwikal ni chakumenaku chirijekinau nawamp ap video uwanyidina utekinau pa jw.org. Pirijekinay mulong wa chikumangan cha mudimu wa chingand, ntakel ufanyidin kutongin piur pa yom yikezay kukasikeshin ni kuyikwash in kulejan akuya mu mudimu wa kulejan pa dichuku dinidia.

8. Ov, chom ik chimwing cha usey chifanyidinau kwisambin pa chisu cha chikumangan cha mudimu wa chingand Diampos ap Diarubing?

⁸ Chilakej, Diampos in kulejan avud apanining Chinong cha Kalam ni Réveillez-vous ! In kulejan avud ipanininga mu mudimu wa kulejan pa Diampos kakutwishap kwipan pa rubing rawonsu, chawiy lel chikutwish kuyikasiken kuvurik yiyul ya kusadil pa mutapu wa kupan magazet pa chisu cha urel wau wa Kwifukwil mu Dijuku. Chawiy lel, chidi cha usey kudi ntakel kuchirikinamu dinans dimwing dia yakumenaku ya sampul yidia pa paj wa nsudiel wa Mudimu Wetu wa Want. Yiyul yikwau yilejena pa mutapu wa kwisambin pa jinsangu jisu ja pol pen, chinship ap dichuku ditumbila dilejenau mu gazet ap mutapu wa kumulej mwin chikumbu chisu chikwau tukeza kumuchirikin anch witiy magazet. Anch chikumangan kanang cha mudimu wa chingand chasadidin kal magazet mamwing ma kupan, mwin kutakel ukutwish kuyit in kulejan chakwel isambina mu wiswimp manans mamwing ap isambina pa uman ukasikeshina. Diarubing, ntakel ukutwish kutond yom kanang ya chilik chimwing yitadina pa mutapu wa kupan magazet ma pa ngond. Mikand ya kwilej nich, mudi mabroshir Rusangu Ruwamp, Mutesha Nzamb ni buku Chifundishinay Bibil akutwish kuyipan pa dichuku kanang, chawiy lel, ntakel ukutwish kwisambin mu wiswimp pa mutapu wa kupan umwing wa mikand yiney.

9. Ov, chom ik chifanyidina kwisambin pa rubing ra kwipan mu kampany wa pakampwil?

⁹ Anch chikumangen chipan mu kampany wa pakampwil pa rubing riner, ntakel ukutwish kushinshikin mutapu wa kupan magazet masu pamwing ni diladikij ap trakt, ap ukutwish kwisambin pa chom chifanyidina kusal anch muntu wamekesh musangar. Chiyul chikwau chikutwish kwikal cha kwisambin uman kanang ukasikeshina pa usey wa kwipan mu makampany minam.

10, 11. Ov, mulong wak kwirijek kwa in kulejan kuding kwa usey chakwel chikumangan cha mudimu wa chingand chisadika nawamp?

¹⁰ Mutapu Ufanyidinau In Kwilej Kwirijek: In kulejan afanyidin niyawiy kwirijek chakwel chikumangan cha mudimu wa chingand chisadika nawamp. Kusutil ku kwirijek kurutu kwa chisu mulong wa chikumangan chinech, pamwing ap mu difukwil diau dia mu dijuku, akez kwisambin yom yimwing yasalau pamwing ni in kulejan akwau. Kwirijek kuwamp kwitining kand kutambul magazet ni mikand yikwau kurutu kwa kwez ku chikumangan cha mudimu wa chingand chakwel in kulejan awonsu aya mu teritwar pakad kulab.

¹¹ Chidi cha usey kand kutenchik chisu cha kushikang mu minit akemp kurutu chikumangan chinech chisambisha. Chakin kamu, tufanyidin kusal usu wetu wawonsu wa kushikang kurutu kwa chisu ku yikumangan yawonsu ya chikumangen. Pakwez, chikutwish kulet pakampwil kampuw anch twashik kwinyim kwa chisu ku chikumangan cha mudimu wa chingand. Ov, mutapu? Mukadivar ukutakel ufanyidin kushinshikin yom ya kwisambin kurutu kwa kutakel chirund. Anch kudi in kulejan akemp ashika kurutu kwa chisu, mukadivar winou ukutwish kutakel chakwel in kulejan inay aya kapamp kamwing mu teritwar mu mutapu uwamp. Anch in kulejan eza kukumangan ku chikumangan cha mudimu wa chingand akuya mu teritwar udia kulemp, ndiy ukutwish kuyitek pamwing ni in kulejan akuyila mu miotak chakwel aya nau. Anch mu teritwar kanang mudi milong ya chisum yikash, ndiy ufanyidin kutond akadivar chakwel asala pamwing ni yirund ya anambaz yidia piswimp. In kulejan adia ayibid afanyidin kulejan mu balibal yidia piswimp ap jindond jidia piswimp nakash. In kulejan asu afanyidin kusal pamwing ni in kulejan akweta uman uvud. Pakwez, anch in kulejan amwing ashik kwinyim kwa chisu, chifanyidin kuchirikin kand mutapu wa kwangan kwa in kulejan chakwel ukwatijana ni in kulejan inay ashika kwinyim kwa chisu. Chakin kamu, yisu yimwing tukweting mayingish makata kutushikij kwinyim kwa chisu. Pakwez, anch tukwetining chaku cha kushikang kwinyim kwa chisu, tukutwish kwiyipul ayinetu anch chidi mulong tukatap kusangaredinang yikumangan ya mudimu wa chingand ap anch chidi mulong tukangenying kurijek yom yetu kurutu kwa chisu.

12. Anch yisu yivud utenchikining amwiney mulong wa kuya mu mudimu wa kulejan, ov, chom ik ukutwisha kushinshikin?

¹² In kulejan akukumangan akutwish kutenchik ayinau kurutu kwa chikumangan kusambish ap akutwish kutond mbay wa mudimu ukutwishau kusal nend. Anch yisu yivud ukwatining mupak amwiney, ov, ukutwish nchik ‘kujimbish’ mudimu wey wa kulejan pamwing ni in kulejan ashalijadina pa ndond pa kulejanang ching kusu ni arund ney chisu ni chisu? (2 Kor. 6:11-13) Ov, ukutwish yisu yimwing kulejan pamwing ni mwin kulejan musu chakwel umukwasha kukudish ukaliweny wend wa kufundish? (1 Kor. 10:24; 1 Tim. 4:13, 15) Tesh nawamp yany yiwatambula ni umutakel utadina ndond yiukusambishina kulejan. Anch kamu chikumangan chapwa, ipuk kuswimpol kapamp kamwing yatenchikangau kal ni yang mu teritwar.

13. Anch etu awonsu twasal usu wa kuwanyish ni kushinshikin pa yisend yiney yitukweta, ov, yikumangan yikwikal nich yibudikin ik padi etu?

¹³ Kupwa kwa kulejan kwau, in kulejan 70 atumay Yesu awiy “achirika nich musangar ujim.” (Luka 10:17) Chakin kamu, chikumangan chakumanganay Yesu nau kurutu asambisha mudimu wau wa kulejan chayikwasha kuwanyish nawamp mudimu wau wa kulejan. Nlel unou, yikumangan ya mudimu wa chingand yiding niyawiy ya ukwash wa chilik chimwing. Anch etu awonsu twasal usu wa kuwanyish ni kushinshikin pa yisend yiney yitukweta, yikumangan ya mudimu wa chingand yikez kutukasikesh, kutuwanyish ni kututenchik chakwel tuwanyisha chisend chetu cha kupan “uman kudi antu a michid yawonsu.”​—Mat. 24:14.