‘Twiyijidishany Kushimpish’
1 Chitumena nsudel ya ditenchik dia yom dia Satan dined yikat kushejin piswimp, chitufanyidin ‘kwiyijidish kushimpish’ ni pakwezila dichuku dikutupandishay Yehova. Nakash nakash pa muten winou wa nsudel, akankuny ayimp ajijamedin kuzuwol kubabal kwetu kwa kutek ukaleng wa Yehova pa ndond ya kusambish ni akat kupakish kutupak ni kutuzuwol nich yisakin yivud yivud ya muntu ipend. Mwi njil yiney, Satan usotin kutulikish ap kutuchirish kwinyim mu mudimu wa Want wa kulejan. (Yak. 5:7, 8; Mat. 24:13, 14) Mutapu ik tukutwisha kumekesh kushimpish mud kwinoku?
2 Kusutin Kwikal Iyudila: Pitusankena kuburen kusanger ap rupompat mu mudimu wetu, kwiyul kukutukwash kujijaman mu kulejan. Tukukwachikap nich wom ap kuman mud twabund kal milong anch twasankan antu adia ankatu (in kutukatol yitamp) ap akad kalimish. (1 Pi. 2:23) Usu winou wa mu muchim ukutwish kutukangesh kulondin nayimp antu adia mu teritwar wetu, amekeshina kuburen kusanger ap alikina kwitiy uruu wetu, ni tuwapidil kujingunin anch mazu mud minam makutwish kutuchirish etu kwinyim ni antu atubachikijina.
3 Kusutin Kushimpish ni Kujijaman: Kushimpish kwetu kukutwish kwikal mu kupimik anch kwinyim kwa kwisamb nawamp ni muntu kampand, kupwa pa kuchirikinimu ni kumutal twamutan muntu wasangerina kwikil. Chilik chimwing kand anch twilejin ni muntu Baibel pakwez kikasikeshinap kuya kurutu ap uchikakin pa kwikal ku mutambu wa uyakin. Pakwez, kushimpish ni kujijaman, chisu chivud kusongining mabuj. (Gal. 6:9) Nambaz umwing wamwendila mband umwing tupamp tuvud kurutu asambisha kwilej nend Baibel. Pa kuchirikinimu kutan kwa kusambish, mband winou wadinga ukwatiken ni milong yikwau. Pa kuchirikinimu kwa musamban, ruval wa mayal wamunakina nambaz, mulong katanap muntu ap umwing ku chikumbu. Pakwez, chajijamanay kumwinkish mband winou chisu chikwau kand, nambaz waya kand ni kumutal ni wamutana tayad mulong wa kwilej. Kupwa, mwin kwilej waya kurutu nakash ni mu chisu chikemp kusu wapana mwom wend kud Yehova.
4 Twij anch dichuku dia Yehova dikulabap. Chawiy lel tuchingedin anch Yehova akwata yom mu makas, twij anch kushimpish kwend kukez kusong mabuj mawamp. (Hab. 2:3, NW; 2 Pi. 3:9-15) Tufanyidin kwiyijidish kushimpish mud musadilay Yehova ni tuwapidilap kusha mudimu wa kulejan. Tutalany kud Yehova mulong wa masamun piur pa mudimu wetu ukash nich ‘ritiy ni kushimpish.’—Heb. 6:10-12.