Mukand Wa Chisak Chitakedina

Ambay Netu Akatish Atuman a Yehova:

Kambuy Paul wasadina yisu yawonsu yadingay nich ayimekeshin ambay nend akaritiy rukat rend ni kuyijikitish. Wayifundina in Kristu a mu in Rome anch: “Am namujikitish Nzamb wam mu Yesu Kristu mulong wenen awonsu, mulong ritiy ren rovakan kal ku mangand mawonsu.” (Rome 1:8) Mwawiy, in Kristu a pa chitot cha mivu cha kusambish ading ijiken mu mwab wawonsu wa Want wa Rome, mulong wa ritiy rau rikash, ni mushiku wau wa kulejan. (1 Tes. 1:8) Chishimokishinap anch Paul wading uyikatin nakash akadivar nend!

Mudi Paul, tukat kumujikitish Yehova chisu chin chawonsu tukata kukutongany. Tukukatilany nakash en awonsu! Ni ikalany nich kashinsh anch Yehova ukukatilany muntu ni muntu. Amwing pakach pen ayipompatin nakash, pakwez udandamedinany kulejan. Spiritu wa kukapuk ni wakad wom umekeshinanya usangareshin muchim wa Yehova!—Jinsw. 27:11.

Piutanginanya ni kutongijokin piur pa “Yisal ya Atuman a Yehova a Katat” yidia mu Annuaire winou usangareshina ni ukasikeshina ritiy, ukumanany uman umekeshina anch Nsalejetu Yesu Kristu udandamedina “kuya kurish ni kuyipandikan” ni ut wawonsu ukuchilau mulong wa kuyirishish in kwilej a Kristu, kiukez kupandakanap, bwat.—Kubur. 6:2; Is. 54:17.

Paul wayifundina in Kristu a ku Filipoi anch: “Am namujikitish Nzamb wam . . . mulong wa kukwash kwenen mu kupalangesh kwa rusangu ruwamp.” (Filip. 1:3-5) Mwamu twiyovilinga niyetu yid ya Chisak Chitakedina piur penen. Mu muvu wa mudimu wa 2007, atutwambil 6691790 asadil asaa 1431761554 mu kulejan rusangu ruwamp mu jingand 236 mu mangand mawonsu. Usu wen usadilanya chakwel kupalangesh rusangu ruwamp udi ushimokishina! Tonginanyap bil yitot ya tunan twa antu twakwashina, chakwel eza amushimana Yehova!

Pa yisu yimwing, Paul wamekesha anch wayanakena nakash akadivar nend. Wayifundina in Tesalonik anch: “Tukat kunivurik . . . ni kudandamen kwa ruchingej mwi Nsalejetu Yesu Kristu.” (1 Tes. 1:2, 3) Mwom ukwet milong yivud. Milong yikutwish yalank, pakwez chidi cha usey kujijaman. Milong ik urishina nich? Uziyil mulong wa mayej mey makukangeshina kumusadil Yehova mudimu? Ov, wafishin muka uruw ney mukatish? (Jinswi. 30:15, 16) Ov, umeken mudi usheshin usu wey chamwamu, mu kukimb muntu wa kwatijan nend umukatina Yehova piudandamedina kulondul chiyul cha Mifund chilondina anch ching kwatijan mu Mwant? (1 Kor. 7:39) Ov, ukwet yikokujol ya kuyilil aney mulong uburedin nfalang? Chikalap nchik mwikadil wey, anch wakimb bil yisakin ya Want, ukutwish kwikal nich kashinsh anch Yehova kakezap “kuvuramen yisalijok yen ap rukat ruumekeshinanya mu dijin diend.” Twakwilembilany amboku akadivar ni anambaz kangal “[waziyany] kusal yom yiwamp”!—Heb. 6:10; Gal. 6:9.

Yom ik yikutukwasha kujijaman? Mudi in Tesalonik, ridi “ruchingej mwi Nsalejetu Yesu Kristu.” Mulong wa diyingish diwamp, Paul wafanikesha “ruchingej ra dipandish” nich mpup yikutwisha kumuchidij mwin Kristu ku yitongijok yiyimp ni ku kwidjidjek kukash.—1 Tes. 5:8.

Chakin kamu, kusutil ku kujijaman nich musangar, wakwilany ku masal ma Satan piur pa mulong ujim wa ukaleng wa mangand. Satan ufil mukan anch atushalapol a Nzamb akwet choy ni akutwish amusadil Nzamb mu kachisu, akuwa mu ritiy rau anch kwikal yoziu yikash ap anch ditenchik dia yom dadandamen kupandakan muchingejinau. Ukwetany chisend cha kumulejan patok Djabul anch udi mukamakasu! Dichuku ni dichuku dikushejishinany piswimp nakash ni kuwanyin kwa ruchingej ren.

Mudi mwasalay Paul yisu yadingay nich mulong wa kuyijikitish akadivar mulong wa ritiy rau rikash, kwipan kwau mu mudimu wa kulejan, ni mulong wa kujijaman kwau, niyetu twasadil kal chisu chinech mulong wa kukujikitishany ni kukwijikishany anch tukukatinany. Mudimu uwamp mwan!

Tukusotidinany yiyukish yiwamp ya muspiritu mu muvu winou.

Akadivar nen,

Chisak Chitakedina cha Atuman a Yehova