BIBLIOTEK Udia pa Kapend
BIBLIOTEK
UDIA PA KAPEND
Uruund
  • BIBIL
  • MIKAND
  • YIKUMANGAN
  • w15 1/1 map. 27 ​-​ 31
  • Ov, Chitwishikin Kwikal nich Rukat Rikash?

Kwikil video ukimbina

Video winou umukimbinap amboku nawamp.

  • Ov, Chitwishikin Kwikal nich Rukat Rikash?
  • Chinong cha Kalam Chilejen Want wa Yehova—2015
  • Tumitu twa milong
  • Yom Yifanakena
  • RUKAT RAKIN RITWISHIKIN!
  • “RUKAT REY RUWAPIL KUPANDAKANAMU MAAR MA NVINY”
  • KANGAL WALANGWISH RUKAT ‘KURUTU KWA AM KUSOT’
  • MUKAJAM “UDI MUDI CHIR CHIJINDJIKINAU”
  • Manans Majim ma Buku wa Muminy
    Chinong cha Kalam Chilejen Want wa Yehova—2007
  • Ov, Usangaredin Chakin Kamu Chipan cha Nzamb cha Uruw?
    Chinong cha Kalam Chilejen Want wa Yehova—2012
  • Changadim Silamit Udi Chilakej Chiwamp cha Kwimburij
    Mudimu ni Mashakamin ma in Kristu—Mukand Wa Chikumangan (2016)
  • Ezany Tuwangany Muminy wa Want!
    ‘Tumuwangilany Yehova ni Musangar’
Chinong cha Kalam Chilejen Want wa Yehova—2015
w15 1/1 map. 27 ​-​ 31

Ov, Chitwishikin Kwikal Nich Rukat Rikash?

‘Rukat ridi mudi kasu, rikat kwoshan mudi kasu ka chivud.’​—MUM. 8:6.

OV, UKWAKUL NCHIK?

  • Ov, mulong wa kuding rukat rakin pakach pa ikundj ni mband?

  • Ov, chom ik chikutwisha angatan in Kristu kwilejin kusutil ku mukand wa Muminy wa Salomon?

  • Ov, chom ik chikutwishau ajich in Kristu kwilejin piur pa kwendilijan ni kutond kwa muntu wa kwatijan nend?

1, 2. Ov, anany akutwisha kutaninamu ku kushinshikin kwa mukand wa Muminy wa Salomon, ni mulong wak? (Tal chipich cha kwinsambishil.)

‘MUSANGAR mud ik wovilingau ngatan ni ngachik chisu chatijadiningau! Muntu mwin mwawonsu uyimening akwet rukat!’ Mukadivar wayisadina diskur dia uruw wayimena mutapu ambay a uruw inay ading ni musangar umwing ni mukwau. Ndiy washikena kwiyipul anch: “Ov, payila kuvul kwa mivu rukat rau rikudandamedin?” Ov rukat rau rikez kukez bil anch kwashiken milong yikash? Anch ikundj ni mband akatijan chakin kamu umwing ni mukwau, urund wau wa piswimp ukudandamena kamu ap kwashiken milong yikash. Cha ushon chidi anch ambay a uruw avud ashikena kushadish musangar wau ni mauruw makat kufa.

2 Chading chikasiken kumekesh rukat rakin pa chisu cha Mwant Salomon wa mu Isarel wa pasak. Parumburilay mashakamin madingaku pa chirung chend, Salomon wafunda anch: “Namutana ikundj umwing pakach pa antu kanan unikutwisha kulimish, pakwez kinatanap mband ap umwing, bwat. Chom chinamana chawiy chinech, Nzamb watutanga zwang, pakwez yetu ayinetu twiwejinaku yom yikash.” (Mul. 7:26-29) Nakash mulong wa yibachikin ya amband angendj adinga kumwifukwil Bal, mashakamin mawamp mayipa nakash chawiy chasala anch pa chirungu cha Salomon chading chikash kutan mband wadinga ukweta mikadil yiwamp.a Chikwau kand, muminy wafundau mivu mudi 20 kurutu, Muminy wa Salomon, umekeshin anch rukat rakin rikutwish kwikalaku kudi ikundj ni mband. Umekeshin kand chirumburikina rukat ni mutapu wa kurimekesh. Angatan ni ajik amwifukwidila Yehova akutwish kwilejin yom yivud piur pa rukat riner pa kutongijokin pa chilondina mukand winou wa mu Bibil.

RUKAT RAKIN RITWISHIKIN!

3. Ov, mulong wak rukat rakin ritwishikin kudi ikundj ni mband?

3 Tang Muminy wa Salomon 8:6. Mazu ‘kasu ka Yah’ amasadidin mulong wa kumekesh rukat ripandikena. Rukat rakin ridi ‘kasu ka Yah’ mulong Yehova ndiy musul wa rukat riner. Wamutanga muntu mu chifu chend nich ukaliweny wa kukat. (Dis. 1:26, 27) Chisu chamwinkishau Adam ikundj wa kusambish Eve kudiay Nzamb, mazu mabudika mu kan ka Adam mamekesha yom yadingay nich. Chidi chakin anch Eve wiyova piswimp nakash ni Adam, ‘kwamudioshau.’ (Dis. 2:21-23) Kudiosh chisu chayinkishau antu ukaliweny wa kumekesh rukat kudi Yehova, chitwishikin kudi ikundj ni mband kwikal ni rukat rakin ni kukatijan umwing ni mukwau.

4, 5. Rumburil mu wiswimp rusangu ridia mu Muminy wa Salomon.

4 Rukat pakach pa antu a yid ya mujimbu ushalijadina riding chom chikwau cha usey chidia cha rawonsu. Mitapu yimwing yishimokishina piur pa rukat ayifundin mu mukand wa Muminy wa Salomon. Afunda mukand winou mudi kamukand, ap rusangu ridia piur pa rukat rudia pakach pa changadim wa mu ul wa Silamit ni kafung wading ukatinay. Changadim amutwala mu chibeng cha Salomon mulong ufun wend wading ukat kumupwit Salomon nakash, wadinga piswimp ni mitond ya nviny kwadingau kumulamin changadim ou. Pakwez, kudiosh kwinsambishil, chimeken patok anch changadim ou wading ukatijadin ni kafung. Pasadinay Salomon usu wa kumuwin kafung, changadim wamekesha patok muntu wading ukatilay. (Mum. 1:4-14) Kafung washika ku chibeng, ni asambishang kwilej mazu mawamp ni ma rukat.​—Mum. 1:15–17.

5 Salomon wachirika ku Yerusalem, wamusenda changadim ni waya nend; kafung wayilondula. (Mum. 4:1-5, 8, 9) Usu wawonsu wasalay Salomon chakwel changadim amukata wading wamwamu. (Mum. 6:4-7; 7:1-10) Kupwa, mwant wamulika chakwel achirik kwol kwau. Muminy upwil nich kuswir kwa changadim kudi mukatish nend anch ‘ikal mudi nkay’ ni wezin mau kudiay.​—Mum. 8:14.

6. Ov, mulong wak chikasiken kwijik antu alondina mu disengan?

6 Muminy wa Salomon udi mukand wa manangu ni uwamp nakash, umekeshin kulond kwa antu aad, kwilondodin kwa muntu panrend, ni yilat yidia mu muminy winou yidiap yiyimp. (Mum. 1:1) Kukwatijan ni The New Interpreter’s Dictionary of the Bible, “yom mudi kupungan, rusangu, mambamb, ni antu yadingap yom ya usey kudi awiy.” Muminy ou wa rukat uwapil mulong majin ma antu alondinamu kamajimbwilap. Chikwau kand, tukutwish kumwijik muntu kusutil ku yom yilondinau antu piur pend.

“RUKAT REY RUWAPIL KUPANDAKANAMU MAAR MA NVINY”

7, 8. Ov, chom ik tukutwisha kulond piur pa ‘mazu ma rukat’ madia mu Muminy wa Salomon? Pan yilakej.

7 Mukand wa Muminy wa Salomon ulondin nakash piur pa “rukat” pakach pa changadim ni kafung. Ap anch mazu minam mamekeshin mikadil ya pakuru kwasutin kal mivu piswimp ni 3 000 ni makutwish kwikal mazu ma wingendj kudi in kutang a nlel, madi ma usey ni manangu madiamu madiap masu kudi etu. Chilakej, kafung wisambidin pa mes ma changadim anch madi mudi ma mes ma ‘atwinkudimb.’ (Mum. 1:15) Mes ma changadim winou mading mawapin mudi mes ma atwinkudimb. (Tang Muminy wa Salomon 5:12.) Mes mend mawapina mading kumekan kudi kafung mudi atwinkudimb akata kwowishau nich mayel.

8 Mazu mawonsu mamekeshinau mu muminy winou mamekeshinap ching kusu kuwap kwa kumujimbu. Shinshikinany chilondinay kafung piur pa kulond kwa changadim. (Tang Muminy wa Salomon 4:7, 11.) Ulondin anch milamu yend “yitadil mudi woch.” Ov, mulong wak? Mulong chipwepu cha woch chitadiling nakash kupandakanamu woch usutila rinkind. “Rudim [rend] rutadil mudi woch ap mudi mayel,” chirumburikin anch mudi woch ni mayel, kulond kwend kwading kusangareshin ni kuwap. Choviken patok kamu anch, palondinay kafung piur pa changadim winou anch, “ey udi wa ufun, ey udi kand muwamp wakad chitaj,” ndiy wading nich yom yivud piur pa kuwap kwend kwa mujimbu mu manangu.

9. (a) Ov, rukat pakach pa ambay a uruw ritining ik? (b) Ov, mulong wak chidia cha usey kudi ambay a uruw kwimekeshin rukat umwing ni mukwau?

9 Ditenchik dia uruw diadiap kovijan kwachamwamu ap kovijan kusu kwakad usey wa rukat. Pakwez, rukat udi mwikadil wa pakampwil mu uruw wa mwin Kristu. Pakwez, ov, ridi rukat ra mutapu ik? Ov, ridi rukat ritakedilau nich yany ya mu Bibil? (1 Yoh. 4:8) Chitin rukat ra chitangil​—rukwetingau muntu ni mukwau? Ov, rukat riner ridi musangar ni kovijan kudinga pakach pa arund akin? (Yoh. 11:3) Ov, ridi kukatijan kwa ikundj ni mband? (Jinsw. 5:15-20) Nlel, rukat rakin ni ra chikupu pakach pa ambay a uruw afanyidin kurimekesh mu mitapu yin yawonsu. Rukat ridi chovil chiwamp chikatau kumekesh chisu chawonsu. Musangar mud ik kudi ambay a uruw akata kusal usu wau wawonsu mukulik midimu yau ya mwom wa pichuku-pichuku yikangesha kumekesh rukat rau umwing ni mukwau! Rukat riner rikutwish kukwash nakash kulam uruw ni musangar mukach mwa uruw. Mumashakamin ma antu amwing yisu yimwing anch ikundj ni mband atenchikin uruw chitining kwijikijan yaku ya muntu umwing ni mukwau kurutu wa kusal musambu wa uruw, akutwish kwikal nich kuswir kwa kwimekeshin rukat mu mambamb mau yawiy yikutwish kukwash chakwel rukat rikula mu uruw wau.

10. Ov, kuvurik kwa yom ya rukat kukutwisha kwikal nich chibachik ik?

10 Anch ambay a uruw akat kwimekeshin rukat umwing ni mukwau chinech chikutwish kwikal nich chibachikin chiwamp. Mwant Salomon ulondin ukumusadin changadim Silamit “yibab ya utad wa or, ni kutekaku yileng ya utad wa argent.” Wamushimana nakash, pa kulond anch changadim wading “wa ufun mudi ngond, ukat kupay mudi muten.” (Mum. 1:9-11; 6:10) Pakwez, changadim wadandamena kwikal ushinshamena kudi kafung mukarukat nend. Ov, chamukasikesha ni chamwongoja mudi chisu chaurikau? Utulejin. (Tang Muminy wa Salomon 1:2, 3.) Changadim wading ukwet “mazu ma rukat” ma kafung mu manangu. Ndiy, wading mudi “maar ma nviny” madingaku mulong wa kusangaresha muchim, ni dijin diend diading mudi chitaleshina mudi “rupwembu ruwamp” ku mutu. (Kus. 23:5; 104:15) Mwaning, kuvurik kwa yom yisangareshina ya rukat radingau nich kukutwish kwakasikesh mwikadil wa rukat. Chidi cha usey mudi ik kud ambay a uruw kwimekeshin rukat kudi umwing ni mukwau!

KANGAL WALANGWISH RUKAT ‘KURUTU KWA AM KUSOT’

11. Ov, chom ik chikutwishay mwin Kristu mujich kwilejin kudiay changadim Silamit wayichipisha akwau chakwel kangal apakisha kulangwish rukat mudiay?

11 Muminy wa Salomon upanin kand dilejan kudi in Kristu ajich, pakampwil kudi antu akimbina mbay wa uruw. Changadim kamekeshap rukat kudiay Salomon. Wachipa machip kudi ayangadim a mu Yerusalem, changadim walonda anch: ‘Kangal walangwish rukat mudi am kurutu kwa am kusot.’ (Mum. 2:7; 3:5) Ov, mulong wak? Mulong chiyipining kukudish rukat ra ikundj ni mband kapamp ka kusambish ka kumanijan nend. Chikwau kand, anch mwin Kristu uswiridin kwatan, chidi cha manangu kuchingel nich kushimpish muchim mulong wa kuchingel muntu ukutwish kukat chakin kamu.

12. Ov, mulong wak changadim Silamit wamukata kafung?

12 Ov, mulong wak changadim Silamit wamukata kafung? Chakin kamu, kafung winou wading muwamp, ufanikena nich “nkay”; makas mend mading makash mudi ‘utad wa or’; ni mend yendendiy yading yiwamp ni yikash mudi “mazeu ma nzavu.” Pakwez, kadingap ching mukash ni muwamp. “Mudi mudia mutond wa mabuj mukach mwa mitond yakad kusong mabuj” mwawiy mwadingay “mukach mwa ansangarum akwau.” Kudi changadim wadinga ushinshamena kudi Yehova wadinga nikutongin piur pa ikundj, wading ufanyidin kwikal muntu wa muspiritu.​—Mum. 2:3, 9; 5:14, 15.

13. Ov, mulong wak kafung wading umukatin changadim?

13 Chidi nchik piur pa changadim Silamit? Ap anch ufun upandikena wamupwita mwant wading ukwet ‘a mwant mwad 60 ni akajend a kuns 80, ni ayangadim avud akad kuchind,’ wading kwiman amwinend mudi “chisalamb cha ufun”​—chisalamb chamwamu. Changadim wading wikepishin ni kwitudish. Chidiap cha kushimok palondinay piur pa changadim anch wading mudi “chisalamb mukach mwa miy,” chom chimwing chading chijikena kudiay kafung! Changadim winou wading ushinshamen kudiay Yehova.​—Mum. 2:1, 2; 6:8.

14. Ov, rukat rimekeshinau mu Muminy Upandiken Yikwau Kuwap uyifundishin ajich akimbina kwatan chom ik?

14 Mu Bibil, in Kristu ayikasikeshin kwatan “ching mu Mwant.” (1 Kor. 7:39) Mujich ukweta kuswir kwa kwatan ukusal usu wa kulik kwikal ni rukat ra ikundj ni mband pamwing ni mbay wakad kwitiyij pakwez ufanyidin kukimb mbay wa uruw pakach pa antu amwifukwidila Yehova. Chikwau kand, ikundj ni mband akutwish kurish nich yakamish ya mashakamin ma mwom. Chawiy lel, anch ukimbin kwatan londul amboku chilakej cha kafung ni cha Silamit.

MUKAJAM “UDI MUDI CHIR CHIJINDJIKINAU”

15. Ov, mutapu ik udiay changadim Silamit chilakej kudi amakundj ni amband ajik?

15 Tang Muminy wa Salomon 4:12. Ov, mulong wak kafung umumekeshin mukarukat nend mudi “chir chijindjikinau”? Rupang ra chir kakatap kurazuril mulong wa antu awonsu. Afanyina kwandamin ching ku chis chipatinau. Changadim Silamit washa rukat ching kusu mulong wa nfumwend wafanyinay kwatijan nend​—kafung. Pa kulik kumekesh rukat kudiay mwant, changadim wamekesha amwinend anch wading mudi ‘mpwembu’ ni kulik mudi ‘chis’ chading chazurilau. (Mum. 8:8-10) Chilik chimwing kand, in Kristu asotina kwatijan afanyidin kwikal ashinshamen kudi umwing ni mukwau ni kafanyidinap kumekesh rukat ra ikundj ni mband kudi muntu mukwau.

16. Ov, chom ik chifundishinau Muminy wa Salomon piur pa kwiyendil?

16 Chisu chamwitau changadim Silamit kudi kafung anch asala nend weny pa chisu chiwamp cha dichuku, anamakwend kitiyap. Pa ndond pa kumulik aya, amwinkisha mudimu wa kulam mitond ya nviny mu chir. Ov, mulong wak? Ov, katekap ruchingej mudiay kafung? Ov, ading kutong pamwingap anch wading ukweta yitongijok yiyimp? Chakin kamu, akwata mipak yiney anch mwanamakwau mband kangal wez wawil yoziu. (Mum. 1:6; 2:10-15) Pinap padi dilejan kudi ajik in Kristu: Pa chisu cha kutondan, afanyidin kusal usu wa kwilam ku kuwil mu masandj. Afanyidin kwipuk kwikal ku jindond jijingamina. Kwikal ni mambamb ma rukat madia makad kwijond ni mawanyidina, kudi kwa usey mulong wa kulik kuwil mu mashakamin mayimp.

17, 18. Ov, yom ik wataninamu kal mu kushinshikin Muminy wa Salomon?

17 Yisu yivud ambay a uruw in Kristu akweta urund wa piswimp afanyidin kukatijan nakash umwing ni mukwau. Mulong Yehova ndiy watenchika uruw chawiy uruw ufanyidin kulab, chidi cha usey kudi ambay a uruw kupandikesh rukat rau ni kusal anch mwikadil wau wa rukat uya ching kurutu.​—Mar. 10:6-9.

18 Anch ukimbina mbay wa uruw, ufanyidin kukimb ching kusu muntu ukutwisha kukat chakin kamu ni kukudishin rukat rakad musul mudi murilejenau mu Muminy wa Salomon. Ap anch ukimbin mbay wa uruw wa kwatijan nend ap anch wandamin kal mu uruw, ufanyidin kwikal nich rukat rakin​—‘kasu ka Yah.’​—Mum. 8:6.

a Tal Chinong cha Kalam cha Chiwong 15, 2007, paj 31, mu Français.

    Mikand ya Uruund (1999-2025)
    Budik
    Andam
    • Uruund
    • Kwangan
    • Yom ukatina
    • Copyright © 2025 Watch Tower Bible and Tract Society of Pennsylvania
    • Mbil ja Kusadin
    • Mbil ja Ujindj
    • Paramètres de confidentialité
    • JW.ORG
    • Andam
    Kwangan