Kupandakan Yikangesh Ya Kulejan Ku Chikumbu Ni Chikumbu

“Nzamb wetu watwinkisha kujijaman chakwel tukulejany en rusangu ruwamp ridiokila kudi ndiy.”—1 TES. 2:2, Manswik Masu.

1. Yikangesh ik yarishay nich Yeremiy, ni mutapu ik watwishay kuyipandakan?

YEREMIY wadinga muntu ukweta yovil mudi yetwetu. Chisu chamutondau kudi Yehova chakwel ikala muprofet ni amutuma “ku michid yawonsu,” ndiy wakula anch: “Nsalejam [Yehova], am kinijap mutapu wa kulond, mulong nichidi kwam nsand.” Chikalap nchik mwamu, ndiy wamuchingejina Yehova, ni witiyija mudimu wend. (Yer. 1:4-10) Mu mivu 40 ni kusut, Yeremiy warisha nich kulik kumutesh, amulika, amuswingisha, ni amusala nayimp ku mujimbu. (Yer. 20:1, 2) Pa yisu yimwing, wadinga ni kwiyov anch alika kwend. Pakwez, wadandamena mu kulejan uruu wadinga ukisinau antu avud kuutesh. Nich usu wa Nzamb, Yeremiy wasala yom yadingay yakadiay ndiy kutwish kusal ku usu wend amwinend.—Tang Yeremiy 20:7-9.

2, 3. Mutapu ik upandakenau ilel atushalapol a Nzamb yikangesh mudi yadingay nich Yeremiy?

² Atushalapol avud ilel a Nzamb akutwish iyov mudi mwiyovay Yeremiy. Pakatau kutongin pa kuya kulejan ku chikumbu ni chikumbu, avud a pakach petu atongining anch, ‘Am nikutwishap nasal mwamu.’ Pakwez, pitujingunina anch radinga rusot ra Yehova anch tulejana rusangu ruwamp, twapandakana wom twova ni twakwatikana nakash mu mudimu wa kulejan. Chikalap nchik mwamu, avud etu ara nich mikadil yikash yasala anch chiyikasikena nakash, mu chisu chimwing, kudandamen nich kulejan. Chidi chakin anch chikasikening kusambish kulejan ku chikumbu ni chikumbu ni kudandamen kulejan djat ni kwinsudiel.—Mat. 24:13.

³ Chadi chikwikal nchik anch wadinga ni kwilej Bibil ni Atuman a Yehova ni wadinga ni kukumangan ku yikumangan ya chikumangen pakwez pa chisu kanang widjidjeka kusambish kulejan ku chikumbu ni chikumbu? Chadi chikwikal nchik kud Kaman wababatishau kal umena anch chimukasikedin kusal mudimu wa kulejan ku chis ni chis, ap anch ku mujimbu ukutwish wasal mwamu? Ikal nich kashinsh anch antu a mitapu yawonsu apandaken yikangesh ya mudimu wa kulejan ku chikumbu ni chikumbu. Ukutwish kusal mwamu, nich ukwash wa Yehova.

Tujijamanany

4. Chom ik chamutwishisha kambuy Paul chakwel alejana rusangu ruwamp nich kujijaman?

⁴ Pakad kwidjidjek wijany anch mudimu wa kulejan pa mangand mawonsu usadikin, kichidiap kusutil ku usu ap manangu ma chiuntu, pakwez chidi kusutil ku mwiku utumbila wa Nzamb. (Zak. 4:6) Chidi chakin piur pa mujikit wa mwin Kristu umwing ni umwing. (2 Kor. 4:7) Tumushinshikinany kambuy Paul. Pavurikay pa chisu ndiy ni ambay nend amishoner payimeshau mar kudi in rupompat, ndiy wafunda anch: “Atumesha mar ni kutusaal masaal mu musumb wa Filip, . . . Nzamb wetu watwinkisha kujijaman chakwel tukulejany en rusangu ruwamp.” (1 Tes. 2:2; Mid. 16:22-24) Chikutwish chatukasiken kutongin anch mwin kulejan ukweta mushiku mudi Paul anch wadinga ni yisu yimwing yarishay chakwel anch alejan. Pakwez, mudi etu awonsu, Paul wadinga ufanyidin amukungamen Yehova chakwel alejana rusangu ruwamp nich kukapuk. (Tang Efes 6:18-20.) Ov, mutapu ik tukutwisha kwimburij chilakej cha Paul?

5. Mwi njil ik yimwing yitukutwisha kutanin kujijaman mu kulejan?

⁵ Mutapu umwing tukata kujijaman mu kulejan udi kusutil ku malembil. Chibol umwing walonda anch: “Nadinga ni kulembil chakwel nilonda nich kashinsh, nalembila chakwel nitwisha kuyishik antu ku michim, ni nalembila anch nisangera mujikit. Oku, udi mudimu wa Yehova, kiudiap wetwetu ayinetu, chawiy kwikil chitukutwisha kusal pakad ukwash wend.” (1 Tes. 5:17) Etu awonsu tuswiridin kulembil wakad kulik mulong wa ukwash wa mwiku utumbila wa Nzamb chakwel tulejana nich mushiku.—Luka 11:9-13.

6, 7. (a) Chishimushimu ik chamanay Ezekiel, ni chirumburikin ik? (b) Chishimushimu chamanay Ezekiel chiyinkishin atushalapol ilel a Nzamb dilejan ik?

⁶ Buku wa Ezekiel ujingunishin chom chikwau chikutwisha kutukwash chakwel tulonda nich kujijaman. Mu chishimushimu, Yehova wamwinkisha Ezekiel mukand wadinga aufundil mitambu yawonsu yaad “runeng, ni kwinan” ni wamwela audia, walond anch: “Mwan a muntu, diang mukand unikwinkila ou, chakwel wikuta.” Chishimushimu chinech chirumburikin ik? Ezekiel wadinga ufanyidin kudia kamu uruu wamwelau aya akaulejan. Wadinga ufanyidin kwikal mwi ndiy, mudi muwadinga, nich usu pa yovil yend ya mukach mwend. Muprofet udandamedin kulond anch: “Chad am naudia, kuupak wading utadil mudi woch.” Chadinga chisangareshin mudi ik kulejan uruu wa Nzamb patok—chadinga mudi kudia woch—kudiay Ezekiel. Wiyova anch witapidil dilau dijim kudiay Yehova ni kuwanyish mudimu winou wamwinkishau kudi Nzamb, ap wadinga urumburikin kulejan uruu ukash kudi antu akad kuusanger.—Tang Ezekiel 2:8–3:4, 7-9.

⁷ Chishimushimu chinech chikwet dilejan dia usey mulong wa atushalapol ilel a Nzamb. Niyetu tukwet uruu ukash wa kuyilej antu akisininga chisu chawonsu usu wetu. Chakwel etu tudandamena kuuman mujikit wa Ukristu mudi chisend chitwinkishinay Nzamb, tufanyidin kudia nawamp muspiritu. Yaku ya kwilej kwa piur-piur ap kwa kukashimuk kiyifanyidinap kudi etu chakwel tudia muchifanyidina Dizu dia Nzamb. Ov, ukutwish watenchik kutang kwey ni kwilej kwey Bibil kwakad kujing? Ov, ukutwish watongijokin chisu ni chisu pa yom yiutangina?—Kus. 1:2, 3.

Sambishany Minsamb ya Bibil

8. Mutapu ik wa kusal wayikwasha in kulejan a Want kusambish minsamb ya Bibil mu mudimu wa ku chikumbu ni chikumbu?

⁸ Kudi in kulejan avud, chom chidinga chikash ku mutambu wau mu mujikit wa ku chikumbu ni chikumbu chidi minsamb ya kusambish ni mwin chikumbu. Chakin kamu, mu materitwar makwau chiding chikash kusambish minsamb. In kulejan amwing iyoviling nawamp pisambiningau ni antu ku yis yau anch asambish minsamb yau nich mazu matondinau nawamp ni kupwa anch amwinkish mwin chikumbu trakt, mudi muchilejenau mu mushet ulondwilaku ou. Mutu wa mulong wa trakt ap yifwatul yikutwishap yapwit manangu ma mwin chikumbu, kwawiy kukututwishisha tulondaku rutong ra kumwendil kwetu ni kushik mu chilik cha kumwipul chipul. Kusal mutapu windjing kudi kumulej mwin chikumbu matrakt masatu ap manying mashalijadina ni kumwel amwinend atonda usangaredinay. Chakin kamu, rutong retu kiridiap ching kusu ra kusha matrakt ap kumasadil ku chis ni chis pakwez ridi ra kusambish minsamb ya Bibil yikushikija ku malejan ma Bibil.

9. Ov, mulong wak kwirijek nawamp kukwet usey?

⁹ Mutapu win wawonsu ukusadila, kwirijek nawamp kukez kukukwash wikal wakad kwiyakamish ni usangera mudimu wa ku chikumbu ni chikumbu. Chibol umwing walonda anch: “Nikat kusangar nakash anch nirijek nawamp. Chikat kwinbachik nisamba ni antu yom yinarijekang.” Chibol mukwau walonda anch, “Anch nijik nawamp yom yidia mu mikand yinikupana, nikat kusanger kuyisadil.” Ap anch kuding kutaninamu kujim mu kuchirikin mu muchim yom yiukulonda, avud amening anch chiding cha ukwash nakash achirikina minsamb yau nich dizu piur. Kusal mwamu kwayikwasha amwinkisha Yehova yom yau yipandakenamu kuwap.—Kol. 3:23; 2 Tim. 2:15.

10. Chom ik chifanyidina kusal chakwel kwikal yikumangan ya mudimu yifanyidina ni ya ukwash?

¹⁰ Yikumangan ya mudimu yilejena cha kusal yikat kutwikadish ayifuvu ni kusanger mudimu wa ku chikumbu ni chikumbu. Anch verse wa dichuku wisambidin mujikit wa kulejan, chifanyidin kumutang ni kumwisambin. Pakwez, mukadivar utakedila chikumangan cha mudimu ufanyidin kusadil chisu chifanyidina mulong wa kwisambin ap kusal chakumenaku chiswapela cha minsamb yifanyidina nich teritwar ap kushinshikin jinsangu jikwau jifanyidina jifanyidinau kusadil mu mujikit pa dichuku dinidia. Chom chinech chikez kuyikwash antu adiaku apana uman nawamp. Nich kwirijek kurutu kwa chisu, amakurump ni antu akwau akata kutakelang yikumangan yiney akutwish asal mwamu ni akutwish apwish chikumangan chinech mu chisu chau.—Rome 12:8.

Usey wa Kutesh Nawamp

11, 12. Ov, ranaken rikutwish mutapu ik kutukwash kuyishiken antu nich rusangu ruwamp? Let chilakej.

¹¹ Kudiap ching kusu kwirijek kuwap pakwez kand kuyisanger nakash antu nikwawiy kutukwashining tusambisha minsamb ya Bibil ni kuya kudiau antu mu mujikit wetu. Njil yimwing mutukata kumekeshin anch tuyisangaredin yidi kusutil ku mutapu tuyiteshina. Kalam umwing mwin kwendangan walonda anch: “Kushimpish muchim ni kumekesh kusot kuyitesh antu kukweting usu umwing wamushena wa kuyipwit ni udi mutapu umwing wamushena wa kumekeshin kuyisanger kwetu.” Kutesh nich riy kukutwish kwikal mutapu wa kushik ku muchim wa mwin chikumbu, mudi muchimekedina mu chom chinech chamanau.

¹² Mu mukand wa kusambish nich udia mu jurnal Le Progrès, wa mu Saint-Étienne, mu France, mband umwing ushimunin rusangu ra amband aad eza kumwendil kwolikwend kupwa kwa kumufish mwanend mband wa angond asatu. Mband wafunda anch: “Nayijingunina kapamp kamwing anch inay adi Atuman a Yehova. Nadinga tayad nayaka kwa kalimish, pakwez namana kand broshir wadingau ni kupan. Wadinga wisambidin mulong ulikidinay Nzamb mar. Chawiy nayandjika mu chikumbu nich chitongijok cha kufish nich yitongijok yau. . . . Atuman ashakama piswimp saa umwing ni kusut. Antesha nich ranaken rijim, ni patumbukau, niyova nawamp nakash ni chawiy nayitiyija eza kakwau kand.” (Rome 12:15) Pa kusut kwa chisu, mband winou witiyija kwilej Bibil. Tukutwish twilej yom yivud kusutil ku mutapu wavurikay yom yisambinau kapamp kinak ka kusambish, kiyidiap yalondau anambaz, pakwez mutapu wamuteshau.

13. Mutapu ik tukutwisha kusadin rusangu ruwamp kulondulijan ni antu tutanina?

¹³ Anch twatesh nich ranaken, chakin kamu tukuyishil antu ndond chakwel atuleja mulong wak uswiridinau Want. Chom chinech chikutwinkish mutapu uwamp wa kuyilej rusangu ruwamp. Pamwingap wamana kal anch atutwambil ayifuvu adinga in kutesh nakash. (Jinsw. 20:5) Akat kuyisanger nakash antu akatau kutanijan nau mu mujikit. Afundining kichidiap ching majin ni maadres mau kusu pakwez kand yom yisangaredinau ni yiswiridinau. Anch muntu wabudish chitongijok kanang chovikena, akat kukimbijol ni kumuchirikin swa chakwel akamuleja yom yatanau kal. Mudi kambuy Paul, akat kwambatanish minsamb yau ya uruu wa Want kulondulijan ni antu ataninau. (Tang 1 Korint 9:19-23.) Kusanger kwinoku kwakin kuyipwitidin antu ku rusangu ruwamp ni kumeken muchifanyidina “muchim wa riy wa Nzamb wetu.”—Luka 1:78.

Ikalany Nich Manangu Mawamp

14. Mudi mutusadila mujikit wetu, ov, mutapu ik tukutwisha kumekesh ngikadil ya Yehova?

¹⁴ Yehova wamekesha anch utumen nich usey ujim patwinkishay ukaliweny wa kwitondil. Ap anch ndiy udi Nzamb Mwin Dikand Diawonsu, kakatap kumushindil muntu ap umwing amusadil pakwez ukat kuyel antu nich rukat, ukat kuyiyukish antu itiyijina yitenchik yend yiwamp. (Rome 2:4) Chitudia atushalapol end, tufanyidin kwikal tayad mulong wa kulejan rusangu ruwamp mu mutapu ufanyidina wa Nzamb wetu mwin riy pa chisu ni chisu tupanina uman. (2 Kor. 5:20, 21; 6:3-6) Mulong wa chinech, tufanyidin twikal nich manangu mawamp piur pa antu adia mu teritwar wetu. Chom ik chikutwisha kutukwash tusala mwamu?

15. (a) Yesu wayileja in kwilej asala ik anch antu alik uruu wau? (b) Chom ik chikutukwasha kwasin pa kuyisot antu awamp?

¹⁵ Yesu wayileja in kwilejend anch kangal wiyakamishany chamwamu anch antu alik kwau kutesh uruu pakwez ufanyidinany kwasin pa kuyisot antu awamp. (Tang Mateu 10:11-15.) Kwitekin jintong jikemp, jitukutwisha kuwanyish kukutukwash tusala mwamu. Mukadivar umwing wifanikesha nich mwin kukimbijol chom cha usey. Dizu diend dia usey didi, “Niyil ching kurutu nimukimba muntu muwamp ilel.” Mukadivar mukwau wadinga nich rutong ra “kumutan muntu ukusangera kapamp ka kusambish pa rubing ni rubing ni kumuchirikin mu machuku makemp chakwel akakudisha kusanger kwinoku.” In kulejan amwing asadiling usu wa kumulej mwin chikumbu anch chitwishikin verse ap umwing kusu. Rutong ik riwamp riukutwisha kwitekin niyey?

16. Mayingishin ik mitukweta ma kudandamen nich kulejan?

¹⁶ Kupandakan mu mujikit wa ku chikumbu ni chikumbu kwengamidinap ching kusu pa mutapu witiyijinau antu adia mu teritwar. Chakin, mudimu wa kulejan udi wa usey nakash mu kuyipandish antu akweta michim yiwamp, pakwez kusadil kand mulong wa jintong ja usey. Mujikit wa Ukristu utwinkishin ndond ya kumulej Yehova anch tumukatin. (1 Yoh. 5:3) Kututwishishin twiyepa chikal cha mash. (Mid. 20:26, 27) Uyibabeshin antu akad kumwijik anch “muten wa kwimikish kwend [Nzamb] wez kal.” (Kubur. 14:6, 7) Chipandakenamu yawonsu, kusutil ku kulejan rusangu ruwamp, akat kushiman dijin dia Yehova pa mangand mawonsu. (Kus. 113:3) Chawiy lel, antu atesha ap bwat, tufanyidin kudandamen nich kulejan uruu wa Want. Chakin kamu, usu wetu wawonsu utusadila mulong wa kulejan rusangu ruwamp udi wa usey ku mes kwa Yehova.—Rome 10:13-15.

17. Antu akez piswimpap kamu kwijik ik?

¹⁷ Ap anch antu avud nlel apipeshin mudimu wetu wa kulejan, akez piswimpap kamu kuuman mutapu windjing. (Mat. 24:37-39) Yehova wamwinkisha Ezekiel kashinsh anch chisu chikeza kwez dirumburish, chikumbu cha wintombuj cha in Isarel chikez “kwijik anch muruu wa Nzamb wading mukach mwau.” (Ezek. 2:5) Chawiy chimwing, chisu chikezay Nzamb kulet dirumburish diend pantaliken nich ditenchik dined dia yom, antu akez kushiken ku kwijik anch uruu wadingau ni kulejan Atuman a Yehova mu jindond ja patok ni ku chikumbu ni chikumbu chakin kamu wadinga udiokil kudi Nzamb wakin, Yehova, ni anch chakin kamu Atuman adinga asadil mudi antimesh end. Twitapidil dilau mudi ik pa kusend dijin diend ni kulejan uruu wend mu yisu yiney ya mar makash! Mu usu wend, el tudandamenany kupandakan yikangesh ya kusal mujikit wa kulejan ku chikumbu ni chikumbu.

Ov, Ukwakul Nchik?

• Mutapu ik tukutwisha kutan kujijaman mu kulejan?

• Chom ik chikutwisha kutukwash kusambish minsamb ya Bibil pitudia mu mujikit wa ku chikumbu ni chikumbu?

• Mutapu ik tukutwisha kumekesh anch tuyisangaredin antu akwau?

• Chom ik chikutukwasha twikala nich manangu mawamp piur pa antu adia mu teritwar wetu?

[Kamushet/​Chipich chidia pa paj wa 9]

Mutapu wa Kusambish Minsamb ya Bibil

Mutapu wa kusambish:

◼ Kupwa kwa kumulangwish mwin chikumbu, ukutwish wamwinkish trakt ni ukulond anch, “Kwez kwam kukwendil nlel kudi mulong wa kukulej chitongijok chikasikeshina pa mutu wa mulong ou.”

◼ Ap ukutwish wamwinkish trakt ni kulond anch, “Nezang kukwedil nlel mulong nisotil nijika yiutongina pa mulong unou.”

Anch witiyij trakt:

◼ Pakad kusutish chisu chilemp, mwipula chipul chakwel wijika yitonginay piur pa mutu wa mulong wa trakt.

◼ Mutesha nawamp, sot kutesh nawamp yitongijok ya mwin chikumbu. Mujikitisha mulong wa yirumburil yend ni yisambinangay.

Mutapu wa kudandamen nich minsamb:

◼ Tang ni isambinany mufund umwing ap yivud, sadin kukwatijan nich minsamb yey ni yom yisangaredinay muntu ni maswir mend.

◼ Anch muntu wasanger nakash, mwinkisha mukand ni muleja mutapu wa kwilej nich Bibil anch chitwishikin. Wovijanany mutapu wa kumuchirikin kand.