Yeremiya
13 Yehova ambwiye ati: «Genda ugure umukaba wo mu gitambara ciza*, uwukenyere mu kiyunguyungu, mugabo ntuwushire mu mazi.» 2 Nuko ngura uwo mukaba nk’uko Yehova yari yambwiye, maze ndawukenyera. 3 Yehova yongera kumbwira ati: 4 «Fata wa mukaba wagura, uwo nyene ukenyeye, uhaguruke uje kuri Efurate, uwunyegeze mw’ibuye ry’urutare ryasadutse.» 5 Nuko ndagenda ndawunyegeza iruhande ya Efurate, nk’uko Yehova yari yantegetse.
6 Mugabo inyuma y’imisi myinshi, Yehova ambwira ati: «Haguruka uje kuri Efurate, utore wa mukaba nagutegeka kunyegezayo.» 7 Nuko nja kuri Efurate, ndimba hanyuma ntora nya mukaba aho nari nawunyegeje, nsanga warononekaye, ata na kimwe ukimaze.
8 Yehova aca ambwira ati: 9 «Yehova avuze ati: “Ukwo nyene ni ko nzotikiza ubwishime bw’ababa mu Buyuda n’ubwishime bwinshi bw’ababa i Yeruzalemu+. 10 Abo bantu babi banka kugamburuka ivyo mvuga+, bagakurikira umutima wabo bwite babigiranye akagagazo+, bagakurikira izindi mana bakazikorera kandi bakazunamira, bazomera nk’uwo mukaba ata na kimwe ukimaze. 11 Kuko nk’uko umukaba ufata neza mu kiyunguyungu, ni ko natumye ihanga ryose rya Isirayeli n’Ubuyuda bwose bamatako”, ni ko Yehova avuze. “Nabigize kugira babe abantu banje+, batume mba rurangiranwa+, batume nshemezwa bongere batume mpabwa icubahiro. Mugabo ntibagamburutse+.”
12 Uze ubabwire n’ubu butumwa uti: “Yehova Imana ya Isirayeli avuze ati: ‘Umubindi wose munini wuzuzwa umuvinyu.’” Na bo bazokwishura bati: “None ntidusanzwe tuzi yuko umubindi wose munini wuzuzwa umuvinyu?” 13 Uraca ubabwira uti: “Yehova avuze ati: ‘Ngira nuzuze akaborerwe ababa muri iki gihugu bose+, abami bicara ku ntebe y’ubwami ya Dawidi, abaherezi, abahanuzi n’ababa i Yeruzalemu bose. 14 Nzobasekanya ndabamenagure, baba ba sebibondo canke abana’, ni ko Yehova avuze+. ‘Sinzobagirira impuhwe canke akagongwe canke imbabazi. Nta na kimwe kizombuza kubahonya+.’”
15 Nimwumve kandi mutege ugutwi.
Ntimugire ubwibone kuko Yehova ari we avuze.
16 Nimuninahaze Yehova Imana yanyu
atarazana umwiza,
n’ibirenge vyanyu bitaratsitara ku misozi buhwibiriye.
17 Nimwanka kwumva,
nzoririra mu mpisho kubera ubwishime bwanyu.
18 Bwira umwami n’umugabekazi*+ uti: “Nimwicare mu kibanza giciye bugufi,
kuko urugori ruteye igomwe mwambaye ruzogwa.”
19 Ibisagara vyo mu bumanuko birugawe*, nta n’umwe avyugurura.
Abo mu Buyuda bose bajanywe mu bunyagano, nta n’umwe asigaye+.
20 Raramura amaso urabe abaje bavuye mu buraruko+.
Bwa busho bw’intama nziza wahabwa buri hehe+?
Mbega ntuzofatwa n’ibise nk’ivy’umugore ariko aribaruka+?
22 Niwibwira mu mutima uti: “Kubera iki ibi bintu vyanshikiye+?”
Uze umenye ko ari kubera ikosa ryawe rikomeye.
Ni co gituma wakuweko impuzu zawe+, ibitsintsiri vyawe bikagirirwa nabi.
23 Mbega Umukushi* yoshobora guhindura urukoba rwiwe, canke ingwe igahindura ukuntu isa+?
Nimba ivyo vyoshoboka, namwe rero mwoshobora gukora iciza,
mwebwe mwamenyereye gukora ikibi.
24 Nzobashwiragiza rero nk’ivyatsi biguruwe n’umuyaga wo mu bugaragwa+.
25 Ivyo ni vyo bizogushikira. Ni wo mugabane nakugeneye», ni ko Yehova avuze,
26 Ni co gituma nzoduza impuzu zawe ndazikurenze mu maso,
maze babone ubwambure bwawe+.
27 Ukurenga ibigo kwawe+, inambu yawe irenze urugero
n’ubumaraya bwawe buteye isoni,
na vyo nyene bazobibona.
Ingeso zawe zisesemye narazibonye+ ku mirambi no mu gahinga.
Uragowe Yeruzalemu we!
Uzoguma uhumanye gushika ryari+?»