Bariko baritanga babikunze

“ABANTU bawe bitanga babikunze” (Zaburi 110:3). Ayo majambo arafise insobanuro idasanzwe ku banyeshure 46 bitavye ivyigwa vy’umugwi ugira 118 vya rya Shure ry’ivya Bibiliya ry’i Gileyadi rya Watchtower. None biteguriye gute kwitaba iryo shure rimenyereza abimirije kuba abamisiyonari kugira ngo bitwararike ivyo abantu bo mu bindi bihugu bakeneye mu vy’impwemu? Mike na Stacie, abari mu bagize uwo mugwi ugira 118, basiguye bati: “Ingingo twafashe yo kubaho mu buryo busanzwe yaradufashije kugabanya ivyodusamaza no kugumiza ivy’impwemu mu kibanza ca mbere mu buzima bwacu. Twariyemeje kutareka ngo ukuroranirwa kwacu mu vy’ubutunzi gupfukiranye imigambi yo mu vy’impwemu”. Nka kurya kwa Mike na Stacie, abandi banyeshure bari muri uwo mugwi baritanze babikunze, ubu bakaba ari abamamaji b’Ubwami mu makontina ane y’isi.

Ku wa gatandatu, kw’igenekerezo rya 12 Ntwarante 2005, abantu 6.843 barakurikiranye n’umunezero uboneka porogarama yo gutanga impapuro z’umutsindo. Theodore Jaracz, akaba ari umwe mu bagize Inama Nyobozi y’Ivyabona vya Yehova, ni we yari ahagarikiye iyo porogarama. Amaze guha ikaze n’igishika abashitsi bari ng’aho bavuye mu bihugu 28, yaciye ashimika ku gaciro ko kwiga Bibiliya. Mu gusubiramwo amajambo yavuzwe n’umwigisha w’Umunyamerika yitwa William Lyon Phelps, uwo mushikirizansiguro yavuze ati: “Umuntu wese afise ubumenyi bushika kure bwerekeye Bibiliya yoshobora vy’ukuri kuvugwa yuko yize”. Naho amashure ashobora kuba ngirakamaro, kwiga Bibiliya vyovyo birahambaye kuruta. Birafasha abantu kwironsa ubumenyi bwerekeye Imana, ubwo na bwo bukaba bushikana ku buzima budahera (Yohana 17:3). Umuvukanyi Jaracz yarakeje abari bimirije gusohoka iryo shure kubera bagize umutima ukunze wo kugira uruhara rwiyongereye muri porogarama yo kwigisha Bibiliya kw’isi yose ibera mu mashengero y’Ivyabona vya Yehova arenga 98.000 ari hirya no hino kw’isi.

Indemesho zaje hageze ku bari bimirije gusohoka iryo shure

Umuhagarikizi amaze kuvuga amajambo yo gutangura, uwitwa William Samuelson yaciye ashikiriza insiguro ivuga ngo “Ingene mushobora kuba nk’igiti ca elayo kiremvye mu nzu y’Imana”, iyari ishingiye kuri Zaburi 52:8. Yarerekanye yuko igiti c’umwelayo gikoreshwa muri Bibiliya mu kugereranya ukwama cane, ubwiza, be n’icubahiro (Yeremiya 11:16). Mu kugereranya abo banyeshure n’ibiti vy’umwelayo, uwo mushikirizansiguro yavuze ati: “Yehova azobona yuko mufise ubwiza n’icubahiro nimwarangura mudahemuka igikorwa canyu co kwamamaza Ubwami aho mwarungitswe gukorera ubumisiyonari”. Nk’uko nyene igiti c’umwelayo gikeneye imizi ishika kure kugira ngo uruzuba ntirucumishe, ni na ko abanyeshure bakeneye gukomeza imizi yabo yo mu vy’impwemu kugira ngo bihanganire ukutanegwa ibintu, ukurwanywa, canke ibindi bigeragezo bishobora kubashikira mu murimo barangurira mu mahanga.​—Matayo 13:21; Ab’i Kolosayi 2:6, 7.

John E. Barr, umwe mu bavukanyi batatu bo mu Nama Nyobozi bagize uruhara muri iyo porogarama, yaciye irya n’ino umutwe-shimikiro uvuga ngo “Muri umunyu w’isi” (Matayo 5:13). Yarerekanye yuko nka kurya nyene umunyu uzigama imfungurwa ntizibore, ari na ko ukwamamaza kw’abamisiyonari ku vyerekeye Ubwami bw’Imana kuzorangura uruhara ndokorabuzima ku bumviriza, kukabarinda kwononekara mu vy’inyifato runtu no mu vy’Imana. Maze akoreshe ijwi rya kivyeyi, umuvukanyi Barr yahimirije abari bimirije gusohoka iryo shure ‘kubana amahoro’ n’abandi (Mariko 9:50). Uwo mushikirizansiguro yahimirije ati: “Muratsimbataze ivyamwa vy’impwemu, kandi murabe neza yuko ingendo yanyu be n’imvugo yanyu vyama nantaryo vyerekana ko muri abanyabuntu be n’uko mwitwararika abandi”.

Uwitwa Wallace Liverance, umwe mu bigisha b’i Gileyadi, yaciye irya n’ino umutwe-shimikiro uvuga ngo “Mugume mu bwato mu mazi maremare”. Nka kurya nyene ubwato buriko buca mu mazi maremare bushobora gufata inzira yo, ni na ko ugutahura “[“ibintu vyimbitse”, NW] vy’Imana”, ni ukuvuga ukuri kwerekeye umugambi w’Imana be n’ingene uzoranguka, bishobora gufasha umuntu gutera imbere mu vy’impwemu (1 Ab’i Korinto 2:10). Kuguma gusa mu mazi makeya yo mu vy’impwemu mu kuguma ku “vya mbere vy’itanguriro vy’ivyavuzwe n’Imana” birazibira iterambere ryacu, eka mbere bigashobora gutuma duhakwa cane ‘gusaba nk’ubwato mu vy’ukwizera’ (Abaheburayo 5:12, 13; 1 Timoteyo 1:19). Umuvukanyi Liverance yasozereye ati: “Murareke ‘uburebure bw’amajepfo bw’ubutunzi bw’ubwenge no kumenya vy’Imana’ bibashigikire mu gikorwa canyu c’ubumisiyonari”.​—Abaroma 11:33.

Uwitwa Mark Noumair, akaba ari uwundi mwigisha w’i Gileyadi, yaciye irya n’ino umutwe-shimikiro uvuga ngo: “Mwoba muzokwumira kw’iragi mwahawe?”. Mu kiringo c’imyaka irenga 60, Ishure ry’ivya Bibiliya ry’i Gileyadi rya Watchtower ryarabonetse ko ari iryo kwizigirwa ryongera riravugwa neza cane kubera ‘ibimenyamenya vyiza injojo’ vyatanzwe n’abasohotse iryo shure (Itanguriro 31:48). Iryo ragi ry’i Gileyadi ryaraye rihawe abanyeshure bitavye ivyigwa vy’umugwi ugira 118. Umuvukanyi Noumair yaremesheje abo banyeshure kwigana ab’i Tekowa ha kera bo mu gihe ca Nehemiya, maze bicishije bugufi bagakorana n’ishengero bakukira be n’abamisiyonari bagenzi babo. Barahimirijwe kwirinda inyifato y’“abapfasoni” bibona bavuzwe na Nehemiya, ahubwo bakemera n’umutima ukunze gukora batekereje batarondera kwiyerekana.​—Nehemiya 3:5.

Ivyabonywe be n’ibiganiro vyo kubaza ibibazo, bicisha ubwenge

Ikiganiro gikurikira kuri porogarama cari gifise umutwe-shimikiro uvuga ngo “Ijambo ry’Imana ryabandanije gukura” (Ivyakozwe 6:7). Bayobowe n’umwigisha w’i Gileyadi yitwa Lawrence Bowen, abo banyeshure barakinye udukino dusubiramwo ivyo biboneye mu busuku bwo mu ndimiro igihe bari kuri iryo shure. Ivyo vyabonywe vyarerekanye yuko nya banyeshure bari baramamaje Ijambo ry’Imana babigiranye umwete be n’uko Yehova yahezagiye rwose utwigoro bagize.

Uwitwa Richard Ashe yararongoye ikiganiro co kubaza ibibazo abo mu muryango wa Beteli bakorana cane n’iryo shure. Ivyo bavuze vyatumye abari ng’aho batahura neza agacumu k’ubumwe umuryango wa Beteli uterera kugira ngo ufashe abanyeshure b’i Gileyadi kwungukira bimwe bishitse kuri iryo shure. Inyuma y’ivyo, uwitwa Geoffrey Jackson yaraganiriye na bamwebamwe mu basohotse ishure ry’i Gileyadi kera. Barerekanye uturyo twinshi abamisiyonari baronka two gushemeza no kuninahaza Yehova. Umwe muri bo yavuze ati: “Abantu barihweza akantu kose umumisiyonari akora. Barumviriza, bakitegereza, kandi bakibuka”. Ni co gituma abanyeshure baremeshejwe kwama bibuka gutanga akarorero keza igihe cose. Iyo mpanuro ngirakamaro ntizobura kubafasha mu misi iri imbere.

Stephen Lett, umwe mu bagize Inama Nyobozi, yarashikirije insiguro isozera, iyari ifise umutwe-shimikiro uvuga ngo “Je imbere yemwe abatwara ‘amazi y’ubuzima’” (Yohana 7:38). Yavuze yuko mu mezi atanu aheze, abanyeshure bungukiye cane rwose ku kunywa amazi menshi y’ukuri kwo mw’Ijambo ry’Imana. Ariko none abo bamisiyonari bashasha bazokoresha iki ubumenyi baronse? Umuvukanyi Lett yarahimirije abari bimirije gusohoka iryo shure guhako abandi ayo mazi yo mu vy’impwemu batitangiriye itama kugira ngo na bo nyene baze bagire “imbizi y’amazi yiburuka azana ubu[zima] budashira” (Yohana 4:14). Uwo mushikirizansiguro yongeyeko ati: “Ntimuze mwigere mwibagira guha Yehova, we “sōko y’amazi y’ubu[zima]”, icubahiro be n’ubuninahazwa akwiriye. Murihangane igihe muzoba muriko murigisha abavuye muri Babuloni Hahambaye yishwe n’uruzuba” (Yeremiya 2:13). Umuvukanyi Lett yasozereye mu kuremesha abagira basohoke iryo shure kwigana banezerewe impwemu be na wa mugeni, mu kubandanya kuvuga bati: “Ngwino. Kand’ūfise inyota n’aze, ūgomba ni yākīre amazi y’ubugingo ku buntu”.​—Ivyahishuriwe 22:17.

Umuvukanyi Jaracz yasozereye iyo porogarama mu gushikiriza indamukanyo zavuye mu bihugu bitandukanye. Ivyo vyakurikiwe n’ikete ryo gukenguruka ryasomwe n’umwe mu banyeshure bari bimirije gusohoka iryo shure.

Woba ushobora kwitanga kugira ngo ukorere ahakenewe abamamaji kuruta ahandi? Nimba vyoshoboka, nukurikirane rero imigambi yo mu vy’impwemu, nk’uko abo bari bimirije gusohoka iryo shure babigize. Niwimbure umunezero be n’ugushira akanyota umuntu aronka iyo yitanze n’umutima ukunze mu gikorwa c’Imana, haba mu kuba umumisiyonari mu mahanga canke mu kuba umusuku akorera hafi y’iwabo.

[Uruzitiro ku rup. 13]

IBIRANGA ABARI BITAVYE IRYO SHURE

Igitigiri c’ibihugu bavuyemwo: 8

Igitigiri c’ibihugu barungitswemwo: 19

Igitigiri c’abanyeshure: 46

Incahagati y’imyaka y’amavuka: 33

Incahagati y’imyaka bamaze mu kuri: 16,5

Incahagati y’imyaka bamaze mu busuku bw’igihe cose: 12,9

[Ifoto ku rup. 15]

Umugwi ugira 118 w’abasohoka Ishure ry’ivya Bibiliya ry’i Gileyadi rya Watchtower

Mu rutonde rukurikira, imirongo iharurwa uhereye imbere uja inyuma, amazina na yo akaba atondetse uhereye ibubamfu uja iburyo ku murongo umwumwe wose.

(1) Brockmeyer, A.; Moloney, S.; Symonds, N.; Lopez, Y.; Howard, C. (2) Jastrzebski, T.; Brown, D.; Hernandez, H.; Malagón, I.; Jones, A.; Connell, L. (3) Howard, J.; Lareau, E.; Shams, B.; Hayes, S.; Brown, O. (4) Burrell, J.; Hammer, M.; Mayer, A.; Kim, K.; Stanley, R.; Rainey, R. (5) Jastrzebski, P.; Zilavetz, K.; Ferris, S.; Torres, B.; Torres, F. (6) Connell, J.; Hernandez, R.; Moloney, M.; Malagón, J.; Shams, R.; Hayes, J. (7) Ferris, A.; Hammer, J.; Stanley, G.; Kim, C.; Symonds, S.; Lopez, D.; Burrell, D. (8) Brockmeyer, D.; Mayer, J.; Rainey, S.; Zilavetz, S.; Jones, R.; Lareau, J.