Intererano zinezereza umutima w’Imana

IYO nkuru irababaje. Umwamikazi Ataliya yari yishize ku ngoma y’Ubuyuda ku nguvu akoresheje uruyeri n’ubwicanyi. Yibwiye yuko ba samuragwa bose bari bamaze kugandagurwa, aca yishira ku ngoma aba umwamikazi. Hari uwundi mugore yitwa Yehosheba, akaba yari umukobwa w’umwami yakunda cane Yehova n’Ivyagezwe vyiwe, yagize umutima rugabo aranyegeza umwe mu bana b’umwami yari akiri akayoya, ari we Yowasi. Yehosheba n’umunega wiwe, ari we wa Muherezi Mukuru Yehoyada, baramaze imyaka itandatu banyegeje uwo samuragwa aho baba mu rusengero.​—2 Abami 11:1-3.

Yowasi ashikanye imyaka indwi, Umuherezi Mukuru Yehoyada yaciye atangura gushira mu ngiro umugambi yari afise wo gukura ku ngoma wa mwamikazi yari yarihaye ubutegetsi bidaciye mu mategeko. Yarasohoye uwo muhungu amukura aho yari anyegejwe, aramwambika igitsibo c’ubwami, gutyo uwo muhungu aba ari we aja ku ngoma biciye mu mategeko. Abashibamyi b’umwami baciye basohorera hanze y’urusengero uwo Mwamikazi w’umubisha Ataliya baramwica, maze abanyagihugu babona gutora akoyokwe no kugira umunezero mwinshi. Ivyo Yehoyada na Yehosheba bakoze vyarafashije cane mu vyo gusubiza umutamana ugusenga kw’ukuri mu gihugu c’Ubuyuda. Ariko igihambaye kuruta, baragize ico bafashije mu gutuma uruvyaro rukomoka ku Mwami Dawidi rubandanya, urwo rukaba ari na rwo Mesiya yokomotsemwo.​—2 Abami 11:4-21.

Uwo mwami yari ahejeje kwimikwa na we nyene yari agiye kugira ikintu aterereye conezereje umutima w’Imana. Inzu ya Yehova yari ikeneye gusanurwa cane. Ataliya yarahahamiye cane ikibanza co kuba we mutware rudende w’Ubuyuda. Ico vyavuyemwo, ni uko urusengero rwahavuye rutitabwaho, eka mbere no gusahurwa rurasahurwa. Yowasi yaciye rero yiyemeza gusanura urusengero no kurusubiza uko rwahora rumeze. Bidatevye, yaratanze itegeko ryo gutororokanya amahera yari akenewe kugira inzu ya Yehova isubizwe uko yari imeze. Yavuze ati: “Amahera yose azanwa mu ngoro y’Uhoraho, atanzwe mu buryo bg’inyegu, ari yo mahera y’incungu z’abaharūwe, n’ayo umuntu wese aciriwe, n’ayo umuntu wese azokwiyumvira mu mutima wiwe kuzana mu ngoro y’Uhoraho; ayo yose abaherezi bayatware, umuntu wese az’ayake uwo bazinanyi; mugabo abe ari bo bazosanura iyo ngoro, ah’igomba gusanwa hose”.​—2 Abami 12:4, 5.

Abanyagihugu baratanze intererano n’umutima ukunze. Ariko rero, igikorwa abaherezi bari bashinzwe co gusanura urusengero ntibakiranguranye umutima wabo wose. Ku bw’ivyo, umwami yaciye afata ingingo yo kwifatira ibintu mu minwe, maze ategeka yuko intererano zose zishirwa mw’isandugu idasanzwe ata handi zirinze guca. Ico gikorwa umwami yaciye agishinga Yehoyada. Inkuru yigana iti: “Maz’umuherezi Yehoyada yābīra isandugu, ayitobora umwenge mu mutemere, ayitereka i ruhande y’igicaniro, ku ruhande rw’i buryo umuntu aja kwinjira mu ngoro y’Uhoraho; nukw abaherezi barinda umuryango bakagenda barokezamw’amahera yose azanwa mu ngoro y’Uhoraho. Maz’iyo babonye amahera agwiriye mur’iyo sandugu, umukarani w’umwami n’umuherezi mukuru bāradūga, bagaharūra amahera yabonetse mu ngoro y’Uhoraho, bakayashira mu mipfuko. Bamaze kugera ayo mahera ku munzane bakayaha abashinzwe gukoresha ibikorwa vyo kur’iyo ngoro y’Uhoraho; na bo bakayahemba ababāji n’abubatsi bākora kur’iyo ngoro nyene, bo n’abubakisha amabuye n’abayabāza; bakayagura n’imbaho n’amabuye abāje vyo gusanura aho hāsambutse h’iyo ngoro y’Uhoraho, bakayagura n’ibindi vyose bigombga vyo kuyisanura”.​—2 Abami 12:9-12.

Abanyagihugu baritavye n’umutima wabo wose ako kamo bari batewe. Inzu ya Yehova yo gusengeramwo yarasubijwe uko yari imeze kugira ngo bashobore kubandanya kumusenga mu buryo buteye iteka. Gutyo rero, amahera yose yatererewe yakoreshejwe ico yari agenewe. Ico kintu Umwami Yowasi yaracitayeho!

Muri iki gihe, ishirahamwe rya Yehova riboneka riritaho cane kuraba yuko intererano z’amahera zose zitangwa zikoreshwa neza ku bwo guteza imbere ivy’ugusenga Yehova, kandi abakirisu b’ukuri baragize ico bakoze n’umutima wabo wose nk’ukwo kw’Abisirayeli bo mu gihe ca kera. Ushobora kuba uri mu batanze intererano mu mwaka w’umurimo uheze ku bwo guteza imbere ivyungura Ubwami. Reka ubu turabe uburyo bumwebumwe intererano watanze zakoreshejwe.

UGUSOHORA IBITABU

Kw’isi yose, ibisohokayandikiro bikurikira ni vyo vyacapuwe kugira vyigwe vyongere bitangwe:

• Ibitabu: 47.490.247

• Udutabu dutoduto: 6.834.740

• Udutabu tuninitunini: 167.854.462

• Ibirangamisi: 5.405.955

• Ibinyamakuru: 1.179.266.348

• Udupapuro tw’inkuru nziza: 440.995.740

• Amavidewo: 3.168.611

Ibisohokayandikiro bicapurirwa muri Afirika, muri Amerika ya Ruguru, muri Amerika yo Hagati, muri Amerika y’Epfo, muri Aziya, mu Buraya, be no mu mazinga yo muri Pasifike. Ibihugu bicapurirwamwo ibisohokayandikiro, vyose hamwe bikaba ari 19.

“Jewe nitwa Katelyn May. Mfise imyaka umunani. Mfise amadolari 28 [ayo akaba ari amafaranga arenga gatoyi amarundi 30.000], nkaba nashaka ko muyakira kugira ngo aze afashe mu bijanye n’amamashini acapura. Yari umuvukanyikazi wanyu mutoyi, Katelyn”.

“Umuryango wacu warakoranye uraganira ibijanye n’amamashini mashasha yo gucapura. Abana bacu, umwe akaba afise imyaka 11 uwundi 9, bafashe ingingo yo kwikora ku mahera baziganije kugira na bo bagire ico batanze. Turi n’umunezero wo kurungika izo ntererano zabo hamwe n’izacu”.

UBWUBATSI

Hari amaporoje y’ubwubatsi yatangujwe ku bwo gushigikira ibikorwa birangurwa n’Ivyabona vya Yehova. Amwamwe muri yo ni aya:

• Ingoro z’Ubwami zo mu bihugu bifise uburyo buke: 2.180

• Ingoro z’amateraniro: 15

• Amashami: 10

• Abitanze gukorera umurimo w’igihe cose mu mahanga: 2.342

“Kuri iyi mpera y’umushamvu twaragiriye ikoraniro rya mbere mu Ngoro y’Ubwami yacu nshasha. Turahimbawe cane kubona dufise ikibanza kibereye co gushemezamwo Data wa twese Yehova Imana. Turabakurira ubwatsi mwe na Yehova kubona mwaritayeho ivyo dukeneye mu kwubaka Ingoro z’Ubwami ziyongereye. Vy’ukuri, Ingoro y’Ubwami yacu irashariza koko akarere irimwo”.​—Shili.

“Abavukanyi n’abavukanyikazi barakenguruka cane imfashanyo itangwa n’ishirahamwe rya Yehova. Gushika uyu musi turacaganira ivyerekeye igihe kiryoshe cane twamaranye n’umugwi w’abubatsi”.​—Molodaviya.

“Twe n’umukenyezi wanje duheruka guhimbaza umusi mukuru w’imyaka 35 tumaranye. Twaragerageje kuraba ico umwumwe muri twebwe yogabira mugenziwe kuri uwo musi, duca dufata ingingo yo kugira ico dutanze kugira dushimire Yehova n’ishirahamwe ryiwe, kubera ko iyo itaba imfashanyo yabo umubano wacu kumbure utaba wararoraniwe. Twipfuza yuko amahera ari kumwe n’aka gakete yokoreshwa mu kwubaka Ingoro y’Ubwami muri kimwe mu bihugu bikenye cane kuruta ibindi”.

“Mperuka kuronka intoranwa. Rero, kubera ko ivyo mbona nipfuza ari bike, ivyo nkeneye na vyo bikaba ari na bike cane, nipfuza ko mwokwakira aya mahera ari kumwe n’aka gakete kugira afashe mu kwubaka Ingoro z’Ubwami zikenewe cane mu bihugu vyinshi”.

GUTABARA ABASHIKIWE N’IVYAGO

Muri ino misi y’iherezo, ivyago usanga akenshi bishika giturumbuka. Ivyabona vya Yehova benshi baratanga n’izindi ntererano kugira abavukanyi babo bo mu turere twashikiwe n’ivyago bashobore gufashwa. Tuributswa yuko intererano zitangwa ku bwo gutabara abashikiwe n’ivyago ari umuce w’igikorwa kirangurirwa kw’isi yose. Ivyabona vya Yehova baratabaye abashikiwe n’ivyago bo mu turere dukurikira:

• Afirika

• Aziya

• Akarere ka Karayibe

• Amazinga yo muri Pasifike

“Twe n’umunega wanje twagomba kubakengurukira cane kuba mwaraturungikiye imfashanyo mu twigoro two gutabara twagizwe inyuma y’aho ibivumbuzi vyononeye ibintu. Twarashoboye gusakara inzu yacu bundi busha. Turakenguruka cane kubona mutatevye guca mugira ico mukoze”.

“Jewe nitwa Connor, nkaba mfise imyaka 11. Aho mariye kubona ivyabaye igihe hatera ca cago c’ibisebuzi vyataziriwe “tsunami”, naciye numva nshaka kugira ico mfashije. Nizigiye ko ivyo ndungitse bizofasha abavukanyi n’abavukanyikazi banje”.

ABASUKU BADASANZWE B’IGIHE COSE

Hari abakirisu batari bake bakora umurimo w’igihe cose mu kwamamaza inkuru nziza canke mu gukorera mu mabeteli. Bamwebamwe mu bitanze gukora umurimo w’igihe cose bashigikirwa n’intererano zitangwa n’abavyishakiye. Muri abo harimwo:

• Abamisiyonari: 2.635

• Abacungezi b’ingenzi: 5.325

• Abanyabeteli: 20.092

“Kubera ko ubu ntashobora kuja gukora kuri Beteli [ivyo bikaba bivugwa n’agahungu k’imyaka itanu], nashaka kurungika iyi ntererano n’urukundo rwinshi. Ninakura, nzoja kuri Beteli gukora cane”.

Guteza imbere ivy’ukwigisha Bibiliya

Yezu Kirisitu yashinze abayoboke biwe igikorwa co “guhindura [“abantu bo mu mahanga yose”, NW] abigishwa” (Matayo 28:19). Ivyabona vya Yehova barakurikiza ayo majambo mu gukorana umwete igikorwa co kwamamaza no kwigisha ubutumwa bwa Bibiliya mu bihugu 235. Barasohora bakongera bagatanga ibitabu bivuga ivya Bibiliya mu ndimi 413.

Mu vy’ukuri, intererano umukirisu ashobora gutanga iruta agaciro izindi zose kugira afashe abantu benshi kuruta kumenya ivyerekeye Imana be n’imigambi yayo, ni umwanya wiwe. Ivyabona vya Yehova baratanze umwanya wabo mwinshi bongera barakoresha inguvu nyinshi cane kugira bafashe abantu nka bo. Baratanze n’intererano z’amahera, kandi intererano zose batanze, ukwo zari zimeze kwose, zarafashije mu kumenyekanisha izina rya Yehova be n’imigambi yiwe kw’isi yose. Ese Yehova yobandanya guhezagira utwo twigoro tugirwa ku bwo gufasha abandi kumenya n’ibindi vyinshi ku bimwerekeye (Imigani 19:17)! Emwe, uwo mutima ukunze wo gufasha abandi uranezereza umutima wa Yehova!​—Abaheburayo 13:15, 16.

[Uruzitiro ku rup. 28, 29, 30]

Uburyo butandukanye bamwebamwe bahitamwo gutanga

INTERERANO KU BW’IGIKORWA KIRANGURIRWA KW’ISI YOSE

Abenshi barashira ku ruhande amahera, canke bakabika igitigiri kinaka c’amahera bazoshira mu dusandugu tw’intererano twanditseko ngo “Intererano ku bw’igikorwa kirangurirwa kw’isi yose​—Matayo 24:14”.

Ku kwezi ku kwezi, amashengero ararungika ayo mahera ku biro vy’Ivyabona vya Yehova bihagarikiye ibihugu akukira. Izo ntererano z’amahera zitangwa n’abavyishakiye, zoshobora no kurungikwa ata handi ziriwe ziraca kuri aderese ikurikira: Watch Tower Bible and Tract Society of Pennsylvania, Attention Treasurer’s Office, 25 Columbia Heights, Brooklyn, New York 11201-2483, canke na ho zikarungikwa ku biro vy’ishami vy’Ivyabona vya Yehova bihagarikiye igihugu ubamwo. Amasheki arungikwa kuri iyo aderese akwiye kuba yanditsweko yuko amahera yohabwa “Watch Tower”. Ibintu vyo mu mabuye y’agaciro canke ibindi bintu vy’agaciro na vyo nyene vyoshobora gutangwa. Ivyo bintu vyoba bitanzweko intererano bikwiye guherekezwa n’ikete rigufi rivuga yuko ari ingabirano.

INDINGANIZO Y’IVYO GUTANGA AMAHERA YOSHOBORA GUSUBIZWA

Amahera yoshobora kurungikirwa ishirahamwe Watch Tower kugira riyakoreshe mu gikorwa kirangurirwa kw’isi yose. Ariko rero, ayo mahera yoshobora gusubizwa mu gihe nyene kuyatanga abisavye. Ushaka kumenya vyinshi kuri ico kibazo, turakwinginze ubaze Ibiro vy’Umushingwabigega ukoresheje aderese yamaze gutangwa.

KURINGANIZA IVYO GUTANGA UMUNTU AVYISHAKIYE

Uretse ingabirano z’amahera, hariho ubundi buryo bwo gutanga intererano zo guteza imbere umurimo w’Ubwami urangurirwa kw’isi yose. Muri ubwo buryo harimwo ubu bukurikira:

Soransi: Izina Watch Tower ryoshobora gutangwa ngo iryo shirahamwe ribe ari ryo ryakira amahera ya soransi y’ubuzima bw’umuntu canke imbitso y’amahera umuntu azokwikorako mu gihe akukurutse canke ahawe pansiyo.

Amakonte yo muri banki: Amakonte yo muri banki, impapuro zemeza amahera yabikishijwe muri banki, canke amakonte y’umuntu yakukurutse, birashobora kubikishirizwa ishirahamwe Watch Tower canke bigashingwa yuko bizohabwa iryo shirahamwe nyene vyo niyapfa, hisunzwe ibisabwa n’ibanki y’aho umuntu aba.

Umutahe umuntu afise ahantu be n’ivyete bitanga uburenganzira bwo kwakira amahera aho ayafise: Ivyo na vyo nyene vyoshobora guhabwa ishirahamwe Watch Tower bwa ngabirano.

Itongo canke inzu: Itongo canke inzu, kibure vyompi uko ari bibiri, mu gihe ari ibishobora kugurishwa, birashobora gutangwa bwa ntererano mu kubigaba. Mu gihe ari aho umuntu aba, nyene kubitanga arashobora gusigirwa aho aba arabaye, agashobora kubandanya kuhaba igihe cose asigaje kubaho. Imbere yo kugira amasezerano yo gushikiriza ico ari co cose muri ivyo, urabanza ubivugane n’ibiro vy’ishami vyo mu gihugu ubamwo.

Ukuza uraronka amahera ku yo uba waratanzeko ingabirano: Muri iyo ndinganizo, umuntu araha urwego kanaka rukoreshwa n’Ivyabona vya Yehova amahera canke inzandiko zemeza ko ayafise ahantu. Nyene gutanga na we, canke umuntu yagenywe na we, araronka amahera kanaka ku mwaka ku mwaka amufasha kubaho. Ku mwaka biba vyemejwe ko nyene gutanga ayo mahera agengwa n’iyo ndinganizo, aragabanirizwa ikori yahora ayatangako.

Ivyete vy’iragi be n’imbitso: Itongo canke amahera birashobora kuragwa ishirahamwe Watch Tower biciye ku cete c’iragi canditswe mu buryo bwemewe n’amategeko, canke bigashobora kwitwa ko ishirahamwe Watch Tower ari ryo rigabiwe icete cemeza imbitso umuntu afise ahantu. Imbitso iteza imbere ishirahamwe ry’ivy’idini irashobora gutuma umuntu akurwako amakori amwamwe.

Imvugo ngo “kuringaniza ivyo gutanga umuntu avyishakiye” yerekana ko nyene gutanga abanza kubitegekanya. Mu ntumbero yo gusahiriza abantu bipfuza guteza imbere igikorwa Ivyabona vya Yehova barangurira kw’isi yose biciye ku buryo bunaka bwo gutanga intererano, harateguwe agatabu mu congereza be no mu gisupanyoli kerekeye ugutanga kwo gushigikira umurimo w’Ubwami urangurirwa kw’isi yose (ako gatabu kitwa ngo Charitable Planning to Benefit Kingdom Service Worldwide). Ako gatabu kateguwe kugira gatange amakuru ajanye n’uburyo butandukanye ingabirano zishobora gutangwa haba ubu canke biciye ku kubiraga ishirahamwe. Abantu benshi, bamaze gusoma ako gatabu no kubiganira n’abahanuzwajambo babo mu vy’amategeko canke mu vy’amakori, barashoboye gushigikira ibikorwa Ivyabona vya Yehova barangurira kw’isi yose bijanye n’ivy’idini be n’ivy’ugufasha abari mu ngorane, muri ico gihe nyene bararushiriza kuhungukira rwose mu bijanye no kuriha amakori. Ako gatabu umuntu arashobora kukaronka mu kugasaba ku Biro biraba ivy’ukuringaniza ivyo gutanga umuntu avyishakiye.

Nimba ushaka kumenya ayandi makuru kuri ivyo, wobiganira n’ibiro vy’ishami vy’Ivyabona vya Yehova, mu kwandika ikete ukoresheje iyo aderese ishizwe aho hepfo canke mu guterefona kuri ivyo biro ukoresheje izo nomero zerekanywe aho hepfo.

Ivyabona vya Yehova

B.P. 2150 Bujumbura

Telefone: (257) 241110

[Abo dukesha ifoto ku rup. 27]

Ya videwo yitwa Fidèles: Stalin: U.S. Army photo