Urama Wibuka Ibinyamakuru!

¹ Ivyiyumviro bikurikira vyerekana gute ko twama twibuka ibinyamakuru?: (1) Umwamamaji wese akwiye gusaba igitigiri c’ibinyamakuru gikwiye, mugabo kibereye. (2) Nubone umusi wa Gatandatu uwo ari wo wose nk’Umusi w’Ugutanga Ibinyamakuru. (3) Nutunganye urutonde rwawe rw’umurimo kugira ngo urabe ukuntu woshiramwo igikorwa co gutanga ibinyamakuru ku kwezi ku kwezi. (4) Nutegekanye kurushiriza gushinga intahe akaryo kizanye, ukoresheje ibinyamakuru mu gutanguza ibiyago. (5) Ku bantu b’abadandaza be n’abanyakazi boshimishwa na vyo, nujane ibiganiro bihuye na bo. (6) Uraza uraraba aho wandika igitigiri c’ivyo wabasigiye, hanyuma ubaremeshe kugira baze barakira ibinyamakuru uko bisohotse, uze uragaruka udahorereza witwaje inomero ziherutse gusohoka. (7) Nukoreshe neza ibinyamakuru vya kera ivyo ari vyo vyose, kugira ngo ntihagire ibirundana, hanyuma werekane ibiganiro vyo mu binyamakuru bigezweko bisa n’ivyovyura ugushimishwa.

² Umwerekano w’inshikirizo ngufi y’ibinyamakuru: “Iki kiganiro co mu kinyamakuru Réveillez-vous! kiravuga vyinshi kuri ico kibazo.” Maze nusome iryungane rimwe canke abiri wari wategekanije, hanyuma ubandanye uti: “Kubera ko usa n’uwitayeho ico kibazo, ubona woshima gusoma iki kiganiro hamwe n’ibindi bihuye n’igihe muri iyi nomero y’ikinyamakuru Réveillez-vous!? Nimba wobishima, nohimbarwa no kukigusigira hamwe na mugenzi waco Umunara w’Inderetsi.” Nimba uwo munyamuhana yakiriye ivyo binyamakuru, hari aho vyoba bibereye uvuze ikintu nk’iki: “Igikorwa cacu gikorerwa kw’isi yose, kikaba gishigikirwa n’intererano z’abavyishakiye. Nimba wipfuje gutanga intererano ntoyi uno musi, ndahimbarwa no kuyakira.” Nimba ashatse gutanga intererano, nutege ya bahasha idasanzwe kugira ashiremwo intererano yiwe, kandi mu kumushimira umukure amazinda yuko intererano atanze izokoreshwa ku bwa nya gikorwa kirangurirwa kw’isi yose. Nimba avuze ko ata mahera agira, ntumusabe gusubiza ivyo binyamakuru, ahubwo muremeshe kubisoma.

³ Mu gihe twama twibuka ibinyamakuru vyacu, dukwiye kutigera tureka kubiba imbuto z’Ubwami tubikoresheje. Naho ubukerebutsi bukenewe kugira ngo ibinyamakuru vyacu ntibipfishwe ubusa mu gutabwa ‘mw’ivu ryo mu mabuye,’ abashima inkuru nziza tubazanira, baranezerwa no gusoma ibinyamakuru, kandi bagahimbarwa no gutanga intererano zabo bavyishakiye, igihe babishoboye. (Mrk. 4:5, 6, 16, 17) Gereranya na Matayo 10:42.