Ikigabane ca Kabiri
Himbaza Yehova nka We Mana Yonyene y’Ukuri
1. Imana yonyene y’ukuri ni nde?
BIBILIYA ivuga yuko naho hari vyinshi bifatwa nk’imana, “kuri twebge har’Imana imwe, Data wa twese.” (1 Ab’i Korinto 8:5, 6) Iyo “Mana imwe” ni Yehova, Uwaremye ibintu vyose. (Gusubira mu Vyagezwe 6:4; Ivyahishuriwe 4:11) Yezu yamuvuze ngo ‘Imana yanje ari yo Mana yanyu.’ (Yohana 20:17) Yaremeranije na Musa, uwari yavuze imbere yaho ati: ‘Yehova ni we Mana, nta yindi iriho atari we.’ (Gusubira mu Vyagezwe 4:35) Yehova ararengeye kure n’iyo ibintu vyose bisengwa, nk’ibigirwamana, abantu basengwa nk’imana, canke wa mwansi wiwe Shetani Umurwanizi, we “mana y’iki gihe.” (2 Ab’i Korinto 4:3, 4) Mu buryo bunyuranye n’ivyo vyose, Yehova, nk’uko Yezu yamwise, ni we “Mana yonyene y’ukuri.”—Yohana 17:3, ni twe tubihiritse.
2. Uko twiga ivyerekeye Imana, bikwiye gukora iki ku buzima bwacu?
2 Abantu b’umutima ushima iyo bize ivyerekeye kamere z’akezamutima z’Imana hamwe n’ivyo yakoze be n’ivyo igiye kuzodukorera, bumva bashaka kuyiyegereza. Uko urukundo bakunda Yehova rukura, ni ko bumva babwirizwa kumuhimbaza. Gute? Uburyo bumwe ni mu kumuyagira abandi. Mu Baroma 10:10 havuga hati: “Akanwa [ni] ko [umuntu] yāturisha, akaronka agakiza.” Ubundi buryo ni mu kumwigana mu vyo tuvuga no mu vyo dukora. Mu Banyefeso 5:1 havuga hati: “Mwīgāne Imana, nk’abana ikunda.” Kugira ngo ivyo tubikore bimwe bishitse kuruta, turakeneye kumenya Yehova nk’uko ari koko.
3. Kamere nkurunkuru z’Imana ni izihe?
3 Muri Bibiliya nzima, harimwo amajambo menshi yerekana kamere zibonekeje z’Imana. Kamere nkurunkuru zayo zine ni ubukerebutsi, ubutungane, ububasha be n’urukundo. ‘Ni we afise ubukerebutsi.’ (Yobu 12:13, NW) “Inzira ziwe zose [“ni ubutungane,” “NW”].” (Gusubira mu Vyagezwe 32:4) Afise ‘ububasha bwinshi.’ (Yesaya 40:26) “Imana [ni] urukundo.” (1 Yohana 4:8, ni twe tubihiritse.) Ariko none, muri izo kamere zine nkurunkuru z’Imana, ni iyihe yibonekeje kuruta izindi, iyirusha izindi zose kugenekereza neza uko Imana imeze?
‘Imana Ni Urukundo’
4. Muri kamere z’Imana, ni iyihe canecane yatumye Imana irema ijuru n’isi hamwe n’ibintu vyose bifise ubuzima?
4 Rimbura icatumye Yehova arema ijuru n’isi hamwe n’ibiremwa vy’impwemu bifise ubwenge be n’ibiremwa-bantu bifise ubwenge. Mbega ni ubukerebutsi bwiwe canke ububasha bwiwe bwabimutumye? Oya, kuko naho Imana ivyo yabikoresheje, si vyo bintu vyabimutumye. Vyongeye ubutungane bwiwe si bwo bwamusavye ko agira uwo aha ubuzima. Ahubwo, urukundo ruhambaye rw’Imana ni rwo rwatumye asangira n’abandi bafise ubwenge iminezero y’ukubaho. Urukundo rwatumye afata umugambi w’uko abantu bagamburuka babaho ibihe bidahera mw’Iparadizo. (Itanguriro 1:28; 2:15) Urukundo rwatumye aringaniza ivy’uko abantu bakurwako urubanza rubi ubugarariji Adamu yagize bwabakwegeye.
5. Twishimikije Bibiliya, ni kamere iyihe Yehova wenyene agereranya, kandi ni kuki?
5 Gutyo rero, muri kamere zose z’Imana, iyihambaye rwose kuruta izindi ni urukundo rwiwe. Ni ko Imana imeze. Naho ubukerebutsi, ubutungane n’ububasha ari kamere zayo zihambaye, Bibiliya ntaho yigera ivuga yuko Yehova ari imwe muri izo kamere. Mugabo iravuga koko yuko we ari urukundo. Egome, Yehova ni we nyene agereranya urukundo. Urwo ni urukundo rugengwa n’ingingo, rutagengwa n’akanyengetera. Urukundo rw’Imana rugengwa n’ingingo zigenga ukuri n’ubugororotsi. Ni rwo bwoko ruheta bw’urukundo, nk’uko bibonekera muri Yehova Imana ubwiwe. Mwene urwo rukundo ni inseruro y’ukutikwegerako kwuzuye, rukaba nantaryo rwama rujana n’ibikorwa birugaragaza.
6. Ni igiki gituma bidushobokera kwigana Imana, naho nyene yo iturengeye?
6 Iyo kamere itangaje y’urukundo ni yo ituma twigana mwene iyo Mana. Kubera ko turi abantu bo hasi, b’abanyagasembwa, bama bahengamiye ku gukora amakosa, twoshobora kwiyumvira yuko tutokwigera twigana Imana ngo bidushobokere. Mugabo raba aka karorero k’urukundo ruhambaye rwa Yehova: Arazi neza ko hariho ivyo tudashobora, kandi ntadusaba kutagira agahonzi. Arazi yuko ubu tudatunganye na gatoyi. (Zaburi 51:5) Ni co gituma Zaburi 130:3, 4 ivuga iti: “Uhoraho, wokwama wibuka ibigabitanyo, bgirukiro, ni nde yohava akazohagarara adatsinzwe? Ariko guharirwa kubonerwa kuri wewe.” Ni vyo, Yehova ni “Imana yuzuye imbabazi n’ubuntu, [i]teba kuraka, [i]gira ikigongwe cinshi.” (Kuvayo 34:6) “Wewe Mwami, uri mwiza, ugabirije guharira.” (Zaburi 86:5) Ese ukuntu bihumuriza yemwe! Ibaze ukuntu twezwa umutima no gukorera iyo Mana y’agahore, be no kwitwararikwa na yo mu buryo buranga urukundo n’ikigongwe!
7. Urukundo rwa Yehova rushobora gute kubonerwa mu bikorwa vyiwe vy’irema?
7 Urukundo rwa Yehova rurashobora kandi kubonerwa mu bikorwa vyiwe vy’irema. Iyumvire ibintu vyinshi Yehova yaduhaye kugira ngo biduhimbare, nk’imisozi myizamyiza, amashamba, ibiyaga n’amabahari. Yaraduhaye n’ibifungurwa bitandukanye utoraba kugira ngo bituryohere vyongere bidutunge. Si ivyo gusa, Yehova yaratanze n’amashurwe umurengera mezameza kandi atamirana, tutibagiye n’ibikoko vy’akaroruhore. Yaremye ibintu bishobora gutera umuntu akanyamuneza, naho atategerezwa kubigira. Ego ni ko, kubera tuba muri iyi si mbi turi abanyagasembwa, ntidushobora kwinovora bimwe bishitse ivyo yaremye. (Abaroma 8:22) Mugabo iyumvire gusa ivyo Yehova azotugirira mw’Iparadizo! Umwanditsi wa Zaburi aradukura amazinda ati: “Upfumbaturura igipfunsi cawe, ugahāza ukwifuza kw’ibiriho vyose.”—Zaburi 145:16.
8. Ni akarorero akahe kibonekeje kuruta k’urukundo Yehova yadukunze?
8 Ni akarorero akahe kibonekeje kuruta k’urukundo Yehova afitiye abantu? Bibiliya isigura iti: “Urukundo Imana yakunze abari mw isi [n]i rwo rwatumye itanga Umwana wayo w’ikinege, ng’ūmwizera wese ntaz’apfe rubi, arikw ahabge ubu[zima] budashira.” (Yohana 3:16) Ivyo Yehova yoba yabigize kubera ko abantu bari bameze neza? Mu Baroma 5:8 hishura hati: “Imana yatweretse urukundo rwayo idukunda, kuko Kristo yadupfiriye tukir’abanyavyaha.” Ni vyo, Imana yarungitse kw’isi Umwana wayo atagira agahonzi kugira atange ubuzima bwiwe ngo bube inkuka y’incungu yo kuducungura ngo dukire urubanza rubi dukwegerwa n’icaha be n’urupfu. (Matayo 20:28) Ivyo vyugururiye inzira abantu bakunda Imana kugira ngo bazoronke ubuzima budahera. Turashima kubona urukundo rw’Imana rushika no kuri abo bose bashaka gukora ivyo igomba, kuko Bibiliya itubwira iti: “Imana [nti]robanura abantu ku butoni, ariko mu mahanga yose ūyubaha, agakora ivy’ukugororoka, iramwemera.”—Ivyakozwe 10:34, 35.
9. Kuba Yehova yaratanze Umwana wiwe ngo atubere incungu bikwiye gukora iki kuri twebwe?
9 None kuba Yehova yaratanze Umwana wiwe ngo atubere incungu hanyuma bikatwugururira inzira yo kuronka ubuzima budahera, bikwiye gukora iki ku kuntu dukoresha ubuzima bwacu ubu? Bikwiye gutuma dukunda Imana y’ukuri Yehova urukundo rugera kure. Ico gihe nyene, bikwiye gutuma dushaka kwumviriza Yezu, we aserukira Imana. “Icatumye [Yezu] apfira bose kwar’ukugira ngw abariho babeho batacinezereza, ariko babeho banezereza uwabapfiriye, akabazukira.” (2 Ab’i Korinto 5:15) Ese ukuntu biteye agahimbare kugera ikirenge mu ca Yezu, kuko yatubereye akarorero mu vyo kwigana urukundo n’imbabazi vya Yehova! Ivyo birerekanwa n’ivyo Yezu yabwiye abicisha bugufi ati: “Ni muze kuri jewe mwese abananiwe n’abaremerewe, ndabaruhura; mwikoreze ingata yanje, munyigireko; kuko nd’umugwaneza, niyoroheje mu mutima; namwe muzoronka uburuhukiro bg’imitima yanyu. Kukw ingata yanje itababaza, n’umutwaro wanje uhwahutse.”—Matayo 11:28-30.
Tugaragarize Urukundo Abandi
10. Ni uburyo bumwebumwe ubuhe dushobora kugaragariza urukundo Abakirisu bagenzi bacu?
10 Dushobora gute none kwerekana yuko dufitiye Abakirisu bagenzi bacu rwa rukundo nyene Yehova na Yezu badufitiye? Raba uburyo bwinshi dushobora kubigira: “Urukundo rurihangana, rugira neza, urukundo ntirugira ishari, urukundo ntirwihayagiza, ntirwihimbaza, ntirukora ibiteye isoni, ntirurondera ivyarwo, ntirwiciraho, ntirwiyumvira ikibi ku bantu, ntirunezererwa ukugabitanya kw’abandi, ariko runezeranwa n’ukuri: rurenzako muri vyose, rwizera vyose, rwizigira vyose, rwihanganira vyose. Urukundo nta ho rushira.”—1 Ab’i Korinto 13:4-8; 1 Yohana 3:14-18; 4:7-12.
11. Ni bande kandi dukwiye kugaragariza urukundo, kandi tworubagaragariza gute?
11 Ni bande kandi dukwiye kugaragariza urukundo, kandi tworubagaragariza gute? Yezu yavuze ati: “Nuko ni mugende, muhindure [abantu bo mu] mahanga yose abigishwa, mubabatiza mw izina rya Data wa twese n’iry’Umwana n’iry[’im]pwemu [y]era; mubigishe kwitondera ivyo nabageze vyose.” (Matayo 28:19, 20) Ivyo birimwo ukubwira abataraba Abakirisu bagenzi bacu inkuru nziza yerekeye isi nshasha y’iparadizo y’Imana igiye kuza. Yezu yarerekanye neza yuko urukundo rwacu rudakwiye kugarukira gusa kuri barya dusangiye ukwemera, kuko yavuze ati: “Ni mwakunda ababakunda [gusa], muri n’impēra ki? Mbeg’abatozakori bo si ko bagira? Ni mwaramukanya n’incuti zanyu gusa, abandi muzoba mubarusha iki? Abanyamahanga bo si ko bagira?”—Matayo 5:46, 47; 24:14; Ab’i Galatiya 6:10.
‘Gendera mw’Izina rya Yehova’
12. Ni kuki izina ry’Imana y’ukuri ari yo yonyene ishobora kuryitwa?
12 Uwundi muce uhambaye w’uguhimbaza Imana y’ukuri ni ukumenya izina ryayo yiharije, ari ryo Yehova, ukurikoresha be n’ukuryigisha abandi. Umwanditsi wa Zaburi yaraseruye icipfuzo yari afise ku mutima ati: “Kugira ngo bamenye yuko wewe, uwitwa [“Yehova,” NW], kw ari wewe Usumba vyose, ukaganza isi yose.” (Zaburi 83:18) Izina Yehova risigura ngo “Atuma Biba.” Ni we Mushingamigambi Mukuru kandi yama ayishitsa. Vyongeye Imana y’ukuri ni yo yonyene ikwiriye kwitwa iryo zina, kuko abantu badashobora kwigera bamenya neza ko utwigoro bagira tuzororanirwa. (Yakobo 4:13, 14) Yehova wenyene ni we ashobora kuvuga yuko ijambo ryiwe “rizoshitsa” ico arituma. (Yesaya 55:11) Abenshi baruzura akanyamuneza igihe babonye ari bwo bwa mbere izina ry’Imana muri Bibiliya zabo bakanamenya ico risigura. (Yesaya 26:4) Mugabo bazokwungukira kuri ubwo bumenyi mu gihe ‘bagendeye mw’izina [“rya Yehova,” NW] . . . gushitsa ibihe bitazoshira.’—Mika 4:5.
13. Kumenya izina rya Yehova no kurigenderamwo harimwo ibiki?
13 Ku biraba izina ry’Imana, muri Zaburi 9:10 havuga hati: “Abazi izina ryawe bazokwizigira.” Ivyo ntibisaba gusa kumenya izina Yehova, kuko bidaca bisigura ko tumwizigiye. Kumenya izina ry’Imana bisigura gutahura no gushima ukuntu Yehova Imana ameze, ukwubaha ubukuru bwiwe, kugamburuka amabwirizwa yiwe, kumwizigira muri vyose. (Imigani 3:5, 6) Muri ubwo buryo nyene, kugendera mw’izina rya Yehova bisaba kumwiyegurira no kumuserukira uri umwe mu bamusenga, tugakoresha koko ubuzima bwacu mu buryo buhuye n’ivyo Imana igomba. (Luka 10:27) Ivyo woba uriko urabikora?
14. Nimba dushaka gukorera Yehova ibihe bidahera, ni ibiki bikenewe turetse ukwumva ko ari itegeko kuri twebwe?
14 Nimba dushaka gukorera Yehova ibihe vyose, kwumva ko ari itegeko si co kintu gikwiye gutuma tubigira. Intumwa Paulo yahimirije Timoteyo uwari amaze imyaka myinshi akorera Yehova, ati: “Wimenyereze kwubaha Imana.” (1 Timoteyo 4:7) Ukwubaha kuva ku mutima wuzuye ugukengurukira nyene kwubahwa. Ukwo “kwubaha Imana” kwerekana ukwibanga Yehova ubwiwe kugera kure. Kugaragaza ukumwibandako bivuye ku kumusonera kwinshi no ku gusonera inzira ziwe. Kuratuma dushaka ko umuntu wese yubahiriza cane izina ryiwe. Dutegerezwa gutsimbataza ukwubaha Imana mu buzima bwacu nimba dushaka kugendera ibihe bidahera mw’izina rya Yehova, we Mana yonyene y’ukuri.—Zaburi 37:4; 2 Petero 3:11.
15. Dushobora gute gusenga Imana yonyene?
15 Kugira ngo dukorere Imana mu buryo yemera, dutegerezwa kuyisenga tutayibangikanije, kuko ari Imana ‘isaba gusengwa yonyene.’ (Kuvayo 20:5) Ntidushobora gukunda Imana ngo twongere dukunde iyi si mbi, ari yo Shetani abereye imana. (Yakobo 4:4; 1 Yohana 2:15-17) Yehova arazi neza uko umuntu wese muri twebwe ariko aragerageza kumera. (Yeremiya 17:10) Nimba vy’ukuri dukunda ubugororotsi, arabibona kandi azodufasha kwihanganira ibigeragezo bidushikira imisi yose. Kubera ko adushigikira akoresheje impwemu yiwe yera y’inyabubasha, azotuma dutsinda ububisha bwabaye ndanse muri iyi si. (2 Ab’i Korinto 4:7) Azodufasha kandi kugumana icizigiro cacu gikomeye c’ubuzima budahera bwo kw’isi y’iparadizo. Mbega icizigiro c’akaroruhore! Dukwiye gukenguruka cane ico cizigiro kandi tugakorera ya Mana y’ukuri Yehova n’umutima ukunze, we atuma ubuzima budahera bushoboka.
16. Ni ibiki ukwiye kwipfuza gukora uri kumwe n’abandi bantu amamiliyoni?
16 Kw’isi yose, abantu amamiliyoni baremeye n’akamwemwe ubutumire butangwa n’umwanditsi wa Zaburi, uwanditse ati: “Ni muhimbazanye nanje [“Yehova,” NW], dushirane hejuru izina ryiwe.” (Zaburi 34:3) Yehova aragutumira ngo uje muri ayo masinzi y’abariko baramuhimbaza bagenda barongerekana mu mahanga yose.
Ikiganiro c’Isubiramwo
• Yehova ameze gute? Twebwe twungukira gute ku gutahura neza kamere ziwe?
• Dushobora gute gufasha abandi bantu kumenya ukuri kwerekeye Imana?
• Kumenya izina rya Yehova no kurigenderamwo harimwo iki?
[Amafoto ku rup. 14]
Yehova, mu rukundo rwiwe ntangere, ‘azopfundurura igipfunsi ciwe ahaze ukwipfuza kw’ibiriho vyose’