Ihema ryeranda ryo gusengeramwo

Igihe Musa yari ku musozi Sinayi, Yehova yaramubwiye kwubaka ihema ridasanzwe. Iryo hema ni ryo Abisirayeli bari gusengeramwo Yehova. Bari kuza bararyimukana iyo bagiye hose.

Yehova yamubwiye ati: ‘Bwira abantu batange ivyo bashoboye kuronka kugira bikoreshwe mu kwubaka iryo hema.’ Abisirayeli baratanze inzahabu, ifeza, umujumpu, amabuye y’agaciro n’udusharizo. Baratanze n’ubwoya bw’ibikoko, ilino, inshato z’ibikoko n’ibindi bintu vyinshi. Baratanze ibintu vyinshi ku buryo Musa yababwiye ati: ‘Birakwiye! Ntimusubire kuzana ibindi.’

Abantu bazi gukora ibintu bitandukanye barafashije kwubaka iryo hema. Yehova yarabahaye ubwenge bwo gukora ico gikorwa. Bamwe barajisha inyuzi, abandi bakadesa ibitambara. Hari n’ababaza amabuye, abakora ibintu vy’inzahabu n’abakora ibintu vy’imbaho.

Bubatse iryo hema nk’uko nyene Yehova yari yababwiye. Barakoze irido ryiza cane ryatandukanya ibice bibiri vy’iryo hema. Ivyo bice vyitwa Aheranda n’Aheranda cane. Aheranda cane hari isandugu y’isezerano ikozwe mu mbaho z’umunyinya hamwe n’inzahabu. Aheranda hari ikintu c’inzahabu giterekwako amatara. Hariyo n’imeza hamwe n’igicaniro baturirirako imibavu. Mu kigo hari ibesani y’umujumpu hamwe n’igicaniro kinini. Isandugu y’isezerano yaributsa Abisirayeli ko bari baremeye kugamburukira Yehova.

Yehova yacaguye Aroni n’abahungu biwe ngo babe abaherezi kuri iryo hema ryeranda. Ni bo bahitwararika bakongera bakaza barashikanira Yehova ibimazi. Umuherezi mukuru Aroni ni we wenyene yari yemerewe kwinjira Aheranda cane. Yahinjira rimwe mu mwaka agiye gushikana ikimazi c’ibicumuro vyiwe, ivy’umuryango wiwe n’ivy’Abisirayeli bose.

Abisirayeli bahejeje kwubaka iryo hema ryeranda haciye umwaka bavuye mu Misiri. Bari bagiye baronka ahantu ho gusengera Yehova.

Yehova yarerekanye ko yashimye iryo hema mu gushira igicu hejuru yaryo. Igihe cose ico gicu caba kiri hejuru y’iryo hema, Abisirayeli baguma aho bari. Ico gicu kigiye baca bamenya ko hageze ko bimuka. Baca basambura iryo hema, bagakurikira nya gicu.