Nuhumurize abatuntuye

“Uhoraho yandobanuje amavuta . . . ngo [mpumurize] abagandaye bose.”​—YESAYA 61:1, 2.

1, 2. Ni bande dukwiye guhumuriza, kandi kubera iki?

YEHOVA, ya Mana itanga uguhumurizwa kwose, aratwigisha ukuntu twoba abantu bitwararika igihe abandi bashikiwe n’ivyago. Aratwigisha ‘kuremesha abarandutse imitima’ no guhumuriza abagandaye bose (1 Ab’i Tesalonike 5:14). Mu gihe imfashanyo nk’iyo ikenewe, turayironsa abo dufatanije ugusenga. Turagaragariza kandi urukundo abatari mw’ishengero, mbere n’abantu muri kahise batagaragaza ko badukunda na gato.​—Matayo 5:43-48; Ab’i Galatiya 6:10.

² Yezu Kirisitu yarasomye yongera ariyerekezako igikorwa kivugwa mu buhanuzi, mu kugira ati: ‘Impwemu ya Yehova iri kuri jewe, kuko Yehova yandobanuje amavuta ngo mbwire abaciye bugufi ubutumwa bwiza; yantumye gutubika imitima imenetse, . . . guhumuriza abagandaye bose.’ (Yesaya 61:1, 2; Luka 4:16-19). Abakirisu basizwe bo mu gihe ca none bamaze igihe kirekire batahura yuko ico gikorwa na bo nyene kibaraba, kandi n’“izindi ntama” barifatanya na bo muri ico gikorwa banezerewe.​—Yohana 10:16.

3. Igihe abantu babajije ngo “Ni kubera iki Imana ireka ivyago bigashika?”, twobafasha gute?

³ Igihe hateye ivyago hanyuma abantu bakavunika umutima, akenshi babaza bati: “Ni kubera iki Imana ireka hakaba amarushwa?” Bibiliya irishura mu buryo butomoye ico kibazo. Ariko rero, bishobora gufata igihe kugira umuntu atariga Bibiliya atahure iyo nyishu bimwe bishitse. Imfashanyo iratangwa mu bisohokayandikiro vy’Ivyabona vya Yehovaa. Ariko rero, mu ntango vyaragaragaye ko ari impumurizo ku bantu bamwebamwe gukubitiza gusa akajisho muri Bibiliya bakabona icanditswe nka kimwe kiri muri Yesaya 61:1, 2, kubera yuko cerekana icipfuzo Imana ifise c’uko abantu baronka impumurizo.

4. Icabona umwe wo muri Polonye yashoboye gufasha gute umukobwa umwe w’umunyeshure yari yadendebuwe n’umubabaro, kandi ivyo vyabaye bishobora gute kugufasha gusahiriza abandi?

⁴ Abakiri bato, cokimwe n’abakuze, barakeneye guhumurizwa. Hari umuyabaga wo muri Polonye yari adendebuwe n’umubabaro yasavye impanuro umuntu umwe bari bazinanyi. Nya mugenzi, uwo na we akaba yari Icabona ca Yehova, amaze gutohoza abigiranye ubwitonzi, yaramenye yuko uwo mukobwa yari arengewe n’ibibazo be n’ibintu vyinshi yakekeranyako: “Ni kubera iki ibibi vyabaye ndanse? Ni kubera iki abantu bacumukura? Ni kubera iki mutoyi wanje yakongataye acumukura? Ni kubera iki umutima wanje utameze neza? Mw’idini bavuga yuko Imana ari yo ibishaka. Mugabo nimba ari ukwo biri, sinzosubira kuyizera!” Nya Cabona yarasenze Yehova mu gacerere hanyuma avuga ati: “Ndanezerewe no kubona wambajije ivyo bibazo. Ndagerageza kugufasha.” Yamwiganiye yuko na we nyene hari ivyo yakekeranyako akiri umwana, kandi yuko Ivyabona vya Yehova bamufashije. Yasiguye ati: “Naramenye yuko Imana atari yo ituma abantu bacumukura. Irabakunda, ibashakira iciza, kandi vuba izogira amahinduka akomakomeye kw’isi. Indwara, ingorane z’ubusaza be n’urupfu ntibizoba bikiriho, kandi abantu bagamburuka bazobaho ibihe bidahera, aha kuri iyi si nyene.” Yareretse uwo mukobwa Ivyahishuriwe 21:3, 4; Yobu 33:25; Yesaya 35:5-7 be na Yesaya 65:21-25. Hashize umwanya munini baganira, nya mukobwa yaravuze yerekana ko yaruhuriwe bimwe biboneka ati: “Ubu ndamenye ico mbereyeho. Ubona nosubira kuza kukuraba?” Yaramugiriye inyigisho ya Bibiliya kabiri mu ndwi.

Humuriza abandi ukoresheje impumurizo Imana itanga

5. Igihe tugaragaje impuhwe, ni igiki kizotuma abandi bumva bahumurijwe koko?

⁵ Igihe turondera guhumuriza abandi, amajambo y’impuhwe usanga koko abereye. Turihatira kubwira uwo muntu atuntuye biciye mu majambo tuvuga no ku rugero rw’ijwi dukoresha yuko twitwararitse cane ukuntu amerewe. Ivyo umuntu ntabishitsa mu gukoresha amajambo ata co amaze. Bibiliya itubwira yuko ‘biciye ku kwihangana no ku guhumurizwa guheshwa n’ivyanditswe, dushobora kugira icizigiro’ (Abaroma 15:4). Ivyo tuvyitwararitse, turashobora gusigura mu gihe kibereye ico ari co Ubwami bw’Imana, kandi tugashobora kwerekana muri Bibiliya ukuntu buzotorera umuti ingorane za kino gihe. Turashobora mu nyuma guca twerekana igituma ari icizigiro co kwizigirwa. Muri ubwo buryo, tuzoshobora gutanga impumurizo.

6. Dukwiye gufasha abantu gutahura iki kugira ngo bashobore kwungukira bimwe bishitse ku mpumurizo yo mu Vyanditswe?

⁶ Kugira ngo umuntu yungukire bimwe bishitse ku mpumurizo dutanga, arakeneye kumenya ya Mana y’ukuri, kumenya iyo ari yo, no kumenya ko imihango itanga ari iyo kwizigirwa. Igihe turondera gufasha umuntu ataraba umusavyi wa Yehova, vyoba vyiza dusiguye ivyiyumviro bikurikira. (1) Impumurizo dusanga muri Bibiliya iva kuri Yehova, ya Mana y’ukuri. (2) Yehova ni Mushoboravyose, Umuremyi w’ijuru n’isi. Ni Imana y’urukundo, kandi yuzuye ubuntu mvarukundo n’ukuri. (3) Turashobora gukomezwa kugira twihanganire ingorane turamutse twiyegereje Imana mu kwironsa ubumenyi ntagakosa bwo mw’Ijambo ryayo. (4) Bibiliya irimwo ivyanditswe bijanye n’ibigeragezo kanaka abantu batandukanye bahanganye.

7. (a) Ushimitse ku vy’uko impumurizo Imana itanga ‘igwizwa biciye kuri Kirisitu’, ushobora gushika ku ki? (b) Ushobora guhumuriza gute umuntu atahura yuko inyifato yiwe yabaye mbi?

⁷ Hari abahaye indemesho yo mu vy’impwemu abatuntuye basanzwe bamenyereye Bibiliya mu gusoma 2 Ab’i Korinto 1:3-7. Igihe bahasoma, barashimitse kuri aya majambo ngo ‘uguhumurizwa kwacu kwarushirije kugwizwa biciye kuri Kristo’. Ico canditswe hari aho cofasha umuntu gutahura yuko Bibiliya ari isoko ry’impumurizo abwirizwa guha agaciro cane. Kirashobora kandi gutuma yemera n’ibindi biganiro, kumbure mu bindi bihe. Mu gihe umuntu yumva ko ingorane afise zavuye ku bintu bibi yakoze, twoshobora rero kumubwira, tutamucira urubanza, yuko bihumuriza kumenya ivyanditswe muri 1 Yohana 2:1, 2 no muri Zaburi 103:11-14. Muri ubwo buryo, turahumuriza koko abandi dukoresheje impumurizo Imana itanga.

Humuriza abo ubuzima bwabo bwononwa n’ubukazi canke amagume yo mu vy’ubutunzi

8, 9. Abantu bagiriwe ubukazi bashobora guhabwa impumurizo mu buryo bubereye gute?

⁸ Ubuzima bw’abantu amamiliyoni burononwa n’ubukazi, bwaba ari ubukazi bugirwa n’inkozi z’ikibi mu kibano canke ubukazi buterwa n’intambara. Dushobora kubahumuriza gute?

⁹ Abakirisu b’ukuri bararaba neza yuko, haba mu vyo bavuga canke mu vyo bakora, badashigikiye umugwi n’umwe mu ntambara z’iyi si (Yohana 17:16). Mugabo, barakoresha mu buryo bubereye Bibiliya kugira berekane yuko ibintu bibabaza vya kino gihe bitazobandanya ibihe vyose. Barashobora gusoma Zaburi 11:5 kugira berekane ukuntu Yehova abona abantu bakunda ubukazi, canke bagasoma Zaburi 37:1-4 kugira bashire ahabona indemesho Imana itanga yo kutihora ubwacu mugabo yo kuyizigira. Amajambo yo muri Zaburi 72:12-14 arerekana ukuntu umwe Salomo Mukuru ari we Yezu Kirisitu, uwutegeka ubu ari Umwami mw’ijuru, yumva amerewe ku vyerekeye abantu ata co bazira bagirirwa ubukazi.

10. Nimba umaze imyaka n’iyindi wihanganira intambara, ivyanditswe vyatanzwe bishobora kuguhumuriza gute?

¹⁰ Abantu bamwebamwe barihanganiye intambara zikurakuranwa igihe imigwi itavuga rumwe yaniganira gutwara. Bafashe iciyumviro c’uko intambara be n’inkurikizi zayo biri mu bigize ubuzima. Icizigiro conyene babona, ni uko ibintu vyorushiriza kubagendera neza baramutse bahungiye mu kindi gihugu. Ariko abatari bake muri bo babigenza gutyo, ntibigera bererwa, mbere n’ababigerageje barahasize ubuzima. Abashoboye gushika mu kindi gihugu akenshi babona yuko kwabaye gusa ukuva mu ngorane zimwe ukaja mu zindi. Umuntu yoshobora gukoresha Zaburi 146:3-6 kugira afashe abantu nk’abo gushira icizigiro cabo ku kintu co kwizigirwa kiruta ukwimukira mu kindi gihugu. Ubuhanuzi buri muri Matayo 24:3, 7, 14 canke muri 2 Timoteyo 3:1-5 hari aho bwobafasha kubona neza uko ibintu biri koko be n’insobanuro y’ibintu bariko barihanganira, ni ukuvuga bakabona yuko tubayeho mu nsozero y’urunkwekwe rw’ibintu rushaje. Ivyanditswe nka Zaburi 46:1-3, 8, 9 na Yesaya 2:2-4, vyobafasha gutahura yuko hariho koko icizigiro ca kazoza karangwa amahoro.

11. Ni ivyanditswe ibihe vyahumurije umugore umwe wo muri Afirika yo mu Burengero, kandi kubera iki?

¹¹ Igihe hariko haraba intambara idatezura muri Afirika yo mu Burengero, hari umukenyezi yahunze ava i muhira mu gihe hariko hacucagirwa amasasu. Ubuzima bwiwe bwahavuye bwuzura ubwoba, umubabaro be n’ukuvunika umutima. Mu nyuma, mu gihe we n’umuryango wiwe baba mu kindi gihugu, umugabo wiwe yafashe ingingo yo guturira impapuro zemeza umubano wabo, arirukana uwo mugore wiwe kandi yibungenze hamwe n’agahungu kabo k’imyaka cumi, hanyuma aca aba umupatiri. Igihe bamusomera Ab’i Filipi 4:6, 7 na Zaburi 55:22 be n’ibiganiro bishingiye ku Vyanditswe vyo mu Munara w’Inderetsi na Réveillez-vous!, yagiye yaronka impumurizo kandi ubuzima bwiwe buragira intumbero.

12. (a) Ni ugutabarwa ukuhe Ivyanditswe bironsa abamerewe nabi mu vy’ubutunzi? (b) Icabona wo muri Aziya yashoboye gute gufasha umukiriya?

¹² Ugusenyuka kw’ivy’ubutunzi kwaratumye ubuzima bw’abantu amamiliyoni bwononekara. Rimwe na rimwe, ivyo na vyo nyene biterwa n’intambara be n’inkurikizi zayo. Mu bindi bihe na ho, imigambi yo mu vy’intwaro itaranga ubukerebutsi abari ku butegetsi bafashe, umwina wabo be n’ubugunge bwabo vyaramaze amafaranga yose yari ahari maze bituma abantu banyagwa amatungo yabo. Abandi na bo ntibigeze batunga ibintu vyinshi vyo muri iyi si. Abantu nk’abo bose barashobora guhumurizwa no kumenya yuko Imana yemerera ugutabara abayizigira kandi ko isezerana isi igororotse aho abantu bazonezerererwa igikorwa c’amaboko yabo (Zaburi 146:6, 7; Yesaya 65:17, 21-23; 2 Petero 3:13). Igihe Icabona wo mu gihugu kimwe co muri Aziya yumva umukiriya aje kugura ibintu avuga ingene arajwe ishinga n’ukuntu ivy’ubutunzi vyifashe ngaho, yarasiguye yuko ivyariko birashika muri ico gihugu, bisa n’ivyariko bishika hirya no hino kw’isi. Ikiganiro gishingiye kuri Matayo 24:3-14 no kuri Zaburi 37:9-11 bagiranye catumye haba inyigisho ya Bibiliya idahorereza.

13. (a) Igihe abantu bavunywe umutima n’imihango idashitswa, twoshobora gute gukoresha Bibiliya kugira tubafashe? (b) Niba abantu babona yuko ibihe bibi vyerekana ko ata Mana iriho, wogerageza gute kubafasha kuzirikana?

¹³ Igihe abantu bamaze imyaka myinshi bacumukura canke bavunwa umutima n’imihango myinshi idashitswa, boshobora kumera nka ba Bisirayeli mu Misiri, batumvirije “bivuye ku gucika intege” (Kuvayo 6:9, NW). Mu bihe nk’ivyo, vyoba ngirakamaro gushira ahabona uburyo Bibiliya ishobora kubafasha kwihanganira ingorane za kino gihe bikabagendera neza no kwirinda imitego ituma ubuzima bw’abantu benshi bwononekara bitari bikenewe (1 Timoteyo 4:8b). Bamwebamwe boshobora kubona yuko ibihe bibi babayemwo ari ikimenyamenya c’uko ata Mana iriho canke yuko itabitaho. Woshobora kuzirikana ku vyanditswe bibereye kugira ubafashe gutahura yuko Imana yatanze imfashanyo mugabo benshi bakaba batayemeye.​—Yesaya 48:17, 18.

Humuriza abari mu ngorane zitewe n’ibihuhusi be na vya nyamugigima

14, 15. Igihe icago kimwe cari cateye casigamwo imvune abatari bake, Ivyabona vya Yehova berekanye gute ko babitwararika?

¹⁴ Harashobora gutera ivyago bivuye ku gihuhusi, nyamugigima, umuriro canke iturika ry’amabombe. Henshi ushobora gusanga abantu batuntuye. Ni igiki gishobora gukorwa kugira abarusimvye bahumurizwe?

¹⁵ Abantu barakeneye kumenya ko hari umuntu abitaho. Hamaze kuba igitero ca bagaterabwoba mu gihugu kimwe, abenshi basigaranye imvune. Abatari bake muri bo barabuze abo mu miryango yabo, abari batunze umuryango, barabura n’abagenzi. Bamwe baratakaje akazi, abandi benshi na bo bumva ko batagitekaniwe. Ivyabona vya Yehova barashikira abo mu kibano barimwo, bakabereka ko basangiye na bo umubabaro kubera babuze bimwe bikomeye, hanyuma bakababwira amajambo yo kubahumuriza avuye muri Bibiliya. Abenshi barakengurutse cane ukwo kubitwararika.

16. Igihe icago catera mu karere ko muri Salvador, ni kubera iki vyagenze neza cane mu murimo wo mu ndimiro Ivyabona bo muri ako karere bakoze?

¹⁶ Muri Salvador, hari nyamugigima gikomeye cabaye mu 2001 cakurikiwe n’ugusegenyuka kw’ivyondo vyinshi vyahitanye abantu benshi. Umuhungu w’imyaka 25 w’Icabonakazi umwe be na benewabo babiri b’umukobwa uwo muhungu wiwe yari areheje barishwe. Nyina w’uwo muhungu be na nya mukobwa yari arehejwe n’umuhungu wiwe baciye bihutira gukora cane mu murimo wo mu ndimiro. Benshi bababwira yuko abo bapfuye Imana ari yo yari yabatwaye canke yuko Imana ari yo yari yabishatse. Nya Vyabona barasubiyemwo amajambo yo mu Migani 10:22 kugira berekane yuko Imana idashaka ko tugira umubabaro. Barasomye Abaroma 5:12 kugira berekane yuko icaha c’umuntu ari co cazanye urupfu, ariko ko rutavuye ku kugomba kw’Imana. Barerekanye kandi ubutumwa buhumuriza buri muri Zaburi 34:18, Zaburi 37:29, Yesaya 25:8 no mu Vyahishuriwe 21:3, 4. Abantu barumviriza n’umutima ukunze, canecane kubera yuko abo bagore babiri na bo nyene bari babuze abo mu miryango yabo bahitanywe n’ico cago, maze inyigisho nyinshi za Bibiliya ziratanguzwa.

17. Mu bihe vy’ivyago, ni imfashanyo bwoko ki twoshobora gutanga?

¹⁷ Igihe icago giteye, urashobora guhura n’umuntu akeneye imfashanyo y’umubiri yihutirwa. Iyo mfashanyo ishobora kuba irimwo guhamagara umuganga, gufasha uwo muntu gushika ku bitaro, canke kumukorera ikintu ico ari co cose gishoboka kugira aronke ibifungurwa n’uburaro. Mu gihe hatera icago nk’ico mu 1998 mu Butaliyano, hari umumenyeshamakuru yavuze yuko Ivyabona vya Yehova “bakora mu buryo ngirakamaro, bagafasha abamerewe nabi bataravye idini barimwo”. Mu turere tumwetumwe, ibintu vyabuwe biranga imisi y’iherezo bituma abantu bacumukura cane. Muri utwo turere, Ivyabona vya Yehova barashira ahabona ubuhanuzi bwo muri Bibiliya bakongera bagahumuriza abantu bakoresheje amajambo yo muri Bibiliya yemeza yuko Ubwami bw’Imana buzozanira umutekano nyakuri umuryango w’abantu.​—Imigani 1:33; Mika 4:4.

Tanga impumurizo iyo hari uwo mu muryango yapfuye

18-20. Igihe hari uwapfuye mu muryango, ni igiki wovuga canke wokora kugira ngo ubahumurize?

¹⁸ Uko bukeye, abantu amamiliyoni baratuntuzwa n’ukubura uwabo. Woshobora guhura n’abagandaye igihe uriko ugira uruhara mu busuku bwa gikirisu, canke igihe uri mu dukorwa twawe twa misi yose. Ni igiki wovuga canke wokora cobahumuriza?

¹⁹ Uwo muntu yoba adugaraye mu mutima? Inzu yoba yuzuye abantu bo mu ncuti bishwe n’intuntu? Hari aho woba ufise vyinshi wipfuza kuvuga, mugabo ukwiyubara kurahambaye (Umusiguzi 3:1, 7). Kumbure ikintu kibereye ni ukuvuga amajambo yo kubahoza, gusiga igisohokayandikiro gishingiye kuri Bibiliya kibereye (nk’agatabu, ikinyamakuru canke agapapuro k’inkuru nziza), hanyuma ukagaruka haciye imisi mikeyi kugira urabe niba hari iyindi mfashanyo ishobora gutangwa. Mu gihe kibereye, nubasabe ko mwosangira ivyiyumviro bimwebimwe biremesha vyo muri Bibiliya. Ivyo birashobora gutuma asubira kugira umutima utekanye akongera agasubirana (Imigani 16:24; 25:11). Ntushobora kuzura uwo yapfuye, nk’uko Yezu yabigira. Mugabo urashobora kubabwira ico Bibiliya ivuga ku kuntu abapfuye bamerewe, naho ico kitoba ari co gihe c’ukwiyamiriza ivyiyumviro bitari vyo abantu bafise (Zaburi 146:4; Umusiguzi 9:5, 10; Ezekiyeli 18:4). Murashobora gusomera hamwe imihango Bibiliya itanga ijanye n’izuka (Yohana 5:28, 29; Ivyakozwe 24:15). Woshobora kuganira na bo ico ivyo bisobanura, kumbure ukabigira ukoresheje inkuru yo muri Bibiliya yerekeye izuka (Luka 8:49-56; Yohana 11:39-44). Niwerekeze kandi ivyiyumviro kuri kamere za ya Mana y’inyarukundo iduha icizigiro nk’ico (Yobu 14:14, 15; Yohana 3:16). Nusigure ingene izo nyigisho zakugiriye akamaro be n’igituma uzizigira.

²⁰ Gutumira umuntu atuntuye kuza ku Ngoro y’Ubwami vyoshobora kumufasha kumenya abantu bakunda koko bagenzi babo kandi bazi kuremeshanya. Hari umukenyezi wo muri Suwede yasanze ivyo nyene ari vyo yahora arondera mu buzima bwiwe bwose.​—Yohana 13:35; 1 Ab’i Tesalonike 5:11.

21, 22. (a) Dusabwa iki niba dushaka gutanga impumurizo? (b) Ushobora guhumuriza gute umuntu asanzwe azi neza Ivyanditswe?

²¹ Igihe uzi yuko hari umuntu atuntuye, yaba uwo mw’ishengero rya gikirisu canke atari uwo muri ryo, woba rimwe na rimwe wumva utazi ico wovuga canke wokora? Ijambo ry’ikigiriki kenshi rihindurwa ngo “impumurizo” muri Bibiliya, urudome ku rundi risobanura “akamo ko kuza iruhande y’umuntu”. Kugira ube umuntu ahumuriza koko, bisaba ko abatuntuye bashobora kukuronka bitagoranye.​—Imigani 17:17.

²² Bite none niba umuntu ugomba guhumuriza asanzwe azi ico Bibiliya ivuga ku rupfu, ku ncungu no kw’izuka? Kuba umugenzi basangiye ukwizera ahari ubwavyo birashobora guhumuriza. Niba ashaka kuvuga, nube umuntu yumviriza. Ntiwumve yuko ukeneye kuvuga menshi. Nimba ivyanditswe bisomwe, nubifate ko ari amajambo y’Imana akomeza imitima yanyu mwempi. Nuserure ukujijuka gukomeye mwempi mufise ku vy’uko umuhango bitanga ari uw’ukuri. Ugaragaje imbabazi ziva ku Mana ukongera ugasangira n’abatuntuye ukuri kw’agaciro kwo mw’Ijambo ryayo, urashobora kubafasha kuronkera inyiruro be n’inkomezi kuri Yehova, ya ‘Mana itanga uguhumurizwa kwose’.​—2 Ab’i Korinto 1:3.

[Utujambo tw’epfo]

Ubivugako iki?

• Abantu benshi begeka ivyago kuri nde, kandi dushobora kubafasha gute?

• Twokora iki kugira dufashe abandi kwungukira bimwe bishitse ku mpumurizo Bibiliya itanga?

• Ni ibintu ibihe biriko biratera intuntu abantu benshi mu karere iwanyu, kandi ushobora kubahumuriza gute?

[Ifoto ku rup. 23]

Ugusangira n’abandi ubutumwa bw’impumurizo nyakuri mu bihe vy’amakuba

[Abo dukesha ifoto]

Ikambi y’impunzi: UN PHOTO 186811/J. Isaac

[Ifoto ku rup. 24]

Kuba umugenzi ahari ubwavyo birashobora guhumuriza