Niwiheke ku mpwemu y’Imana uko uhangana n’ibihinduka mu buzima

“Wame ugira umwete wo kwiha Imana nk’uwamaze kurama”.—2 TIMOTEYO 2:15.

1. Ni amahinduka ayahe aba intambamyi ku bijanye n’ukumererwa neza kwacu mu vy’impwemu?

ISI idukikije iguma ihindagurika. Turibonera amahinduka atangaje agirwa mu vya siyansi no mu vy’ubuhinga ajana n’itituka rikomeye mu bijanye n’imico runtu. Nk’uko twabirimbuye mu kiganiro c’imbere y’iki, abakirisu bategerezwa kunanira impwemu y’iyi si irwanya Imana. Ariko rero, uko isi ihindagurika, na twebwe turahinduka mu buryo bwinshi. Turava mu bwana tugashika ku kuba abakuze. Twoshobora kuronka amatungo canke tukayatakaza, kugira amagara canke tukayabura, kugira abacu canke tukababura. Amahinduka menshi nk’ayo ntidushobora kuyatangira ngo ntabe, kandi arashobora kuba iyindi ntambamyi ikomeye ku bijanye n’ukumererwa neza kwacu mu vy’impwemu.

2. Ni gute ubuzima bwa Dawidi bwabayemwo amahinduka?

² Ni abantu bake bashikirwa n’amahinduka akomeye cane mu buzima bwabo nk’amwe yashikira Dawidi mwene Isayi. Bukwi na bukwi, Dawidi yaravuye mu rufuri aho yari agahungu k’akungere, aba umuntu wa rurangiranwa akomeye mu gihugu. Mu nyuma, yahavuye aba impunzi, arahigwa buhongo n’umwami w’umunyeshari. Inyuma y’ivyo, Dawidi yarabaye umwami, aba n’intwari mu rugamba. Yarihanganiye inkurikizi zibabaza zatewe n’icaha gikomeye yakoze. Yarashikiwe n’ivyago, haraba n’amacakubiri mu rugo rwiwe. Yararonse amatungo, arasaza hanyuma arashikirwa n’ubumuga bwo mu busaza. Ariko rero, naho habaye amahinduka menshi mu buzima bwiwe, Dawidi yaragaragaje ko yizigira kandi yishimira Yehova be n’impwemu yiwe mu buzima bwiwe bwose. Yaragize umwete wo kwiha “Imana nk’uwamaze kurama”, maze Imana iramuhezagira (2 Timoteyo 2:15). Naho uko ivyacu vyifashe gutandukanye n’uko ivya Dawidi vyari vyifashe, turashobora kugira ico twigiye ku kuntu yavyifashemwo mu bintu vyamushikiye mu buzima. Akarorero kiwe karashobora kudufasha gutahura ukuntu twobandanya kuronka imfashanyo y’impwemu y’Imana uko duhangana n’amahinduka mu buzima.

Ukwicisha bugufi kwa Dawidi ni akarorero keza

3, 4. Dawidi yavuye gute mu rufuri aho yari agahungu k’akungere acika umuntu wa rurangiranwa mu gihugu cose?

³ Dawidi akiri agahungu, ntiyari anahambaye mu muryango wabo. Igihe umumenyeshakazoza Samweli yaza i Betelehemu, se wa Dawidi yamweretse indwi mu bahungu umunani yari afise. Dawidi, umuhungu wiwe w’umuhererezi, yari yasigaye aragiye intama. Yamara, Yehova yari yahisemwo Dawidi kugira ngo abe ari we azoba umwami wa Isirayeli. Dawidi yaratumweko iyo yari ari mu gahinga. Ubukurikira, inkuru ya Bibiliya ivuga iti: “Samweli aca yābīra rya hembe ry’amavuta, ayamusukako bakuru be bamukikije. Kuva uwo musi [im]pwemu [y]’Uhoraho yama [i]za kuri Dawidi akābushūngwe” (1 Samweli 16:12, 13). Dawidi yarihetse kuri iyo mpwemu mu buzima bwiwe bwose.

⁴ Bidatevye, ako gahungu k’akungere kobaye rurangiranwa mu gihugu. Yaratumweko kugira akorere umwami yongere amucurarangire. Yarishe wa murwanantambara Goliyati, ikigatanya cari gikaze cane ku buryo n’ingabo zo muri Isirayeli zimenyereye cane ivy’ukurwana zatinya guhangana na co. Dawidi amaze kugirwa umukuru w’ingabo, yararwanije Abafilisitiya arabanesha. Abanyagihugu baramukunze. Baratunganije indirimbo zo kumuhayagiza. Imbere y’aho, umuhanuzi w’Umwami Sauli ntiyari yavuze gusa ko Dawidi ari “umucuraranzi w’umuhinga” avuza inanga, ariko kandi yari yavuze ko ari n’‘umuhizi w’inkomezi kandi azi kurwana, yitonda mu vyo avuga, akaba n’umuntu w’igikundiro’.—1 Samweli 16:18; 17:23, 24, 45-51; 18:5-7.

5. Ni igiki cari gushobora gutuma Dawidi yishima, kandi tuzi gute ko atabaye umuntu yishima?

⁵ Kuba rurangiranwa, umuntu w’akaranga, uwukiri muto, umuntu amenyereye ivy’ukuvuga, umucuraranzi w’umuhanga, umuhinga mu vya gisirikare, umuntu atoneshwa n’Imana, izo kamere zose biboneka ko Dawidi yari azifise. Iyo ari yo yose muri izo kamere yari gutuma yishima, yamara nta n’imwe muri zo yatumye yishima. Raba ingene Dawidi yishuye Umwami Sauli igihe yamwemerera kumuha umukobwa wiwe ngo amubere umugore. Dawidi abigiranye ukwicisha bugufi kutarimwo uburyarya, yavuze ati: “Mbega jewe, n’inda n’indēsho, n’umuryango wacu, n’inzu ya data ukw iri mu Bisirayeli, noba umukwe w’umwami?” (1 Samweli 18:18). Incabwenge imwe mu kugira ico ivuze kuri uwo murongo, yanditse iti: “Ico Dawidi yashaka kuvuga ni uko, vyaba ivyo yari azi, ikibanza yari afise mu kibano, canke abo yamukako, ata na kimwe cari gutuma avuga yuko akwiriye agateka ko kuba umukwe w’umwami”.

6. Ni kubera iki dukwiye gutsimbataza ukwicisha bugufi?

⁶ Ukwicisha bugufi kwa Dawidi kwari gushingiye ku vy’uko yemera icese yuko Yehova asumba kure n’iyo abantu b’abanyagasembwa mu buryo bwose. Dawidi yaratangajwe n’uko Imana mbere yibuka umuntu (Zaburi 144:3). Dawidi yari azi kandi yuko ubukuru bwose ashobora kuba yari afise yabuheshejwe n’uko Yehova yagaragaje ukwicisha bugufi, araca bugufi kugira amushigikire, amukingire yongere amwitwararike (Zaburi 18:35). Ese ukuntu ari icigwa ciza cane kuri twebwe! Ububangukirwe dufise, ivyo turangura be n’uduteka dufise, ntibikwiye na rimwe gutuma twishira hejuru. Intumwa Paulo yanditse ati: “Kand’ic’ufise utāhawe n’igiki? Ariko namba waragihawe, n’iki gituma wirata, nk’ūtāgihawe?” (1 Ab’i Korinto 4:7). Kugira turonke impwemu yera y’Imana twongere twemerwe na yo, dutegerezwa gutsimbataza ukwicisha bugufi kandi tukakuzigama.—Yakobo 4:6.

“Ntimwīhōrane”

7. Ni akaryo akahe ko kwica Umwami Sauli Dawidi yari aronse?

⁷ Naho izina rya rurangiranwa Dawidi yari afise ritatumye agira ubwibone mu mutima, ryaravyuye ishari rirangwa n’ubwicanyi mu Mwami Sauli, uwo impwemu y’Imana yari yaravuyeko. Naho ata kibi Dawidi yari yarakoze, yarahunze kugira akize ubuzima hanyuma aba mu bugaragwa. Umusi umwe, igihe Umwami Sauli yariko akomeza guhiga Dawidi, yarinjiye mw’isenga atazi ko Dawidi na bagenziwe ari ho banyegeye. Ingabo za Dawidi zahimirije Dawidi guca aboneraho ako karyo yasa n’uko ahawe n’Imana kugira ace yica Sauli. Turashobora kwiha ishusho bari mu mwiza muri iryo senga, bongorera Dawidi ngo: “Uyu ni wa musi Uhoraho yakubgira kw azogabura umwansi wawe mu maboko yawe, ng’uz’umugire uk’ugomba”.—1 Samweli 24:2-6.

8. Ni kubera iki Dawidi yirinze kwihora?

⁸ Dawidi yaranse kugirira nabi Sauli. Kubera ko yari afise ukwizera akaba n’umuntu yihangana, yarabonye ko akwiye kurekera ibintu mu maboko ya Yehova. Umwami amaze kuva muri iryo senga, Dawidi yaramuhamagaye hanyuma amubwira ati: “Uhoraho n’aducire urubanza twe nawe, Uhoraho n’abe ari we azokumpōra; arik’ukuboko kwanje ntikuzogukorako” (1 Samweli 24:12). Naho Dawidi yari azi ko Sauli ari we ari mw’ikosa, ntiyihoye; eka mbere ntiyabwiye nabi Sauli canke ngo amuvugeko ikintu kibi. Mu bindi bihe bitari bike, Dawidi yaririnze kwifatira ibintu mu minwe. Ahubwo, yarihetse kuri Yehova kugira ngo atunganye ibintu.—1 Samweli 25:32-34; 26:10, 11.

9. Ni kubera iki tudakwiye kwihora bishitse tukarwanywa canke tugahamwa?

⁹ Nka kumwe kwa Dawidi, ushobora gusanga uri mu bintu bigoye. Kumbure urarwanywa canke ugahamwa n’abo mwigana, abo mukorana, abo mu muryango wanyu canke abandi mudasangiye ukwizera. Ntiwihore. Niwiheke kuri Yehova, usabe impwemu yera yiwe igufashe. Kumbure abo bantu batizera bazoshima inyifato yawe nziza hanyuma bacike abizera (1 Petero 3:1). Uko biri kwose, numenye udakeka ko Yehova abona ivyawe kandi yuko azogira ico akoze mu gihe ciwe kibereye. Intumwa Paulo yanditse ati: “Abo nkunda, ntimwīhōrane, ariko muhe uburyo uburake bg’Imana: kuko handitswe, ng’Uguhōra n’ukwanje, ni jewe nzobasubiriza mu nkōko, ni k’Uhoraho agize”.—Abaroma 12:19.

‘Mwumvirize ugutozwa indero’

10. Vyagenze gute ngo Dawidi agwe mu caha, kandi yagerageje gupfukapfuka icaha ciwe gute?

¹⁰ Imyaka yarahaciye. Amaherezo Dawidi yarabaye umwami wa rurangiranwa akundwa. Ubuzima bwiwe burangwa ukudahemuka kwibonekeje be n’amazaburi aryoheye ugutwi yanditse ashemeza Yehova, vyohava bituma umuntu aca yiyumvira ko Dawidi yari umuntu atokwigeze agwa mu caha gikomeye. Yamara, yaraguye mu caha gikomeye. Umusi umwe, uwo mwami ari hejuru ku ngoro yiwe, yaritegereje umugore asa n’irirenga yariko yiyuhagira. Yarabaririkije uwo mugore uwo ari we. Dawidi amaze kumenya yuko uwo mugore ari Batisheba, akamenya kandi yuko umugabo wiwe Uriya ari ku rugamba, yaciye amutumako hanyuma bararyamana. Mu nyuma yasanze uwo mugore yasamye imbanyi. Ese ukuntu vyomuteje urubwa hose, ibintu biramutse bigiye ahabona! Mu gihe c’Ivyagezwe vya Musa, ubusambanyi cari icaha gituma umuntu yicwa. Biboneka ko umwami yiyumvira yuko ico caha cari gushobora gupfukapfukwa. Yaciye rero arungika ubutumwa ku ngabo busaba Uriya gusubira i Yeruzalemu. Dawidi yari yizigiye ko Uriya yoraranye na Batisheba, mugabo si ko vyagenze. Dawidi amaze kubona ko imigambi yamutekurukanye, yaciye arungika Uriya ngo asubire ku rugamba, amurungikana icete ashira Yowabu, umukuru w’ingabo. Nya cete casaba ko Uriya ashirwa aho urugamba rukaze kugira yicwe. Yowabu yaragamburutse, Uriya arahava aricwa. Batisheba amaze kwubahiriza ikigandaro nk’uko vyari bisanzwe bigirwa, Dawidi yaciye amucura aba umugore wiwe.—2 Samweli 11:1-27.

11. Ni inkuru iyihe Natani yabwiye Dawidi, kandi Dawidi yavyakiriye gute?

¹¹ Umugambi wa Dawidi wasa n’uwagenze neza naho yari akwiye kumenya yuko ivyo bintu vyose bitari bihishijwe na gato imbere ya Yehova (Abaheburayo 4:13). Amezi yarahaciye, hanyuma umwana aravuka. Inyuma y’aho, Natani umumenyeshakazoza ategetswe n’Imana, yaragiye kwa Dawidi. Uwo mumenyeshakazoza yiganiye umwami inkuru y’umutunzi yari afise intama nyinshi hanyuma afata intama imwe yonyene umworo yari atunze kandi yakunda cane, arayibaga. Iyo nkuru yatumye Dawidi aca abona ko ubutungane bukwiye gukurikizwa, mugabo ntiyaca n’ikanda insobanuro yihishije muri iyo nkuru. Dawidi yaciye acira urubanza rwihuta uwo mutunzi. N’ishavu n’akantu, yabwiye Natani ngo: “Uwakoze ivyo yar’akwiye gupfa”.—2 Samweli 12:1-6.

12. Ni urubanza uruhe Yehova yaciriye Dawidi?

¹² Uwo mumenyeshakazoza yaciye asubizayo ati: “Ereg’uwo muntu ni wewe nyene”. Dawidi yari yiciriye urubanza. Nta gukeka ko uburake bwa Dawidi bwaciye busubirirwa n’ukumaramara bimwe bigera kure be n’agahinda kenshi. Amaze gukubitwa n’inkuba, yarateze ugutwi igihe Natani yariko amushikiriza urubanza Yehova yamuciriye rw’ivyobwirijwe kumushikira. Nta majambo ahumuriza canke yirura yarimwo. Dawidi yari yarasuzuguye ivyo Yehova yavuze mu gukora ikibi. None ntiyari yatumye Uriya yicwa n’inkota y’umwansi? Inkota ntiyovuye mu rugo rwa Dawidi. None ntiyari yaryamanye na muka Uriya mu mpisho? Na we yokorewe ikibi nk’ico nyene, atari mu mpisho, ariko ku mugaragaro.—2 Samweli 12:7-12.

13. Dawidi yavyakiriye gute igihe yatozwa indero na Yehova?

¹³ Ico twoshimira Dawidi, ni uko atahakanye icaha ciwe. Ntiyashavuriye umumenyeshakazoza Natani. Ntiyegetse amakosa ku bandi canke ngo yisigure ku vyo yari yakoze. Igihe Dawidi yariko ahangana n’icaha ciwe, yaremeye kwagirwa n’ikosa, avuga ati: “Nacumuye k’Uhoraho” (2 Samweli 12:13). Zaburi ya 51 irerekana ingene yababajwe n’icaha ciwe be n’urugero ukwigaya kwiwe kwashikanyeko. Yinginze Yehova ati: “Ntunte kure yo mu nyonga zawe, ntunkūreko [im]pwemu [y]awe [y]era”. Yaremera yuko Yehova abigiranye ikigongwe ciwe, atokengereye “umutima umenetse, ujanjaguwe” ku bijanye n’icaha (Zaburi 51:11, 17). Dawidi yarabandanije kwiheka ku mpwemu y’Imana. Naho Yehova atakingiye Dawidi ingaruka zikaze z’icaha yakoze, yaramuhariye.

14. Dukwiye kwakira gute ugutozwa indero na Yehova?

¹⁴ Twese turi abanyagasembwa, kandi twese turacumura (Abaroma 3:23). Rimwe na rimwe, vyoshobora gushika tukagwa mu caha gikomeye nka kumwe kwa Dawidi. Nk’uko sebibondo arangwa urukundo atoza indero umwana wiwe, ni ko na Yehova akosora abarondera kumusukurira. Ariko rero, naho ugutozwa indero ari ngirakamaro, ntivyoroshe kukwemera. Nkako, rimwe na rimwe kuratera “umubabaro” (Abaheburayo 12:6, 11). Yamara, ‘twumvirije inyigisho [canke, “ugutozwa indero”, NW]’, turashobora gusubiza hamwe na Yehova (Imigani 8:33). Kugira ngo twinovore umuhezagiro ubandanya w’impwemu ya Yehova, dutegerezwa kwemera gukosorwa kandi tukagira ico dukoze kugira ngo twemerwe n’Imana.

Ntiwizigire amatungo atari ayo kwizigirwa

15. (a) Abantu bamwebamwe bakoresha amatungo yabo mu buhe buryo? (b) Dawidi yipfuza gukoresha amatungo yiwe gute?

¹⁵ Nta kintu na kimwe cerekena yuko Dawidi yakomoka mu muryango ukomeye canke ko umuryango wiwe wari utunze. Ariko rero, mu gihe c’ubwami bwiwe, Dawidi yararonse amatungo atagira uko angana. Nk’uko ubizi, benshi barabika ahadata amatungo yabo, bakarondera kuyongereza mu buryo burimwo umwina, canke bakayakoresha mu buryo bw’ubwikunzi. Abandi bakoresha amahera yabo kugira ngo bihayagize (Matayo 6:2). Dawidi we si uko yakoresheje amatungo yiwe. Yipfuza gutera iteka Yehova. Dawidi yaraseruriye Natani icipfuzo yari afise co kwubakira Yehova urusengero rwogiyemwo isandugu y’isezerano, ico gihe ikaba yari i Yeruzalemu, “iba mw ihema gusa”. Yehova yarahimbawe n’umugambi Dawidi yari afise, mugabo abicishije kuri Natani yamubwiye yuko urwo rusengero rwokwubatswe na Salomo umuhungu wa Dawidi.—2 Samweli 7:1, 2, 12, 13.

16. Ni imyiteguro iyihe Dawidi yagize ku bijanye n’iyubakwa ry’urusengero?

¹⁶ Dawidi yaregeranije ibikoresho vyokoreshejwe muri iyo poroje ihambaye y’ubwubatsi. Yabwiye Salomo ati: “Niteguriye ingoro y’Uhoraho italanto z’izahabu ibihumbi ijana, n’iz’ifeza ibihumbi igihumbi, niteguriye n’imiringa n’ivyuma bitogerwa, kukw ar’isinzi; kandi niteguye n’ibiti n’amabuye; nawe uze wiyongererekw ibindi”. Mu butunzi bwiwe, yaterereye italanto z’izahabu 3.000 n’italanto z’ifeza 7.000a (1 Ngoma 22:14; 29:3, 4). Ugutanga kwa Dawidi abigiranye inda nziza ntikwarimwo ukwiyerekana, mugabo cari ikintu cerekana ko afise ukwizera be n’uko yibanda kuri Yehova Imana. Mu kwemera icese uwo amatungo yiwe yakomotseko, yabwiye Yehova ati: “Vyose biva kuri wewe, kand’ivyawe akaba ari vyo tuguhayeko” (1 Ngoma 29:14). Umutima w’ugutanga wa Dawidi wamusunikiye gukora ivyo yari ashoboye vyose kugira ngo ateze imbere ugusenga kw’ukuri.

17. Impanuro iri muri 1 Timoteyo 6:17-19 ikora gute ku batunzi no ku bakene?

¹⁷ Muri ubwo buryo nyene, ese natwe twokoresha amatungo yacu mu gukora iciza. Aho gukurikirana uburyo bwo kubaho buranga ugukunda amaronko, ni vyiza ko turondera kwemerwa n’Imana, iyo ikaba ari yo nzira y’ubukerebutsi n’ubuhirwe nyakuri. Paulo yanditse ati: “Wihanize abatunzi bo mu vy’iki gihe, boye kwibona, canke kwishimira ubutunzi butar’ubgo kwishimirwa, ariko bishimire Imana, iduha vyose bisēsekaye, ngo tubinezererwe; kandi bakore iciza, babe abatunzi ku bikorwa vyiza, babe abanyabuntu bakunda gutanga, bībīkire ubutunzi buzoba itanguriro ryiza mu gihe kizoza, kugira ngo bacakire ubu[zima] nyakuri” (1 Timoteyo 6:17-19). Uko ivyacu mu vy’ubutunzi vyoba vyifashe kwose, nimuze twiheke ku mpwemu y’Imana hanyuma dukurikirane ingendo y’ubuzima izotuma tuba “[aba]tunzi mu vy’Imana” (Luka 12:21). Nta kintu gifise agaciro kanini kuruta kugira impagararo yemewe imbere ya Data wa twese munyarukundo wo mw’ijuru.

Niwihe Imana nk’uwamaze kurama

18. Ni mu buhe buryo Dawidi yasigiye akarorero keza abakirisu?

¹⁸ Mu buzima bwiwe bwose, Dawidi yararondeye kwemerwa na Yehova. Yatakamvye mu ruririmbo ati: “Ngirira ikigongwe Mana, ngirira ikigongwe, kuk’ubugingo bganje buronka ubuhungiro muri wewe” (Zaburi 57:1). Ukwizigira Yehova kwiwe ntikwabaye ukw’ubusa. Dawidi yarisaziye, ‘aragera mu zabukuru’ (1 Ngoma 23:1). Naho Dawidi yakoze amakosa akomeye, aribukwa ko ari umwe mu vyabona vy’Imana benshi bagaragaje ukwizera kwibonekeje.—Abaheburayo 11:32.

19. Dushobora gute kwiha Imana nk’abamaze kurama?

¹⁹ Uko uhangana n’ibihinduka mu buzima, niwibuke yuko, nka kumwe nyene Yehova yashigikiye Dawidi, akamukomeza akongera akamukosora, ari ko na wewe ashobora kukugirira. Intumwa Paulo yarahanganye n’amahinduka menshi mu buzima nka kumwe kwa Dawidi. Yamara, na we nyene yagumye ari umwizerwa mu kwiheka ku mpwemu y’Imana. Yanditse ati: “Nshobozwa vyose n’ūmpa inkomezi” (Ab’i Filipi 4:12, 13). Twihetse kuri Yehova, azodufasha turoranirwe. Ashaka ko turoranirwa. Tumuteze ugutwi kandi tukamwiyegereza, azoduha inkomezi zo gukora ivyo agomba. Vyongeye, tubandanije kwiheka ku mpwemu y’Imana, tuzoshobora ‘kwiha Imana nk’abamaze kurama’, ubu no mu bihe bidahera.—2 Timoteyo 2:15.

[Akajambo k’epfo]

Wokwishura gute?

• Twoshobora gute kwirinda ubwibone?

• Ni kubera iki tudakwiye kwihora?

• Dukwiye kubona gute ugutozwa indero?

• Ni kubera iki tudakwiye kwizigira amatungo ariko dukwiye kwizigira Imana?

[Ifoto ku rup. 16, 17]

Dawidi yarihetse ku mpwemu y’Imana yongera ararondera kwemerwa n’Imana. Woba nawe uriko uragira nk’ukwo?

[Ifoto ku rup. 18]

“Vyose biva kuri wewe, kand’ivyawe akaba ari vyo tuguhayeko”