Niwitwararike “Impfuvyi” Ubigiranye Urukundo
1 Yehova ni “se w’impfuvyi.” (Zab. 68:5) Ukuntu yitwararika ineza yazo bigaragarira muri iri bwirizwa yahaye ihanga rya Isirayeli rigira riti: “Ntihaze hagire umupfakazi cank’impfuvyi mucuranguza. Ni mwagira ico mubacuranguzako na gitoya, bakantakambira, sinzobura kwumviriza ugutakamba kwabo.” (Kuv. 22:22, 23) Ivyagezwe vy’Imana vyarimwo n’intunganyo yerekeye gusahiriza mwene abo bantu mu kubaronsa ibintu bakeneye. (Gus. 24:19-21) Mu gihe c’Ubukirisu, abasavyi nyakuri bakeburwa “kurāba impfuvyi n’abapfakazi mu marushwa yabo.” (Yak. 1:27) Dushobora gute kwigana ukuntu Yehova yitwararikana urukundo abakurira mu ngo zirimwo umuvyeyi yirerana abana canke zigizwe n’abadasangiye idini?
2 Ukumenyerezwa mu vy’Impwemu: Nimba uri umuvyeyi yirerana abana canke ukaba wubakanye n’umuntu atizeye, kwigana Bibiliya n’abana bawe udahorereza i muhira vyoshobora kuba urugamba. Mugabo inyigisho ya Bibiliya idahorereza kandi iri n’ico ivuze irakenewe cane nimba ushaka yuko nibakura bazoba abantu bafise uburimbane kandi bahumuye mu vy’impwemu. (Imig. 22:6) Kwama imisi yose muyaga ivyerekeye ibintu vy’impwemu, na vyo nyene birahambaye. (Gus. 6:6-9) Rimwe na rimwe hari aho wokwumva ucitse intege, mugabo ntuhebe. Nuhindukirire Yehova umusabe inkomezi n’uburongozi uko ‘urera abana bawe ubahanura uko Yehova agomba.’—Ef. 6:4.
3 Nimba ukeneye gufashwa mu buryo bunaka mu bijanye n’ukurangura amabanga akwega yo mu Vyanditswe, ivyo ukeneye nubimenyeshe abakurambere. Boshobora kukugira inama ngirakimazi canke bakagusahiriza mu vyo gushinga urutonde wokwama ukurikiza rw’ibikorwa vyo mu vy’impwemu ku bw’urugo rwawe.
4 Ukuntu Abandi Bashobora Gufasha: Mu kinjana ca mbere, Timoteyo yaracitse umusavyi wa Yehova w’umunyamwete naho yari yarerewe mu rugo rugizwe n’abadasangiye idini. Utwigoro turangwa n’umwete twagizwe na nyina be na inakuru mu kumwigisha ivyanditswe vyeranda akiri muto, nta mazinda yuko twagize uruhara ruhambaye muri ivyo. (Ivyak. 16:1, 2; 2 Tim. 1:5; 3:15) Ariko rero, yaranungukiye ku kwifatanya n’abandi Bakirisu, harimwo n’intumwa Paulo, uwavuze ko Timoteyo yari ‘umwana wiwe akunda, mu Mwami.’—1 Kor. 4:17.
5 No muri iki gihe nyene, ese ukuntu biba ngirakamaro igihe abavukanyi n’abavukanyikazi bahumuye mu vy’impwemu bitwararika impfuvyi mw’ishengero babigiranye urukundo! Woba uzi umwe wese uko yitwa? Woba ubaganiriza ku makoraniro ya gikirisu no ku bindi bihe? Batumire mukorane mu busuku bwo mu ndimiro. Kumbure woshobora kuja urabatumira rimwerimwe, bari kumwe n’umuvyeyi abirerana, canke uwizeye mu bavyeyi babo, bakifatanya namwe mu nyigisho mugira mu muryango canke mu ndinganizo mugira z’ivy’ukwiruhura kubereye. Igihe abo bakiri bato bakubona nk’umugenzi wabo, bararushiriza kwigana akarorero kawe no kwemera indemesho ubaha.—Flp. 2:4.
6 Yehova aritwararika cane impfuvyi, kandi arahezagira utwigoro turanga urukundo tugira mu kuzifasha kugira ngo ukuri zikugire ukwazo. Benshi mu bakuriye mu ngo zirimwo umuvyeyi umwe canke zigizwe n’abadasangiye idini, usanga bararonse mwene izo ndemesho, gutyo ubu bakaba bariko basukura badahemuka ari abatsimvyi, abakozi b’ishengero, abakurambere, abacungezi b’ingenzi, abamisiyonari canke abagize umuryango wa Beteli. Ese twese tworondera uburyo bwo ‘kwaguka’ mu rukundo tugaragariza impfuvyi, tukigana Dawe wa twese wo mw’ijuru.—2 Kor. 6:11-13.