Turyohore ubuhanga bwacu mu busuku—Gucira inzira isubirayo

Igituma bihambaye: Igihe turonse umuntu ashimishwa, duca twipfuza kuzosubira kumugendera ku gihe azoba ari muhira kugira ngo tuvomere imbuto z’ukuri tuba twateye. (1 Kor. 3:6) Akenshi ivyo bisaba ko imbere y’uko tugenda, ducira inzira isubirayo mu kumenya igihe twogarukira. Vyongeye, ni vyiza gusiga tubajije ikibazo tuzoganirako tugarutse. Ivyo bizotuma umunyamuhana aturindirana igishika, kandi nimba inyishu y’ico kibazo iboneka mu gisohokayandikiro twamusigiye, azokwipfuza cane kugisoma. Gucira inzira ikiyago kizokurikira biratuma kandi kugira isubirayo vyoroha kubera ko muba mwaramaze guhitamwo ico muganirako, kandi umunyamuhana akaba asanzwe akizi. Igihe dusubiye kubonana na we, twomusigurira ko tugarutse kumwishura ikibazo twasize ubuheruka hanyuma tugaca tuduga kw’ijambo.

Uko twobigira:

Igihe utegura ivyo uvuga mu busuku bw’inzu ku nzu, nutegure kandi ikibazo uzokwishura ugarutse. Ico kibazo gishobora kuba gishingiye ku kiganiro kirimburwa mu gisohokayandikiro uba uriko urashikiriza. Canke naho gishobora kuba cishurwa muri kimwe mu bisohokayandikiro vyacu vyo kwiga, kino ukaba ushobora kukimuha ugarutse.
Mu gusozera ikiyago mwagiranye n’umunyamuhana yashimishijwe, numubwire ko wipfuza kuzosubira kuganira na we maze uce umubwira ikibazo wateguye ko muzoganirako ugarutse. Mu vyibare bimwebimwe usanga abantu bafatiriwe cane kandi ugasanga birabagora kukwemerera ko wogaruka ngo muyage. Nimba ari ukwo bimeze, woshobora kuvuga uti: “Uyu woba ari wo mwanya ukunda kuba uri muhira? [Rindira yishure.] Mu ndwi iza, noshima guca ng’aha gatoyi kugira ngo ndakwishure iki kibazo . . . Ariko ninasanga ufatiriwe, ntuze witinye kubimbwira.”
Nimba wemereye umunyamuhana kuzogaruka ku musi kanaka, ntuyage amasigaracicaro. (Mat. 5:37) Mu gusozera isubirayo, nucire inzira irindi rikurikira.

Muri uku kwezi nugerageze iki kintu:

Igihe utegura ivyo uvuga mu busuku bw’inzu ku nzu, nutegure kandi ikibazo uzokwishura ugarutse. Nubwire ico kibazo abamamaji mwakoranye.