Phedzani Anango Toera Kuthambaruka

“Ndinakupfundzisa mbandikuonera.”​—SAL. 32:8.

MUNATAWIRA TANI?

Ndi pitsandzo pipi pingasi pya m’Bhibhlya pinapangiza kuti Yahova asaona maluso a atumiki ace?

Thangwi yanji tisafunika kuyesera kuona pinthu pyadidi mwa anango?

Tinakwanisa tani kuphedza aphale atsikana peno abale apswa adamala kwene kubatizwa toera kuthambaruka?

1, 2. Kodi Yahova asaona tani atumiki ace pa dziko yapantsi?

ANYAKUBALA angaona anawo mbakasendzeka, kazinji kene asadzuma maluso a anawo. Panango imwe mwaona kale pyenepi. Ana anango asakhala na maluso adidi akuthamanga, anango akuti ndi athunga ali na maluso kakamwe akumenya bola peno masendzekero anango. Mwakukhonda tsalakana maluso awo, anyakubala asacita pyonsene toera kuphedza anawo kuthambaruka kuti akwanise kucita pinthu pyadidi kakamwe.

² Yahova asatsalakanambo kakamwe anace pa dziko yapantsi. Iye asaona atumiki ace a ndzidzi uno ninga “pya upfumi” wa madzindza onsene. (Ageu 2:7) Iwo ndi akufunika kakamwe thangwi ya cikhulupiro cawo na kuperekeka kwawo. Mwandimomwene, panango musaona kuti pakati pa Mboni za Yahova pana anthu a maluso akusiyana-siyana. Abale anango ali na maluso kakamwe akucita nkhani zadidi, mbwenye anango ali na maluso akukhunganya pinthu. Alongo azinji ali na maluso akupfundza pilongero pyakunja na kupiphatisira mu utumiki, mbwenye anango asakwanisa kakamwe kuphedza ale anafuna cibalangazo peno kutsalakana atenda. (Arom. 16:1, 12) Kodi nee tisapereka takhuta thangwi yakucita khundu ya mpingo wakuti uli na Akristu ninga anewa?

3. Ndi mibvundzo ipi inafuna ife kudinga mu nsolo uno?

³ Mbwenye Akristu anango, kuphatanizambo aphale adamala kwene kubatizwa, panango adzati kugumana mbuto yawo m’mpingo. Tinaaphedza tani toera kuthambaruka? Thangwi yanji tisafunika kuwangisira toera kuona pinthu pyadidi mwa iwo, mbatiaona ninga munaaonera Yahova?

YAHOVA ASAONA PINTHU PYADIDI MWA ATUMIKI ACE

4, 5. Kodi lemba ya Atongi 6:11-16 isapangiza tani kuti Yahova asaona maluso a atumiki ace?

⁴ Bhibhlya isapangiza kuti Yahova nee asaona pinthu pyadidi basi mwa atumiki ace, mbwenye asaonambo maluso awo. Mwacitsandzo, mudasankhulwa Gedheoni toera kuombola mbumba ya Mulungu m’manja mwa Amidiyani, panango iye adzudzumika na mafala a anju mudapangwa iye kuti: Yahova “ali na iwe, nyankhondo wa mphambvu.” Gedheoni nee akhali “wa mphambvu,” pontho nee akhaona kuti mbadakwanisa kuombola mbumba ya Mulungu. Iye adzindikira kuti akhali wang’ono. Mbwenye Yahova akhaona Gedheoni munjira yakusiyana kakamwe kupiringana mukhaonekera iye ekhene.​—Lerini Atongi 6:11-16.

⁵ Yahova akhanyindira kuti Gedheoni mbadapulumusa Aisraele thangwi Iye akhadaona kale maluso ace. Mwacitsandzo, anju wa Yahova akhadaona kuti Gedheoni akhapepeta trigu na mphambvu yace yonsene. Pana cinthu cinango cidatundusa anju. Mu ndzidzi wakale, kazinji kene, anyakulima akhabubuda trigu panja toera kumburusa makoko a trigu na mphepo. Mbwenye Gedheoni akhapepeta trigu n’nyumba toera akwanise kubisira Amidiyani. Gedheoni akhali wakucenjera! Mwakukhonda penula, pamaso pa Yahova Gedheoni akhali nyakulima wakucenjera na wandzeru. Inde, Yahova aona maluso a Gedheoni, mbamphatisira.

6, 7. (a) Kodi maonero a Yahova kwa Amosi akhali akusiyana tani na a Aisraele anango? (b) Ninji pinapangiza kuti Amosi nee akhali munthu wakusowa cidziwiso?

⁶ Munjira ibodzi ene, tisaona kuti Yahova adzindikira maluso a mprofeta wace Amosi, maseze azinji akhamuona ninga munthu wakupwazika. Amosi alonga kuti iye akhali nkumbizi wa mabira na nyakulima masambvu​—misapo yakuti ikhaoniwa ninga pyakudya pya atcerengi. Mudasankhulwa Amosi na Yahova toera kusandika madzindza khumi a Israele, Aisraele anango mbadanyerezera kuti iye nee akhali wakuthema.​—Lerini Amosi 7:14, 15.

⁷ Amosi abuluka ku cisa cakutali na nzinda, mbwenye cidziwiso cikhali na iye thangwi ya misambo na atongi a mu ndzidzi wace, capangiza kuti akhadziwa pizinji. Iye akhadziwa mwadidi makhaliro akuipa a mu Israele na a madzindza akunja kubulukira kwa anyamalonda azinji akhadziwana na iye. (Amo. 1:6, 9, 11, 13; 2:8; 6:4-6) Lero, anyakudziwa pya Bhibhlya asalonga kuti Amosi akhali na luso yadidi yakulemba. Iye aphatisira mafala akukhonda nentsa kubvesesa, amphambvu, kulandanisa pinthu, na mafala akuphiphirisa. Inde, cipapo ca Amosi pakutawira nyantsembe Amasiya, capangiza kuti Yahova akhadasankhula munthu wakuthema, pontho mbadakwanisa kuphatisira maluso ace akuti pakutoma nee akhaonekera pakweca.​—Amo. 7:12, 13, 16, 17.

8. (a) Ndi cinyindiro cipi cidapereka Yahova kuna Mambo Dhavidhi? (b) Thangwi yanji mafala anagumanika pa Masalmo 32:8 ndi akuwangisa kwa ale akuti ndi akusowa cinyindiro na maluso?

⁸ Inde, Yahova asaona maluso a m’bodzi na m’bodzi a atumiki ace. Iye apasa cinyindiro Mambo Dhavidhi kuti ndzidzi onsene ‘mbadantsogolera na kumuonera.’ (Lerini Masalmo 32:8.) Kodi musakwanisa kuona kuti pyenepi ndi pyakuwangisa kwa ife? Ngakhale kuti panango nee tiri na cinyindiro, Yahova anakwanisa kutiphedza toera kucita pizinji kupiringana pinanyerezera ife, na kukwanirisa pifuno pyakuti panango nee tikhapidikhira. Ninga mpfundzisi waluso asakwanisa kupfundzisa munthu mbakwanisa kucita cinthu munjira yadidi, Yahova asatipfundzisa toera kuthambaruka na kukwanirisa pifuno pyathu. Yahova anakwanisambo kuphatisira anyakukhulupira andzathu toera kutiphedza kuti tithambaruke. Munjira yanji?

SAKANI KUONA PINTHU PYADIDI MWA ANANGO

9. Tinaphatisira tani uphungu wa Paulu wa ‘kusaka’ pya udidi wa anango?

⁹ Paulu akulumiza Akristu toera ‘kusaka pya udidi’ wa anyakukhulupira andzawo. (Lerini Afilipi 2:3, 4.) Uphungu wa Paulu usabveka kuti tisafunika kuona maluso a anango na kuasimba. Tisabva tani munthu angatisimba thangwi ya kuthambaruka kunapangiza ife? Kazinji kene, pyenepi pisatikulumiza toera kuenda kutsogolo, na kupangiza maluso athu. Munjira ibodzi ene, tingasimba anyakukhulupira andzathu, tisaaphedza toera kukhala akuwanga na kuthambaruka mwauzimu.

10. Makamaka mbani anafuna ciphedzo cathu?

¹⁰ Makamaka mbani anafuna ciphedzo cathu? Mwandimomwene, midzidzi inango, tonsene tisafuna ciphedzo cakupambulika. Mbwenye aphale peno abale adamala kwene kubatizwa, asafunika kuphedzwa toera akwanise kuona kuti asacita khundu ya mpingo. Pyenepi pinaaphedza toera kubvesesa kuti iwo ali na khundu yakufunika pakati pathu. Munjira inango, kukhonda kudzindikira abale anewa, kunapungula cifuno cawo ca kuthambaruka toera kucita pizinji, ninga munalongera Mafala a Mulungu.​—1 Tim. 3:1.

11. (a) Kodi nkulu wa mpingo unango aphedza tani mphale m’bodzi toera kukunda manyadzo? (b) Musapfundzanji kubulukira ku citsandzo ca Julien?

¹¹ Ludovic, nkulu wa mpingo adaphindula kakamwe na citsalakano ninga ceneci pikhakhala iye mphale alonga: “Ndingapangiza citsalakano kuna m’bale, iye asathambaruka mwakucimbiza kakamwe.” M’bodzi wa iwo ndi Julien mphale wakuti akhali na manyadzo kakamwe. M’bale Ludovic alonga: “Nakuti midzidzi inango Julien akhapangiza macitiro a mphwayo, makhaliro ace nee akhali adidi. Mbwenye ndikhaona kuti iye akhali wacilemedzo, pontho akhafuna kakamwe kuphedza anango m’mpingo. Natenepa, mbuto mwakupenula pifuno pyace, ndasaka kuona makhaliro ace adidi, mbadiyesera kumuwangisa.” Mukupita kwa ndzidzi, Julien adzathema toera kutumikira ninga ntumiki wakutumikira, cincino iye ndi mpainiya wa ndzidzi onsene.

APHEDZENI TOERA ATHAMBARUKE

12. Ndi n’khaliro upi wakufunika kakamwe toera kuphedza munthu kuti athambaruke? Perekani citsandzo.

¹² Khala tisafuna kuphedza anango toera kuthambaruka, tisafunika kukhala na luso yakudzindikira mwadidi. Ninga pidaona ife mu citsandzo ca Julien, tisafunika kuona pizinji kupiringana madodo a munthu, natenepa tinakwanisa kudzindikira makhaliro ace adidi na maluso ace akuti anakwanisa kukuliswa. Yezu akhaona mpostolo Pedhro munjira ineyi. Ngakhale kuti midzidzi inango Pedhro akhaoneka ninga munthu wakupenula, Yezu alonga mwanyapantsi kuti iye mbadakhala wakuwanga ninga mwala.​—Jwau 1:42.

13, 14. (a) Kodi Barnabe apangiza tani luso yakudzindikira pakutsalakana Marko? (b) Kodi m’bale unango aphindula tani na ciphedzo ninga cidatambira Marko? (Onani cithundzithundzi cakutoma.)

¹³ Barnabe apangiza makhaliro mabodzi ene pakutsalakana Jwau, wakuti mu Ciroma akhacemerwa Marko. (Mach. 12:25) Paulendo wakutoma wa Paulu na Barnabe ninga amisionaryo, Marko akhali ninga “mphedzi wawo,” panango akhali na basa yakutsalakana pyakufuna pyawo. Mbwenye pidafika iwo ku Pamfilya, mwakukhonda dikhira, Marko abwerera pyace. Iwo aenda okhene, mbapita na njira yakuti ikhadziwika ninga yakugopswa thangwi ya mapanga. (Mach. 13:5, 13) Barnabe adzindikira madodo a Marko, mukupita kwa ndzidzi, asaka kumpasa mwai unango toera kumpfundzisa. (Mach. 15:37-39) Pyenepi pyaphedza Marko toera kukhala ntumiki wakukola wa Yahova. Mwakudzumisa, Marko akhali ku Roma pabodzi na Paulu wakuti akhali nkaidi. Marko apereka nanthu mwanyikiro kwa Akristu a ku mpingo wa ku Kolose, pontho Paulu asimba kakamwe Marko. (Akol. 4:10) Nyerezerani kukomerwa kudakhala na Barnabe, mudaphemba Paulu ciphedzo ca Marko!​—2 Tim. 4:11.

¹⁴ Alexandre nkulu wa mpingo wakuti akhazikiswa cincino asakumbuka kuti aphindula kakamwe na ciphedzo ca m’bale unango: “Pikhakhala ine, mphale, nee ndikhakwanisa kucita phembero patsogolo pa anthu azinji. Nkulu wa mpingo m’bodzi andipangiza kuti ndinakhunganyika tani, pontho ndinakhala tani wakusudzuka. Mbuto mwakukhonda kundiphemba pontho toera kucita phembero, iye andipasa miyai mizinji toera kucita phembero mwakubwereza-bweza pa misonkhano toera kuenda m’basa ya m’munda. Mukupita kwa ndzidzi, ndadzakhala na cinyindiro cakukwana.”

15. Kodi Paulu apangiza tani kupereka takhuta kuna abaleace?

¹⁵ Tingaona makhaliro adidi a Akristu andzathu, kodi tisakwanisa kulonga nawo kuti tisapasa ntengo kakamwe makhaliro awo adidi? Pa Aroma kapitulu 16, Paulu asimba anyakukhulupira andzace akupiringana 20 thangwi ya makhaliro awo adidi akuti aacitisa kukhala akufunika kakamwe kwa iye. (Arom. 16:3-7, 13) Mwacitsandzo, Paulu adzindikira kuti Androniko na Julya akhatumikira Kristu mu ndzidzi uzinji kupiringana iye, mbagomezera kupirira kwawo Kwacikristu. Paulu asimbambo kakamwe mai wace Rufo, panango akhakumbuka pya citsalakano caufuni cidacitirwa iye pakutoma.

16. Kodi kusimba aphale na atsikana kunabweresa maphindu anji?

¹⁶ Pasaoneka maphindu adidi kakamwe tingasimba na ntima onsene. Onani citsandzo ca Rico, mphale wa ku Fransa wakuti akhali wakufewa manungo thangwi pai wace nee akhali Mboni, pontho apingiza Rico toera akhonde kubatizwa. Rico anyerezera kuti akhafunika kudikhira mpaka kukhala na thunga yakukwana toera kutumikira Yahova. Iye akhanentsekambo kakamwe thangwi akhathimbana na kusingirirwa kuxikola. Frédéric, nkulu wa mpingo adaphembwa toera kupfundza Bhibhlya na Rico alonga: “Ndasimba Rico thangwi mipingizo ineyi ikhapangiza kuti iye akhali na cipapo cakukwana toera kupangiza cikhulupiro cace.” Mafala anewa akusimba awangisa Rico toera kupitiriza kupangiza citsandzo cadidi, pontho amphedza toera kukhala na uxamwali na pai wace. Pakumalisa, Rico abatizwa na pyaka 12 pyakubalwa.

17. (a) Tinaphedza tani abale athu toera kuenda kutsogolo? (b) Kodi Misionaryo unango apangiza tani citsalakano cace kwa abale aciphale, na ndi maphindu api adaoneka?

¹⁷ Ndzidzi onsene unasimba ife basa idacitwa mwadidi, peno kuwangisira kunaona ife, tisapasa mphambvu anyakukhulupira andzathu toera kutumikira Yahova mwakukwana. Mulongo Sylvie,a wakuti asatumikira ku Beteli ya Fransa mu pyaka pizinji, alonga kuti alongo anakwanisa kusimba abale. Iye alonga kuti akazi anakwanisa kusimba makhundu akusiyana-siyana, na kuwangisira kunaona iwo mwa abale. Natenepa, “mafala awo akuwangisa anakwanisa kuthimizira maonero akusimba anaperekwa na abale aluso.” Iye athimiza: “Kwa ine, kusimba ndi basa yakuti ndisafunika kuicita.” (Mis. 3:27) Jérôme, ndi misionaryo anatumikira ku Guiana Francesa, iye aphedza aphale azinji mbakhala akuthema toera kupita m’basa ya umisionaryo. Iye alonga: “Ndingasimba aphale thangwi ya ntsonga zakupambulika zinapangiza iwo mu utumiki wawo, peno kulonga mafala akuwangisa, cinyindiro cawo cisathimizirika. Ninga maphindu, maluso awo asakula.”

18. Thangwi yanji kuphata basa na aphale ndi kwakuphindulisa?

¹⁸ Tinakwanisambo kuphedza anyakukhulupira andzathu toera kuthambaruka mwauzimu mu kuphata basa pabodzi na iwo. Nkulu wa mpingo anakwanisa kuphemba m’bale waciphale wakuti asadziwa kuphatisira mwadidi ntcini wandzeru toera kudhinda mphangwa zingasi zinagumanika mu site jw.org zakuti zinakwanisa kuwangisa anyakugwesera akuti nkhabe ntcini wandzeru. Khala muli na basa toera kucita pa Nyumba ya Umambo, ndiye tani kucemera m’bale waciphale toera kuphata basa pabodzi na imwe? Pyenepi pinakupasani miyai toera kuona aphale, kuasimba, na kuona maphindu a pyenepi.​—Mis. 15:23.

CITANI PINTHU MBAMUYEREZERANI PYA NTSOGOLO

19, 20. Thangwi yanji tisafunika kuphedza anango toera kuthambaruka?

¹⁹ Mudasankhulwa Yoswa na Yahova toera kutsogolera Aisraele, Yahova apanga Mose: “Umuwangise mbumpasa mphambvu.” (Lerini Deuteronomyo 3:28.) Anthu azinji kakamwe ali kupita m’mpingo Wacikristu. Kusiyapo akulu a mpingo, Akristu onsene akuti ali na maluso anakwanisa kuphedza aphale Acikristu na anthu apswa toera kuthambaruka. Natenepa, anthu azinji anadzapita m’basa ya ndzidzi onsene, pontho, anthu azinji anadzakhala ‘akuthema toera kupfundzisa anango.’​—2 Tim. 2:2.

²⁰ Mwakukhonda tsalakana khala mpingo wathu ndi ukulu, peno tiri pa nsoka ung’ono wakuti ukutoma kwene kukula, tendeni ticite pinthu mbatinyerezera pya ntsogolo. Cinthu cakufunika kakamwe ndi kusangizira Yahova, wakuti ndzidzi onsene asaona pinthu pyadidi mwa atumiki ace.