Nsonkhano Wa Gawo Wa Mboni Za Yahova Wa 2008
1 Mpostolo Paulu acenjeza Akristu Acihebere kuti agumanyikane towera awangisane unango na zace “makamaka” pakuona kuti ntsiku iri kufika duzi. (Aheb. 10:24, 25) Pana pinthu pizinji pinapangiza kuti “ntsiku” ineyi idalonga Paulu iri duzi kakamwe! Natenepa, ife tisadikhira miyai ya kugumanyikana na abale pabodzi na alongo athu towera titambire cipfunziso cauzimu cakuti cingakwanise kutitsogolera nkati mwa ‘ntsiku zino zakumalisa’ na zakugopswa. (2 Tim. 3:1) Tinadzakhala na mwai unoyu pa nsonkhano wa gawo unafuna kudza wa 2008.
2 Gumanikani Pa Ntsiku Zonsene Zitatu: Ife tisakuwangisani kuti mugumanike pa ntsiku zonsene zitatu za nsonkhano wa gawo. Mu kukhonda ‘kuchalira misonkhano yathu,’ ife nee tinadzaluza cakudya cauzimu cakupasa umaso tayu. (Aheb. 10:25) Tomani kukhunganyika mwakukhonda dembuka. Mungakwanise kudziwisa mwanyapantsi patrau wanu towera akhale na ndzidzi wakucita masasanyiro onsene akufunika. Khala ananu anadzagumanika kuti aciri kuenda ku xikola mu ndzidzi wa nsonkhano wanu wa gawo, dziwisani apfunzisi awo pya pyakufuna pyanu. Apangeni kuti nsonkhano wa gawo usacita khundu ya kulambira kwanu kwa ndzidzi onsene. Imwe mungakwanise kukhala na cinyindiro cakuti Yahova anapasa nkhombo kuwangisira kwanu towera kuikha pifuno pya Umambo pa mbuto yakutoma.—Mat. 6:33.
3 Phedzani Anango Towera Agumanike: Paulu aphembambo abale ace kuti ‘alangane [peno anyerezerane unango na nzace].’ (Aheb. 10:24) Kodi abale na alongo a mu nsoka wanu wa Pfunziro ya Bukhu ya Mpingo asafuna ciphedzo towera agumanike pa nsonkhano wa gawo? Kodi mungakwanise kuphedza anyakupfunza anu a Biblya towera agumanikembo pa nsonkhano wa gawo, ngakhale kuti anakwanisa kugumanika pa ntsiku ibodzi basi? Pa kudziwisa acibale anu akukhonda khulupira pya nsonkhano wanu wa gawo, aphembenimbo kuti aende pabodzi na imwe. Kuwangisira kwanu kwa kufuna kungakwanise kubweresa nkhombo zakukhonda dikhirika.
4 Kusaka Kudziwa: Piaka pyonsene ofesi ya filiali isatambira mitokodzi mizinji kakamwe ya kufuna kudziwa kuti misonkhano ya gawo inacitwa lini na kupi. Izinji ya mitokodzi ineyi isabulukira kwa abale na alongo akuti atambira kale mphangwa zenezi. Mbamusati kumenya ntokodzi ku ofesi ya filiali, tiri kuphemba kuti pakutoma mudinge mphangwa zinagumanika mu A Sentinela ya 1.° de Março de 2008.
5 Khala munthu unango m’mpingo asafuna ciphedzo ca kugumana mbuto yakufikira, Komiti Yakuyang’anira Basa isafunika kudinga khala m’mwazi mphangwa unoyu athema kuphemba mbuto peno nkhabe. Ale akuti nkhabe thema asafunika kucita masasanyiro awo ene towera agumane mbuto yakufikira, kuphataniza akubuluswa m’mpingo.—1 Akor. 5:11.
6 Ninga munthu pa ekha, banja, peno mpingo, tomani kucita masasanyiro akugumanika pa nsonkhano mwakukhonda dembuka. Mwakubverana na makhaliro a pacisa, mpingo ubodzi na ubodzi, banja, peno m’mwazi mphangwa asafunika kunyerezera mwacidikhodikho m’phembero pinthu pyakuti pingakwanise kucitwa towera kukhonda kuluza nsonkhano. Abale anango angakwanise kutoma kukoya kobiri pang’ono pa nthanda ibodzi na ibodzi towera akwanise kulipa miotokala. Mipingo ingakwanisembo kucita masasanyiro towera kulipa maxibombo peno motokala towera kukwata abale kuenda ku nsonkhano. Anango angakwanise kubverana towera kufamba pabodzi kuenda ku nsonkhano m’misoka ya banja, mukutowerera citsanzo ca anzakazi akale a Yahova.—Luka 2:41-44.
7 Mabasa Adidi: Kubvera matongero a Yahova a kugumanyikana pabodzi towera kulambira ndi ‘udidi kwa ife.’ Cakufunika kakamwe, kubvera kusatipasa miyai ya kulemedza dzina ya Yahova. (Iza. 48:17) ‘Mabasa athu adidi asaoneka’ kwa anthu azinji pa misonkhano ya gawo, na anango akulumizika kulonga mabvero awo. (1 Tim. 5:25) Mu nzinda ubodzi unacitirwa misonkhano yathu m’piaka pizinji, ntsogoleri unango wa hotel alonga: “Anthu azinji mu nzinda asalonga pya Mboni za Yahova na kuti misonkhano yawo isabvekanji kwa ife. Ife tisadziwa kuti anthu anu acenesa tani centro cívico na ife taona pikhacenesa imwe mbuto ikulu yakuikhira miotokala. Ndi pyakukomeresa kukhala na anthu anu nkati mwa ndzidzi wathu wa malimwe. Tiri kudikhira kuti uxamwali wathu unapitiriza m’piaka pyakutowerera ipi.” Pakumala kulonga pya nyatwa zinathimbana na misoka na anthu anango anatsanzayisa anzawo, ntsogoleri wa hotel alonga pya nzimu wa cibverano na kupirira kudapangizwa na abale athu nkati mwa ntsiku zidakhala iwo pa hotel. Iye alonga: “Ife tisafuna kuti alendo athu onsene akhale ninga Mboni za Yahova!” Makhaliro a abale athu adacitisa kuti pyenepi pilongwe na anango mazinji akulandana na anewa mwandimomwene asakomeresa ntima wa Mulungu wathu, Yahova!
8 Yezu alonga kuti umaso wathu usanyindira kubvera “mafala onsene anabuluka n’kanwa mwa Mulungu.” (Mat. 4:4) Pa misonkhano yathu ya gawo ya caka na caka, Yahova asatipasa ‘na kweru [peno mu ndzidzi wakuthema] phoso [yauzimu],’ yakukhunganywa na “mbandazi wakukhulupirika na wanzeru.” (Mat. 24:45, Mphangwa Zadidi) Basa izinji yacitwa towera kukhunganya na kucita phwando ineyi yauzimu. Tendeni tipangize kupereka kwathu takhuta ku masasanyiro akufuna a Yahova mu kugumanika na kubvesera mwacidikhodikho makhundu onsene a nsonkhano .
[Study Questions]
1. (a) Thangwi yanji uphungu wa Paulu kwa Akristu Acihebere ndi wakufunika kakamwe lero? (Lerini Ahebere 10:24, 25.) (b) Kodi ndi mwai upi unafuna kudzakhala na ife towera kuphatisira uphungu wa Paulu?
2. (a) Thangwi yanji ndi pyakufunika kugumanika pa ntsiku zonsene zitatu za nsonkhano wa gawo? (b) Kodi tinakwanisa tani kutoma kukhunganyika towera tigumanike pa nsonkhano unoyu?
3. Kodi ndi mu njira zipi tingakwanise kupangiza citsalakano kwa anango?
4. Kodi tinakwanisa tani kudziwa mphangwa zakulonga pya ntsiku na mbuto ya misonkhano ya gawo?
5. Kodi ndi masasanyiro api anacitwa towera kuphedza munthu wakuti panango asafuna ciphedzo cakugumana mbuto yakufikira?
6. Kodi tisafunika kucitanji towera tigumanike pa nsonkhano?
7. (a) Kodi tingakwanise kulemedza Yahova mu njira zipi pa misonkhano yathu ya gawo? (b) Thangwi ya makhaliro adidi a abale athu, kodi ndi ninji pidalongwa na ntsogoleri wa hotel?
8. Kodi Mateo 4:4 asagomezera tani kufunika kwa kubvesera mwacidikhodikho ku makhundu onsene a nsonkhano ?
[Caption on page 3]
Ndzidzi Wa Ndandanda:
Cixanu na Sabudu
8:20 - 15:55
Dimingu
8:20 - 15:00