Obwenge bw’e Ordinatere​—Ka Guba Mugisho Erhi Buheherere?—​Bici Ebibliya Edesire?

Omu nsiku zigezire, abarhegesi b’igulu, abasoma eby’esiyanse, n’eby’eteknoloji baganirire obuhashe bunene bw’obwenge bw’e ordinatere (intelligence artificielle). Baganirire obulagirire bwabo, cikone kandi bwanakolesibwa kubi.

• “Obwenge bw’e ordinatere (intelligence artificielle) eri teknoloji egwerhe obuhashe bunene ene, yananarhabala okushanja akalamo k’abantu . . . Mw’ako kasanzi ko n’ako, obwenge bw’e ordinatere (intelligence artificielle) bunarhume abantu barhaba omu murhûla n’omu bulanzi, na kandi bunarhume ehaki y’abantu n’ebintu bibayerekire birhakengwa, n’oko kunarhume barhalangalira n’okuba n’obuyemere omu njira y’okurhegeka.”​—Kamala Harris, vice président w’e États-Unis, Nsiku 4/5/2023.

• “Ciru akaba obwenge bw’e ordinatere (intelligence artificielle) bunarhabale okubiyerekire eby’okubukwa, omu zindi njira bwananarhulerhera amazibu g’amagala, ag’omubiri n’ag’ekandalala.”​—Eyo myanzi yayandikagwa n’ecigusho ca badoktere n’abashibirira eby’amagala b’omu bihugo biri lubero cilongozibwa na Dr. Frederik Federspiel, omu mwanzi gwahânagwa omu Nsiku 9/5/2023, omu BMJ Global Health.a

• “Abantu bakola bakakolesa obwenge bw’e ordinatere (intelligence artificielle) lyo bayaIiza emyanzi y’obunywesi. Hano hofi-hofi, bwanarhuma abantu baheza amakazi gabo. Bantu baguma na baguma bakola omu by’eteknoloji bayobohire bwenene oku omu mango gayisha obo bwenge bw’e ordinatere bwalerhera abantu amazibu.”​—The New York Times, Lusiku 1/5/2023.

Omu nsiku ziyishire lyo rhwamanya erhi obwenge bw’e ordinatere buli bwakolesibwa omu kujira ebintu binja erhi bibi. Bici Ebibliya edesire?

Bulya gurhi obushiru bwa bene bantu burhali bwalerha obulanzi?

Ebibliya eyerekine oku bene bantu barhakayerekana n’obwalagale oku amajambere bali bajira omu by’eteknoloji ganalerha amalehe minja gone.

1. 1. Ciru n’amango bene bantu bagwerhe ebirhumire binja bibashumize okujira kantu kalebe, barhakabona embere z’akasanzi amalehe mabi g’ebijiro byabo.

   • “Hali enjira ebonekana nnungêdu, ebulizinda erhi yahêka ekuzimu [ebwa lufû].”​—Emigani 14:12.

2. 2. Omuntu arhakaba n’obuhashe boshi-boshi lugenda oku abandi bakolesa amalehe g’omukolo gwage.

   • “Ntasîma bankwirize omukolo nakozire hanola igulu, omukolo ndekîre omwana wayishiyima omu byani. Caba mushâna, ndi omanyire erhi ayishibà murhimanya erhi musirhe? Ye wanayishiyima omu mirimo yani yoshi, muli ebîra byajâgamwo entûbano n’oburhimanya bw’obuzine bwani bwoshi.”​—Omuhanûzi 2:18, 19.

Ebyo byoshi biyerekine n’obwalagale oku rhulagirire oku bulongozi bw’Omulemi wirhu.

Bici rhwakalangalira?

Omulemi wirhu alaganyize oku arhakaleka ciru n’ehitya bene bantu erhi eteknoloji bajijire eshereze igulu erhi abantu.

• ‘Igulu lyohe lyayorha lihaba.’​—Omuhanûzi 1:4, Mashi Bible.

• “Abashinganyanya bo balya igulu, bo banalibêrakwo ensiku n’amango.”​—Ennanga 37:29.

Kugerera Ebibliya, Omulemi wirhu anarhuhe obulongozi bwayish’irhurhabala rhube n’omurhûla n’obulanzi omu mango gayisha. Ly’oyiga binji lugenda ebi Ebibliya edesire, osome omwanzi gudesire “Kuko Muongozo Wenye Kutumainika Wenye Unaweza Kutusaidia Kuwa na Maisha ya Muzuri Wakati Wenye Kuja?” na “Tumaini Bora la Wakati Ujao.”