Betsera Vamwe Kuti Vazvibetsere Vamene
1 Jehovha anopikira kutidzidzisa zvatinofanira kuziva. Iye anotivimbisa paPisarema 32:8: “Ndichakudzidzisa nokukurayira nzira yaunofanira kufamba nayo; ndichakupa njere neziso rangu, riri pamusoro pako.” Iyi vimbiso ndeyebetsero huru kwatiri. Nenzira isati iri youdyire, tinoda kuratidza vamwe kuzvibatsira kwavanogona kuita kupfurikidza nokuteerera zano rokuchenjera rinobva muBhaibheri. (Isa. 48:17) Mukati maSeptember tinogona kuita ikoku kupfurikidza nokugovera bhuku raKurarama Nokusingaperi. Mukuita mharidzo dzedu, pane nzira dzakasiyana-siyana dzatinogona kuratidza nadzo ukoshi hunoshanda hweBhaibheri.
2 Nemhaka yokupararira kwezvinetso zveroorano nhasi, ungasarudza kuratidza uyu mufungo unobva mubhuku ra“Kurarama Nokusingaperi”:
◼ “Vanhu vakawanda zvikurusa vandakataura navo vanonetseka zvikuru pamusoro pewedzero huru mukushayikwa kwomufaro muroorano uye chatanuro. Munorangarira sei pamusoro peichi chinetso? [Bvumira mhinduro.] Vakawanda vakakundikana kuziva zvisakiso zvikuru. Kana vakaita nhamburiko yechokwadi, varoorani havasati vachizotongogona kuchengetedza bedzi roorano yavo asi ivo vanogona kuwanawo mufarwa wechokwadi. Chinhu chinokosha kurubudiriro chiri mukushandisa zano rinowanika muBhaibheri.” Rava VaEfeso 5:28, 29, 33. Tendeukira kupeji 243, kurukurai ndima 16 ne17, uye ipapo govera bhuku racho.
3 Vana vanoda nguva yakanaka uye rovedzo inobva kuvabereki vavo. Mukuratidzira bhuku ra“Kurarama Nokusingaperi”, ungagona kuti:
◼ “Tose zvedu tinonetseka pamusoro pegarikano yeramangwana ravaduku vedu. Mumurangariro wenyu, ndeipi iri nzira yakanakisisa iyo vabereki vanogona kubetsera nayo vana vavo kuwana ramangwana rakachengeteka? [Bvumira mhinduro.] Teererai iri zano rinobva muchirevo cheBhaibheri chakanyorwa anenge makore 3 000 akapfuura. [Rava Zvirevo 22:6.] Nepo vana vedu vachigona kubetserwa zvikuru kwazvo nomurayiridzo wavanogamuchira muchikoro, rovedzo yavo inokosha zvikurusa inogoverwa pamusha navabereki vavo. Kunoda nguva, ngwariro, uye rudo, asi kwakasanokodzera nhamburiko yacho.” Tendeukira kupeji 245, kurukurai ndima 20 ne21, uye ipapo tsanangura mashandisirwe anogona kuitwa bhuku racho sehwaro hwefundo yemhuri yeBhaibheri.
4 Ungashuva kugovera bhuku ra“Kurarama Nokusingaperi” kupfurikidza nokuratidza nzira iyo pasi richava nayo paradhiso:
◼ “Ndine chokwadi chokuti munoitira hanya pamusoro pokuti upenyu hwenyu huchava hwakaita sei mune ramangwana. Mumunyengetero waShe, Jesu akatidzidzisa kunyengeterera kuti kuda kwaMwari kuitwe pasi pano sezvakunoitwa mudenga. Pasi richava rakaita sei apo ikoko kunoitika? [Bvumira mhinduro.] Heunoi mufananidzo womunyori wemifananidzo wenyika yeparadhiso. [Ratidza mufananidzo uri pamapeji 12 ne13. Ipapo rava Isaya 11:6-9, inobatanidzwa mundima 12.] Hakwaizova kwakaisvonaka kurarama munyika yakadaro here? Iri bhuku richakuratidzai mararamire ayo imi nemhuri yenyu munogona kuita muparadhiso yakaita seiyi.”
5 Kugadzirira mharidzo yako pachine nguva mberi chinhu chinokosha mukusarudza kubudirira kwako pasuo. Usati wagogodza, iva nechokwadi chokuti une chimwe chinhu chakananga chokutaura pamusoro pomufungo wapaMagwaro. Uyewo, rangarira tsinhiro pfupi pamusoro porutivi rwunofadza rwemagazini kana kuti turakiti zvaunoronga kugovera kana bhuku risina kugamuchirwa. Shandisa mukana uri wose waunawo kudyara mbeu dzezvokwadi yoUmambo mukati maSeptember. (Mup. 11:6) Uchava uchibetsera vamwe kuwana betsero idzo dzichagara nokusingaperi.