Mueshi wa 7

Bioso bibakuile Yesu na bibakitshine, mpaa na bilengieleshi, bibaadi abileesha bi binangu bia Nshaye na bi’abipushaa mu mushindo upuidikie. (Yo. 14:9) Bilengieleshi bia Yesu bi kuitulongiesha kinyi? Yesu na Nshaye mbetufule ngofu. Pabaadi pano pa nsenga, Yesu baadi muleshe’shi e na lusa na kifulo bua bantu ngofu, pa baadi mufubishe bukome buaye bua kukita bilengieleeshi, bua kukuasha baaba booso babaadi abakiengie. Dingi efuku, bana balume babidi ba mpofu babaadi abeele misaase ya ku muisendela bua’shi ebakuashe. (Mat. 20:30-34) Lamiina’shi Yesu “bebafuidiile lusa” na aye nkuibapaasha. Kino kishima kia mu kina Greke kiabadi baluule bu ‘kuibafuila lusa,’ akilesha lusa lukata alumuenekaa mu bikitshiino kui muntu. Luno lusa lukata, aluleesha kifulo kikata, nnaakio kibaadi kitakule Yesu buadia kudiisha babaadi na nsala na kupaasha babaadi na maladi a nsudi. (Mat. 15:32; Mak. 1:41) Tui balombene kushinkamisha’shi Yehowa, Efile Mukulu “shaa lusa,” na Muana aaye mbetufule ngofu, na abapushaa bi bubi p’atukiengie. (Luk. 1:78; 1 Mp. 5:7, Kilombeeno Kipya 2014) Yehowa na Muana aaye Yesu, be kudi bua kukatusha nkalakashi yooso i mui bantu! w23.04 3 ¶4-5

Tui balombene kuikitshisha na muetu mooso bua kupela kubadika, sunga kuteemesha mianda i bubi yabakuete kupalakasha mu uno ndumbuluilo a Satana. Tui balombene kuusha mianda i buwa mu binangu bietu pa kubadika na kuilongiela Bible. Kuendanga mu bisangilo na kukitanga mudimo wa bulungudi, nbilombene kukaluila binangu bietu. Na dingi, Yehowa etulaa’shi ta mulombene kuitutadiila bua’shi tupete bitompuanga bikile bukome buetu nya. (1 Kod. 10:12, 13) Abitungu’shi ooso akuatudi, atekie ngofu kukila kumpala bua kushaala na lulamato kui Yehowa, mu kino kipungo ki bukopo kia mafuku a ku mfudiilo. Yehowa akumiina’shi ‘tumufungwile mashimba eetu’ mu luteko. (Mis. 62:8) Tumbisha Yehowa na omutumbule bua bioso bia kuete kukita. Mutekie bukuashi bodia kuikala n’eshimba dinyingie mu bulungudi. Muisendeele akukuashe bodia kunyingiila lukalakashi looso lualua, na kukambila kitompuanga kioso kiodi mulombene kufumankana nakio. Totadilanga kintu su nkimune sunga muntu buadia nkukutshishua kukitanga nteko efuku dioso kui Yehowa. w23.05 7 ¶17-18

Buakinyi atutuelaa mu bisangilo bia kakongie? Kia kumpala, mbua kutumbisha Yehowa. (Mis. 26:12; 111:1) Atutuelaa dingi mu bisangilo bua’shi tuinyingishene ku muntu na muntu, mu kino kipungo ki bukopo. (1 Tes. 5:11) Nsaa y’atuibuesha mboko kuiyilu bua kutuusha ngaluulo, atukuatshishena ku ino mianda ibidi. Anka p’atutuusha ngaluulo, tui kufumankana na ino nkalakashi. Tui kupusha bubi bua kutuusha ngaluulo, sunga’shi tui kuikadika na lukalo lukata lua kutuusha ngaluulo, anka nsaa y’atuele mboko muiyilu pangi ta mbalombene kuitusangula bu bi’atukumiinanga. Tui kunyingiila ino nkalakashi yooso naminyi? Mpoolo mutumibua baadi muambe’shi, tui balombene kutuula binangu bietu mu “kwinyingishena ku mashimba.” P’atumono’shi bangi ba munkatshi muetu mbalombene kunyingishibua p’atutuusha tu bishima tupeela tua lukumiino luetu, abitupa muloo wa kukumiina kutuusha ngaluulo. Su nta mbetusangule misuusa i bungi, tui balombene kuikala na muloo wa’shi bangi mu kakongie, abapete namu nabo mushindo wa kutuusha ngaluulo.​—1 Mp. 3:8. w23.04 20 ¶1-3

Mfumu baadi muukishe bena Yuda’shi munda mua bipua bikile pa 70, babaadi na bulungantu bua kualukiila mu nsenga yabo ku Isaleele. (Esel. 1:2-4) Nka penda Yehowa ngi baadi mulombene kulombasha uno muanda. Muanda Babilone ta baadi mulombene kufungula ba mpika nya. (Yesh. 14:4, 17) Anka nsaa ibaponene Babilone, na mfumu mupia abanga kumunana, balunguile bena Yuda’shi babaadi balombene kukatuka mu Babilone na kualukila kuabo. Muina Yuda ooso, bikishekishe ba mfumu ba bifuko, babaadi kumpala kua kino kitshibilo kia kukatuka mu Babilone sunga kushaala muanka. Biabia kino kitshibilo ta kibaadi kibofule bua kuikiata nya. Muanda bantu banunu be bungi, ta babaadi bakite luno luendo lui bula muanda wa kupela nkapeta nkalakashi muishinda. Dingi kubaadi bangi bena Yuda be bungi babaadi batandikilue mu Babilone bashi baadi abauku angi ma mbalo ankashaala. Bua bano bena Yuda babaadi batandikilue mu Babilone, nsenga ya Isaleele, babaadi abeimono’shi nsenga ya bankambua ibaabadi bashaale. Abimueneka’shi bangi bena Yuda babaadi bobeshe nshalelo a mu Babilone. Ngi buakinyi bibaadi bilombene kuibelela bukopo bua kuleka mashibo aabo e buwa na bupeta buabo na nkashaala mu mbalo yabashi beubidishene nayo. w23.05 14 ¶1-2

Eyi di’Efile Mukulu aditunyingisha bua kutungunuka na kudima eyikashi dia kunyigiila, lusa, na kifulo. Luka 21:19 amba’shi: “Anukalama miuwa yenu mu kunyingiila kuenu.” Mukanda wa Bena Kolose 3:12 awamba nyi’shi: “Fualayi . . . lusa.” Na mukanda wa 1 Bena Tesalonike 4:9, 10 awamba dingi’shi: “Anue banabene nui balongieshibue n’Efile Mukulu bua kuifulena ku muntu na muntu. . . . Kadi bakuetu, atuinusendeela bua kutungunuka na kunyisha kuibikita.” Ano ma verse ooso mbeafundile balongi bapue kulesha kunyingiila, lusa, na kifulo. Biabia, bakuete kutungunuka na kulonga mushindo wa kulesha ino ngikashi. N’atue namu, abitungu tukite nka biabia. Bua’shi bikukuashe, taluula bibaadi bena Nkidishitu ba kumpala baleshe ino ngikashi. Dingi, atukamono mushindo watudia kuambula bano balongi booso, na bu kipeta olesha’shi we muilumbuule bua mpombo ikata. Dingi, apakabanga mpombo ikata, okalongo biodia kunyingiila na biodia nkekala na kitshibilo kiodia kutungunuka na kunyingiila. w23.07 3 ¶4, 8

Biatuikala bedibue muimu sunga “ingi mikooko,” abitungu’shi tushaale “Muishinda diselele” bu biadidi dipue kuitutuula mu mpaladiiso a mu kikudi, na bu bi’aditukunkusha ku miabi ya mu kikudi ya mu mafuku aafiki. (Yo. 10:16) Kubanga 1919 (B.B.) midiyo ya bana balume na bana bakashi na bana bakinga, mbatuukie mu Babilone Mukata ampire a lulanguilo lua madimi lua mu nsenga ishima, na babanga kutambukila mu dino eshinda dia mu kifuanyi. Pabakatukile bena Yuda mu Babilone, Yehowa baadi mupue kumona’shi bikokoshi bioso mbipue kukatushibua muishinda. (Yesh. 57:14) “Eshinda diselele” mu ano etu mafuku ndilumbuulue naminyi? Munda mua siekele ibungi ayituala ku kipua kia 1919, Yehowa mmufubishe bana balume abatshinyi Efile Mukulu bua kukuasha mu kulumbuula eshinda adifiki ku Babilone Mukata. (Puandikisha na Yeeshaya 40:3.) Babaadi bapue kukita mudimo wa kulumbuula eshinda dia mu kikudi kalolo, na kubofuisha bantu bena mashimba e buwa bua’shi batukie mu Babilone Mukata na batuele mu Mpaladiiso a mu kikudi, mbalo yabadi bapue kualushuula lulanguilo lui selele lua Yehowa. w23.05 15-16 ¶8-9

Yehowa akumiina’shi tubadiile kukumiina kumufubila na muloo. (2 Kod. 9:7) Tui kutungunuka na kuikitshisha bua kuiatshila kepatshila ka mianda ya mu kikudi, aku namu ta tui na lukalo lua kuikalombasha? Tuateyi kileshesho kia Mpoolo mutumibua. Bambile’shi: “Nangipaa mbidi yande na neyikasha bupika.” (1 Kod. 9:25-27, Kilombeeno Kipya 2014) Sunga nsaa ibaadi Mpoolo te na lukalo lua kukita kibaadi akikumiina Yehowa, baadi ekitshisha bua’shi ekikite. Yehowa baadi mukumiine mudimo wa Mpoolo su? Oolo. Ngi buakinyi Yehowa baadi mumufute bua kuikitshisha kuaye. (2 Tim. 4:7, 8) Mu mushindo umune, Yehowa asankaa p’etumono atuikitshisha bua kulombasha kepatshila keetu, sunga p’atupusha’shi ta tui na lukalo lua kuikalombasha. Abimusankishaa muanda auku’shi, sunga ta tui bakumiine kukita wawa mudimo nsaa yooso, atuibikitaa muanda tui bamufule. Nka bibaadi Yehowa muelele Mpoolo muabi, aketuelela namu n’atue bua kuikitshisha kuetu. (Mis. 126:5) P’atumono miabi ya Yehowa, atubanga kuikala na lukalo lua kulombasha kepatshila keetu. w23.05 29 ¶9-10

Mpoolo mutumibua apuandikisha baaba booso bash’abakapanda kuifuku dia Yehowa na bantu balaale. Muanda pabadi balaale t’abauku mianda ikuete kukitshika paapa pabadi sunga abikidi nsaa nya. T’abauku kunangushena ku muanda wi na muulo aukitshika buabua bufuku, na kiabadia kukita nya. Bantu be bungi lelo uno, mbalaale mu tulo tua mu kikudi. (Lom. 11:8) T’abakumiina mianda yooso ikuete kukitshika ayilesha’shi tui “mafuku a ku nfudiilo” na’shi mpombo ikata tayidi peepi. (2 Mp. 3:3, 4) Biabia, bi na muulo buatudia kushaala bapasukie efuku dioso. (1 Te. 5:6) Buakinyi abitungu tulame butaale na kuikala bashimate? Biabia, t’atutuelakanaa mu mianda ya politike i kano kabidi ya ino nsenga nya. Bu abinyiisha kuifubuila efuku dia Yehowa peepi, bantu namu bakuete kunyiisha kuitutakula bua’shi tutuelakane mu yaya mianda yabo. Kadi t’abitungu’shi tuikalakashe bua kiatudi balombene kukita nya. Kikudi ki’Efile Mukulu nkilombene kuitukuasha buatudia kulama butaale na kushaala bashimate mu binangu na kuata bitshibilo bi buwa.​—Luk. 12:11, 12. w23.06 10 ¶6-7

P’opusha dino eshina Samesone nkinyi akikufuila mu binangu? Pangi opuandikisha muntu baadi na bukome bui bungi ngofu. Biabia mbia binyi. Anka Samesone batshile bitshibilo bi bubi bibaadi bimukiengieshe ngofu. Sunga mbiabia, Yehowa baadi mutuule binangu nka ku bioso bibaadi Samesone mukite bua kumufubila, na mmufundishe kileshesho kia lulamato luaye mu Bible bua’shi kitukuashe. Yehowa baadi mufubishe Samesone bua kulombasha mianda ya kukaanya bua kukuasha muilo waye wa Isaleele ubaadi musangule. Siekele i bungi kunyima kua lufu lua Samesone, Yehowa baadi muyokiele Mpoolo mutumibua buadia kuela eshina dia Samesone mu mulongo wa bantu babaadi na lukumiino lui bungi. (Eb. 11:32-34) Kileshesho kia Samesone ki kuitunyingisha. Baadi mukulupile mui Yehowa, sunga mu kipungo kibaadi na nkalakashi. Tui balombene kulongiela kui Samesone, na mushindo ulombene kuitunyingisha kileshesho kiaye. w23.09 2 ¶1-2

Tui kunyingisha kunyingiila kuetu p’atuikala atuele nteko misuusa yooso kui Yehowa, na kumulungula mianda yeetu yooso. (1 Tes. 5:17) Pangi t’opetele nkalakashi ibukopo binobino nya. Sunga mbiabia we mulombene kuela nteko kui Yehowa, omuteka bukuashi su we mukalakashibue na su we na mianda ibungi mu mutue, sunga kukutua kuuka kia kukita. Su buekadika otekie Efile Mukulu eetu bua’shi akukuashe mu luteko ku ino mianda ipeela y’okiopete binobino, t’abikakuikeela bukopo bodia kuteka nsaa yokapete nkalakashi ibukopo mu mafuku aafiki nya. Okashinkamisha’shi Yehowa auku kalolo nsaa yadi mulombene nkukuasha, na mushindo wadia nkukitshina mianda. (Mis. 27:1, 3) Atukanyingiila ngofu mu mafuku aafiki ku mpombo ikata su tubabanga kunyingiila ku nkalakashi ya ano mafuku. (Lom. 5:3) Buakinyi atuamba biabia? Bakuetu be bungi abamba’shi nsaa yooso y’atunyingiila nkalakashi y’atupete, abitukuasha bua kunyingiila ingi nkalakashi ayifiki. Nsaa y’abanyigiila nkalakashi ku bukuashi bua Yehowa, lukumiino luabo alunyiisha kunyinga’shi Yehowa mmukumiine kuibakuasha. Na muanda be na lukumiino mui Yehowa, mbalombene kunyingiila nkalakashi ayifiki.​—Yak. 1:2-4. w23.07 3 ¶7-8

Kuiyisha kua Yehowa na lusa luaye, ngi abimutakulaa buadia kuikala na nkatshinkatshi. Bu kileshesho, kuiyisha kua Yehowa, kubaadi kumueke pabaadi akiebe kubutula bantu be bubi babaadi mu kibundi kia Sodome. Kukiila kui ba mikeyilu baaye, Yehowa balunguile Lota muntu mululame, buadia kusuukila ku muengie. Lota baadi na moo wa kuenda kuakua ku miengie. Biabia baadi mutekie bua’shi aye na kifuko kiaye, bebatadiile basuukile dia ku Zoare, ka kibundi kapeela, kabaabadi bapue kuatshila kitshibilo kui Yehowa bua kuikabutula. Yehowa baadi mulombene nka kushinshikila Lota bua’shi alonde nka buludiki buaye bubaapu kumulungula. Anka, Yehowa baadi mutadiile’shi Lota ende ku Zoare, na ta baadi nyi mubutule kaaka ka kibundi nya. (Kib. 19:18-22) Kunyima kua siekele i bungi, Yehowa baadi muleshe lusa luaye kui bantu ba mu Ninive. Yehowa baadi mutume mutemuki Yona, buadia nkebalungula mukandu wa kabutu, ka kiakia kibundi na bantu babi be muanka. Anka, pa baadi bena Ninive belangie ku mashimba, Yehowa baadi muibapushe lusa, na ta baadi mubutule kiakia kibundi nya.​—Yon. 3:1, 10; 4:10, 11. w23.07 21 ¶5

Kileshesho kia Yowase nkilombene kuitulongiesha kinyi? Yowase baadi nka bu mutshi ukata wi na mishi i bukopo yabadi bakuatshishene kui bibayi. Kunyima kua Yekoyada kufua, muntu baadi amukuatshishena, Yowase babangile kuteemesha bantu basumbule lukumiino, na aye nkukutua lulamato kui Yehowa. Bino bileshesho bi na malongiesha e bukome abilesha’shi, t’abitungu’shi kutshiina kuetu ku’Efile Mukulu kutukile ku bukitshishi bua bena Nkidishitu netu, na bena kifuko netu nya. Bua kushaala banyingie mu kikudi, abitungu tunyingishe lulamato mui Efile Mukulu, na kutshiina akutuukila mu kuibadikila kuetu kua Bible nsaa yooso, kunangushena na luteko. (Yel. 17:7, 8; Kol. 2:6, 7) Yehowa t’etutekie mianda ikile bungi nya. Kioso ki’etutekie ki mu mukanda wa Mulungudi 12:13, awamba’shi: ‘Tshiina Efile Mukulu na kulama milangilo yê, mwanda kyakya nyi kyoso ki nyina mwanda kya mûwa wa muntu.’ Nsaa y’atutshiinyi Efile Mukulu, atuikala na ngobesha ya kukambila bitompuanga bia mu mafuku aafiki, na kushaala bashimate pepoo Ta kui kintu su nkimune kilombene kuluisha kipuano kietu na Yehowa. w23.06 19 ¶17-19

Kishinkamiisho ki’Efile Mukulu akibanga na bino bishima ku mbangilo’shi: “Na yawa baadi mushale ku nkuasa a bufumu bambile’shi.” (Kbf. 21:5a) Ano mayi e pa buawo muanda ngakule penda misuusa isatu mu mukanda wa Kibafumbuilue, nsaa ibakuile Yehowa aye nabene mu bimonua. Biabia kino kishinkamiisho kiabadi betupe, t’akifiki ku bukome bua ba mikeyilu, sunga ku lusangukilo lua Yesu nya, kadi akifiki kui Yehowa nabene! Uno muanda aulesha’shi tui balombene kukulupila mu ano mayi ooso aadi muakule aalondo. Buakinyi bi biabia? Muanda Yehowa “ta mulombene kudimba.” (Tt. 1:2) Biabia, mayi atubadika mu Kibafumbuilue 21:5, 6 aakalombana binyibinyi. tutaluuleyi kishima “Talayi!” Kishima kia mu kiina Greke kiabadi baluule bu “talayi,” mbekifubishe misuusa i bungi mu mukanda wa Kibafumbuilue. Efile Mukulu akula dingi kinyi? Efile Mukulu amba’shi: “Nkuete kukita bintu bioso bipia.” Mu binyibinyi, Yehowa akula pabitale kushintuluka kua mu mafuku aafiki, muanda buaye’ye, ino milayilo ya binyibinyi ayikalombana bu biadi muakule bua kuno kushintuluka nka bu’shi mbipue kuikala kuanka.​—Yesh. 46:10. w23.11 3-4 ¶7-8

Mpiele Mutumibua baadi mutungunukie nka na kuikitshisha bua kukambila kubofula kuaye. Tutaluuleyi tuno tubileshesho tupeela. Yesu pa baadi muibapatuluile bi’akakiengie na kufua bua kulombasha matemuki a mu Bible, Mpiele bamulunguile’shi biabia t’abikufikila. (Mak. 8:31-33) Misuusa i bungi, Mpiele na bangi balongi naye babaadi bekakeene bua kuuka pabitale mukile bangi boso bukata. (Mak. 9:33, 34) Bufuku kumpala kua Yesu kufua, pa muanda wa nsungu Mpiele batshibile ungi muana mulume etui. (Yo. 18:10) Anka buabua bufuku bumune, Mpiele baadi mupele’shi t’auku Yesu kuuku aaye misuusa isatu. (Mak. 14:66-72) Pa muanda wa biabia, kunyima Mpiele badidile ngofu. Yesu ta baadi musumbushene uno mulongi aaye baadi muinyongole nya. Kunyima kua Yesu kusanguka, baadi mupe Mpiele mushindo wa kumulesha dingi’shi mumufule. Yesu balunguile Mpiele buadia kuikala muiyishe bua kufuba bu mulami a mikooko yaaye. (Yo. 21:15-17) Mpiele baadi muilumbuule bua kukita uno mudimo ubabamupeele kui Yesu. Na dingi baadi mu Yelusalema efuku dia Pentekote, na baadi mu kisaka kia balongi babaadi bedibue muimu wa kikudi kiselele. w23.09 22 ¶6-7

Mpiele alungula bakulu naye’shi: “Kunkushayi mikooko y’Efile Mukulu.” (1 Mp. 5:1-4) Su we mukulu, atuuku’shi we mufule bakuenu balume na bakashi na okumiina kui balama. Biabia ingi nsaa we kupusha’shi, we na bi bungi bia kukita, sunga’shi we mukookie tue bia kulombasha uno mudimo. We kukita naminyi? Lungula Yehowa mianda ayikukalasha. Mpiele bafundile’shi: “Su muntu kuete kukuasha bangi, ebikite bu’ye akulupila bukome abutuusha Efile Mukulu.” (1 Mp. 4:11) Bakuetu balume na bakashi be kufumankana na nkalakashi ya bashii balombene kupua yoso mu uno ndumbuluilo a mianda. Uuka’shi: “Mulami mukata,” Yesu Nkidishitu mmulombene kuibakuasha kukila biodi mulombene kukita. E kukita biabia mu ano mafuku etu mpaa na mu nsenga ipia. Akitungu’shi bakulu bakite, nyi nkufula bakuabo, kui balama na kuikala “bileshesho kui mikooko.” w23.09 29-30 ¶13-14

Abintungu tudimukile nangunangu ya bumuntu. Muanda su tuabanga kumona mianda na kinangu kia bu muntu, tui kubanga kuluba Yehowa na mayi aaye a kulonda. (1 Ko. 3:19) “Binangu bia ino nsenga” abikalaa na bukitshishi bui bungi kui bantu bua’shi bapele kukookiela Efile Mukulu. Bena Nkidishitu bapeela ba mu kakongie ka Pergame na ka Tiyatire, babaadi bakumiine lulanguilo lua mankishi na binangu bi bubi bia kutambuka lusandi bibaadi bipalakane kui bantu be bungi mu bibundi. Yesu baadi mupe tukongie tooso tubidi elango di bukopo bua bibaatudi atutadiila bantu abatambuka lusandi. (Kbf. 2:14, 20) Lelo uno, bantu be tuifunyishe bakuete kutompa kuitukitshisha bua’shi tukumiine binangu bi bubi. Bena kifuko netu na bangi bantu, abatompaa kuitulesha’shi tui na miiya ikile bukopo, na’shi tui balombene kuipaa miiya ya Yehowa. Bu kileshesho, be kuamba dingi’shi ta bi na muulo buanudia kushaala batokane mu muikeelo nya, na’shi miiya ilulame ya mu Bible ngia kala. Ingi nsaa, tui kunangushena’shi buludiki bu’abetupa kui Yehowa t’abupushika kalolo. Tui kupeta kitompuanga kia “kuenda kula na mianda ifundibue.”​—1 Ko. 4:6. w23.07 16 ¶10-11

Mariya baadi na lukalo na kunyingishibua. Banda kunangushena bibaadi mulombene kupusha kunyima ku’aye kupeta mukandu ubaabamulunguile kui muikeyilu Gabriele. Ta baadi muibakilue nya; kadi, baadia kuimita. Ta baadi awuku bia kukusha bana aye nabene nya, anka baadi mupasukile muana mulume baadi na kia kufika Mesiya. Na ta baadi mubande kulaala na muana mulume nya, mmushindo kinyi ubaadia kupatuluila Yosefe baadi amuyiila ino mianda yoso? (Luk. 1:26-33) Mariya baadi mulombene kupeta kunyingishibua? Baadi mukulupile’shi bangi abamukuasha. Bu kileshesho, bayipuishe muikeyilu Gabriele buadia kumupatuluila mianda yoso pabitale wawa mudimo. (Luk. 1:34) Kunyima kua paapa, Mariya bayile mu luendo “ku eumbo dia ku miengie” dia ku kibundi kia mu Yudeya bua nkatembela mukuabo mukashi Elizabete. Elizabete baadi mutumbule Mariya n’ayokielua na Yehowa bua kunyingisha Mariya pabitale butemuki bua muana mulume akatanda. (Luk. 1:39-45.) Mariya bakuile’shi Yehowa “bakitshi mianda ya bukome na mboko yaye.” (Luk. 1:46-51) Kukiila kui Gabriele na Elizabete, Yehowa baadi munyingishe Mariya. w23.10 14-15 ¶10-12

Nka penda ndambo ipeela ya balongi ba Nkidishitu ngi bedibue muimu wa kikudi kisele lelo uno, na be na muloo wa kuikala mu kipuano ki pabuakio na Yehowa. Bano bedibue muimu 144 000 ngi abafubu bu ba tshite bakuidi muiyilu na Yesu. (Kbf. 14:1) Kadimbo ka kishila ka mu tabernakele akalesha’shi mbakuminyibue bu bana ba mu kikudi b’Efile Mukulu sunga mbiabaki pa nsenga. (Lom. 8:15-17) Kadimbo kakile kishila ka mu tabernakele akalesha eyilu, muamua mushaale Yehowa. “Kilamba kishikie” pankatshi pa Kadimbo ka kishila na Kadimbo kakile kishila, akilesha mbidi ya Yesu i bu ishikie pa kibelo kia muiyilu bu biadi Tshite muakuidi Mukile bukata a mu ntempelo a mu kikudi. P’aye kutusha mbidi yaye ya bumuntu bu mulambu bua bantu booso, Yesu mmufungule eshinda dia muwa wa muiyilu bua bena Nkidishitu booso bedibue muimu. Abitungu n’abo namu balekie mbidi yabo ya musamba buabadia kupeta efuto diabo dia muiyilu.​—Eb. 10:19, 20; 1 Ko. 15:50. w23.10 28 ¶13

Gideone baadi muipeeleshe na kushaala muumiine nsaa ibaabadi abamuakula bibubi, kui bena Efraime. (Bans. 8:1-3) Gideone ta baadi ebaluula na nsungu nya. Gideone baadi muleshe’shi muiyishe pa kuibateemesha kushi kuibaluula, na pa kuakula naabo na kalolo kooso. Bino bibaadi abituesha butaale munkatshi muabo, nsaa ibaadi muanda wi bukopo. Bakulu basha binangu abambula Gideone pa kuteemesha bangi na kalolo kooso, na kuibaluula ku biabebakula na kuiyisha. (Yak. 3:13) Na bino abifuisha butaale mu kakongie. Pa baabadi basaamune Gideone pa muanda wa bibaadi mutshokole bena Mediane, baadi mualuishe Yehowa ntumbo yooso. (Bans. 8:22, 23) Bana balume be na mashito be kuambula Gideone naminyi? Abitungu baluishe Yehowa ntumbo yooso ku mianda yooso y’abakitshi. (1 Ko. 4:6, 7) Bu kileshesho, su batumbula mukulu bua ngobesha yaye ya kulongiesha, abitungu atuule binangu biaye bioso kui nsulo a buludiki, Kuiyi di’Efile Mukulu, na ku buludiki abufiki kui ndumbuluilo a Yehowa. Abitungu bakulu banangushene ingi nsaa p’abalongiesha bua’shi batumbishe Yehowa kushi kukimba bia kukaanyisha bantu. w23.06 4 ¶7-8

Su ta tui bapete kiakia kia tuikeele batekie mu luteko, abitungu tuiyipushe atue banabene’shi: ‘Natekaa bua mianda i buwa su?’ Kubapu tunangushene ku kiakia kiatuuku’shi ki buwa kuatudi. Muanda tui kuteka ingi mianda ish’ayitukuasha munda mua mafuku e bungi. Su tuateka bua mianda yetu, tui kupeta ngaluulo i buwa kukila biinyi bia tutekiele. Anka ingi mianda y’atutekie i kukutua kuikala ipusheene na kikiebe ki’eshimba dia Yehowa. (1 Yo. 5:14) Bu kileshesho, tutaluuleyi kileshesho kia baledi. Babaadi batekie Yehowa bua’shi muana aabo atungunukie nka na kushaala mu bia binyibinyi. Luno luteko lui kumueneka bu lui buwa bukile, anka Yehowa t’akitshishaa ooso akuatudi pa bukopo bua’shi amufubile nya. Akumiina’shi atue booso mpaa na bana betu, tusangule buatudia kumulanguila. (Miy. 10:12, 13; 30:19, 20) Abitungu banambutuile batekie Yehowa bukuashi bua kukuma mashimba a bana baabo, bua’shi bamone bia kuibatakula mu kufubila Yehowa na bafikie bakuuku baye.​—Nki. 22:6; Ef. 6:4. w23.11 21 ¶5; 23 ¶12

Buakinyi kunyingisha bangi kui na muulo na akulesha’shi tui bebafule? Muyile Bible, kishima kiabadi bafubishe kui Mpoolo bu “kunyingisha,” akipushisha “kuimana ku lupese lua muntu kampanda bua kumunyingisha nsaa yadi mu bitompuanga bi bukopo.” Biabia, p’atunyingisha mukuetu kuete kukienga, atumunyingisha buadia kutungunuka na kufubila Yehowa na lulamato. P’atunyingisha mukuetu mulume sunga mukashi kuete adidi, atumulesha’shi tui bamufule. (2 Ko. 7:6, 7, 13) Kupusha muntu lusa sunga kumunyingisha, mbintu bibidi bipushene. Mmushindo kinyi? Nsaa i muntu apusha muntu kampanda kuete kukienga lusa, akumiinaa kumunyingisha na kukimba mushindo wa kumukuasha. Su tui na lusa, aluitukuasha buatudia kunyingisha bangi. Mpoolo baadi mupatuule’shi, lusa lua Yehowa bua bantu, alumutakulaa buadia kuibanyingisha. Mpoolo balesheshe Yehowa bu “Yaya sha lusa n’Efile Mukulu a busambi boso.”​—2 Ko. 1:3. w23.11 9-10 ¶8-10

Balongi boso ba Nkidishitu mbalombene kupeta makienga. Tutaluuleyi kileshesho kia Mpoolo mutumibua. Bakuile bua boso babaadi mu Tesalonika’shi: “Muanda pabaatudi nenu, tubaadi nka atuinudimusha kumpala’shi, atukafumankana na kubinguabingua, na nyi bibaadi bikitshikie.” (1 Te. 3:4) Na dingi baadi mufundile bena Kodinda’shi: “T’atukumiina nukutue kuuka makienga atubaadi bakapete . . . tatubaadi bakulupile dingi’shi atushala na muwa.” (2 Ko. 1:8; 11:23-27) Na bena Nkidishitu namu lelo uno, mbalombene kutengiela kupeta makienga mu ingi mishindo. (2 Ti. 3:12) Kasha otuula lukulupilo loobe mui Yesu na kumulonda, Ba kuuku bobe na bena kifuko nobe be mpaa na nkushikua. Kitshibilo kiobe kia kuikala mululame mu mianda yooso, akikufuishiishaa nkalakashi ku mudimo su? (Eb. 13:18) We mupete kubinguabingua kui bena mbulamatadi pa muanda wa’shi okuete olungula bangi bi lukulupilo loobe su? Sunga tuafumankana na kubinguabingua kua mushindo kinyi, Mpoolo akula’shi tui balombene kuikala na muloo. w23.12 10-11 ¶9-10

Yakobo baadi munyingiile nkalakashi i bungi. Bana ba Yakobo babidi, babaadi basabulushe kifuko kiabo mpaa n’Eshina dia Yehowa. Kukatusha biabia, mukashi a Yakobo a kifulo Rashele, bafuile pa kutanda muana aaye a kabidi. Na pa muanda wa nsala bibaadi abitungu’shi Yakobo, akatukie mu nsenga ya kuabo ende mu Ejipitu na bununu buaye. (Kib. 35:16-19; 37:28; 45:9-11, 28) Sunga mbibaadi na ino nkalakashi yooso, Yakobo ta mushimishe lukumiino luaye mui Yehowa na mu milayilo Yaaye nya. Yehowa namu ku luaye lupese, baadi muleshe Yakobo’shi mmumukumiine. Bu kileshesho, Yehowa baadi muelele Yakobo miabi apeta bintu bi bungi bia ku mbidi. Yakobo baadi na lutumbu lukata binyibinyi kui Yehowa, nsaa ibamuene muana aaye mulume Yosefu abaabadi bamulungule’shi mmufue takudi mafuku e bungi! Kipuano kiaye ki buwa na Yehowa, kibaadi kimukuashe buadia kunyingiila nkalakashi yaaye. (Kib. 30:43; 32:9, 10; 46:28-30) Su tualama kipuano ki buwa na Yehowa, natue namu tui kobesha kunyingiila nkalakashi yatush’atutengielanga ayitukuata. w23.04 15 ¶6-7

Mukanda wa Misambo 23 nyi ndono alulesha kishinkamiisho kia kifulo kia Yehowa. Davide bafundile uno musambo bua kulesha bukata bua kifulo kibaadi pankatshi p’aye na pa Mulami aaye Yehowa. Davide baadi mupushe bibulami bua Yehowa, na baadi mumukulupile nka aye. Davide baadi muukie’shi Yehowa amuleesha kifulo kiaye efuku dioso. Nkinyi kibaadi kimushinkamiishe bino? Davide baadi muipushe’shi mbamufule ngofu muanda Yehowa baadi amulombeesha nkalo yaye ooso. Davide baadi dingi musangeele kipuano kiaye na Yehowa, na bibaadi Yehowa mumukumiine. Ngi buakinyi baadi mushinkamishe’shi, sunga kuakamukitshikila muanda mu mafuku aafiki, Yehowa atungunuka na kumupasukila mu bioso. Muanda Davide baadi mukulupile’shi Yehowa mmumufule na amupasukila, bibaadi bimukuashe bua’shi tekalanga ekalakasha, kadi ekadikie nka na muloo na kusanka na kiadi nakio.​—Mis. 16:11. w24.01 29 ¶12-13

Kubanga nka mu Ngoshi ya Kabidi ya Nsenga ishima, muilo wa Yehowa wi mu bulungantu bua kukita mudimo wa kulungula mukandu wibuwa mu maumbo e bungi. Kadi, mudimo ukuete kuenda nka na kutama. Lelo uno, bena Kasaka ka Bakunkushi-Bakulu bakuete kutungunuka na kukimba bukunkushi bua Nkidishitu. Abakumiinaa kutusha buludiki kui bakuetu balume bua’shi bekale na mmueneno a mianda a Yehowa na a Yesu. Na abafubishaa bakunkushi ba bifunda na bakulu bua kutusha buludiki mu tukongie. Bakulu bedibue muimu be ‘muiyasa dibalume’ dia Nkidishitu.’ (Kbf. 2:1) Biabia, bano mbekale bantu bakutue kupuidika na abakitaa bilubilo. Mpaa na Moyise na Yoshua babadi abakitshi bilubilo ingi nsaa, nka bu bibadi bikite batumibua. (Mba. 20:12; Yos. 9:14, 15; Lom. 3:23) Anka, tukuete kumona kalolo’shi Nkidishitu kuete kukunkusha kalolo mpika a lulamato na bakulu, atungunuka na kuibikita. Biabia, tui na kabingilo ke buwa bukile ka kukulupila bukunkushi buabakuete kuitupa kui baba babadi basangule bua kuitukunkusha. w24.02 23-24 ¶13-14

Lelo uno, tuikutumbisha Yehowa pakuakula pa bimutale na muloo oso na lutumbu mpa na kifulo. Nsaa yatudi mu mudimo wa bulungudi, abitungu tulamiine’shi, kepatshila ketu nka kukakila bantu kui Yehowa, na kuibakuasha bua’shi bamone Nshetu sha kifulo bu biatumumonaa. (Yak. 4:8) Mushindo wabalesha Yehowa mu Bible, biadi na kifulo, kululama, binangu na bukome na ingi ngikashi yaaye i buwa abisankishaa bikile. Atutumbisha dingi Yehowa na kumusankisha patuikitshisha bua kumuambula. (Ef. 5:1) Su tubambula Yehowa, atuikala belamune na uno ndumbuluilo e bubi. Patuambula Yehowa bantu mbalombene kumona’shi tuibelekene na bantu ba mu uno ndumbuluilo e bubi. (Mat. 5:14-16) Patuikala belekene nabo mu nshalelo etu a kuifuku n’efuku, tuikupeta mushindo wa kuibapatuluila buakinyi atukitaa biabia. Bu kipeta, bantu be na mashimba alulame abefubuila kui Efile Mukulu etu. Patutumbisha Yehowa mu ino mishindo, abinyisha kusankisha eshimba diaye.​—1 Ti. 2:3, 4. w24.02 10 ¶7

Bua kufika mulume muina Nkidishitu munyingie mu kikudi, abitungu otamishe ngobesha yodi mulombene kufubisha. Ino ngobesha ayikakukuasha bodia kupeta mashito mu kakongie, kukita mudimo wa ku mbidi bua kulombasha nkalo yobe na ya kifuko kiobe, na kuikala mu kipuano ki buwa na bangi. Bu kileshesho longa kubadika na kufunda. Bible amba’shi bua kuikala na muloo na kobesha mu nshalelo, abitungu kukisha nsaa efuku dioso mu kuibadikila Bible na kunangushena ku bi’obadika. (Mis. 1:1-3) P’obadika Bible efuku dioso ouku mushindo aunangushenaa Yehowa, na abikakukuasha bodia kunangushena kalolo na kutumikila biolongo mu Bifundue. (Nki. 1:3, 4) Bakuetu balume na bakashi be na lukalo na bukuashi bua bana balume be na mushindo wa kulongiesha na kuibapa malango aatukila mu Bible. P’obadika na kufunda kalolo, wekala na mushindo wa kulumbuula miisambo, kutusha ngaluulo ayikuasha bangi, na kunyingisha lukumiino luabo. Okekala dingi na mushindo wa kufunda mianda ikata uuka’shi, ayikakukuasha bodia kunyingisha lukumiino lobe obe nabene na kunyingisha namu bangi. w23.12 26-27 ¶9-11

Nsaa yodi na moo nangushena ku bi’abakakukitshina kui Yehowa mu mafuku aafiki. Nsaa ishayikala Satana kuanka. Mu kikongeno kia mu 2014 mubaadi maasha a kileshesho abaadi aalesha nshe bana esamba na kifuko kiaye pabitale ungi mushindo wa kubadika 2 Timote 3:1-5 su yaaya verse ayilesha mianda ayikekala mu Mpaladiiso abadika’shi: “Mu nsenga ipia amukeekala bipungo bia muloo. Muanda bantu abakekala bafule bantu nabo, bafule mianda ya mu kikudi, basha kuipeelesha, beyishe, balanguidi b’Efile Mukulu, abakookiela baledi baabo, basha lutumbu, basha lulamato, basha kifulo kia butandua bua bifuko biabo, be na kikudi kia butaale, bash’abadimbilaa bantu mianda, be na kuikanda, bashi bantomboshi, bafule mianda ibuwa, bashi na mapala abidi, bantu abatadiila ingi mianda, bashi bukielo, bafule Efile Mukulu pe kufula miloo, be na lulamato kui Efile Mukulu, ngi bantu bakuilamatshishena nabo baaba.” W’esambaa na kifuko kiobe sunga bena Nkidishitu noobe pabitale nshalelo akekadika mu nsenga ipia su? w24.01 6 ¶13-14

Abitusankishaa ngofu pa kuuka’shi Yehowa mmukumiine muilo waye mu kisaka! Bible amba’shi: “Yehowa asangalâ na mwilo wê.” (Mis. 149:4) Ingi nsaa, bangi mbalombene kutshoboloka na kuiyipusha’shi: ‘Ami namu Yehowa munkumiine pa bupenka su?’ Be bungi ba ku bantu babadi bateemune mu Bible, babaadi bafubile Yehowa na lulamato looso, babaadi abatshoboloka ingi nsaa pa muanda wa yaaya mpaka. (1 Sam. 1:6-10; Yob. 29:2, 4; Mis. 51:11) Bible aleesha patooka’shi bantu bakutue kupuidika, mbalombene kukuminyibua na Yehowa. Mushindo kinyi? Abitungu tuikale na lukumiino mui Yesu Nkidishitu na tubatshishibue. (Yo. 3:16) Bino abilesha’shi tubelanga pa butooka ku miluisho yeetu, na tubalaa Efile Mukulu’shi, atukitshi kikiebe ki’eshimba diaye. (Bik. 2:38; 3:19) Yehowa asankaa neetu p’atukitshi ino mianda yooso bua kuikala naaye mu kipuano ki buwa. Bu bi’atutungunuka na kuikitshisha bua kuikala na nshalelo muipushene na mutshipo wetu wa kuilambula, Yehowa etukumiina na kuitumona bu bakuuku baaye ba p’eshimba.​—Mis. 25:14. w24.03 26 ¶1-2

Tui kuambula batumibua p’atutungunuka na kulungula mukandu wi buwa, nsaa i bakata ba mbulamatadi betutekie bua’shi tulekie kuiwulungula. N’atue namu, abitungu tukulupile’shi Yehowa etukuasha buatudia kulombasha mudimo wetu wa bulungudi. Tui balombene kuteka eshimba dinyingie na binangu. Teka Yehowa akukuashe nsaa y’onyingiila nkalakashi. Be bungi bakuatudi bakuete kunyingiila nkalakashi ya ku mbidi, sunga ya mu binangu, kufuisha muntu abadi bafule, nkalakashi ya mu kifuko, kubinguabingua, sunga ingi mianda. Na ingi mianda bu bipupa bia maladi, ngoshi, bikuete kunyiisha kuikasha ino nkalakashi bukopo ngofu biatushi balombene kuiyinyingiila. Lungula Yehowa bi’opusha muishimba diobe. Mulungule pabitale muanda oobe nka biodi mulombene kulungula kuuku oobe a p’eshimba. Ikala mushinkamishe’shi Yehowa “akukitshiina byooso.” (Mis. 37:3, 5) Kuela nteko i bungi nkulombene kuitukuasha bua “kunyingiila mu mpombo.” (Lom. 12:12, NWT) Yehowa auku’shi balanguidi baaye bakuete kunyingiila, anka ‘ateemesha misaase yabo ebapashaa.’​—Mis. 145:18, 19. w23.05 5-6 ¶12-15

P’atukiebe kuata bitshibilo bi na muulo, abitungu tuukie bi kikiebe “ki’eshimba dia Yehowa” na tukite mianda ipushene nakio. (Ef. 5:17) Nsaa y’atupete mayi a kulonda a kutumikila bua muanda wetu, abitungu tukimbe bi binangu bia Yehowa mu wawa muanda. Na dingi p’atutumikila aa mayi a kulonda, atuata bitshibilo bi buwa. “Muntu mubi,” muishikuanyi neetu Satana, akumiina’shi tuipaane mu kukita mianda ya mu ino nsenga, bua’shi tukutue nsaa ya kufubila Efile Mukulu. (1 Yo. 5:19) Bena Nkidishitu be kubanga kutuula binangu nka penda ku nfualanga, mu kulonga, mu midimo ya ku mbidi, na bingi bintu bia ingi mishindo. Su bantu babanga kukita biabia, be kukutua kufubila Yehowa. Mu binyibinyi, kuikala na bino bintu ta kui bubi nya, anka t’abitungu’shi bikale pa mbalo ya kumpala mu muwa wetu nya. w24.03 24 ¶16-17