Ëlufumu-liba

Ee i abi miii, nöö i sa heepi de u de da piki di fiti. So juu u ta taki u soni di nama ku fuka di ta dë a di tööu libi, nasö u soni di nama ku fanafiti libi. Ma tökuseei wan nasö tu palaklafu o dë a di woto, ka miii o sa da piki. Heepi dee mii fii u de fusutan faandi mbei dee baaa an o ta da de okasi u de da piki hiniwan juu te de hopo maun. Te i heepi de u de fusutan di soni dë, nöö a sa heepi de u de an lasi hati, te de an feni okasi u da piki (1 Tim. 6:18). Hii u tuu sa seeka piki di sa da wotowan taanga, söseei di ta tja gafa ko da Jehovah (Nöng. 25:11). Hii fa u sa konda wan woto fu useei te woo da piki, tökuseei u musu köni fu wa ta du ën hia poi. (Nöng. 27:2; 2 Kol. 10:18) U musu ta mbei möiti u buta pakisei a Jehovah, a di Wöutu fëën ku dee sëmbë fëën.​—Ako. 4:11. w23.04 bld. 24-25 pal. 17-18

Lobi dë fanöudu fuu sa ta dë ku wojo, söseei fuu sa dë ku limbolimbo fusutan (Mat. 22:37-39). U di u lobi Gadu, mbei u ta du di peleikiwooko go dou, aluwasi ee a sa tja fuka ko da u (2 Tim. 1:7, 8). Söseei u di u lobi dee sëmbë dee an ta dini Jehovah, mbei u ta peleiki go dou, aluwasi ee u musu peleiki ku tëlëfön nasö ee u musu sikifi biifi u peleiki da de. U ta biibi taa a wan ten dee sëmbë dee u ta peleiki da o bia libi, nöö de o bigi du soni di bunu (Eze. 18:27, 28). U lobi dee baaa ku dee sisa fuu tu. U ta lei taa u lobi de te u ta ’da useei degihati ta heepi u na u fuu nango fesi nöömö’ (1 Tes. 5:11). Leti kumafa sodati ta waka bandja ku bandja ta da de na de taanga te de dë a feti, sö nöö u ta da u na u taanga. Nöiti woo du wan soni ku useei kë u hati wan baaa nasö wan sisa fuu. Söseei nöiti woo toona du wan soni ku ën baka, u di a bi du wan soni ku u (1 Tes. 5:13, 15). U sa lei taa u abi lobi te u ta lesipeki dee baaa dee ta tei fesi a di kemeente.​—1 Tes. 5:12. w23.06 bld. 10 pal. 6; bld. 11 pal. 10-11

Wan u dee fasi fa u sa mbei di biibi fuu ko möön taanga, da te u ta kai pakisei a di lusupaima. Di lusupaima da wan soni di ta mbei u dë seiki taa dee soni dee Gadu paamusi u o pasa tuutuu. U musu ta tei ten u kai pakisei a di soni di mbei Gadu paka di lusupaima da u, söseei a di fa di paima dë dii tjika. Te u ta du di soni aki, nöö woo ta möön biibi taa woo sa libi u teego a wan möön bunu goonliba, kumafa Gadu paamusi u. Faandi mbei u sa taki sö? Andi Jehovah bi du sö taa di lusupaima bi sa paka? Wë Jehovah bi manda di wan kodo Womi Mii fëën di a lobi gaanfa seei ko a goonliba aki, nöö a bi ko dë wan libisëmbë di an abi zöndu. Di Jesosi bi dë a goonliba aki, a bi miti sömëni pei fuka. Te u kaba fëën a tja pena, hën a dëdë wan hati dëdë. Wan gaan paima wë Jehovah paka dë e! Nöiti di lobihati Gadu fuu bi o da pasi taa di Womi Mii fëën tja sitaafu, söseei taa a dëdë sö taa u sa abi wan bunu libi u wan kölö pisiten nöö (Joh. 3:16; 1 Pet. 1:18, 19). U di Jehovah du sö wan gaan soni, mbei u sa dë seiki taa a o du hii soni sö taa u sa libi u teego a di njunjun goonliba. w23.04 bld. 27 pal. 8-9

Jehovah kë weki sëmbë ko a libi baka u? Wë aai. A bi mbei sömëni sëmbë sikifi soni a Bëibel, di ta lei taa a di ten di ta ko, a o weki sëmbë ko a libi baka (Jes. 26:19; Ako. 20:11-13). Te Jehovah taki wan soni, nöö a ta du ën tuutuu (Jos. 23:14). Jehovah dë seei ta wakiti u weki dee sëmbë dee dëdë ko a libi baka. Buta pakisei a dee soni di Jöpu bi taki. A bi dë seiki taa ee a bi ko lasi libi, Jehovah bi o dë seei ta wakiti u weki ën ko a libi baka (Jöpu 14:14, 15). Sö nöö Jehovah ta wakiti u weki hii dee dinima fëën dee dëdë. A dë seei ta wakiti u da de wan libi ka de o ta dë gösöntu, söseei ka de o ta dë waiwai. Ma unfa a dë ku dee milionmilion sëmbë dee dëdë, ma dee an bi feni di okasi u de ko sabi soni u Jehovah? Wë di lobihati Gadu fuu kë weki de ko a libi baka tu (Tjab. 24:15). A kë taa de ku ën dë mati, söseei a kë u de libi u teego a goonliba aki.​—Joh. 3:16. w23.04 bld. 9 pal. 5-6

Unfa i sa ko ta möön biibi taa dee soni dee Jehovah paamusi u o pasa tuutuu? Ee i da wan u dee sëmbë di o libi u teego a goonliba aki, nöö i sa lesi dee soni dee di Bëibel ta taki u di Paladëisi, nöö i kai pakisei a de (Jes. 25:8; 32:16-18). Kai pakisei a di fasi fa di libi o dë a di njunjun goonliba. Si seei fa i dë ala kaa. Ee u ta hoi dee wini dee woo feni a di ten di ta ko a pakisei, nöö di soni dë o heepi u fu ’wa ta si dee fuka dee ta miti u kuma gaan soni,’ „biga fu wan pisiten nöö de dë” (2 Kol. 4:17). Dee soni dee Jehovah paamusi u sa da u taanga fuu hoi dou te fuka ta miti u. A seeka soni da u kaa, sö taa u sa feni di taanga di u abi fanöudu. Fëën mbei te i abi degihati fanöudu fii sa du wan wooko di a da i, fii sa hoi dou te fuka ta miti i, nasö fii sa ta dë waiwai, nöö a bi o bunu fii begi ën fajafaja, söseei fii ta lei soni u Bëibel, sö taa a sa heepi i. Na niinga u tei di taanga di dee baaa ku dee sisa kë da i. Tei ten pakisei dee bunu dee joo feni a di ten di ta ko. Te un ta du dee soni aki, nöö Gadu o „da unu di kaakiti fëën a unu libi. Biga di kaakiti u Gadu bigi te pasa maaka, nöö ee a ta wooko a unu nöö woon a’ taihati a soni. Woon sa tei hii dee soni dee ta miti unu ku pasensi, ku wai a hati seei”.​—Kol. 1:11. w23.10 bld. 17 pal. 19-20

U sa da Jehovah tangi da sömëni soni, te u ta begi. U sa dëën tangi da hii dee bunu soni dee u abi, u di hii bumbuu soni ta kumutu a Jehovah (Jak. 1:17). U sa ta dëën tangi u di waiti fasi fa a mbei di goonliba, ku dee woto soni dee dë nëën. U sa ta dëën tangi da di libi di a da u, u sa ta dëën tangi taa u abi mati, ku famii. U sa ta dëën tangi tu u di a seeka soni sö taa abiti möön u sa ko abi wan möön bunu libi. Boiti di dë, u sa ta dëën tangi u di a da u pasi fuu ku ën sa ko dë gaan mati. Kandë a o dë fuu kai pakisei luku faandi mbei u musu ta tei dee soni dee Jehovah ta du da u u bigi. Sömëni sëmbë u di ten aki an ta tei soni u bigi. De lo’ u buta pakisei nöö a dee soni di de musu du u feni dee soni di de kë. De an ta buta pakisei a dee soni di de sa ta du u lei taa de ta wai ku dee soni di de abi kaa. Ee u ko ta pakisei kuma dee lö sëmbë dë, nöö te woo begi, nöö hakisi nöö woo ta hakisi Jehovah faa ta du soni da u. Fëën mbei ee wa kë ko ta pakisei sö, nöö hii juu u musu ta tei hii dee soni dee Jehovah ta du da u u bigi, söseei u musu ta du soni di ta lei taa u ta tei de u bigi.​—Luk. 6:45. w23.05 bld. 4 pal. 8-9

U di Jehovah lobi u mbei an ta kë fuu pena (Jes. 63:9). Ma tökuseei an ta puu hii dee fuka dee ta miti u, dee u sa tei maaka ku lio nasö ku faja (Jes. 43:2). Hii fa a dë sö, tökuseei a ta paamusi u taa a o heepi u fuu sa „pasa” de. Nöö an o disa dee fuka fuu be de tapa u fuu dini ën. Boiti di dë, Jehovah ta da u di santa jeje fëën di ta heepi u fuu sa hoi dou (Luk. 11:13; Fil. 4:13). U sa dë seiki taa hii juu Jehovah o ta da u dee soni dee u abi fanöudu fuu sa hoi dou, söseei fuu sa dini ën ku hii u hati go dou. Jehovah kë fuu futoou ën (Heb. 11: 6). So juu a ta djei kuma dee soni dee ta miti u ta hebi pasa maaka poi. A sa pasa taa u sa bigi ta hakisi useei ee Jehovah o heepi u tuutuu. Ma di Bëibel ta piki u taa Gadu sa mbei u „subi wan peni”, te a da u di santa jeje fëën (Ps. 18:29). Fëën mbei ka fuu bigi hakisi useei ee Jehovah o heepi u tuutuu, nöö a bi o möön bunu fuu begi ën fajafaja ku di biibi taa a o heepi u, söseei u musu abi di futoou taa a o piki dee begi fuu.​—Jak. 1:6, 7. w23.11 bld. 22 pal. 8-9

A dë wan bunu fasi seei u taki andi da tuutuu lobi! Dee wöutu aki ta lei womi ku mujëë di tööu taa de sa lobi deseei u nöömö. Ee wan womi ku wan mujëë di tööu kë lobi deseei u nöömö, nöö de musu mbei möiti fëën. Boo taa ee i kë u wan pau faja ta kisi nango nöömö, nöö i musu ta buta udu dëën. Biga ee ja du di soni dë, nöö di faja o tapa. Wë sö nöö a dë taa wan womi ku wan mujëë di tööu sa ta lobi deseei nango nöömö, ee de ta mbei möiti u de ko dë möön gaan mati. So juu de sa ta fii kuma di lobi di de abi da deseei ta ko kötö, möönmöön te de abi möni fuka, te soni an nango bunu ku di gösöntu u de, nasö te a ta taanga da de u de kiija dee mii u de. Ee wan womi ku wan mujëë di tööu kë u „di faja u Jah” ta kisi a di tööu libi u de, nöö de tuu musu mbei möiti u de ku Jehovah ko dë gaan mati. w23.05 bld. 20 pal. 1-3

Andi u musu du fuu sa ko abi degihati? Dee gaansëmbë fuu sa da u taanga fuu mbei möiti fuu ko abi degihati, ma de an sa mbei u ko abi di fasi aki, aluwasi de de abi ën. Leti kumafa u sa lei u du wan njunjun soni, sö nöö u sa ko abi degihati. Wan fasi fa u sa lei u du di soni, hën da te u ta djeesi wan sëmbë di sa’ u du ën. Sö nöö u sa ko abi degihati, te u ta djeesi dee sëmbë dee bi lei taa de abi degihati. Leti kuma Daniëli, u musu sabi di Wöutu u Gadu bumbuu. U musu lo’ u fan ku Jehovah, ta konda dëën unfa u ta fii, sö taa u ku ën sa ko dë gaan mati. Boiti di dë, u musu ta futoou Jehovah, söseei u musu dë seiki taa a o ta heepi u hii juu. Nöö te tesi miti u, nöö woo du soni ku degihati. Sëmbë lo’ u lesipeki sëmbë di abi degihati. Boiti di dë, dee lö sëmbë aki sa heepi woto sëmbë u de ko sabi Jehovah. U ta si tuutuu taa a dë wan bunu soni fuu mbei möiti fuu ko abi degihati. w23.08 bld. 2 pal. 2; bld. 4 pal. 8-9

De bi ta wooko ku di Giiki wöutu di de puu ko „wegi hii soni luku”, te de bi ta luku ee wan soni mbei ku tuutuu goutu nasö tuutuu soofu. Sö nöö u musu ta wegi dee soni dee u ta lesi, nasö dee u ta jei, luku ee de dë tuutuu soni. Useei musu ta du ën, möönmöön fa di gaan fuka o bigi abiti möön. Wa musu biibi hii soni di u ta jei. Ma u musu wooko ku di fusutan fuu fuu tei dee soni dee u ta lesi nasö dee u ta jei, maaka ku dee soni di di Bëibel ta taki, nasö di di ölganisaasi u Jehovah ta taki. Te u ta du di soni aki, nöö de an o sa ganjan u ku dee mindimindi woto di dee taku jeje o ta paaja (Nöng. 14:15; 1 Tim. 4:1). Dee sëmbë u Jehovah o pasa di gaan fuka libilibi. Ma na wan fuu sabi unfa soni o waka da hiniwan fuu apaiti a di ten di ta ko (Jak. 4:14). Aluwasi ee woo pasa di gaan fuka libilibi, nasö aluwasi ee u ko lasi libi ufö di gaan fuka dou, tökuseei Jehovah o mbei u libi u teego ee u hoi useei nëën go dou. Be hii u tuu ta buta pakisei a dee gaan bunu dee Jehovah paamusi u, söseei boo ta dë kabakaba ta wakiti di daka u Jehovah! w23.06 bld. 13 pal. 15-16

Wa sabi unfa so u dee tjabukama woto u Bëibel o pasa (Dan. 12:8, 9). Ma na u di wa ta kaba fusutan unfa wan tjabukama woto o pasa, mbei an o pasa tuutuu. U sa dë seiki taa Jehovah o heepi u fuu ko fusutan dee soni dee u musu fusutan a di soifi ten, leti kumafa a bi du ën a di ten di pasa. Sëmbë o taki taa: „Aai, hii soni dë bunu kaa. An dë fuu fëëë möön” (1 Tes. 5:3). Te de taki sö, nöö dee tiima u di goonliba aki o booko hii dee poipoi keiki puu (Ako. 17:16, 17). Baka di dë, nöö de o go feti ku dee sëmbë u Gadu (Eze. 38:18, 19). Nöö sö di feti fu Amagedon o bigi (Ako. 16:14, 16). U sa dë seiki taa an o tei longi möön ufö dee soni aki pasa. Fëën mbei boo ta buta pakisei a dee tjabukama woto u Bëibel go dou, söseei boo ta heepi wotowan u de du sö tu. A sö wan fasi, woo lei di Tata fuu di dë a liba ala taa u ta tei soni u bigi. w23.08 bld. 13 pal. 19-20

Di apösutu Paulosu bi ta taki soni u biibi, ku lobi, söseei ku di wakiti di u ta wakiti u Gadu du dee soni dee a paamusi u, hën a bi taki taa „lobi, hën da mama u de tuu” (1 Kol. 13:13). Faandi mbei a bi taki di soni dë? Wë a di ten di ta ko, wa o abi u ta dë ku di mëni taa di njunjun goonliba dë a pasi ta ko möön, söseei wa o abi u ta biibi dee soni dee Gadu bi paamusi u möön. Biga dee soni dee u bi ta biibi o ko dë soni di pasa tuutuu kaa. Ma hii juu woo abi u ta lei taa u lobi Jehovah ku dee wotowan fuu. Fuu taki ën, nöö u teego woo ta möön lobi de daka fu daka. Söseei te u ta lei taa u lobi dee baaa ku dee sisa fuu, nöö u ta lei gbelingbelin taa u da dee tuutuu bakama u Keesitu. Jesosi bi piki dee apösutu fëën taa: „Biga te un ta lobi sö kaa, nöö hii sëmbë o si taa bakama u mi gbelin un dë e” (Joh. 13:35). Boiti di dë, di lobi di u ta lobi u na u ta mbei taa u ta du soni makandi a di seei fasi. Paulosu bi taki taa lobi ta mbei taa sëmbë sa „libi makandi ku wan hati kumafa Gadu kë”. Ma boiti dee soni dee u taki aki, wan woto soni dë di mbei a dë fanöudu fuu ta lobi u na u (Kol. 3:14). Apösutu Johanisi bi piki dee baaa ku dee sisa u di ten fëën taa: „Ee i lobi Masa Gadu, nöö söseei i musu u lobi di otowan fii tu” (1 Joh. 4:21). Te u ta lei taa u lobi dee wotowan fuu, nöö hën da u ta lei taa u lobi Gadu. w23.11 bld. 8 pal. 1, 3

Di Bëibel ta tei di libi u wan Keesitu sëmbë maaka ku di kule di sëmbë ta fia kule. Dee sëmbë dee o kule dou te a di kaba o feni teego libi (2 Tim. 4:7, 8). U musu mbei taanga möiti fuu sa kule go dou, u di u zuntu ku ka u nango. Apösutu Paulosu bi konda da u andi da dee soni dee o heepi u fu useei wini ën tu. A bi taki taa: „Dee soni dee ta hebi u fu wa sa kule bunu, nöö u musu puu de a u sinkii tuwë . . . nöö un boo tai hati e, dee sëmbë, ta kule a di pasi liba nöömö di Gadu maaka buta da u fuu kule nëën”. Di Paulosu bi kë taki taa wan Keesitu sëmbë musu dë hooo söndö soni u tja u? Wë nönö, na di soni dë a bi kë taki. A bi kë taki taa wa musu tja dee soni dee an dë fanöudu. Dee lö soni dë sa mbei u ko ta kule sapisapi, nasö de sa mbei u ko wei. Ee u kë hoi dou, nöö u musu ta fusutan hesihesi ee u ta tja dee lö soni dë, söseei u musu ta dë kabakaba u puu de tuwë wantewante. Ma di soni aki an kë taki taa u musu tuwë dee soni dee dë fanöudu. Ee u du sö, nöö woo lasi di fia kule.​—2 Tim. 2:5. w23.08 bld. 26 pal. 1-2

Te u sa’ u libi ku wotowan, nöö woo sa ta lesipeki di fasi fa de ta si soni. So sisa lo’ u bë buka, nasö de lo’ u buta soni a fesi te de ta seeka sinkii, ma so sisa an lobi ën. So baaa ku sisa ta bebe daan pikisö, ma i abi wotowan di buta taa de an o ta bebe soni di dë ku daan. Hiniwan Keesitu sëmbë kë dë gösöntu, ma hii de tuu an ta kula deseei a di seei fasi. Ee hii juu u ta si kuma di fasi fa u ta du soni da di möön bunuwan, söseei ee u ta pooba u mbei dee baaa ku dee sisa du soni kuma u, nöö u sa mbei wotowan naki futu, söseei u sa mbei fiifii libi an dë a di kemeente möön. Wë wa bi o kë du sö wan soni! (1 Kol. 8:9; 10:23, 24) Jehovah an ta piki u andi ku andi u musu bisi, ma a da u mama wëti di sa heepi u. A dë fanöudu fuu ta bisi soni a wan lesipeki fasi, a wan fasi di ta gafa Gadu, a wan fasi di ta lei taa wa ta du soni pasa maaka, söseei di ta lei taa u dë ku „limbolimbo fusutan” (1 Tim. 2:9, 10). Boiti di dë, wa kë bisi soni di o mbei wotowan buta pakisei a u a wan fasi di an fiti. Dee mama wëti u Bëibel o heepi dee gaanwomi tu, u de an buta wëti da sëmbë te a nama ku di fasi fa de ta bisi soni, nasö ku di fasi fa de ta seeka de uwii. w23.07 bld. 23-24 pal. 13-14

Jehovah bi konda soni da u, u heepi u u soni waka bunu da u. Dee sëmbë dee nango a di „don mujëë” pisi, ta suku u feni piizii a fanafiti libi. Nöö di soni di de ta du dë o tja dëdë kii de (Nöng. 9:13, 17, 18). Soni an dë sö da dee sëmbë dee nango a di köni mujëë pisi! U ta mbei möiti fuu ko lobi dee soni dee Jehovah lobi, söseei u ta mbei möiti u buuse dee soni dee a ta buuse (Ps. 97:10). U ta wai, u di u sa kai woto sëmbë u de ko, u deseei sa feni „tuutuu köni”. U dë kuma dee futuboi dee ta „bai ta kai sëmbë. De ta taki taa: ’Be dee sëmbë dee na abi öndöfeni, ko aki.’” Dee bunu dee u ku dee sëmbë dee ta ko, ta feni, an o dë u wan kölö pisiten nöö. De o dë u nöömö. De ta jabi pasi da u fuu sa „libi” u nöömö, u di u ta ’waka a wan fasi di ta lei taa u abi fusutan’.​—Nöng. 9:3, 4, 6. w23.06 bld. 24 pal. 17-18

Unfa i ta fii te wan sëmbë di i ku ën ta wooko nasö wan sëmbë di i ku ën dë a di wan kalasi ta hakisi i wan soni di nama ku di biibi fii? Senuwe ta naki i ö? Wë a ta miti sömëni fuu. Ma dee lö hakisi aki sa heepi u fuu ko fusutan andi di sëmbë ta biibi, nöö a sö wan fasi an o taanga da u sö fuu peleiki dëën. Ma so juu de ta hakisi u so soni u di de an ta biibi nasö u di de kë fia ku u. Di soni aki dë sö, u di de ta jei mindimindi soni u dee soni dee u ta biibi (Tjab. 28:22). Boiti di dë, u ta libi a „dee lasiti daka, ”ka sömëni sëmbë ’an ta hoi deseei a tii möönsö’, söseei de „hogi leti kuma taku mbeti” (2 Tim. 3:1, 3). Kandë i sa ta hakisi iseei taa ’unfa mi sa piki di sëmbë a wan lesipeki fasi te mi si taa di sëmbë kë fia ku mi?’ Wë saapifasi o heepi i fii piki a wan bunu fasi. Hati u wan sëmbë di abi saapifasi an ta boonu hesi, ma a ta hoi hënseei te sëmbë ta poobëën nasö te an sabi andi a musu. w23.09 bld. 14 pal. 1-2

So juu di ölganisaasi u Jehovah ta da u lai, u tjubi u da di lobi di sëmbë ta lobi möni, söseei a ta da u lai di ta lei unfa u musu ta köni fu wa du soni di sa mbei u pasa Jehovah buka. Te u ta du dee soni dë, nöö woo feni wini, u di u ta saka useei a di tii u Jehovah basu (Jes. 48:17, 18; 1 Tim. 6:9, 10). An dë u taki taa Jehovah o ta wooko ku libisëmbë go dou u tii u a di pisiten u di gaan fuka, ku di Dusu Jaa Tii. Joo ta saka iseei a di tii u Jehovah basu go dou ö? Wë ee u ta saka useei a di tii u Jehovah basu nöunöu kaa, nöö an o taanga da u fuu du ën a di ten di ta ko. Fëën mbei boo ta saka useei a di tii u Jehovah basu hii juu, söseei boo ta du soni kumafa dee womi dee a buta u luku u ta lei u (Jes. 32:1, 2; Heb. 13:17). Te u ta du sö, nöö u sa dë seiki taa Jehovah, di Sëmbë di ta lei u di pasi ka u musu waka, o heepi u fuu sa hoi gingin a di biibi fu te u dou a di njunjun goonliba, ka woo ta libi u teego në u di woto aki tooka. w24.02 bld. 25 pal. 17-18

Apösutu Paulosu bi lobi di dini di a bi ta dini Jehovah, ma na hii juu soni bi ta dë kösökösö dëën. Paulosu bi nango a wan lö longi kamian, nöö a di ten dë, an bi dë wan kösökösö soni u go a dee longi kamian dë. So juu, te Paulosu bi nango a dee longi kamian, nöö ’gaan wata bi ta dë fa u tjëën go kii’, söseei a ’bi musu ta waka ka fufuuma bi ta watji sëmbë u de kisi’. Nöö so juu dee felantima fëën bi ta fon mën tu (2 Kol. 11:23-27). Boiti di dë, na hii juu dee baaa ku dee sisa bi ta lei taa de ta tei dee soni di a bi ta du da de u bigi (2 Kol. 10:10; Fil. 4:15). Andi bi heepi Paulosu faa dini Jehovah go dou? Paulosu bi ko sabi unfa Jehovah dë, u di a bi ta lesi di Wöutu u Gadu, söseei u di a bi ta si unfa soni bi ta waka dëën. Paulosu bi dë seiki taa Jehovah bi lobi ën (Lom. 8:38, 39; Ef. 2:4, 5). A bi ko lobi Jehovah gaanfa seei. A bi lei taa a lobi Jehovah u di a bi ta ’heepi dee Santawan’.​—Heb. 6:10. w23.07 bld. 9 pal. 5-6

Sömëni sëmbë ta fusutan taa u abi di tii u lanti fanöudu, söseei de ta hoi so u dee wëti dee lanti ta buta. Ma so juu dee seei sëmbë dë an ta kë hoi dee wëti di de an lobi, nasö dee wëti dee an ta kai ku de. Di Bëibel ta lei u taa libisëmbë tii ta mbei sëmbë ta tja sitaafu, taa de dë a Saatan basu, söseei taa abiti möön de an o dë möön (Ps. 110:5, 6; Peleik. 8:9; Luk. 4:5, 6). A ta piki u tu taa ’ee wan sëmbë ja kë saka iseei a di tii u lanti basu, nöö a di soni di Gadu buta basu wë ja kë saka’. Te u ta saka useei a lanti basu, nöö u ta wooko makandi ku Gadu, u di a da lanti pasi u faa tii u wan pisiten, sö taa soni an waka fanjanfanjan. Fëën mbei u „musu ta paka de kumafa a fiti”. Ee hën möni u musu da de, ee lesipeki u musu lesipeki de, nasö ee haika u musu haika de, nöö u musu du sö (Lom. 13:1-7). U sa si kuma wan wëti an fiti, nasö taa a taanga u hoi, nasö taa de an du soni ku leti di de buta di wëti dë. Ma u ta saka useei a lanti basu, u di Jehovah ta piki u fuu du sö, solanga na hakisi de hakisi u fuu pasa dee wëti fëën.​—Tjab. 5:29. w23.10 bld. 8 pal. 9-10

A di pisiten di de pai Simison, dee Isaëli sëmbë bi dë a dee Filisiti sëmbë basu, nöö dee Filisiti sëmbë bi ta pena de (Kuutm. 13:1). Dee Isaëli sëmbë bi ta tja sitaafu gaanfa seei. Jehovah bi tei Simison faa „puu dee Isaëli sëmbë a dee Filisiti sëmbë basu” (Kuutm. 13:5). A bi o dë fanöudu u Simison buta futoou a Jehovah, faa bi sa du di wooko dë. Wan daka, hën wanlö Filisiti sodati bi ko u ko kisi Simison a di kamian de kai Leiki, di bi dë a Juda. U di dee womi u Juda bi ta fëëë, mbei de bi buta taa de o go kisi Simison, nöö de o tjëën go da dee Filisiti sëmbë. Dee köndë sëmbë u Simison seei de bi go kisi ën. De bi tai ën gingin hoi ku tu njunjun tatai, hën de tjëën go da dee Filisiti sëmbë (Kuutm. 15:9-13). Ma ’di jeje u Jehovah bi ko a Simison liba’, hën a hai dee tatai koti. Baka di dë, hën a „feni wan agba bonu u wan womi buliki di an bi dëdë sö longi jeti”, hën a bendi tei ën, hën a kii 1000 Filisiti womi ku ën!​—Kuutm. 15:14-16. w23.09 bld. 2-3 pal. 3-4

U wai taa Jehovah tei di Bëibel u heepi u pikipiki fuu ko sabi andi a abi a ’pakisei’ u du. Peipei fasi dë fa Jehovah sa du di soni di a kë du. A „seeka hii soni sö taa a sa du di soni di a abi a pakisei u du” (Nöng. 16:4). Nöö dee soni dee a ta du o dë u nöömö. Andi Jehovah abi a pakisei u du, nöö andi a bi du woto fasi sö taa soni sa pasa kumafa a kë? Gadu bi piki dee fosu sëmbë dee a mbei andi a bi abi a pakisei da de. A bi kë u de ’pai miii be de ko hia, be de fuu di goonliba, nöö de musu dë basi fëën. De musu dë basi u . . . hii libilibi soni di ta hai ku bëë a goon’ (Ken. 1:28). Di Adam ku Eva hopo fia ku Gadu, hën de mbei taa libisëmbë ko abi zöndu. Ma di soni dë an bi tooka di soni di Gadu bi abi a pakisei u du. A bi bia du soni woto fasi, sö taa soni sa pasa kumafa a kë. Wantewante a bi buta taa a o seti wan Könuköndë a liba ala di o mbei soni waka da libisëmbë ku di goonliba aki, kumafa a bi abi a pakisei.​—Mat. 25:34. w23.10 bld. 19-20 pal. 6-7

Jehovah sa heepi u fuu hoi dou. Kandë a o dë fuu ta mbei taanga möiti, möönmöön ee u ta feti wan hii pisiten kaa ku wan suwakifasi di u abi. So juu a sa djei kuma dee suwakifasi fuu hogi möön dee u apösutu Petuisi. Ma Jehovah sa da u di taanga di u abi fanöudu fuu hoi dou (Ps. 94:18,19). Ufö wan baaa bi ko sabi di tuutuu lei, nöö a bi ta libi ku woto womi kuma hënseei sömëni jaa longi. Ma a bi disa hii di fanafiti fasi u libi dë, hën a tooka seei ko ta libi kumafa Gadu kë. Tökuseei, so juu a bi ta mbei taanga möiti u feti ku dee taku fii dë jeti. Andi bi heepi ën faa hoi dou? A bi taki taa: „Jehovah ta da u taanga. Di santa jeje u Jehovah . . . , heepi mi u mi ko fusutan taa u sa hoi dou a di tuutuu lei . . . Jehovah bi heepi mi u mi sa wooko dëën, söseei a ta heepi mi go dou aluwasi mi abi suwakifasi”. w23.09 bld. 23 pal. 12

Un dee njönku baaa, wan o sa ko dë gaangaan sëmbë a di biibi ee wan mbei di möiti dë. A dë fanöudu fuun djeesi sëmbë di abi wan taanga biibi, fuun ko abi möön fusutan u soni, fuun ko dë u futoou, fuun ko sa’ u du so soni, söseei fuun seeka unuseei da dee faantiwöutu dee un sa ko abi bakaten. So juu un sa fii bookosaka te un pakisei hii dee möiti dee o dë fuun mbei. Ma un sa du ën. Un hoi a pakisei taa Jehovah dë kabakaba u heepi unu (Jes. 41:10, 13). Boiti di dë, dee baaa ku dee sisa u di kemeente o heepi unu tu. Te un ko dë gaangaan sëmbë a di biibi kumafa Jehovah kë, nöö di libi o ta suti da unu, söseei woon ta dë waiwai. Un dee njönku baaa, u lobi unu e! Be Jehovah mbei un feni gaan bunu, u di un ta mbei möiti nöunöu kaa, fuun ko dë gaangaan sëmbë a di biibi. w23.12 bld. 29 pal. 19-20

Buta pakisei a dee bunu fasi di dee baaa ku dee sisa fii abi, ka fii buta pakisei a dee soni di de an ta du bunu. Boo buta pakisei a wan woto. Boo taa i ku wanlö baaa ku sisa puu wan footoo makandi. Ma i puu tu woto footoo ee a ko pasa taa di fosuwan di i bi puu an bunu. Ma te i ta luku dee dii foto nöö i ta si taa wan baaa poi fesi a wan u de. Nöö joo feki ën puu, u di i abi tu woto footoo ka hii sëmbë dë lafulafu. Möön gaanfa u ta hoi dee piizii ten dee u bi pasa ku dee baaa ku sisa fuu a pakisei. Ma boo taa wan baaa nasö wan sisa bi du nasö taki wan soni di ja bi lobi a wan u dee piizii dë. I bi o hoi di soni dë a pakisei fii ta mëni ën nöömö u? Wë a bi o bunu fii mbei möiti u na ta pakisei di soni dë möön, leti kumafa i bi o feki di möön taku footoo puu a di tëlëfön fii (Ef. 4:32). U sa feki dee pikipiki föutu u dee baaa ku dee sisa fuu u di wa ta fëëkëtë hii dee bunu soni dee u ku de bi du makandi. Dee lö soni aki u ta kë hoi a pakisei. w23.11 bld. 12 pal. 16-17

Di Giiki wöutu di de wooko ku ën aki ta lei taa wan mujëë sëmbë musu ta bisi koosu a wan fasi di fiti, söseei a wan fasi di ta lei taa a ta lesipeki wotowan. U ta wai seei ku dee sisa fuu u di de ta bisi koosu a wan fasi di fiti! Wan woto fanöudu fasi di hiniwan sisa di dë gaangaan sëmbë a di biibi musu abi, hën da a musu sa’ u wegi soni luku. Ma andi di soni aki kë taki? Di soni aki da di sabi di u ta sabi andi bunu ku andi an bunu, nöö u ta buta taa woo du di soni di bunu. Buta pakisei a di woto u Abigaëli. Hën manu bi du wan soni di bi o mbei hogi miti hën ku hii dee sëmbë fëën wosudendu. Ma Abigaëli bi hopo du soni wantewante. Di wegi di a bi sa’ u wegi soni luku bumbuu, bi mbei taa hogi an bi miti de (1 Sam. 25:14-23, 32-35). Di wegi di u ta wegi soni luku ta heepi u tu fuu sabi na un te u musu fan ku na un ten u musu dë piii. Söseei a ta heepi u fuu lei wotowan taa u ta booko u hedi ku de, söndö fuu mbei de fii wan fasi.​—1 Tes. 4:11. w23.12 bld. 20 pal. 8-9

Apösutu Paulosu bi sikifi dee soni aki da dee baaa ku dee sisa u Loomë. Dee baaa ku dee sisa aki bi lei soni u Jehovah ku Jesosi, de bi ko abi wan taanga biibi, söseei de bi ko toon Keesitu sëmbë. Di biibi u de bi mbei de ’ko dë bumbuu sëmbë a Gadu wojo’, söseei Gadu bi salufu de ku di santa jeje fëën. Awa, de bi sa dë seiki taa Gadu bi o mbei de feni wan gaan bunu a di ten di ta ko. Bakaten Paulosu bi sikifi wan biifi manda da dee salufuwan u Efeise, u taki u dee soni dee Gadu bi paamusi de. Wan u dee soni dë da di gudu di Gadu bi o da de, u di de dë sëmbë fëën hedi (Ef. 1:18). Paulosu bi piki dee sëmbë u Kolosën tu naasë de bi o feni di soni di Gadu bi paamusi de. A bi taki taa ’Gadu abi wan suti libi nëën köndë u da de’ (Kol. 1:4, 5). Gadu bi paamusi dee Keesitu sëmbë dee a bi salufu a di ten dë, taa a bi o weki de u de go libi nëën a liba ala, u de sa tii makandi ku Keesitu.​—1 Tes. 4:13-17; Ako. 20:6. w23.12 bld. 9 pal. 4-5

Di Giiki wöutu di de puu ko „tjubi”, bi dë wan wöutu di de bi ta wooko ku ën, te de bi ta taki soni u dee sodati dee bi ta hoi wakiti u tjubi wan foto. Dee sëmbë dee bi ta libi a wan foto ka sodati bi ta hoi wakiti, bi ta duumi suti, u di de bi sabi taa sodati ta tjubi de. Wë leti sö a dë ku di kötöhati u Gadu, te a ta tjubi u hati ku u fusutan, nöö u ta dë bööböö, u di u sabi taa a ta tjubi u (Ps. 4:8). Aluwasi ee di fuka fuu an seeka wantewante, tökuseei u sa ta fii taa u dë bööböö, leti kuma Hana (1 Sam. 1:16-18). Te u ta fii taa u dë bööböö, nöö an ta taanga da u sö fuu du soni ku köni, söseei fuu si soni a wan soifi fasi. Andi u musu du? Te soni ta hebi da i, nöö bai kai Jehovah faa heepi i. Hën da di Sëmbë di ta tjubi i. Unfa i sa du ën? Wë begi fu te i fii taa Gadu da i di kötöhati fëën (Luk. 11:9; 1 Tes. 5:17). Ee wan fuka ta miti i, nöö ta begi fajafaja. Te i ta du sö, nöö joo si fa di kötöhati u Jehovah o tjubi i hati ku i pakisei.​—Lom. 12:12. w24.01 bld. 21-22 pal. 5-6

U Jesosi bi sa mbei di në fëën Tata ko limbo, nöö a bi musu hoi dou di sëmbë bi ta du hogi ku ën, di de bi ta kosi ën, söseei di de bi ta mindi soni dëën. A bi sabi taa a bi piki hën Tata buka a hii soni, fëën mbei a bi ta sen (Heb. 12:2). A sabi tu taa Saatan hën bi ta du ku ën a di pisiten di soni bi ta taanga dëën (Luk. 22:2-4; 23:33, 34). Saatan bi kë u Jesosi an hoi hënseei a Jehovah möön, ma di soni dë an pasa! Jesosi bi lei taa Saatan da wan gaan mindisonima, söseei a bi lei taa Jehovah abi dinima jeti di ta hoi deseei nëën aluwasi fa soni ta taanga da de! I kë mbei di Könu fuu di ta tii wai ku i ö? Wë a bunu fii ta gafa di në u Jehovah nöömö, ta heepi woto sëmbë u de ko sabi unfa a dë tuutuu. Te i ta du dee soni dë, nöö a o dë u si taa i ta djeesi Jesosi tuutuu (1 Pet. 2:21). Nöö leti kuma Jesosi joo mbei Jehovah wai seei, söseei joo lei taa Saatan, di felantima fëën, da wan gaan mindisonima! w24.02 bld. 11 pal. 11-13

A dee feifi jaa dee pasa, möön leki wan milion sëmbë dopu ko toon Jehovah Kotoigi. Te i buta i libi a Jehovah maun, nöö i ta lei taa i kë dë wan bakama u Jesosi Keesitu, söseei taa di dini di i ta dini Jehovah da di möön fanöudu soni a di libi fii. Andi di soni aki kë taki? Jesosi bi taki taa: „Ee wan sëmbë kë waka a mi baka, a musu disa di soni di hënseei kë” (Mat. 16:24). Dee Giiki wöutu di de puu ko „a musu disa di soni di hënseei kë”, sa puu ko „an ta libi da hënseei möön”. Ja o ta du soni möön di an ta kai ku Jehovah te i buta di libi fii nëën maun (2 Kol. 5:14, 15). Di soni aki kë taki tu taa wa o ta du ’dee soni di hati fuu ta manda u fuu du dee na ta kai ku Gadu’. Soni kuma „jajo libi” sö (Gal. 5:19-21; 1 Kol. 6:18). Di libi o taanga da i ee i ta hoi dee wëti aki ö? Wë nönö, an o dë sö ee i lobi Jehovah, söseei ee i dë seiki taa dee wëti fëën o tja wini ko da i.​—Ps. 119:97; Jes. 48:17, 18. w24.03 bld. 2 pal. 1; bld. 3 pal. 4

Jehovah ta da dee sëmbë dee a ta feni u bunu di santa jeje fëën (Mat. 12:18). I sa hakisi iseei taa: ’Mi bi du soni di ta lei taa mi abi so u dee fasi di di jeje u Gadu ta mbei sëmbë ko abi ö?’ I ko si taa i ko ta möön hoi pasensi da wotowan möön di ja bi sabi soni u Jehovah u? Fuu taki ën, nöö möön joo ta mbei möiti u lei taa i abi dee fasi di di jeje u Gadu ta da sëmbë, möön joo ko dë seiki taa Jehovah ta feni i u bunu! Jehovah ta mbei dee sëmbë dee a ta feni u bunu, feni wini u di lusupaima (1 Tim. 2:5, 6). Ma nöö unfa a dë ee hati fuu ta piki u taa Jehovah an ta feni u u bunu, hii fa u dopu kaa, söseei hii fa u ta biibi taa Jesosi paka di lusupaima da u? Wë hoi a pakisei taa so juu di fasi fa u ta fii sa ganjan u, ma u sa futoou Jehovah. U di a ta si dee sëmbë dee ta biibi taa Jesosi paka di lusupaima da u, kuma sëmbë di ta libi a wan leti fasi, söseei a paamusi de taa a o mbei de feni gaan bunu.​—Ps. 5:12; Lom. 3:26. w24.03 bld. 30 pal. 15; bld. 31 pal. 17